2 Corinthians 11

Khûpò̌lǔ kû̌ pwa̤nophû̌ dǒ a lòhô tokhlǒ

1He wě̤cû̌ bǎ sî lî̤ khònò̤̌ tokhlǒnu, he wě̤cû̌ sô̌sô̌kû̌ kòyò kimwi tôpwa̤ akhû̌akhî, khòsǎdô khòsǎphlǒhtû pû he nî̌. 2Ma̤titèhî̌dě he sǎphlǒshû̌ jî̌jî̌ dǒ sî gǔ sǎphlǒcǒ kû̌ Khrǐ. Sî nî̌ asô̌sô̌kû̌ pwa̤mǒ̤phû̌sǎ dǒ asǎphlǒ mṳ̂̌plî tôpwa̤ dǒ he olò̤ hto heyô̤̌ kû̌ he gǔ ǐ kû̌ pwa̤khû pě tôpwa̤ dǒ amè̤̌kû̌ Khrǐ pěnu tôpwa̤ hǒ. 3Pô̤̌ hǎkhû̌tana tûlû anǎ̤ sô̌sô̌kû̌ wṳ̂̌ dě a hè lô̌ǐplò̤ǐ Mǒ̤ěwǎ nu, he bǎyô̤ nǎ kû̌ hî̌pě kòyò hè lô̌ǐplò̤ǐ sî pô̤̌nu pě hǒ, htokhôtô̤̌ hî̌pě kòyò hè ma̤pî̌kè bò sî sǎphlǒ a ta̤gènè̤ tokhlǒ dě sî wîkè sî ta̤sǎyṳ mô̤ lǒ̤sû̌lǒ̤sǎphlǒ Khrǐ kû̌ sî ta̤sǎyṳmô̤ mî̌ca Khrǐ nu pě he bǎyṳ̂ jî̌jî̌ dǒ sîya pô̤̌nu. ^a 4Ma̤titèhî̌dě mò̌pè tôpwa̤ bǎbǎ, a kè̌ hènṳ̌ shôbǐǐlṳ̌ bǎ sî kû̌ Yeshǔ awe̤akè dǒ a khô̌ kû̌ pa shôbǐǐ bǎ sî nu hî̌dě sî sǎlě̤sǎlò̤ kaǎshǔ yǎ. Dě sî phî̌shǐshu yokǎkwe Yôla Plò̌shǐ Běcǎ dǒ a khô̌ kû̌ sî phî̌shǐshu hto nu tôpwa̤, htokhôtô̤̌ sî yṳ̌ǎyṳ̌ô pwǎ ta̤sǎlě̤we̤kè dǒ a khô̌ kû̌ pa shôbǐǐlṳ̌ bǎ hto sî nutokhlǒ hǒ. 5Sî kè̌ kaǎǐ asî kû̌, “Pwa̤nophû̌ saradû̌” nutokhlǒ nî̌ atô̤̌ htò̌lǒ khlo nô̌ he tô̤̌. 6He hî̌bǎjò hî̌bǎnǐ̤ gû̌ kòyò tô̤̌ bǎbǎkǎlè he sî̌ganǎ̤ tě̤tě̤mè̤̌mè̤̌ lǒ̤bò Cǒmara a ta̤tě̤ta̤mè̤̌ tokhlǒ. Pa ô̌ kû̌ ta̤sî̌ya Cǒmara a ta̤tě̤ta̤mè̤̌ numî̌ pa dǔlè̌lṳ̌ tě̤tě̤mè̤̌mè̤̌ bǎ sî pṳ̂̌꤮ taplǎ hǒ.

