2Cor 12 | KxfSCKXF | STEP | Ta̤hî̌bǎhtû̌sò̌ nî̌ a nǐ̤bwǐsirî dǒ kòyòya tôpwǎ̤ tô̤̌ bǎbǎkǎlè he tôbǎ shôbǐǐ htû̌sò̌ pwǎ. Bǎbǎkǎlè khònò̤̌ he gǔ shôbǐǐlṳ̌ bǎ sî kû̌ Běcǎ dǐkè̌shî̌ tobo nǎ he tokhlǒ kû̌ a dǔlè̌lṳ̌ bǎ he ta̤tokhlǒ awe̤akè.

2 Corinthians 12

Khûpò̌lǔ a ta̤kè̌shǐlṳ̌ nǎ tokhlǒ kû̌ ta̤dǔlè̌lṳ̌ lû̌û tokhlǒ

1 Ta̤hî̌bǎhtû̌sò̌ nî̌ a nǐ̤bwǐsirî dǒ kòyòya tôpwǎ̤ tô̤̌ bǎbǎkǎlè he tôbǎ shôbǐǐ htû̌sò̌ pwǎ. Bǎbǎkǎlè khònò̤̌ he gǔ shôbǐǐlṳ̌ bǎ sî kû̌ Běcǎ dǐkè̌shî̌ tobo nǎ he tokhlǒ kû̌ a dǔlè̌lṳ̌ bǎ he ta̤tokhlǒ awe̤akè. 2 Dǒ awǐkha shilǐ̤ně akhanu, kòyò kaǎ gehtò̌ kòyòpha dǒ a yṳ̌ǎ Khrǐ tôpwa̤ dǒ mǒkhû̌ sutô̤̌ tôtô̤̌ nutôkû. (anǎ̤glǒ ô̌ paya, mî̌ a ô̌pa tô̤̌ ya nu, he sî̌ganǎ̤ tô̤̌. Sî̌ganǎ̤ pwǎtǒ̤ Cǒmara tôpwa̤ nô̤̌ pwǎ.) 3 Pô̤̌ he hî̌htonu, kòyòpha nutôpwa̤ nî̌ bǎnukha anǎ̤glǒ ô̌pa ya mî̌ a ô̌pa tô̤̌ ya nu sî̌ganǎ̤ pwǎtǒ̤ Cǒmara tôpwa̤ nô̤̌ pwǎ. 4 Bǎbǎkǎlè Běcǎ kaǎ gehtò̌ a dǒ alǎ̤ô̌ ǐ mǒkhû̌ gûlǎ̤ htò̌yô̤̌lǒ nutôkû mî̌ he sî̌ganǎ̤. Bǎ a htò̌ô̌ bǎnu akha a ganǎ̤de kòyò hî̌bǎ lû̌û yô̤̌ tokhlǒ dǒ a shôbǐǐlṳ̌ getîkhîjò bǎ kòyò kû̌ kòyòhǎkhû̌phû̌ ayô̤̌ tô̤̌, htokhôtô̤̌ Cǒmara no shôbǐǐlṳ̌ bǎ lû̌û tô̤̌tô̤̌. 5 He gǔ shôbǐǐhtû̌sò̌ ta̤ma̤htûhtò̌ anǎ̤ nutokhlǒ. Bǎbǎkǎlè he shôbǐǐhtû̌sò̌ ǐ bǎ henǎ̤ tô̤̌. He gǔ hî̌bǎ htû̌sò̌htò̌ǐ pwǎtǒ̤ he ta̤khû̌shiǎjǎ nutokhlǒ nô̤̌ pwǎ. 6 Bǎbǎkǎlè he kè̌ sǎyṳ shôbǐǐhtû̌sò̌ ǐ henǎ̤ pě numî̌ anǐ̤ pwǎ, he htû bǎ kòyò kimwi tô̤̌, ma̤titèhî̌dě he shôbǐǐhtû̌sò̌ ǐ heyô̤̌ nutokhlǒ numî̌ acǒatè̤ pwǎ. Bǎbǎkǎlè pô̤̌khô he gǔ hî̌bǎ htû̌sò̌ ǐ henǎ̤ tô̤̌ nu, he khòǐ henǎ̤. He sǎyṳ nogènè̤ kòyò pwǐ a kè̌shǐ he ma̤ta̤tokhlǒ kû̌ pwǐ a ganǎ̤de he ta̤sû̌ǐtòwòǐ tokhlǒ nupwǎ. He sǎyṳ no gènè̤dû̌khlo kòyò kû̌ pwǐ he ma̤nu tô̤̌.

