1Ti 5 | KxfSCKXF | STEP | Tṳ̂mṳ̂̌ tǎ̤ pwa̤khû mǒ̤pwǎ̤ tǎ̤mǎ̤ nî̌꤮, bǎbǎkǎlè kwisǎyṳ hî̌bǎ bè̌dubè̌nǎ̤ a pô̤̌ na kwisǎyṳ napha nunî̌꤮. Pwa̤khû dǒ anějǎ tokhlǒnu bè̌ a pô̤̌ napṳ̌ kû̌ nanǎ̤ nunî̌꤮.

1 Timothy 5

Ta̤ma̤lò̤bǎ dǒ ta̤dòkû tokhlǒ aya

1 Tṳ̂mṳ̂̌ tǎ̤ pwa̤khû mǒ̤pwǎ̤ tǎ̤mǎ̤ nî̌꤮, bǎbǎkǎlè kwisǎyṳ hî̌bǎ bè̌dubè̌nǎ̤ a pô̤̌ na kwisǎyṳ napha nunî̌꤮. Pwa̤khû dǒ anějǎ tokhlǒnu bè̌ a pô̤̌ napṳ̌ kû̌ nanǎ̤ nunî̌꤮. 2 Bè̌dubè̌nǎ̤ lô̌khô pwa̤mǒ̤ mǒ̤pwǎ̤ tokhlǒ pô̤̌ namǒ̤ nunî̌꤮. Htodě pwa̤mǒ̤ dǒ anějǎ tokhlǒnu, bè̌dubè̌nǎ̤ asî dě gènè̤ ma̤mṳ̂̌plî asî pô̤̌ na pṳ̌pwa̤mǒ̤ nunî̌꤮.

3 Pwa̤mǒ̤khwè̌ dǒ kòyò pwa̤ma̤jè̌ lû̌ô̌tô̤̌ tokhlǒnu, bè̌dubè̌nǎ̤ asî dě kè̌ǐma̤jè̌ asî nî̌꤮. 4 Bǎbǎkǎlè pwa̤mǒ̤khwè̌ tôpwa̤nu a kè̌ phû̌ô̌, mè̤̌tô̤̌dě ali̤ tokhlǒ kè̌ô̌ hî̌nu, aphû̌ali̤ sîtokhlǒ tôbǎ kè̌khwè̌ pû apwa̤mǒ̤khwè̌, a phimǒ̤khwè̌nu pô̤̌ khrǐphû̌ lǎ̤klô ma̤nu. Pô̤̌nu akhû̌akhî, ma̤bwǐma̤sîrî sô̌ mǒ̤phaphiphu tokhlǒ kû̌ klè̌klò pô̤̌o nî̌꤮, ma̤titèhî̌dě ma̤ta̤ pô̤̌o tokhlǒ numî̌ atô Cǒmara asǎphlǒ. 5 Pwa̤mǒ̤khwè̌ tôpwa̤ dǒ a mè̤̌mî̌ca dě kòyò pwa̤kè̌ǐ lû̌û ô̌tô̤̌ tôpwa̤nu, a kè̌shuǐ a ta̤ma̤jè̌ dǒ Cǒmara a ô̌. Htodě lṳ̌mṳ̌khǐkhǐ lṳmṳ̌shasha a kwicaba sǎla̤la̤ kǎtô̤̌ a kwisǎyṳ Cǒmara kû̌ a gǔ ma̤jè̌ lû̌û. 6 Bǎbǎkǎlè pwa̤mǒ̤khwè̌ tôpwa̤ dǒ a kè̌lǎǐ a ta̤sǎyṳsǎbǎ a ta̤ma̤mô̤lò̤ ǐ anǎ̤ tôpwa̤nu, a htûpwa̤ bǎbǎkǎlè a si hǒ. 7 Pô̤̌khô kòyò gǔ bè̌ asî ta̤sǔ tô̤̌nu, sû̌ǐtòwòǐ lò̤bǎ kòyò dǒ a yṳ̌ǎ Yeshǔ tokhlǒ gǔ ma̤ lô̌khô pô̤̌nu nî̌꤮. 8 Kòyò tôpwa̤pwa̤ kè̌ a kè̌ǐma̤ǐ akhlialè tô̤̌ hî̌nu, a htè̌bǐkè khrǐphû̌ a ta̤sû̌ǐtòwòǐ hǒ. Dě a mî̌ kòyò dǒ a jî̌khlo pe kû̌ kòyò dǒ a yṳ̌ǎ gû̌ kò Khrǐ tô̤̌ tôpwa̤. A jî̌ gutṳ̌ mî̌ kòyò dǒ a kè̌ǐ a hǐphû̌phòphû̌ aphû̌ama tô̤̌ nutokhlǒ hǒ.