7Bǎ he shôbǐǐlṳ̌ bǎ sî kû̌ ta̤sǎlě̤we̤kè akhanu, he kwi nô̌ sî akhû̌akǎ tômǎ꤮ tô̤̌. Pô̤̌khô sî gǔ nǐ̤bǎ yôla htûpwa̤ tûjû̌pwa̤ ayanu, he shò̌lò̤ henǎ̤ pô̤̌nu pwǎ. He ma̤pô̤nudě mî̌ asǔ ya? 8Bǎ he ma̤ta̤ dǒ sîkla akhanu, ta̤hǎbòkè tokhlǒ numî̌ ta̤dòkû dǒ ashǔshawa̤ tokhlǒ ǐ he ru pwǎ mè̤̌yahî̌. Pô̤̌khô he gǔ ma̤bò̌ta̤ dǒ sîyanu, asô̌sô̌ kû̌ he cû̌ phǐsigwǐyǒsaphǎ ta̤dòkû dǒ ashǔshawa̤ tokhlǒ pô̤̌nu mè̤̌yahî̌. 9Bǎ he ô̌cu kû̌ sî akha, he kè̌ lûbǎru hî̌dě, he kwibǎ sî tôpwǎ̤꤮ tô̤̌, ma̤titèhî̌dě lǒ̤bò ta̤ dǒ he lǎ̤lṳ̂ tokhlǒnu, pa pṳ̌wè̤̌ dǒ Mèsidûnǐ̤yagǎ tokhlǒ hè ma̤jè̌ bò he pwǎ. Dǒ awǐanô̌ numî̌ he kwi nô̌ bǎ sî ta̤ma̤jè̌ tôkhò̌꤮ tô̤̌, khònò̤̌ hènè numî̌ he ma̤gû̌ma̤gè̌, ma̤htǒma̤yò pe nô̌ sî tô̤̌tô̤̌. ^b 10He hî̌bǎhtû̌sò̌ tûû̌ ta̤dòkû dǒ ashǔshawa̤ dǒ a ô̌ bǎ Akheya gǎkû tokhlǒ awe̤akènu, he ta̤htû̌sò̌ nî̌ ô̌kǔ nô̌ tô̤̌. Ma̤titèhî̌dě Khrǐ a ta̤tě̤ta̤mè̤̌ ô̌ dǒ hekû akhû̌akhî, he hî̌ bǎ sî khònò̤̌ tokhlǒnu, sî bǎ sî̌ganǎ̤tě̤tě̤ bò̌nô pwǎ. 11He hî̌ pô̤̌odě he mô̤ǐ sî tô̤̌ pô̤̌nu ya? He mô̤nṳ̌ sî numî̌ Cǒmara sî̌ganǎ̤. 12Pô̤̌khô kòyò dǒ a hî̌ kû̌ asî ta̤ma̤ tokhlǒ numî̌ asô̌sô̌ kû̌ pa ta̤ma̤ pwǎ nutokhlǒ, a gǔ hî̌bǎ htû̌sò̌ jò anǎ̤ pô̤̌nu tô̤̌nu, he gǔ ma̤ sělě pô̤̌ he ma̤ khònò̤̌ nu. 13Asî nutokhlǒ mî̌ pwa̤nophû̌ a mè̤̌mî̌ca mè̤̌tô̤̌. Asî mî̌ pwa̤nophû̌ dǒ a lòhô tokhlǒ pwǎ. Asî cû̌ shôbǐ lòhô bǎ kòyò kû̌ ata̤ma̤ tokhlǒ dě a jî̌ma̤ lô̌khô anǎ̤ pô̤̌ Khrǐ a pwa̤nophû̌ mè̤̌mî̌ca tokhlǒnu pwǎ. 14Asî ma̤pô̤̌nu dě he ǒò̌ nô̌ tocǒ tô̤̌. Hǎkhû̌tana jî̌ lòhô anǎ̤ pô̤̌ mǒkhû̌ tanaphû̌ dǒ a kaha tokhlǒnu mî̌ a ma̤jò pwǎ. 15Pô̤̌nudě, hǎkhû̌tana a pwa̤ma̤ta̤phû̌ tokhlǒ tûlû lòhôjò anǎ̤ sô̌sô̌ kû̌ Cǒmara a pwa̤ma̤ta̤phû̌ dǒ acǒatè̤ tokhlǒ numî̌ lǎ̤ǒò̌ nô̌ tôcǒ tô̤̌. Dǒ nô̌kòtû̌ pě, pô̤̌ asî ma̤sǔ htohǒnu, asî gǔ khòbǎ ta̤cî̌htò̌ pô̤̌ a gwǎ kû̌ asî nu pe.

