2Cor 2 | KxfSCKXF | STEP | He kè̌ hè tṳ̂mṳ̂̌ sî pô̤̌nu hî̌dě, he sî̌ganǎ̤ hǒ kû̌ he gǔ hè ma̤sǎplǎ̤ sî pě akhû̌akhî, he bè̌lò̤kè hǒ he sǎphlǒ kû̌ he hè petô̤̌nu.

2 Corinthians 2

1 He kè̌ hè tṳ̂mṳ̂̌ sî pô̤̌nu hî̌dě, he sî̌ganǎ̤ hǒ kû̌ he gǔ hè ma̤sǎplǎ̤ sî pě akhû̌akhî, he bè̌lò̤kè hǒ he sǎphlǒ kû̌ he hè petô̤̌nu. 2 He kè̌ ma̤sǎplǎ̤ sî hî̌dě mò̌pè gǔ ma̤sǎlě̤ge he pě ya? Pwa̤ma̤sǎlě̤sǎlò̤ he mî̌ a ô̌ pwǎtǒ̤ sî dǒ he ma̤sǎplǎ̤ sî nutokhlǒ pwǎ. 3 Htǔ꤮ he hè pě akhanu, sî dǒ a ma̤sǎlě̤ he tokhlǒnu pô̤̌khô̌ a gǔ ma̤ sǎplǎ̤ he tô̤̌nu, he wě̤cû̌wǐ bǎ tû̌ sî lî̤ nuhǒ. Sî lǒ̤bò sî̌ya tě̤mè̤̌ hǒkû̌ he gǔ sǎlě̤sǎlò̤ dě sî bǎ sǎlě̤ mî̌ca pwǎ. 4 Bǎ he wě̤cû̌ bǎ sî lî̤ nutôbǎ akhanu, he sǎphlǒmô̤ tîkî̌꤮ tô̤̌, agû̌agè̌ jî̌ he. Htokhôtô̤̌ he mǐ̤sǎshi betǐpǐ꤮ le. Bǎbǎkǎlè he sǎyṳ ma̤sǎplǎ̤ sî pô̤̌nu mè̤̌tô̤̌, he sǎyṳ nosî̌ganǎ̤ sî kû̌ he mô̤ sî pwǐ꤮ tè pô̤̌nupwǎ.

Plûkè pwa̤phû̌mò̤̌phû̌ a ta̤sǔ

5 Khònò̤̌dě, kè̌ hî̌ kòyò ma̤sǔta̤ dǒ sîkla nutôpwa̤nu, a ma̤sǎplǎ̤ tǒ̤ he mè̤̌tô̤̌, a ma̤sǎplǎ̤ tǒ̤gû̌ bòkè sî pṳ̂̌꤮ tôpwa̤ hǒ. Bǎbǎkǎlè he sǎyṳ hî̌lǒhî̌khlo bǎtô̤̌, he gǔ hî̌ kû̌ a phǔ꤮ ma̤sǎplǎ̤ bò sî pṳ̂̌꤮ tôpwa̤. 6 Pwa̤ma̤sǔta̤ hǒtôpwa̤nu, sî tôprṳ̂tôphǎ ma̤yò̤ lû̌û pô̤̌numî̌ a pǒhǒ. 7 Bǎbǎkǎlè, khònò̤̌ sî gǔ cû̌ plûkè lû̌û ta̤sǔ hǒnumî̌ awô̌khlo dǒ sîya. Dě cû̌ ǐkhû̌ǐǎ sô̌ anu. Hî̌pě a sǎphlǒpî̌ dě a sǎplǎ̤sǎyṳ tûlû̌shû̌lě. 8 Pô̤̌nu akhû̌akhî, he kwisǎyṳ sî. Cû̌ dǔlè̌lṳ̌ sô̌ a kû̌ sî mô̤gutṳ̌ pepwǎ a pô̤̌nu nî̌꤮. 9 He wě̤ bǎ sî lî̤ dǒ awǐkha tôbǎnu mî̌, he sǎyṳ no ma̤ yò̤lǎ̤plǎdî̌ sî kû̌ kòyò ganǎ̤de gû̌ kòyò ayô̤̌ tô̤̌ nutôpwa̤ hǒ. Pô̤̌nudě he sǎyṳ sî̌ganǎ̤ tě̤tě̤mè̤̌mè̤̌ kû̌ sî gû̌ma̤kû̌ pô̤̌ he sû̌ǐcû̌ sînu ya, mî̌ sî gû̌ma̤ tô̤̌ ya pô̤̌nupwǎ. 10 Khònò̤̌ sî kè̌ plûkè kòyò dǒ sî ma̤yò̤lǎ̤plǎdî̌ lû̌û nutôpwa̤ ata̤sǔ kè̌hî̌dě he mî̌ he plûkè kû̌ a ta̤sǔ pwǎ. Hî̌kûmṳ̂̌mò̌, ta̤ dǒ he tô plûkè kè̌ ô̌ hî̌dě, pô̤̌khô a gǔ htûbwǐhtûsîrî dǒ sîyanu he gǔ plûkè gû̌ a ta̤sǔ pě. Khrǐ gǔ kè̌shǐ gû̌ he plûkè ata̤sǔnu pě. 11 Pô̤̌khô hǎkhû̌tana gǔ ma̤pî̌kè tǎ̤ pa tǎ̤mǎ̤nu, pa bǎ plûkè kòyò ta̤sǔ pô̤̌nu. Ma̤titèhî̌dě hǎkhû̌tana a ta̤gènè̤nǎ tokhlǒnu pa sî̌ganǎ̤ lǒ̤bò tû̌ hǒ.

