1Ti 6 | KxfSCKXF | STEP | Pô̤̌khô Cǒmara ami̤ bǎ ta̤pîjî̌ǐsho tǎ̤mǎ̤, htodě pô̤̌khô kòyò gǔ dô̌kènè tǎ̤ pa ta̤sû̌ǐtòwòǐ nutokhlǒ ayô̤̌ tôpwǎ̤꤮ tǎ̤mǎ̤nu, lǒ̤꤮ bò kòyò htû jû̌ tokhlǒnu, a tôbǎ bè̌ lô̌khô asǎphlǒ kû̌ a gwǎ bè̌dubè̌nǎ̤ aběcǎ tokhlǒ.

1 Timothy 6

1 Pô̤̌khô Cǒmara ami̤ bǎ ta̤pîjî̌ǐsho tǎ̤mǎ̤, htodě pô̤̌khô kòyò gǔ dô̌kènè tǎ̤ pa ta̤sû̌ǐtòwòǐ nutokhlǒ ayô̤̌ tôpwǎ̤꤮ tǎ̤mǎ̤nu, lǒ̤꤮ bò kòyò htû jû̌ tokhlǒnu, a tôbǎ bè̌ lô̌khô asǎphlǒ kû̌ a gwǎ bè̌dubè̌nǎ̤ aběcǎ tokhlǒ. 2 Jû̌ dǒ a ô̌ kû̌ aběcǎ dǒ a yṳ̌nǐ̤nǎ̤nǐ̤ hto Khrǐ tokhlǒnu, he běcǎ mî̌ ta̤dòkûphû̌ pwǎ gènè̤ dě tô ma̤tukutakǎ aběcǎ tô̤̌. Mè̤mè̤̌tôkhônu, a bǎ ma̤wô̌ khlo ta̤ kû̌ anu, ma̤titèhî̌dě aběcǎ dǒ asî ma̤wô̌ khlobǎ lû̌û a ta̤phǐta̤ma̤ tôpwa̤ numî̌ kòyò dǒ a yṳ̌nǐ̤nǎ̤nǐ̤ Yeshǔ Khrǐ dě jû̌ tokhlǒ mô̤ǐ lû̌û akhû̌akhî, asî tôbǎ ma̤wô̌ khlo. Sî bǎ sû̌ǐ asî dě noshû̌ asî dǒ a gǔ ma̤ pô̤̌nu.

3 Kòyò tokhlǒkhlǒ nî̌ a sû̌ǐtòwòǐ sǔ lô̌khô kòyò. Asî ata̤sû̌ǐtòwòǐnu, atô kû̌ pa Běcǎ Yeshǔ Khrǐ a ta̤sû̌ǐtòwòǐ dǒ atě̤mè̤̌ nutô̤̌. Ta̤sû̌ǐtòwòǐ dǒ a gǔ ma̤jè̌ bǎ kòyò pô̤̌ Cǒmara sǎyṳ no ô̌htûpwa̤ kòyò tokhlǒnu asî sû̌ǐ bǎ kòyò tô̤̌tô̤̌. 4 Pô̤̌nudě kòyò nutokhlǒ nî̌, a phî̌dû̌phî̌htò̌lǒ tûlû̌shû̌lě lô̌khô asǎphlǒ dě a sî̌ganǎ̤ lô̌khô tôcǒ꤮ tô̤̌. Asî sǎphlǒshû̌ tûlû̌shû̌lě dǒ a gǔ htè̌ kòyò kû̌ lî̤phlǒ tôphlǒ kû̌ tôphlǒ yô̤̌mûyô̤̌sǎ tokhlǒ akhû̌akhî, ta̤nutokhlǒ nî̌, a no ô̌htò̌ ta̤sǎkhě lû̌û, ta̤tô̤̌klǐ, ta̤pîjî̌ǐsho, kû̌ ta̤gènè̤sǔ kè̌khî lû̌û tokhlǒ pwǎ. 5 Kǎtô̤̌ a no ô̌htò̌ ta̤htè̌ kòyò pṳ̂̌꤮ tôplǎ. Kòyò dǒ a htè̌ kòyò nutokhlǒ a ta̤gènè̤ numî̌ a phû̌mò̤̌ dě ta̤tě̤ta̤mè̤̌ ô̌pe dǒ asîkû tô̤̌. Ta̤cubucaba numî̌ klè̌ dǒ kòyò gǔ dû̌yò̤̌htò̌sa aya tôbô asî gènè̤ lô̌khô pô̤̌nu pwǎ.