9 Pwa̤mǒ̤khwè̌ tôpwa̤pwa̤ dǒ aně kè̌ behtò̌ shisusô̌ tô̤̌nu, bè̌ tǎ̤ a dǒ pwa̤mǒ̤khwè̌ a lî̤wě̤mǎnǎ akû tǎ̤mǎ̤ nî̌꤮, htokhôtô̤̌ a wṳ̂ tôbǎ ô̌ pwǎ tôplǎ nô̤̌ pwǎ. 10 Htodě a bǎ mè̤̌ pwa̤mǒ̤ dǒ ami̤ lṳ̌wô̌ kû̌ a ma̤wô̌ta̤ tokhlǒ akò. A bǎ mè̤̌ pwa̤mǒ̤ tôpwa̤ dǒ a kè̌ǐ dû̌htò̌ǐ wô̌ aphû̌ali̤ tokhlǒ, a bǎ kaǎmô̤shǔ shǐpwǎ̤shǐmè̤ tokhlǒ dǒ a hǐdǒkû, a bǎ mè̤̌ pwa̤mǒ̤ tôpwa̤ dǒ a cǔbò Cǒmara a kòyò tokhlǒ akhò̌lôpô̤̌, ^{▼▼a bǎ mè̤̌ pwa̤mǒ̤ tôpwa̤ dǒ a ma̤ Cǒmara ata̤ma̤ dǒ ta̤shò̌lò̤ sǎphlǒ akû.} a bǎ ma̤jè̌ kòyò bǎpò̤̌bǎsha tokhlǒ htodě a bǎ mè̤̌ pwa̤mǒ̤ tôpwa̤ dǒ a ǐlò̤ asǎphlǒ dǒ ata̤ma̤wô̌ tokhlǒ aya.

11 Bǎbǎkǎlè, pwa̤mǒ̤khwè̌ dǒ anějǎpe tokhlǒnu, bè̌nṳ̌ tǎ̤ asî dǒ pwa̤mǒ̤khwè̌ a lî̤wě̤mǎnǎ akû tǎ̤mǎ̤. Ma̤titèhî̌dě bǎ asî sǐshiphěyî̌ a ta̤sǎyṳsǎbǎ ma̤pî̌kè ata̤mô̤ Khrǐ akhanu, asî sǎyṳ tèplè̌ sô̌ lô̌khô awṳ̂ pwǎ. 12 Dǒ asî ma̤pî̌kè a ta̤olò̤ wǐnu tômû akhû̌akhî, Cǒmara gǔ cî̌htò̌ asî pě. 13 Kǎtô̤̌ asî htûhtò̌ kòyò cè̌klè, ma̤hǎlǒ̤kè shěkhǎ, dě cû̌lè htò̌ kò hǐ tômè hto tômè. Tǒ̤ a cè̌klè pwǎ mè̤̌tô̤̌, asî ô̌kô dô̌mi̤shǐyô̤, hî̌bǎ phô̌phô̌, nṳ̌ma̤shû̌shu shû̌shǎ kòyòwe̤ kòyòkè akû dě hî̌bǎ ata̤hî̌bǎ dǒ a gwǎtô̤̌ tokhlǒ. 14 Pô̤̌nudě he sǎyṳ kû̌ pwa̤mǒ̤khwè̌ dǒ anějǎpe tokhlǒ gǔ phî̌ lô̌khô awṳ̂. Htodě phû̌ô̌li̤ô̌ lô̌khô, dě kè̌ǐ lô̌khô hǐphònu htodě kòyò dǒ a kè̌lǎ pa ta̤sǔ dǒ a gǔ hî̌phû̌mò̤̌shǐhtô pa tokhlǒnu, a kè̌shǐ nô̌ alǎ̤hî̌ pa tokhlǒ tô̤̌ hǒ. 15 Ma̤titèhî̌dě pwa̤mǒ̤khwè̌ tokhlǒkhlǒnu, a htû̌tiwǐkhô̌kè anǎ̤ kû̌ Khrǐ hǒ, dě a gû̌cû̌kû̌ lô̌khô hǎkhû̌tana akò hǒ.

