2Cor 10 | KxfSCKXF | STEP | Tokhlǒkhlǒ nî̌ a hî̌ lô̌khô he kû̌ bǎ he hî̌bǎshěshu kû̌ sî akha, he ǐsha pwǎ bǎbǎkǎlè bǎ he wě̤ kû̌ lî̤ akhanu, he hî̌bǎsho hî̌bǎshû̌ mî̌ca, a hî̌ lô̌khô he pô̤̌nu. Bǎbǎkǎlè he kwisǎyṳ kudǔdǔ sî pô̤̌ khrǐ ô̌ kû̌ ta̤sǎdôhôbî̌, ta̤khòsǎdô nu.

2 Corinthians 10

Khûpò̌lǔ hî̌bǎ taka tě̤tubǐ a ta̤phǐta̤ma̤

1 Tokhlǒkhlǒ nî̌ a hî̌ lô̌khô he kû̌ bǎ he hî̌bǎshěshu kû̌ sî akha, he ǐsha pwǎ bǎbǎkǎlè bǎ he wě̤ kû̌ lî̤ akhanu, he hî̌bǎsho hî̌bǎshû̌ mî̌ca, a hî̌ lô̌khô he pô̤̌nu. Bǎbǎkǎlè he kwisǎyṳ kudǔdǔ sî pô̤̌ khrǐ ô̌ kû̌ ta̤sǎdôhôbî̌, ta̤khòsǎdô nu. 2 Htû̌꤮ he hè tǒ̤sô̌ sî ô̌ akhanu, pô̤̌khô he gǔ hî̌bǎsho hî̌bǎshû̌ sî tô̤̌ nudě, he kwisǎyṳ gutṳ̌ sî kû̌ htû̌lè̌ tèplè̌kè bò sî sǎphlǒ ta̤bè̌ sî sǎphlǒsǔshi nutokhlǒ nî̌꤮. Dǒ sîkla tokhlǒkhlǒnu a hî̌ lô̌khô pa kû̌mî̌ pa gû̌ pwǎ kòyò hǎkhû̌phû̌ alǎ̤klô sǎyṳ nutokhlǒ pwǎ. Kòyò dǒ a hî̌ pa pô̤̌nu tokhlǒnu, he gǔ hî̌bǎsho tuklǔ asî pě. 3 Pa mî̌ kòyò hǎkhû̌phû̌ tokhlǒ pwǎ numî̌ amè̤̌kǎ, bǎbǎkǎlè pa shěpě̤shěshu ta̤nu, pa shěpě̤ pô̤̌ kòyò hǎkhû̌phû̌ tokhlǒ shěpě̤nu mè̤̌tô̤̌. 4 Ta̤shěpě̤ a ta̤wè̤̌ta̤htò dǒ pa noǎ tokhlǒ numî̌ kòyò hǎkhû̌phû̌ a ta̤wè̤̌ta̤htò mè̤̌tô̤̌. Pa noǎ Cǒmara a ta̤wè̤̌ta̤htò dǒ apô̤aphǎ dě a ma̤lò̤tě̤pro̤ pî̌kèbò bò wî̤̌we̤dû̌ tokhlǒ kû̌ ta̤gè̌go lû̌û dǒ asǔ nutokhlǒ. 5 Pa ma̤lò̤tě̤pro̤kè lǒ̤꤮ bò ta̤phî̌dû̌ phî̌htò̌yô̤̌ nǎ̤ dǒ a ma̤dǐdò tě̤tṳ ta̤sî̌ya Cǒmara nutokhlǒ. Lǒ̤꤮ bò kòyò a ta̤gènè̤ tokhlǒnu pa pṳ̂̌ dǒô̌ bò a dě pa no jûlě̤phî̌yô̤̌ ganǎ̤de a kû̌ Khrǐ ayô̤̌.

6 Bǎ sî dǔlè̌lṳ̌ kû̌ sî ganǎ̤de gû̌ma̤ bò hto ta̤ akhanu, pa ô̌ tîwî̌tòwò nǎ dǒ pa gǔ cî̌htò̌ kòyò dǒ a ganǎ̤de gû̌ ma̤ kû̌ kòyò tô̤̌ nutokhlǒ hǒ.

