2Cor 3 | KxfSCKXF | STEP | He hî̌ pô̤̌o dě a lò kû̌ he hî̌bǎ htò̌yô̤̌ sô̌ henǎ̤ pô̤̌nu ya? Mî̌ pa lǎ̤lṳ̂ phǐhènǐ̤ pa lî̤khòlṳ̌ tokhlǒ dǒ a gǔ hî̌lṳ̌ bǎ sî kû̌ pa mî̌ pwa̤nophû̌ tokhlǒ mè̤̌mî̌ca pô̤̌ kòyò tokhlǒkhlǒ phǐhènǐ̤ nuya? Mè̤̌tô̤̌dě pa lǎ̤lṳ̂ phî̌cû̌nṳ̌ sî lî̤khòlṳ̌ tokhlǒ dǒ sî gǔ wě̤ bǎ pa ayanu ya?

2 Corinthians 3

Pa mî̌ pwa̤nophû̌ dǒ a shôbǐǐlṳ̌ bǎ kòyò kû̌ ta̤olò̤ asa

1 He hî̌ pô̤̌o dě a lò kû̌ he hî̌bǎ htò̌yô̤̌ sô̌ henǎ̤ pô̤̌nu ya? Mî̌ pa lǎ̤lṳ̂ phǐhènǐ̤ pa lî̤khòlṳ̌ tokhlǒ dǒ a gǔ hî̌lṳ̌ bǎ sî kû̌ pa mî̌ pwa̤nophû̌ tokhlǒ mè̤̌mî̌ca pô̤̌ kòyò tokhlǒkhlǒ phǐhènǐ̤ nuya? Mè̤̌tô̤̌dě pa lǎ̤lṳ̂ phî̌cû̌nṳ̌ sî lî̤khòlṳ̌ tokhlǒ dǒ sî gǔ wě̤ bǎ pa ayanu ya? 2 Bǎbǎkǎlè pa hǒtokhlǒnu, pa lûgû̌ pô̤̌nu tô̤̌. Pa sî̌ganǎ̤ kû̌ sî mî̌ pa lî̤khòsǎ tokhlǒ hǒ dě pa sǎphlǒ icukû̌ sî pṳ̂̌꤮ tôplǎ. Dǒ sî gû̌ hǒ Khrǐ akò akhû̌akhî kòyò pṳ̂̌꤮ tôpwa̤ gǔ sî̌ganǎ̤ tutṳ̌ gû̌ kû̌ pa ma̤ta̤ numî̌ awô̌ pwǎ pô̤̌nu pě. 3 Sî hǒtokhlǒ numî̌, a sô̌sô̌hǒkû̌ lî̤ dǒ Khrǐ wě̤ dě a sûhè tutṳ̌ kû̌ pa hǒtokhlǒnu hǒ. Bǎbǎkǎlè a wě̤ kû̌ lî̤bô kû̌ cubôli̤shinu mè̤̌tô̤̌, htokhôtô̤̌ a wě̤ ô̌ dǒ lǒ̤bělô̤ pô̤̌ Khûmṳ̂shě lî̤phlǒnu mè̤̌tô̤̌tô̤̌. Khrǐ nowě̤ tutṳ̌ hǒ lî̤phlǒ dǒ sî sǎphlǒ tokhlǒ alô̤ kû̌ a Yôla Plò̌shǐ Běcǎ hǒ. ^a

Cǒmara dǒ a htûpwa̤ hǒtôpwa̤ nohè Yôla Plò̌shǐ Běcǎ gǔ hè ô̌htûpwa̤ dǒ sîkû hǒ. ^b

