2 Corinthians 1

Khûpò̌lǔ a ta̤hî̌mô̤hî̌wô̌

1He mî̌ Khûpò̌lǔ. Cǒmara sǎphlǒ tô tûû̌ dǒ a gǔ rû̌htò̌ he kû̌ Běcǎ Yeshǔ Khrǐ a pwa̤nophû̌ tôpwa̤ hǒ. He kû̌ pa pṳ̌wè̤̌ Khûtîmôte wě̤cû̌bǎ lî̤nu dǒ sî Wî̤̌kôrituphû̌ dǒ a yṳ̌ǎ Cǒmara tokhlǒ a ô̌. Htokhôtô̤̌ pa wě̤cû̌ padô̌ kòyò dǒ a yṳ̌ǎ Cǒmara dǒ a ô̌ dǒ Akheya gǎkû nutokhlǒ a ô̌. ^a

2Papha Cǒmara kû̌ Běcǎ Yeshǔ Khrǐ gǔ ǐlò̤ sî ta̤bwǐta̤sîrî kû̌ ta̤gûjû̌kabǎ nî̌.

Khûpò̌lǔ hî̌bwǐhî̌sîrî htû̌sò̌htò̌ Cǒmara

3Pa gǔ hî̌bwǐhî̌sîrî htû̌sò̌htò̌ wô̤̌wô̤̌ lû̌û pa Běcǎ Yeshǔ Khrǐ apha Cǒmaranu tǎ. A mî̌ pha dǒ a sǎyṳgwèbǎǐ kòyò tôpwa̤, dě lǒ̤bò ta̤ma̤mô̤ ta̤ma̤jè̌ tokhlǒ numî̌ a ô̌ dǒ lû̌ô̌ ahè pwǎ. 4Bǎ pa kè̌shǐ tôbǎ kû̌ ta̤pò̤̌ta̤sha lǒ̤꤮ bò tokhlǒ akhanu, a ma̤mô̤ ma̤jè̌ pa. Dǒ a ma̤mô̤ ma̤jè̌ pa pô̤̌o akhû̌akhî, pa ma̤mô̤ ma̤jè̌bò̌ bǎ kòyò dǒ a kè̌shǐ tôbǎ kû̌ ta̤pò̤̌ta̤sha pṳ̂̌mi̤shicǒ tokhlǒ. Ta̤ma̤mô̤ ma̤jè̌ dǒ pa ma̤mô̤ ma̤jè̌ kòyò tokhlǒ numî̌, a sô̌sô̌pwǎ kû̌ Cǒmara ma̤mô̤ ma̤jè̌ pa nutokhlǒ pwǎ. 5Dǒ Khrǐ akhû̌akhîdě pa khòbǎ dû̌wî̤ ta̤jî̌ta̤jû̌, bǎbǎkǎlè dǒ Yeshǔ Khrǐ akhû̌akhîdě Cǒmara ma̤mô̤ ma̤jè̌ dû̌wî̤ pa. 6Pô̤̌khô sî gǔ nǐ̤bǎ ta̤ma̤mô̤ ma̤jè̌ kû̌ sǎphlǒhtûpwa̤ tûjû̌pwa̤ ayanu, Cǒmara nokhòbǎ pa ta̤pò̤̌ta̤sha pô̤̌onu pwǎ. Dě pô̤̌khô sî gǔ nǐ̤bǎ ta̤ma̤mô̤ ma̤jè̌ ayanu, Cǒmara ma̤mô̤ ma̤jè̌ pa hǒ. Pa ta̤ma̤mô̤ ma̤jè̌ sînu, a dǐhtûhtò̌ sî ta̤khòsǎdô sô̌sô̌kû̌ pa khòbǎ hto nutokhlǒ hǒ. 7Pô̤̌nu akhû̌akhî, pa yṳ̌ǎ sî, ma̤titèhî̌dě bǎ sî khòbǎ sô̌sô̌kû̌ ta̤jî̌ta̤jû̌ pô̤̌ pa khòbǎ tokhlǒ akhanu, Cǒmara gǔ ma̤mô̤ ma̤jè̌ sî pô̤̌ a ma̤mô̤ ma̤jè̌ panu pě.