16 Pwa̤mǒ̤ dǒ a htû khrǐphû̌ tokhlǒnu, dǒ a khlilè aklanu, pwa̤mǒ̤khwè̌ kè̌ ô̌ tôpwa̤pwa̤ hî̌dě asî bǎ kè̌khwè̌ǐ lû̌û. Bè̌htò̌ tǎ̤ ta̤wǐta̤ò̌nu dǒ ta̤dòkû alô̤ tǎ̤mǎ̤, ma̤titèhî̌dě pô̤̌khô ta̤dòkû gǔ kè̌ ma̤jè̌ pwǎtǒ̤ pwa̤mǒ̤khwè̌ dǒ pwa̤ma̤jè̌ lû̌û ô̌tô̤̌ tokhlǒ ayanudě, kè̌khwè̌ǐ lô̌khô asî nî̌꤮.

17 Mǒ̤phumǒ̤pwǎ̤ dǒ a htû ikǒlǒkòdû̌ dǒ a ma̤wô̌ta̤ tokhlǒnu, sî tôbǎ bè̌dubè̌nǎ̤ asî, kǎtô̤̌ asî tô nǐ̤bǎ pô̌ǎpô̌ô lakhû̌lakǎ. ^{▼▼lî̤plò̌shǐ dǒ ashǔshawa̤ tokhlǒkhlǒnu, “Sî tôbǎ bè̌dubè̌nǎ̤ asî, kǎtô̤̌ asî tô nǐ̤bǎ pô̌ǎpô̌ô lakhû̌lakǎ” a hî̌ bǎ kòyò pô̤̌nu tô̤̌, a hî̌ kû̌, “Asî tô nǐ̤bǎ khû̌kǎ ginǐ̤plǎ gûlǎ̤” pô̤̌nu} Mǒ̤khumǒ̤pwǎ̤ dǒ a htû ikǒlǒkòdû̌ dǒ a gû̌ma̤ Cǒmara ata̤ma̤ tokhlǒ, dě a shôbǐǐlṳ̌ bǎ kòyò kû̌ Cǒmara alě̤ayô̤̌ dě a sû̌ǐtòwòǐ bǎ kòyò kû̌ Cǒmara alě̤ayô̤̌ tokhlǒnu, sî tôbǎ bè̌dubè̌nǎ̤ asî, ǐ pô̌ǎpô̌ô bǎ asî lakhû̌lakǎ nî̌. 18 Ma̤titèhî̌dě lî̤plò̌shǐkû hî̌ kû̌, “Pṳ̂̌ dǒ sî noyî̤̌ lò̤te̤su a kû̌ bǔnu, sî tôbǎ cûû bǐ agô̌kû tô̤̌,” ^c htodě “Pwa̤ma̤ta̤phû̌ tôpwa̤ nî̌ a tôbǎ nǐ̤ akhû̌akǎ.” ^d 19 Kòyò tôpwa̤pwa̤ kè̌ bè̌ ta̤sǔ dǒ mǒ̤khumǒ̤pwǎ̤ dǒ a htû ikǒlǒkòdû̌ akla tôpwa̤pwa̤ kè̌hî̌dě pî̌tî̌gutṳ̌ pwa̤khòlṳ̌ kè̌ô̌ sò̌ginǐ̤ tô̤̌mî̌ sò̌su tô̤̌ numî̌ ganǎ̤de tǎ̤ lô̌khô ayô̤̌ tǎ̤mǎ̤ nî̌꤮. ^e 20 Asî kè̌ ma̤ ta̤sǔ kè̌hî̌dě, tṳ̂mṳ̂̌ asî dě sû̌ǐ wô̌ tîkhî sô̌ asî dǒ kòyò tôprṳ̂tôphǎ alô̤mô̤̌ nunî̌. Pô̤̌khô kòyò dǒ ashǔshawa̤ tokhlǒ gǔ ǐsha ayanu tûlû̌ ma̤ lô̌khô pô̤̌nu nî̌꤮.