6 Bǎbǎkǎlè, kòyò dǒ a kè̌ yṳ̌ǎ Cǒmara tôpwa̤pwa̤ hî̌nu a ô̌ kû̌ ta̤sǎphlǒmô̤. Htodě ta̤wô̌ dǒsû̌dǒsò̌ tokhlǒnu a ma̤lǒma̤be bǎ lû̌û ta̤ô̌htûpwa̤ tokhlǒ pě. 7 Bǎ pa hè ô̌phijǎlò̤ dǒ hǎkhû̌ akhanu, pa phî̌hèǐ ta̤ tôcǒcǒ ya? Pa phî̌hèǐ ta̤ tôcǒ꤮ tô̤̌. Pa gǔ phî̌ge jòsô̌ ta̤dǒ hǎkhû̌ numî̌ a ô̌ mî̌titè? Pa phî̌ge jòsô̌ ta̤ tôcǒ꤮ tô̤̌. 8 Bǎbǎkǎlè, pa lǎ̤ǎlǎ̤ô kû̌ pa ta̤kûta̤sô̌ tokhlǒ kè̌ ô̌hǒnu, pa sǎphlǒ mô̤hǒ. 9 Bǎbǎkǎlè kòyò dǒ a sǎyṳ dû̌yò̤̌htò̌sa tokhlǒnu, a lò̤tě̤nṳ̌ dǒ ta̤tili̤tôlô̌ akûhǒ. Kǎtô̤̌ a lò̤tě̤nṳ̌ dǒ ta̤sǎyṳsǎbǎ dǒ a nòdû̌ nutokhlǒ akû kû̌ ta̤sǎyṳsǎbǎ dǒ a ma̤sha bǎ sô̌ lû̌nu akû hǒ. A ta̤sǎyṳsǎbǎnu a comě lû̌û kû̌ sǒpli̤ hǒ. Dě ta̤sǎyṳsǎbǎnu a shò̌lò̤tě̤kè asî dǒ ta̤pî̌ta̤lṳ̂̌ kû̌ ta̤lò̤tě̤prǎlò̤tě̤pro̤ akû nuhǒ. 10 Ma̤titèhî̌dě ta̤sǎyṳsǎbǎ ru numî̌ ta̤phû̌mò̤̌shǐhtô lǒ̤bò akhò̌wǐ̤ hǒ. Kòyò tokhlǒkhlǒnu, a sǎphlǒshû̌ sǎyṳ tûlû̌shû̌lě ru akhû̌khî, asî cû̌ tephekè kû̌ ta̤yṳ̌ta̤nǎ̤ dě nǐ̤bǎ ta̤sǎplǎ̤ acǒcǒ ma̤shama̤htòbò asî sǎphlǒhǒ.

Ta̤mǎnǎyô̤̌sǎ dǒ Khûtîmôte aya

11 Bǎbǎkǎlè na dě na htû Cǒmara a kòyò hǒ akhû̌akhî, khlè̌cû̌ tephekè kû̌ lǒ̤꤮ bò ta̤nutokhlǒ nî̌꤮. Pô̤̌khô na gǔ ô̌ kû̌ ta̤tě̤ta̤mè̤̌, ta̤yṳ̌ǎ Cǒmara, ta̤yṳ̌ta̤nǎ̤, ta̤mô̤ta̤kla, ta̤khòbò̌ta̤, ta̤sǎdôhôbî̌ sî tokhlǒnu dě jî̌pwǐ̤ gû̌ma̤ pû ta̤nutokhlǒ nî̌꤮. 12 Ta̤yṳ̌ta̤nǎ̤ a ta̤shěta̤pě̤nu tûlû̌ jî̌pwǐ̤ shěpě̤ a dǒ awô̌ gutṳ̌ nî̌꤮, dě pṳ̂̌měǐ wô̌ yôla htûpwa̤ tûjû̌pwa̤ nunî̌꤮. Bǎ na olò̤ na ta̤yṳ̌ta̤nǎ̤nu dǒ kòyò saprṳ̂ a lô̤mô̤̌ akhanu, Cǒmara kaǎ na dǒ na nǐ̤bǎ Yôla htûpwa̤ tûjû̌pwa̤ nuhǒ. 13 Bǎ Cǒmara dǒ a ma̤htûpwa̤ ta̤pṳ̂̌tocǒ nutôpwa̤ alô̤mô̤̌nu kû̌ Yeshǔ Khrǐ dǒ a olò̤ ayô̤̌ bǎ Khwǐpò̌tiyapǐlǎ a lô̤mô̤̌ nutôpwa̤nu, he mǎnǎkè na hǒ. ^a 14 Dě he gǔ mǎnǎ na pô̤̌o, jûǎ cǒcǒtè̤tè̤ ta̤mǎlò̤ dǒ he ǐhto nanu tokhlǒ. Nadě nobè̌ tǎ̤ ta̤sǔ kû̌ kòyò tǎ̤mǎ̤. Tûlû̌ ma̤pô̤̌nu tǒ̤dǒ Běcǎ Yeshǔ Khrǐ hèô̌lṳ̌htò̌ sô̌ tôplǎ nupě nî̌꤮. 15 Cǒmaradû̌ dǒ kòyò htû̌sò̌htò̌ǐ lû̌û nutôpwa̤ kû̌ a tôpwa̤ nô̤̌ a pǒ ta̤ lǒ̤꤮ bònu, kû̌ khwǐ tokhlǒ akhwǐ, Běcǎ tokhlǒ a Běcǎ tôpwa̤nu, a gǔ nohè ô̌lṳ̌htò̌ Yeshǔ Khrǐ bǎ ashěkhǎ tě̤tôtě̤bǎ nupě. 16 Cǒmara dǒ a sijòtô̤̌ numî̌ a tôpwa̤ nô̤̌ pwǎ. A htûpwa̤ dǒ ta̤lîta̤kîtrî̌kû, dǒ kòyò hèphǔjò dǒ aô̌ tôpwǎ̤꤮ tô̤̌nu akû. Kòyò kè̌shǐnô̌ a tôpwǎ̤꤮ tô̤̌ htodě kòyò kè̌shǐjò a tôpwǎ̤꤮ tô̤̌. Ta̤bè̌dubè̌nǎ̤ kû̌ ta̤pô̤ta̤phǎ tûjû̌pwa̤ talakhǎ gǔ ô̌ pû nî̌꤮ Ame̤.