8Pṳ̌wè̤̌ sî, pa sǎyṳ ǐ sî̌yakhlo padô̌ sî kû̌ bǎ pa ô̌ dǒ Ashǎgǎ dû̌kû akhanu, pa khòbǎ ta̤jî̌ta̤jû̌ tokhlǒ awe̤akè. Ta̤jî̌ta̤jû̌ dǒ pa khòbǎnu, ajî̌ajû̌ tûlû̌shû̌lě akhû̌akhî pa si tònò̤̌hǒ pa gènè̤ pô̤̌nu. ^b 9Dě pa bè̌ kû̌ pa si hǒ ma̤titèdě pa bǎcû̌ khòjî̌khòjû̌ tǒ̤ pô̤̌o ma̤titèhî̌dě, pô̤̌khô pa gǔ yṳ̌ǎlò̤ ǐtûû̌ panǎ̤ tô̤̌nu, dě pa gǔ yṳ̌ǎ pwǎtǒ̤ Cǒmara dǒ a ma̤ htûpwa̤ge kòyò dǒ ta̤sinu tôpwa̤ ayanu, pa bǎ khòbǎ ta̤ pô̤̌o pwǎ. 10Dě Cǒmara ma̤hǎplǎge pa dǒ ta̤si a ta̤tirǐsò̌ ǐsha dǒ adû̌ayô̤̌ akûnu hǒ. Pa yṳ̌ǎ kû̌ Cǒmara ma̤hǎplǎge sělěnò tûû̌ pa pwǎ. 11Pô̤̌khô Cǒmara gǔ ma̤hǎplǎge pa kû̌ ta̤pô̤̌o tokhlǒ ayanu, pa lǎ̤lṳ̂ dǒ sî gǔ ma̤jè̌ pa kû̌ sî ta̤kwicaba. Pô̤̌khô kòyò gǔ htû̌sò̌ hî̌bwǐhî̌sîrîhtò̌ dû̌wî̤ Cǒmara ayanu, Cǒmara gǔ ganǎ̤de sî ta̤kwicaba tokhlǒ pě dě a gǔ ma̤hǎplǎge pa dǒ ta̤si kû̌ abwǐdû̌ asîrîhtû pě.

Khûpò̌lǔ htû̌lè̌ khô̌kè ata̤ tîwî̌tòwònǎ

12Ma̤titèdě pa hî̌bǎhtò̌yô̤̌ bǔ payô̤̌ hî̌dě, dǒ pa sǎphlǒkûnu pa sî̌ganǎ̤ tě̤tě̤mè̤̌mè̤̌ kû̌ pa ma̤sǔma̤plě, pa hî̌sǔhî̌plě bǎnô̌ kòyò tôpwǎ̤꤮ tô̤̌, htokhôtô̤̌ pa bè̌ cǒtè̤pwǎ pa sǎphlǒ dǒ sîkhû̌ pwǎ. Pa ma̤pô̤̌ numî̌ mî̌ dǒ Cǒmara abwǐsîrî a ta̤pô̤ta̤phǎ akhû̌akhî pwǎ, mè̤̌kû̌ kòyò hǎkhû̌phû̌ a ta̤sî̌ta̤jò̌ akhû̌akhî nu mè̤̌tô̤̌. 13Pa wě̤cû̌ bǎ sî lî̤ tokhlǒnumî̌, pa hî̌ cǒrònè̌ sî pa bè̌sûû̌ yô̤̌mûyô̤̌sǎ tôcǒ꤮ tô̤̌. 14Khònò̤̌dě sî sî̌yaphlô pô̤̌ bò pawe̤pakè khôtô̤̌, bǎbǎkǎlè dǒnô̌kòpěnu pa kè̌shuǐ kû̌ sî gǔ sî̌yaphlô bòmǔtegle bò pawe̤pakè pě. Pô̤̌nudě, bǎ Běcǎ Yeshǔ hèsô̌ pě tôni̤nu, dǒ pakhû̌pakhî dě sî gǔ sǎlě̤sǎlò̤ pô̤̌ pa sǎlě̤sǎlò̤ dǒ sîkhû̌sîkhî nupě.