7 Pô̤̌khô he gǔ hî̌bǎ htû̌sò̌ ǐ henǎ̤ kû̌ he kè̌shǐ ta̤wô̌ dǒ mǒkhû̌ nutokhlǒ tô̤̌nu, Cǒmara ǐ he dǒ he gǔ khòbǎ ta̤jî̌ta̤jû̌ tôcǒ dǒ a sô̌sô̌ kû̌ ta̤shî̌shô̌ a ganǎ̤ ô̌tò̤̌ bǎ he bělǎ̤nu. Hǎkhû̌tana nohè a tanaphû̌ tôdo dǒ a gǔ hè ma̤jî̌ma̤jû̌ he kû̌ ta̤jî̌ta̤jû̌ nutôcǒ hǒ. Dǒ ta̤pò̤̌ta̤sha hǒo akhû̌akhîdě, he phî̌htò̌yô̤̌jò pe henǎ̤ tô̤̌. 8 Pô̤̌khô Cǒmara gǔ phî̌ tephekè bǎ he ta̤jî̌ta̤jû̌nu, he kwisǎyṳ lû̌û suplǎ. 9 Bǎbǎkǎlè a hî̌shěshu he kû̌, “Lǒ̤bò na lṳ̂bǎ ta̤tokhlǒnu hebwǐhesîrî ma̤jè̌ na hǒ. Bǎ na khû̌shiǎjǎ pô̤̌nu akha, he ta̤pô̤ta̤phǎ shû̌sho gǔ ô̌lṳ̌htò̌ dǒ nakû pě.” Pô̤̌nu akhû̌akhî pô̤̌khô kòyò gǔ kè̌shǐ pô̤̌ Khrǐ a ta̤pô̤phǎ shû̌sho ô̌ dǒ hekû nu, he gǔ hî̌bǎ htû̌sò̌ ǐ he ta̤khû̌shiǎjǎ awe̤akè nutokhlǒ pě. He hî̌bǎ htû̌sò̌ ǐ henǎ̤ pô̤̌nu nî̌ he sǎlě̤sǎlò̤ pwǎ. 10 Pô̤̌nudě he ô̌ kû̌ ta̤khû̌shiǎjǎ tokhlǒ, he kè̌shǐ tṳ̌bǎ kû̌ ta̤jî̌ta̤jû̌ tokhlǒ, kòyò pîjî̌ǐsho he tokhlǒ, kòyò ma̤jî̌ma̤jû̌ he tokhlǒ, he kè̌shǐ tṳ̌bǎ kû̌ ta̤pò̤̌ta̤sha sî tokhlǒ, lǒ̤bò ta̤ dǒ he kè̌shǐ tṳ̌bǎ tokhlǒ numî̌ Khrǐ aya pwǎ, bǎbǎkǎlè he sǎphlǒtô sǎphlǒmô̤ pwǎ. Ma̤titèhî̌dě bǎ he khû̌shiǎjǎ akhanu, he shû̌sho ^{▼▼pa yṳ̌ǎ Cǒmara akhû̌akhî, Cǒmara ǐ he shû̌sho dǒsû̌dǒsò̌ tôkhô.} pwǎ.