4 Yeshǔ Khrǐ ô̌htûpwa̤ dǒ pakû kû̌ sîkû akhû̌akhî, pa hî̌bǔ kû̌ pa ma̤ ta̤ma̤ hǒtokhlǒnu, Cǒmara sǎphlǒô̌ pwǎ. 5 Pa sǎlě̤htò̌ ǐtûû̌ pa ta̤sî̌ta̤jò̌ tokhlǒnu mè̤̌tô̤̌. Pa ô̌ kû̌ ta̤sî̌ta̤jò̌ dǒ pa ma̤bò̌hǒ ta̤ma̤ hǒtokhlǒ numî̌ a ô̌ dǒ Cǒmara a ô̌ hè pwǎ. 6 Pô̤̌khô pa gǔ sû̌ǐ shôbǐǐphlôbò̌ bǎ kòyò ta̤olò̤ asa ayanu, pwa̤ dǒ a ǐlò̤ pa ta̤sî̌ta̤jò̌ numî̌ Cǒmara hǒtôpwa̤ hǒ. Ta̤olò̤ asa dǒ a ǐlò̤ numî̌ asô̌sô̌kû̌ kòyò wě̤ ô̌ Khûmṳ̂shě a ta̤sû̌ta̤tòwònu mè̤̌tô̤̌. Ta̤sû̌ta̤tòwò asa numî̌ a gètè̤̌ nǎla̤ǐ Yôla Plò̌shǐ Běcǎ ma̤ta̤ dǒ pa sǎphlǒkûnu pwǎ. Pa kè̌ nǎla̤ǐ ta̤sû̌ta̤tòwò dǒ kòyò wě̤ô̌ numî̌ pa gǔ nǐ̤bǎ ta̤si pě, bǎbǎkǎlè Yôla Plò̌shǐ Běcǎnu a phǐhènǐ̤ bǎ pa sǎphlǒhtûpwa̤ tûjû̌pwa̤ hǒ. ^c

7 Dǒ awǐkha bǎ Cǒmara wě̤ ta̤mǎlò̤ hǒtokhlǒ dǒ lǒ̤belô̤ dě a ǐlò̤ kû̌ Khûmṳ̂shě akhanu, Cǒmara a ta̤bwǐdû̌sîrîhtûnu a lîtîklî̌ htò̌lṳ̌. Dě ta̤lîkakha lò̤tě̤ dǒ Khûmṳ̂shě amǐ̤sǎlô̤nu, a kakhashû̌ bǎ mî̌ca dǒ Isôrělaphû̌ tokhlǒ aya akhû̌akhî, asî kè̌bǔ lû̌ mi̤sǎ tô̤̌. Bǎbǎkǎlè ta̤kakhanu a lîtûû̌ tô̤̌, a hǎmǎ nô̌kò pwǎ. 8 Ta̤sû̌ta̤tòwò a kè̌ hè kû̌ a ta̤bwǐdû̌sîrîhtû shû̌sho pwǐo kè̌hî̌dě ta̤olò̤ asanu a gǔ ta̤bwǐdû̌sîrîhtû shû̌shokhlolǒ nô̌ hǒ kû̌ ta̤sû̌ta̤tòwò nuhǒ. Ta̤olò̤ asanu a ǐhto pa Yôla Plò̌shǐ Běcǎ dǒ a ǐ pa ta̤htûpwa̤nu tôpwa̤ hǒ. 9 Ta̤olò̤ ali̤ dǒ a phî̌hè pwǎ ta̤sinu, a gǔ ô̌ kû̌ ta̤bwǐdû̌sîrîhtû shû̌sho kè̌hî̌dě, ta̤olò̤ asa dǒ a ma̤cǒma̤tè̤ hǒ pa dǒ Cǒmara alô̤mô̤̌nu, a ta̤bwǐdû̌sîrîhtû shû̌sho gǔ dû̌lǒkhlo kû̌nu hǒ. 10 Ta̤olò̤ asa khònò̤̌ tômû a ta̤bwǐdû̌sîrîhtû shû̌sho tûlû̌shû̌lě dě ashû̌asho pè̤̌kè ta̤sû̌ta̤tòwò akhû̌akhî, a sô̌sô̌ kû̌ ta̤sû̌ta̤tòwò a siwi̤sòwò̤ hǎmǎkè pô̤̌nu. 11 Ta̤sû̌ta̤tòwò awî̤awô̌ mî̌ca bǎbǎkǎlè a lîtûû̌ pe tô̤̌, a lî hǎmǎkè pwǎ. Bǎbǎkǎlè ta̤olò̤ asa dǒ a ô̌měô̌gle̤ tûjû̌pwa̤ hǒo, a gǔ ô̌ kû̌ a ta̤bwǐdû̌sîrîhtû shû̌sho dǒ adû̌lǒkhlo hǒ kû̌ ta̤sû̌ta̤tòwò nuhǒ.