15He sî̌ganǎ̤ mè̤̌mî̌ca kû̌ pa bǎ sǎlě̤sǎlò̤ lô̌khô pô̤̌nu pě pwǎ. Pô̤̌nudě pô̤̌khô sî gǔ nǐ̤bǎ ta̤ǐshowî̤ ginǐ̤plǎ ayanu, he bè̌lò̤ hto he sǎphlǒ kû̌ he sǎyṳ hè ô̌lè kû̌ sî ginǐ̤plǎ pě. 16Pô̤̌nudě he bè̌lò̤ hto he sǎphlǒ kû̌ dǒ he cû̌ dǒ Mèsidûnǐ̤yagǎ akhapěnu he gǔ cû̌nṳ̌ô̌lè kû̌ sî pě. Htodě dǒ he ô̌ dǒ Mèsidûnǐ̤yagǎ ge akhapěnu, pô̤̌khô sî gǔ ma̤jè̌ he dǒ he glè̌ cû̌pô̤̌ dǒ Yǔdagǎ ayanudě, he gǔ genṳ̌ ô̌lè gûmṳ̂̌ pô̤̌ sî pěpě, he gènè̤ pô̤̌nu. ^c 17He tîwî̌tòwò htohǒ pô̤̌nu bǎbǎkǎlè a htotô̤̌. Bǎbǎ sî gènè̤bò lô̌khô he kû̌ a hî̌tě̤mè̤̌ ayô̤̌ tô̤̌, a hî̌htôhî̌lò̤ akhû̌akhî ya, pô̤̌nu kǎlè. Kòyò hǎkhû̌phû̌ tokhlǒ a Ta̤tîwî̌tòwò tokhlǒnumî̌, dě a hî̌ kû̌, “O” dě a hî̌ kû̌, “Tô̤̌,” a ma̤ lô̌khô pô̤̌nu. He ta̤tîwî̌tòwò numî̌ a sô̌sô̌ pô̤̌nu mè̤̌tô̤̌.

18Pô̤̌ Cǒmara hî̌bǎcǒ ta̤nu, he hî̌bǎcǒ sô̌sô̌ pô̤̌ a nupwǎ. Hî̌pědě “O” dě “Tô̤̌,” he hî̌ kòyò pô̤̌nu tôkhò̌꤮ tô̤̌. 19Ma̤titèhî̌dě he kû̌ Khûshǐla ▼

▼tilǔbǎnû

kû̌ Khûtîmôte shôbǐǐlṳ̌ hto sî kû̌ Yeshǔ Khrǐ awe̤akè hǒ. A mî̌ Cǒmara aphû̌khû tôpwa̤, a hî̌bǎcǒhî̌bǎtè̤ pṳ̂̌꤮ taplǎ a hî̌htôhî̌lò̤ gû̌ kòyò tôkhò̌꤮ tô̤̌. ^e 20Běcǎ Yeshǔ ma̤lǒma̤be bǎbò Cǒmara a ta̤olò̤ nutokhlǒ hǒ. A ma̤lǒma̤be bǎ Cǒmara a ta̤olò̤ numî̌, pa sǎphlǒtô gû̌ pwǎ dě pa gǔ hî̌ kû̌, “Ame̤” yô̤̌mûyô̤̌sǎ mî̌ “A mè̤̌mî̌ca” dě pa gǔ htû̌sò̌htò̌ Cǒmara pô̤̌nu. 21Pwa̤ dǒ a ma̤měma̤gle tònò bǎ wô̌ pa ta̤yṳ̌ǎ Khrǐ numî̌ amè̤̌hǒ Cǒmara anǎ̤běcǎ tûû̌ nuhǒ. Pô̤̌khô pa gǔ htûhtò̌ a kòyò ayanu, a rû̌htò̌ pa hǒ. 22Htokhôtô̤̌, Cǒmara ma̤mǎnǎ panu, a dǔlṳ̌ kû̌ pa htû a kòyò hǒ. A ǐlò̤ pa Yôla Plò̌shǐ Běcǎ numî̌ a ma̤mǎma̤dònǎ pa hǒ. Htodě Yôla Plò̌shǐ Běcǎ nî̌, a hènṳ̌ ô̌htûpwa̤ dǒ pa sǎphlǒkû dě a hî̌jè̌ padô̌ pa kû̌ Cǒmara gǔ ma̤lǒhtò̌behtò̌ bǎbò pa a ta̤olò̤ nutokhlǒ pě.

23He cè̌klè hè sǎhtǎdû̌da sî dě he hèhtûhtò̌ bǎpe dǒ Wî̤̌kôritu tô̤̌. He hî̌ pô̤̌o dě he lòhô sî tô̤̌ numî̌ Cǒmara sî̌ganǎ̤ bò pwǎ. 24Pa sǎyṳ ma̤tě̤tṳ kû̌ sî ta̤yṳ̌ tô̤̌. Sî ta̤yṳ̌ta̤nǎ̤ shû̌sho numî̌ pa sî̌ganǎ̤ hǒ. Pô̤̌khô sî gǔ sǎlě̤sǎlò̤ dû̌wî̤pô̤̌ ayanu, pa sǎyṳ hè ma̤jè̌ sî pô̤̌nu pwǎ.