Khûpò̌lǔ bǎgû̌bǎgè̌ bǎ Kôritu ta̤dòkû tokhlǒ aya

11 He hî̌bǎ htû̌sò̌htò̌ǐ heyô̤̌ akhû̌akhî, he sô̌sô̌ kû̌ kòyò kimwi tôpwa̤. Bǎbǎkǎlè sî ma̤kimwi he pwǎ. Sî tô htû kòyò tokhlǒ dǒ a tô htû̌sò̌ ǐ he. Pô̤̌ kòyò tokhlǒkhlǒ hî̌ lô̌khô he kû̌, he mî̌ kòyò ô̌lǒô̌khlo tôpwa̤ pwǎ bǎbǎkǎlè he phǔlò̤ khlo kû̌ a htû lô̌khô saradû̌ amè̤̌kû̌ pwa̤nophû̌ nutokhlǒ tîkî̌꤮ tô̤̌. 12 Bǎ he ô̌plǒ kû̌ sî akhanu, sî kè̌shǐ tě̤tě̤mè̤̌mè̤̌ bò kû̌ he mî̌ pwa̤nophû̌ mè̤̌mî̌ca tôpwa̤ hǒ, ma̤titèhî̌dě ta̤ dǒ he ma̤hto tokhlǒnu, he khòsǎphlǒhtû ma̤ jî̌, htokhôtô̤̌ he dǔlè̌lṳ̌ bǎ hto sî ta̤ma̤mǎnǎ tokhlǒ kû̌ ta̤cô̌klǐcô̌sè tokhlǒ hǒ, dě he ma̤lṳ̌ dû̌wî̤ bǎ hto sî ta̤cô̌klǐ ǒò̌ tokhlǒ hǒ. 13 Pwa̤yṳ̌ǎta̤ saprṳ̂phû̌ dǒ ashǔshawa̤ tokhlǒ dě he kè̌dû̌khô̌khlo yǎ, sî dě he kè̌ lò̤phû̌bò̌khû̌ kè sî pô̤̌nu ya? A ô̌ kǎ tôcǒ dǒ he kwi sî ta̤ma̤jè̌ tô̤̌ nupwǎkǎ. He kwi sî ta̤ma̤jè̌ tô̤̌ nudě khòsǎdô dě plûkè mò̌ he ta̤sǔ nî̌꤮.

14 He tîwî̌nǎ dǒ he gǔ hè ô̌lè sî suplǎtôplǎ hǒ. Bǎbǎkǎlè he hèkwinṳ̌ bǎ sî ru tîkî̌꤮ tô̤̌. He kwi pwǎ tǒ̤ sî gǔ mô̤nṳ̌ he nô̤̌ pwǎ, ma̤titèhî̌dě phû̌ tô bǔǎ mǒ̤pha mè̤̌tô̤̌, mǒ̤pha tô bǔǎ phû̌ pwǎ. 15 He ma̤bòkè heruhehta, hekhû̌heǎ, ta̤pṳ̂̌tocǒ dǒ sîya nî̌ he sǎlě̤sǎlò̤ pwǎ. He mô̤ǐ sî pwǐo bǎbǎkǎlè sî ta̤mô̤ǐ he nî̌ asô̌sô̌ kû̌ ayû̌ pî̌tî̌ gelò̤kè ma̤hî̌tè?