7 Sî kè̌ lô̌khô pwǎ ta̤ô̌lṳ̌ dǒ akhlo tokhlǒ pwǎ. Dǒ sîkla tokhlǒkhlǒnu a hî̌sǔ lô̌khô kû̌ kòyò dǒ a htû Khrǐ apwa̤ma̤ta̤phû̌ mî̌ tǒ̤ pa pwǎ. No sî̌ganǎ̤ padô̌ asî kû̌ pa mî̌ mî̌ pa htû Khrǐ apwa̤ma̤ta̤phû̌ tokhlǒ. 8 Ta̤siwi̤sòwò̤ dǒ Běcǎ ǐ henu, a sô̌sô̌ kû̌ he hî̌bǎ htû̌sò̌ shû̌lě henǎ̤ tîkî̌ ya? Bǎbǎkǎlè he sòwò̤̌ bǎtô̤̌. Ta̤shû̌ta̤shonu, a gǔ ma̤ dû̌htò̌htûhtò̌ sîya pwǎ, a ma̤pî̌ma̤kè sîyanu mè̤̌tô̤̌. 9 He wě̤ ǐsha cû̌ bǎ sî kû̌ lî̤ tokhlǒ pô̤̌nu mè̤̌bǎtô̤̌. 10 Ma̤titèhî̌dě tokhlǒkhlǒnu, a hî̌ lô̌khô kû̌, “Khûpò̌lǔ wě̤ lî̤ tûkû̌ ashû̌asho tûlû̌shû̌lě. Bǎ a ô̌cu kû̌ pa akhanu, a ǐsha pwǎ, a shôbǐǐ ta̤ mî̌ anǐ̤ ganǎ̤de kòyò tô̤̌tô̤̌,” A hî̌ lô̌khô he pô̤̌nu. 11 Kòyò dǒ a hî̌ pô̤̌nu tokhlǒnu, a tôbǎ sî̌ganǎ̤ kû̌ pa ô̌yî̤ kû̌ sî bǎbǎ, pa ô̌plǒ kû̌ sî bǎbǎ, pa gǔ ma̤ tě̤tě̤mè̤̌mè̤̌ mè̤̌mî̌ca pô̤̌ pa hî̌ dǒ lî̤kûnu pě.

12 Pa ǐsha mè̤̌mî̌ca pwǎ sînî. Kòyò dǒ a gènè̤ htò̌yô̤̌ tûû̌ lô̌khô anǎ̤ kû̌ asî mî̌ asî̌ajò̌ lǒkhlo kòyò tokhlǒnu pa tèbǎ gònò̤ bǔ nô̌ panǎ̤ kû̌ asî tô̤̌. Asî tôpwa̤ kû̌ tôpwa̤ tèbǎ gònò̤ tûû̌ lô̌khô anǎ̤ akhû̌akhî, asî mî̌ kòyò ô̌lǒô̌khlo mè̤̌mî̌ca tokhlǒ.

13 Bǎbǎkǎlè, pa dě, pa hî̌bǎhtò̌yô̤̌ tûlû̌ kû̌ pa tô bǎ hî̌bǎ htò̌yô̤̌ nutô̤̌. Pa hî̌bǎ htò̌yô̤̌ pwǎtǒ̤ ta̤ma̤ dǒ Cǒmara ǐlò̤ pa tokhlǒ nupwǎ. Hǒo numî̌ a ô̌bò kû̌ pa ma̤ta̤ dǒ sîkla tokhlǒnu hǒ. 14 Pa cû̌ ma̤ tûlû̌ kû̌ gûlǎ̤ dǒ Cǒmara noma̤ panu tô̤̌. Cǒmara ǐ pa ta̤ma̤ dǒ pa bǎ hè dǒ sî ô̌ dě pa mî̌ pwa̤ dǒ a hè shôbǐǐlṳ̌ wǐlǒ bǎ sî ta̤sǎlě̤we̤kè tokhlǒ hǒ. 15 Pô̤̌nudě pa hî̌bǎhtû̌sò̌ bǎ tûû̌ nô̌ panǎ̤ kû̌ ta̤ma̤ dǒ kòyò ma̤htûhtò̌ wǐhto nutokhlǒ awe̤akè tô̤̌. Mè̤mè̤̌tôkhônu pa kè̌shu khô̌tû̌ kû̌ sî ta̤yṳ̌ gǔ shû̌htò̌ htokhôtô̤̌ pa hèma̤ ta̤ma̤ dǒ sîklanu sǔ sǔ a gǔ dû̌htò̌htûhtò̌ pô̤̌ dǒ alô̤mô̤̌ tôkhô aya nupwǎ. 16 Htopědě pa gǔ cû̌ sělě tûlû̌ pô̤̌ dǒ do ô̌yî̤ bǎ kòyò cû̌ shôbǐǐlṳ̌ bǎ asî kû̌ ta̤sǎlě̤we̤kè tôkhò̌ khôtô̤̌ nutokhlǒ a ô̌ pě. Dě pa gǔ cû̌ shôbǐǐlṳ̌ bǎ asî kû̌ Yeshǔ a ta̤sǎlě̤we̤kè pě. Ma̤titèhî̌dě gûlǎ̤ dǒ kò ma̤hto tokhlǒnu, pa sǎyṳ hî̌bǎhtò̌yô̤̌ panǎ̤ kû̌ ta̤ma̤ ma̤hî̌nu tokhlǒ tô̤̌. 17 Ma̤titèhî̌dě, lî̤plò̌shǐkû hî̌ kû̌, “Kòyò tôpwa̤pwa̤ dǒ a sǎyṳ hî̌bǎhtò̌yô̤̌ anǎ̤nu, a tô hî̌bǎhtò̌yô̤̌ pwǎtǒ̤ ta̤ dǒ Běcǎ ma̤ htobǎ ta̤ nutokhlǒ awe̤akè pwǎ.” ^a 18 Ma̤titèhî̌dě, kòyò dǒ a htû̌sò̌ tûû̌ anǎ̤ tokhlǒnu, Běcǎ sǎphlǒô̌ lû̌û tô̤̌, Běcǎ sǎphlǒô̌ pwǎtǒ̤ kòyò dǒ Běcǎ htû̌sò̌tû̌ sanǎ̤ nutokhlǒ pwǎ.