Khûpò̌lǔ shôbǐǐ htû̌sò̌ǐ a khòbǎ ta̤jî̌ta̤jû̌ tokhlǒ

16He gǔ hî̌ sô̌ kû̌, sî tô gènè̤ǐ lô̌khô he kû̌ kòyò kimwi tôpwǎ̤꤮ tô̤̌. Bǎbǎkǎlè sî kè̌ gènè̤ lô̌khô he hî̌dě he htû kû̌lǎ kòyò kimwi dě he shôbǐ htû̌sò̌ǐ kû̌lǎ tîkî̌phû̌. 17He shôbǐ htû̌sò̌ǐ khònò̤̌ numî̌ he hî̌bǎ pô̤̌ Běcǎ sǎyṳ no hî̌bǎ henu mè̤̌tô̤̌. He hî̌bǎ pô̤̌ kòyò kimwi tôpwa̤ nupwǎ. 18Kòyò shôbǐ htû̌sò̌ǐ dû̌ lô̌khô kòyònǎ̤ pô̤̌ kòyò hǎkhû̌phû̌ lǎ̤klô shôbǐ htû̌sò̌ǐ nutokhlǒ akhû̌akhî, he gǔ shôbǐ htû̌sò̌ǐ henǎ̤ pwǎ. 19Dòdû̌ kǎ nǒ̤꤮ lè, sî ô̌ lô̌khô kû̌ ta̤sî̌ta̤jò̌ dě sî khòsǎphlǒhtûbò̌ dě sî sǎlě̤sǎlò̤ ganǎ̤de bǎ lô̌khô kòyò kimwi nutokhlǒ a ta̤hî̌bǎ. 20Kòyò dǒ a nohtû sî jû̌ nutokhlǒ, kû̌ a lô̌ǐplò̤ǐ sî nutokhlǒ, kû̌ ǎtṳ̌ôtṳ̌ sîkhû̌ nutokhlǒ nî̌, sî sǎphlǒhtû lô̌khô takǎkǎ a hǒhǒ. Sî nophî̌ htò̌mǒhtò̌phô̌ lô̌khô anǎ̤ dě sî no pi̤jî̌ lô̌khô asî kû̌ sînǎ̤nǎ̤.