12 Pa sî̌ganǎ̤ tě̤tě̤mè̤̌mè̤̌ hǒ kû̌ ta̤olò̤ asanu a gǔ ô̌měô̌gle tûjû̌pwa̤ pe akhû̌akhî, pa gǔ shôbǐǐlṳ̌ bǎ kòyò kû̌ Cǒmara alě̤ayô̤̌nu pa hî̌ khubǔ hǒ. 13 Pa mî̌ asô̌sô̌kû̌ Khûmṳ̂shě nu mè̤̌tô̤̌. Pô̤̌khô Isôrělaphû̌ tokhlǒ gǔ kè̌tôwǎ̤hè tǎ̤ Khûmṳ̂shě mǐ̤sǎ dǒ a lîtîklî̌ jǎkalò̤ kû̌ kalò̤ tǎ̤mǎ̤nu, Khûmṳ̂shě hǔbǐ ǐtûû̌ amǐ̤sǎ. ^d 14 Bǎnukha Isôrělaphû̌ tokhlǒnu, a ǒò̌ te̤pe̤ bò lû̌û sǎphlǒ. Tǒ̤khònò̤̌ bǎbǎ, bǎ kòyò dô̌ htò̌lṳ̌ Khûmṳ̂shě a ta̤sû̌ta̤tòwò dǒ lî̤plò̌shǐkû akhanu, asî sî̌yaphlô tôcǒ꤮ tô̤̌. Asî kè̌ yṳ̌ǎ Běcǎ Yeshǔ Khrǐ mî̌ asǎphlǒ ô̌shôpe̤nu gǔ ô̌môhtò̌ dě sî̌yaphlôhè bǎnô̌ pwǎ. 15 Tǒ̤khònò̤̌ bǎbǎ, asî sî̌yaphlô lô̌khô khôtô̤̌. Ma̤titèhî̌dě bǎ asî dô̌ Khûmṳ̂shě a ta̤sû̌ta̤tòwò akhanu, asî sǎphlǒ lě̤ ô̌shôpe̤ pepwǎ akhû̌akhî, a sî̌yaphlôbò̌ lô̌khô tô̤̌. 16 Bǎbǎkǎlè, bǎ kòyò dǒ asǎphlǒ bǐte̤pe̤ hǒtôpwa̤ yṳ̌nǐ̤nǎ̤nǐ̤ ge hǒ Běcǎ akhanu, ta̤ dǒ a ma̤khǐma̤te̤pe̤ lû̌sǎphlǒ tokhlǒnu kòyò gǔ phǐcû̌môkè pě. ^e 17 Běcǎ dǒ he wě̤ awe̤akè hǒtôpwa̤ numî̌ Yôla Plò̌shǐ Běcǎ hǒ. Lǒ̤꤮ bò kòyò dǒ a nǐ̤bǎhǒ Yôla Plò̌shǐ Běcǎ tokhlǒnu, Yôla Plò̌shǐ Běcǎ plûhtò̌ pili cû̌ bò lû̌û hǒ. 18 Khònò̤̌ ta̤ dǒ a hǔ tě̤tṳ bǎ lǒ̤bò pa dǒ a yṳ̌ǎ Yeshǔ hǒtokhlǒ amǐ̤sǎnu a ô̌ pe tôcǒ꤮ tô̤̌. Pô̤̌nudě, khònò̤̌ pa kè̌shǐ sělě lû̌ hǒ Běcǎ a ta̤bwǐdû̌sîrîhtû dě pa htûhtò̌ sô̌sô̌kû̌ mě̤dǔ dǒ a lîshěkakha getîkhî Běcǎ a ta̤bwǐdû̌sîrîhtû tokhlǒnu hǒ. Pa kè̌shǐ sělě lû̌ hǒ Běcǎ ata̤bwǐdû̌sîrîhtû, dě Yôla Plò̌shǐ Běcǎ ma̤ bǎ hǒ pa dǒ pa gǔ sô̌sô̌hè kû̌ sô̌sô̌hè, sô̌sô̌ kû̌ pa Běcǎ dǒ a ta̤bwǐdû̌sîrîhtû hǒtôpwa̤nu hǒ.