2Cor 13 | KxfSCKXF | STEP | He glè̌ hè ô̌lè kû̌ sî hǒtôplǎ numî̌ suplǎtôplǎ hǒ. Pô̤̌ lî̤plò̌shǐkû hî̌ kû̌, “Kòyò tôpwa̤pwa̤ kè̌ bè̌ a khô tôpwa̤pwa̤ ata̤sǔ kè̌hî̌dě, pî̌tî̌ gutṳ̌ kòyò sò̌ginǐ̤ tô̤̌mî̌ sò̌su bǎ khòlṳ̌ kû̌ kòyò hǒtôpwa̤ bè̌ a khô ta̤sǔ numî̌ atô mî̌ca pô̤̌nu.”

2 Corinthians 13

Ta̤dǐsè̌rè̌ kû̌ ta̤hî̌mô̤hî̌wô̌ dǒ nô̌kògutṳ̌

1 He glè̌ hè ô̌lè kû̌ sî hǒtôplǎ numî̌ suplǎtôplǎ hǒ. Pô̤̌ lî̤plò̌shǐkû hî̌ kû̌, “Kòyò tôpwa̤pwa̤ kè̌ bè̌ a khô tôpwa̤pwa̤ ata̤sǔ kè̌hî̌dě, pî̌tî̌ gutṳ̌ kòyò sò̌ginǐ̤ tô̤̌mî̌ sò̌su bǎ khòlṳ̌ kû̌ kòyò hǒtôpwa̤ bè̌ a khô ta̤sǔ numî̌ atô mî̌ca pô̤̌nu.” ^a 2 Bǎ he hè ô̌lè kû̌ sî ginǐ̤plǎtôplǎ akhanu, he dǐsè̌rè̌ nǎ hto kòyò dǒ a ma̤sǔta̤ dǒ awǐanô̌ nutokhlǒ kû̌ lǒ̤bò kòyò dǒ ashǔshawa̤ nutokhlǒ hǒ. Khònò̤̌dě he ô̌tepheyî̤ kû̌ sî dě he dǐsè̌rè̌ sô̌ sî. Dě htû̌ he hè sô̌ hǒtôplǎ pěnu he sǎyṳgwèbǎǐ ǐ pe nô̌ sî tôpwǎ̤꤮ tô̤̌. 3 He gǔ ma̤ pô̤̌ he hî̌hto nu pě, ma̤titèhî̌dě Khrǐ nohî̌bǎ tutṳ̌ he kû̌ sî yamî̌ amè̤̌tô̤̌ ya nu, sî kwishû̌ he dǒ he gǔ hî̌ bǎ sî nuhǒ. Khrǐ gǔ sû̌ǐ wô̌ tîkhî sô̌ sî pěmî̌, a ǐsha nô̌ sî tîkî̌꤮ tô̤̌, a gǔ sû̌ǐ wô̌ tîkhî sô̌ sî kû̌ a ta̤siwi̤sòwò̤ pě. 4 Dǒ ta̤khû̌shiǎjǎ akhû̌akhî, Khrǐ tṳ̌sikhòsi anǎ̤ dǒ nò̌dò̌htǔlô̤. Bǎbǎkǎlè khònò̤̌ dǒ Cǒmara a ta̤pô̤ta̤phǎ shû̌sho akhû̌akhî a htûpwa̤ hǒ. Pô̤̌nudě pa mî̌ pa khû̌shiǎjǎ sô̌sô̌ pô̤̌nu bǎbǎkǎlè bǎ pa gǔ hî̌ sî akhanu, pa gǔ dǔlè̌lṳ̌ bǎ sî kû̌ Cǒmara a ta̤pô̤phǎ shû̌sho pě, ma̤titèhî̌dě pa htû kû̌ Khrǐ tôcǒ nô̤̌ dǒ pa ta̤ô̌htûpwa̤kû akhû̌akhî, pa gǔ ma̤pô̤̌nu pě.