Khûpò̌lǔ sǎphlǒgû̌gè̌ dǒ Wî̤̌tarò akû

12 Bǎ he cû̌tǒ̤ hǒ dǒ Wî̤̌taròǎ akû dě he gǔ shôbǐǐlṳ̌ bǎ kòyòkû̌ Khrǐ a ta̤sǎlě̤we̤kè akhanu, he kè̌shǐ kû̌ Běcǎ bǔmô ô̌nǎ bǎ htohǒ he takha dě he kè̌shǐ kû̌ a sǎyṳ noma̤ hǒ he ta̤ma̤ bǎ wî̤̌ nutôwě̤ akû. ^a 13 Bǎbǎkǎlè he sǎphlǒgû̌gè̌ kû̌tû̌ tô̤̌, ma̤titèhî̌dě he kè̌shǐ pa pṳ̌wè̤̌ Khûtǐtǔ tô̤̌. Pô̤̌nudě he hî̌mô̤hî̌wô̌kè kòyò ô̌ bǎ Wî̤̌tarò nutokhlǒ dě he hǎhtò̌cû̌kè dǒ Mèsidûnǐ̤ya gǎ.

Dǒ Khrǐ akhû̌akhîdě pa ma̤pè̤̌ta̤

14 Bǎbǎkǎlè, he hî̌bwǐhî̌sîrî htû̌sò̌htò̌ ta̤ dǒ Cǒmara ma̤ bǎ hǒ pa hǒtokhlǒ, ma̤titèhî̌dě dǒ pa lî̤̌ htûhtò̌kè ta̤tôcǒ kû̌ Khrǐ akhû̌akhî, Cǒmara cû̌ wǐ dǒ palô̤mô̤̌ dě pa gû̌cû̌kû̌ lû̌û dǒ wǎ̤tě̤khlo dǒ asô̌sô̌kû̌ kòyò dǒtě̤ Khrǐ a kòyò dǒ apô̤kû nutokhlǒ hǒ. Cǒmara dǔlè̌lṳ̌ hǒ pa kû̌ kòyò pṳ̂̌꤮ tôpwa̤ hǒ. Cǒmara notutṳ̌ hǒ pa dǒ pa gǔ lǎ̤ǐsî̌ganǎ̤ bǎ kòyò kû̌ Khrǐ awe̤akè dǒ asô̌sô̌kû̌ ta̤numò̤̌nushunu pṳ̂̌꤮ tûkû hǒ. 15 Pa ta̤ô̌htûpwa̤ kû̌ pa ta̤shôbǐǐlṳ̌ bǎ kòyò hǒtokhlǒnu asô̌sô̌kû̌ ta̤numò̤̌nushu dǒ a numû̌ peshe cû̌tǒ̤ bòkè dǒ kòyò pṳ̂̌꤮ tôpwa̤ a ô̌. A numû̌ cû̌tǒ̤ bòkè dǒ kòyò dǒ a nǐ̤bǎhǒ ta̤ma̤hǎplǎge tokhlǒ a ô̌ kû̌ kòyò dǒ a gǔ tǒ̤ hǒ dǒ ta̤pî̌ta̤lṳ̂̌kè pě tokhlǒ a ô̌ hǒ. 16 Pa ta̤ô̌htûpwa̤ kû̌ pa ta̤shôbǐǐlṳ̌ bǎ kòyò Khrǐ awe̤akè dǒ a sûcû̌ kòyò dǒ ta̤htûpwa̤ tûjû̌pwa̤ hǒtokhlǒnu, asô̌sô̌kû̌ ta̤numò̤̌nushu tokhlǒ dě a numò̤̌wǐ mî̌cǎ kòyò dǒ a nǐ̤bǎhǒ ta̤ma̤hǎplǎge tokhlǒ aya hǒ. Bǎbǎkǎlè kòyò dǒ a gǔ tǒ̤dǒ ta̤pî̌ta̤kè pě tokhlǒ ayanu, a nusonuû bǎ asî sô̌sô̌kû̌ lṳ̌nuso nupwǎ. Dǒ asî yṳ̌ǎ gû̌ kòyò tô̤̌ akhû̌akhî, a gǔ sûcû̌ asî dǒ ta̤cî̌htò̌ tûjû̌pwa̤ agûlǎ̤nu hǒ. Pa ta̤ma̤ numî̌ adû̌ayô̤̌ mî̌ca, pô̤̌nudě mò̌pè tôpwa̤ gǔ ma̤bò̌ mî̌ca ta̤ma̤ pô̤̌o tôcǒ nuya? 17 Kòyò ma̤ lô̌khô Cǒmara ata̤ma̤ dě a sû̌ǐtòwòǐ bǎ kòyònu a ô̌ dû̌ bǎbǎkǎlè pa kè̌pǒ̤ ma̤gû̌ pô̤̌ asî ma̤nu tô̤̌. Ma̤titèhî̌dě, pô̤̌khô asî gǔ nǐ̤bǎ lô̌khô ru dě asî shôbǐǐlṳ̌ bǎ kòyò kû̌ Cǒmara alě̤ayô̤̌ pwǎ. Bǎbǎkǎlè pa hǒtokhlǒnu, Cǒmara nocû̌ shôbǐǐlṳ̌ pa kû̌ Khrǐ awe̤akè, pa shôbǐǐlṳ̌ bǎ kòyònu Cǒmara kè̌shǐ, pa htûhto ta̤tôcǒ꤮ nô̤̌ kû̌ Khrǐ hǒ dě pa mî̌ pwa̤nophû̌ dǒ a sǎphlǒcǒtè̤ tokhlǒ hǒ.