17 Mǎnǎ nayô̤̌ kû̌ kòyò dû̌yò̤̌htò̌sa dǒ hǎkhû̌ nutokhlǒnu, dě hî̌ asî kû̌ phǐdû̌phǐhtòlṳ̌ tǎ̤ sînǎ̤ tǎ̤mǎ̤, nǎla̤htò̌ ǐ tǎ̤ sî ta̤dû̌yò̤̌htò̌sa nutokhlǒ tǎ̤mǎ̤. Ta̤dû̌yò̤̌htò̌sa nutokhlǒ nî̌, a ô̌lṳ̌ pwǎ tarû̌tashò̌phû̌nô̤̌ pě dě a gǔ hǎmǎkè pě hî̌ asî pô̤̌nu nî̌꤮. Bǎbǎkǎlè asî tôbǎ kè̌shuhtò̌ dǒ Cǒmara a ô̌. Pô̤̌khô pa gǔ sǎlě̤sǎlò̤ ayanu, Cǒmara ǐ betǐpǐ bǎ pa pṳ̂̌꤮ tôplǎ. 18 Mǎnǎ nayô̤̌ kû̌ kòyò dû̌yò̤̌ nutokhlǒ, dě hî̌ asî kû̌ nodû̌yò̤̌ lô̌khô asî dǒ ta̤ma̤wô̌nu tôkhô nî̌꤮. Dě no sǎlě̤sǎlò̤ yṳ̂̌lò̤ padô̌ kòyò, hî̌ asî kû̌ noma̤jè̌ dû̌wî̤ padô̌ kû̌ kòyò ashǔshawa̤ tokhlǒ nî̌꤮. 19 Kè̌ asî ma̤pô̤̌nu hî̌dě, a sô̌sô̌ kû̌ asî bè̌plǒǐ a ta̤dû̌yò̤̌htò̌sa dǒ a bô̌pwǐ̤bô̌wô̌ akòshî̌ htû̌꤮ nô̌kòpě tôhtu ayanu hǒ. Htodě asî gǔ pṳ̂̌mě ta̤htûpwa̤ dǒ a mè̤̌mî̌ca nupě hǒ.

20 Khûtîmôte꤮ pṳ̂̌mě dě takabǐ wô̌ ta̤ dǒ Cǒmara yṳ̌ǎnṳ̌ na dǒ na kè̌ǐ wô̌ ta̤nutokhlǒ nî̌꤮. Cû̌bò̌ khatephe kòyò dǒ a bè̌dubè̌nǎ̤ gû̌ kòyò Cǒmara tô̤̌ nutokhlǒ a ta̤shôbǐǐ kû̌ a ta̤gègo nòdû̌ dǒ kòyò tokhlǒkhlǒ gènè̤sǔ jò kû̌ “Ta̤sî̌ya” nutokhlǒ nî̌꤮. 21 Kòyò tokhlǒkhlǒ yṳ̌ǎ ǐ a ta̤sî̌ta̤jò̌ nutokhlǒ akhû̌akhî, a cû̌tephekè kû̌ ta̤yṳ̌ta̤nǎ̤ mè̤̌mî̌canu hǒ. Cǒmara abwǐsîrî ô̌cu pû kû̌ sî lǒ̤꤮ bò nî̌꤮.