16 Pô̤̌nudě he ma̤gû̌ma̤gè̌ sî tô̤̌ numî̌ sî sî̌yanò pwǎ. Bǎbǎkǎlè kòyò tokhlǒkhlǒ hî̌ lô̌khô he kû̌ he hè lô̌ǐplò̤ǐ sî, he hè lô̌ǎ sîru, a hî̌ lô̌khô pô̤̌nu. 17 He lô̌ǎ lô̌ô bǎ sî ya? Kòyò dǒ he nohè a dǒ sî ô̌ tokhlǒ numî̌ a hè ǎtṳ̌ôbò sîkhû̌ dě a geǐ lô̌khô he ru numî̌ a ô̌ tôpwa̤pwa̤ ya? 18 Bǎ he kwisǎyṳ Khûtǐtǔ dǒ a gǔ hè dǒ sî ô̌, dě he plûhè kû̌ ta̤dòkûphû̌ tôpwa̤ kû̌ a akha numî̌, Khûtǐtǔ hèma̤ǎ cǎ sîkhû̌ ya? A hè ma̤ǎ sîkhû̌ tôcǒ꤮ tô̤̌. A ta̤ihtǒhǎnòò̌, ata̤bè̌ a sǎphlǒ tokhlǒ numî̌ asô̌sô̌kû̌ he pwǎ yahě?

19 Lǒ̤bò pa wě̤ bǎ sî tokhlǒ numî̌, sî gènè̤ lô̌khô kû̌ pa hî̌bǎ tagabǐ ǐ bò panǎ̤ pô̤̌nu kǎlè. Pô̤̌nu mè̤̌tô̤̌, pa hî̌bǎpwǎ pô̤̌ Khrǐ nohî̌bǎ pa pwǎ numî̌ Cǒmara kè̌shǐ sî̌ganǎ̤ tûû̌ hǒ. Khôbǒsû̌ sî, lǒ̤bò pa ma̤ta̤ tokhlǒ numî̌ pa ma̤ dǒ a gǔ htûbwǐhtûsîrî dǒ sîya pwǎ. 20 Htû̌ he hètǒ̤ dǒ sî ô̌ khapěnu, hî̌pě he hè kè̌shǐ tûû̌ sî ta̤bè̌sû̌bè̌sǎ tokhlǒ dǒ a khô̌ kû̌ pô̤̌ he sǎyṳ kè̌shǐ nutokhlǒ pe hǒ, htodě sî gǔ kè̌shǐ tûû̌ he ta̤bè̌sû̌bè̌sǎ tokhlǒ dǒ a khô̌ pô̤̌ sî sǎyṳ kè̌shǐ he nu pě hǒ, he gû̌gè̌nǎ pô̤̌nu. He bǎyô̤ kû̌ hî̌pě he hèkè̌shǐ sîtô̤̌klǐ lû̌û, sî sǎkhwè̌ kè̌khî lû̌û, sî sǎphlǒdû̌ kè̌khî lû̌û, sî ô̌khô̌yò lû̌û tôprṳ̂ kû̌ tôprṳ̂, pîjî̌ǐsho kòyò, dô̌mi̤dô̌yô̤ kòyò, bè̌dû̌bè̌htò̌lǒ anǎ̤, ma̤shû̌shǎ prûtè̌ ta̤, pô̤̌nu tokhlǒ hǒ. 21 Dǒ sî ta̤ihtǒhǎnòò̌ ma̤ lô̌khô pô̤̌nu akhû̌akhî, he gǔ hè ô̌lè kû̌ sî hǒtôplǎ pěnu, hî̌pě he kè̌shǐbǎ kû̌ ta̤sòwò̤̌ dǒ Cǒmara a lô̤mô̤̌ pě he gènè̤ ǐsha pô̤̌nu. Ma̤titèhî̌dě, dǒ awǐanô̌ numî̌ kòyò dǒ a cû̌sǔnṳ̌plěnṳ̌ pwa̤mǒ̤pwa̤khû tokhlǒ, gènè̤ putupatǎ tokhlǒ kû̌ a cû̌sǔnṳ̌plěnṳ̌ kòyòphû̌kòyòma tokhlǒnu, a yò̤lǎ̤plǎdî̌ lô̌khô asǎphlǒ khôtô̤̌. Pô̤̌nudě dǒ kòyò hǒtokhlǒ akhû̌akhî, he gǔ hǎsihǎô̌ dǒ asîya pě he bǎyû pô̤̌nu.