21Pa ma̤bǔ dòdû̌ pô̤̌ asî ma̤ sî nu tô̤̌, pa ǐsha si nî̌, htodě pa sòwò̤̌ nî̌. Bǎbǎkǎlè asî kè̌ shôbǐ htû̌sò̌ǐ bǔ pô̤̌nu hî̌dě he kè̌ shôbǐ htû̌sò̌ǐ kòyò kimwi tôpwa̤ shôbǐ htû̌sò̌ǐ nu hî̌dě he mî̌ mî̌ he hî̌bǎjò pwǎ. 22Asî mî̌ hebrǔphû̌ tokhlǒ ya? He mî̌ Hebrǔ tôpwa̤pwa̤. Asî mî̌ Isôrělaphû̌ tokhlǒ ya? He mî̌ Isôrělaphû̌ tôpwa̤pwa̤ ya. Asî mî̌ PhaAbraha akhlialè tokhlǒ ya? He mî̌ PhaAbraha akhlialè tôpwa̤pwa̤ ya. 23Asî mî̌ Khrǐ apwa̤ma̤ta̤phû̌ tokhlǒ ya? He ma̤ lǒkhlo kû̌ asî nutokhlǒ he hî̌ pô̤̌o dě a sô̌sô̌ kû̌ he kimwi. He jî̌pwǐ̤ ma̤ khlo asî ma̤nu bǎbǎ kòyò dǒtě̤ wô̤̌khlo he dǒ apô̤kû kû̌ asî, kòyò po̤ he kû̌ aplè henu a ô̌ dû̌wî̤, he phǔ glè̌ sinu he kè̌shǐ shětǒ̤bǎ taga hǒ. ^c 24Yǔdaphû̌ tokhlǒ po̤ he tôplǎnu a po̤ he sushi kû̌ lǐ̤sô̌tôplè, dě he kè̌shǐbǎ pô̤̌nu mî̌ yè̤̌plǎ. ^d 25Rûme̤phû̌ tokhlǒ po̤ he kû̌ wî̤sǒpli̤ suplǎ, kòyò tokhlǒ tě̤ he kû̌ lǒ̤ dě asî tě̤ tǒ̤dǒ he si, he dě asî shò̌tò̤̌ lô̌khô kû̌ he sihǒ nî̌ a ô̌ tôplǎ. ^e Sǒkhlidû̌ hǎphò̌ nô̌ bǎ he dǒ shidû̌tawe̤kû subǎ dě he lûcû̌ dǒ shidû̌te̤we̤ akûnu tôni̤ kû̌ tôsa. ^f 26Dǒ he cû̌ plû klè̌ akûnu he kè̌shǐ tôbǎ dû̌wî̤ kû̌ ta̤tirǐsò̌ ǐsha tokhlǒ. He kè̌shǐ shěto̤bǎ shidû̌ tě̤tubǐ heklè̌, he kè̌shǐ shěto̤bǎ kû̌ pwa̤pô̤̌sigwǐ yǒsaphǎ kòyòta tokhlǒ, he kè̌shǐ shěto̤bǎ kû̌ hekhlilè Yǔdaphû̌ tû̌ tokhlǒ kû̌ Yǔdaphû̌ mè̤̌tô̤̌ tokhlǒ sǎphlǒdû̌ pṳ̂̌ma̤si he. Bǎ he cû̌nṳ̌ dǒ wî̤̌dû̌wî̤̌htû akû bǎbǎ, bǎ he cû̌ dǒ kòyò ô̌ tôpwǎ̤꤮ tô̤̌ agûlǎ̤ nu bǎbǎ, he kè̌shǐ tṳ̌bǎ dû̌wî̤ kû̌ ta̤tirǐsò̌ ǐsha tokhlǒ. Htokhôtô̤̌ dǒ shidû̌te̤we̤ akû bǎbǎ, he kè̌shǐ tṳ̌bǎ dû̌wî̤ ta̤tirǐsò̌ ǐsha tokhlǒ. Pṳ̌wè̤̌ Khrǐphû̌ dǒ a lòhô tokhlǒ a ta̤ma̤pò̤̌ma̤sha numî̌ he tṳ̌bǎ dû̌wî̤. ^g Lǒ̤bò ta̤tarǐsò̌ ǐsha tokhlǒnu, he kè̌shǐbǎ bò̌bò. ^h 27He bǎ ma̤ shèphǔshèwè̤ dě he bǎ jî̌pwǐ̤jî̌li̤ lòdô̌lòde henǎ̤. He hǎmôô̌nǐ̤ tô̤̌ numî̌ a ô̌ taga. He tǒ̤dǒ ta̤lòdô̌ǎ lòdô̌ô mî̌ a ô̌ô̌. Ǎkǒôbe tô̤̌ mî̌ a ô̌ taga. He jejû lǎ̤kûlǎ̤sô̌ ô̌ lǒbetô̤̌ dě he bǎ khòbǎ gǎwô̤̌gǎshasha. 28Tǒ̤ hǒo nô̤̌ mè̤̌tô̤̌, pṳ̂̌ni̤ni̤ he bǎgû̌bǎgè̌ bǎbò ta̤dòkû tokhlǒ awe̤akè. 29Kòyò tôpwa̤pwa̤ kè̌ khû̌shiǎjǎ hî̌dě he gènè̤ sǎyṳgwèbǎǐ yǎ. Kòyò tôpwa̤pwa̤ kè̌ ma̤ta̤sǔ hî̌dě he sǎphlǒdû̌ jî̌ kòyò dǒ a lô̌ǐ cû̌ lû̌û dǒ ta̤sǔ akû nu tôpwa̤.

30Kè̌ he lǎ̤lṳ̂ shôbǐ htû̌sò̌ǐ hî̌dě he gǔ shôbǐ htû̌sò̌ǐ pwǎtǒ̤ ta̤ dǒ a dǔlè̌lṳ̌ he ta̤khû̌shiǎjǎ tokhlǒ awe̤akè pwǎ. 31Běcǎ Yeshǔ Khrǐ apha Cǒmara nǎ a sî̌ganǎ̤ kû̌ he hî̌bǎ lòhô mè̤̌tô̤̌. Kòyò gǔ htû̌sò̌htò̌ pû ami̤ tûjû̌pwa̤ talakhǎ nî̌. 32Bǎ he ô̌ dǒ Wî̤̌damase akû akhanu, khwǐdû̌ Arǐhta ahǒlǎ̤ khwǐ ginǐ̤pwa̤tôpwa̤ bè̌lò̤ ô̌pǒ̤ akliphû̌ tokhlǒ dǒ wî̤̌ takhadû̌htu dě a noô̌pǒ̤ pṳ̂̌ he kû̌ asî. ⁱ 33Bǎbǎkǎlè, kòyò shû̌nṳ̌ he dǒ sû̌ tômè akû, dě dǒ wî̤̌we̤dû̌ alô̤ atakhaphû̌ ô̌ tôkûnu dě kòyò jèlò̤tě̤ he dǒ wî̤̌we̤dû̌ takhaphû̌nu akhlo dě he hǎplǎkè dǒ khwǐ nutôpwa̤ a cǔdekû.