21 Dǒ Cǒmara kû̌ Yeshǔ Khrǐ kû̌ tanaphû̌ aplò̌shǐ tokhlǒ a lô̤mô̤̌nu, he hî̌lò̤ yô̤̌sǎ dǒ a měgle tômû kû̌ na gǔ jûǎ ta̤sû̌ǐtòwòǐ dǒ akhû̌ nutokhlǒ dě na ma̤ta̤ titètè̌ bǎbǎ, kè̌bò̌khû̌ lò̤phǔ tǎ̤ kòyò tôpwǎ̤꤮ tǎ̤mǎ̤ nî̌꤮. Kǎtô̤̌ kè̌dû̌kè̌pî̌tî̌ tǎ̤ kòyò tôpwǎ̤꤮ tǎ̤mǎ̤ nî̌꤮.

22 Cû̌ bè̌htò̌phwè tǎ̤ sî cǔde dǒ kò lô̤ tôpwa̤pwa̤ dǒ a gǔ ma̤ Cǒmara a ta̤phǐta̤ma̤ ayanu tǎ̤mǎ̤ nî̌꤮. Cû̌nṳ̌ tǎ̤ dǒ kòyò ma̤ ta̤sǔta̤plě aklanu tǎ̤mǎ̤ nî̌, ô̌plò̌ô̌shǐ tûû̌ pû nata nî̌.

23 Ôpwǎ tǒ̤shi nô̤̌ tǎ̤mǎ̤, ô padô̌ kû̌ sîpî̌shisî̌yô̤̌ ^{▼▼sîpî̌shisî̌yô̤̌ mî̌ asô̌sô̌kû̌ shisî̌yô̤̌ nuhǒ.} tîkî̌ nî̌. Na sha taga akhû̌akhî, a gǔ ma̤jè̌ nahǒkû ata̤sha nupě.

24 Kòyò tokhlǒkhlǒ a ta̤sǔta̤plě nî̌ a ô̌lṳ̌ lîtîklǐ wô̌bǎ, dě kòyò pṳ̂̌꤮ tôpwa̤ kè̌shǐ sî̌ganǎ̤bò asî ta̤sǔnu kû̌ Cǒmara gǔ cî̌htò̌ asî pě bǎbǎkǎlè kòyò dǒ ashǔshawa̤ tokhlǒkhlǒ a ta̤sǔta̤plě nî̌, khònò̤̌khanu kòyò kè̌shǐjò a tô̤̌. Bǎbǎkǎlè kòyò gǔ kè̌shǐnô̌ a dǒ nô̌kò pě. 25 Pô̤̌nudě ta̤ma̤wô̌ dǒ pa kè̌shǐlṳ̌ lî anu a ô̌ tokhlǒ. Ta̤ma̤wô̌ dǒ kòyò kè̌shǐlṳ̌ lîjò a tô̤̌ tokhlǒ bǎbǎ, kòyò kè̌shǐ wô̌bǎ a dǒ nô̌kò pě.