5 Pô̤̌khô sî gǔ sî̌ganǎ̤ ǐ lô̌khô sînǎ̤ kû̌ sî cǒ kû̌ sî ta̤yṳ̌ ya, tô̤̌ya nu, gwè̌lò̤ ǐtûû̌ lô̌khô sînǎ̤ nu. Khrǐ ô̌htûpwa̤ dǒ sîkû numî̌ sî sî̌ganǎ̤ tô̤̌ ya? Bǎbǎkǎlè sî kè̌ kè̌shǐ kû̌ sî cǒ kû̌ sî ta̤yṳ̌ tô̤̌ hî̌dě, Yeshǔ Khrǐ ô̌htûpwa̤ dǒ sîkû tô̤̌. 6 Dě he yṳ̌ǎ kû̌ pa mî̌ Khrǐ a pwa̤nophû̌ tokhlǒ mè̤̌mî̌ca numî̌, sî gǔ sî̌ganǎ̤hè tûû̌ pě. 7 Pa kwicaba kû̌ sî gǔ ma̤ hènè pe ta̤sǔ tǎ̤mǎ̤, ma̤titèhî̌dě pô̤̌khô kòyò gǔ sî̌ganǎ̤ kû̌ pa mî̌ Khrǐ a pwa̤nophû̌ mè̤̌mî̌ca tokhlǒ ayanudě, pa kwicaba pô̤̌nu mè̤̌tô̤̌. Sî kè̌ gènè̤ lô̌khô pa kû̌ pa mî̌ pwa̤nophû̌ dǒ a mè̤̌mî̌ca tokhlǒ bǎbǎ, a mè̤̌mî̌ca tô̤̌ tokhlǒ bǎbǎ, a lǎ̤hî̌ ô̌ nô̌ tôcǒ tô̤̌. Ta̤ dǒ pa sǎyṳ mè̤̌mî̌ca numî̌ mî̌titè hî̌dě sî kè̌ ma̤wô̌ta̤ numî̌ pô̌ hǒ. 8 Ma̤titèhî̌dě pa shěshǔshu ta̤tě̤ta̤mè̤̌ numî̌ anǐ̤ tô̤̌, pa bǎ gû̌ dǒ ta̤tě̤ta̤mè̤̌ tôkhô. 9 Pa kè̌ lǎ̤lṳ̂ sû̌ǐ wô̌ tîkhî sô̌ sî tô̤̌ hî̌nu, pa noǎjò pa ta̤siwi̤sòwò̤ tô̤̌, pô̤̌nudě kòyò gènè̤ lô̌khô pa kû̌ pa khû̌shiǎjǎ pwǎ bǎbǎkǎlè sî kè̌ ma̤ hènè pe ta̤sǔ tô̤̌ hî̌nu, sî htûhtò̌ kòyò dǒ a shû̌sho tokhlǒ hǒ akhû̌akhî pa sǎlě̤sǎlò̤ jî̌jî̌. Pa kwicaba bǎ sî kû̌ sî gǔ ô̌htûpwa̤ wô̌hè dǒ alô̤mô̤̌ tôkhô dě sî gǔ ma̤ pe lô̌khô ta̤sǔ tô̤̌, pô̤̌nu pwǎ. 10 Htû̌ he hètǒ̤ kû̌ sî pě dě pô̤̌khô he gǔ hè noǎ sho he ta̤siwi̤sòwò̤ dǒ Běcǎ ǐ he hǒonu tô̤̌nu, bǎ he ô̌ yî̤ kû̌ sî akha, he sǎyṳ wě̤cû̌ wǐ bǎ sî lî̤ hǒo pwǎ. Pô̤̌khô he gǔ ma̤dû̌htò̌htûhtò̌ sî ta̤yṳ̌ta̤nǎ̤ ayanu, Běcǎ ǐ he ta̤siwi̤sòwò̤ pwǎ. A ǐ he ta̤siwi̤sòwò̤ dǒ he gǔ ma̤pî̌ma̤kè sî ayanu mè̤̌tô̤̌.

11 Khôbǒsû̌ sî, he sǎyṳ hî̌ sî dǒ nô̌kògutṳ̌ kû̌, sǎlě̤ lô̌khô nî̌. Ma̤wô̌ getîkhî lô̌khô sî ta̤ô̌htûpwa̤ nî̌꤮. Ganǎ̤de lô̌khô he ta̤kwisǎyṳ sî tokhlǒ nî̌. Ô̌plǒô̌cu, ô̌pè̤̌ô̌dû pû lû̌û nî̌꤮. Sî kè̌ ma̤pô̤̌nu hî̌dě Cǒmara dǒ a mî̌ ta̤mô̤ǐ kû̌ ta̤pè̤̌ta̤dû a kòshî̌ tôpwa̤ gǔ ô̌ kû̌ sî pě.

12 Dǔlṳ̌ sî ta̤mô̤ kè̌khî lû̌ûnu kû̌ sî ta̤hî̌mô̤hî̌wô̌ lû̌û tôpwa̤ kû̌ tôpwa̤ nî̌꤮. 13 Pwa̤yṳ̌ǎta̤phû̌ dǒ a ô̌ lô̌khô bǒo pṳ̂̌tôpwa̤ sûhè bǎ sî kû̌ asî ata̤hî̌mô̤hî̌wô̌ tokhlǒ.

14 Pa Běcǎ Yeshǔ Khrǐ abwǐsîrî, pha Cǒmara ata̤mô̤ǐ kû̌ Yôla Plò̌shǐ Běcǎ a ta̤bǒshû̌khǎkhô nî̌ a gǔ ô̌ pû kû̌ sî pṳ̂̌꤮ tôpwa̤ nî̌꤮.