2Cor 4 | KxfSCKXF | STEP | Pô̤̌nudě pa sǎphlǒpî̌ tô̤̌, ma̤titèhî̌dě dǒ Cǒmara abwǐsîrî akhû̌akhî, a ǐlò̤ pa ta̤ma̤ dǒ pa gǔ shôbǐǐlṳ̌ bǎ kòyò kû̌ ta̤olò̤ asanu hǒ.

2 Corinthians 4

Shôbǐǐlṳ̌ bǎ kòyò ta̤sǎlě̤we̤kè

1 Pô̤̌nudě pa sǎphlǒpî̌ tô̤̌, ma̤titèhî̌dě dǒ Cǒmara abwǐsîrî akhû̌akhî, a ǐlò̤ pa ta̤ma̤ dǒ pa gǔ shôbǐǐlṳ̌ bǎ kòyò kû̌ ta̤olò̤ asanu hǒ. 2 Ta̤lô̌ǐ lòhôǎ kòyò, ta̤ma̤ ta̤sûû̌ titètè̌꤮ tokhlǒnu bǎbǎ, ta̤ma̤ dǒ a htûhtò̌ ta̤sòwò̤̌ titètè̌꤮ tokhlǒnu bǎbǎ, pa ma̤pe tîkî̌꤮ tô̤̌ hǒ. Bǎ pa shôbǐǐlṳ̌ bǎ kòyò kû̌ Cǒmara alě̤ayô̤̌ akhanu, pa hî̌bǎ lô̌ǐplò̤ǐ kòyò tô̤̌, pa sû̌ǐlòhô panô̌tǒ̤ ayô̤̌ dǒ ashǔshawa̤ tokhlǒ tô̤̌. Dǒ Cǒmara a lô̤mô̤̌, pa hî̌bǎ titètè̌꤮ bǎbǎ, pa ma̤ta̤ titètè̌꤮ bǎbǎnu, atô lǒ̤bò pwǎ. Pô̤̌khô asî pṳ̂̌꤮ tôpwa̤ gǔ sî̌ganǎ̤ lô̌khô kû̌ asî yṳ̌ǎnṳ̌ pa ayanudě, pa hî̌cǒ, pa ma̤cǒ hǒ ta̤ pô̤̌nu hǒ. 3 Ma̤titèhî̌dě, ta̤sǎlě̤we̤kè dǒ pa shôbǐǐshǔ bǎ kòyònu, a kè̌ ô̌hǔô̌bǐ hǒnumî̌, a ô̌hǔô̌bǐ bǎ pwǎ kòyò dǒ a gǔ tǒ̤dǒ ta̤pî̌ta̤lṳ̂̌ tokhlǒ aya pwǎ. 4 Hǎkhû̌tana dǒ a pǒnǐ̤ hǎkhû̌ hǒtôdonu, a ma̤khǐ ma̤shôpe̤kè asî mǐ̤sǎ akhû̌akhî, asî kè̌shǐ gû̌ kòyò ta̤sǎlě̤we̤kè ata̤lînu tô̤̌. Pô̤̌khô kòyò hǎkhû̌phû̌ tokhlǒ gǔ sî̌yaphlô tǎ̤ Khrǐ a ta̤sǎlě̤we̤kè dǒ a shôbǐǐlṳ̌ bǎ kòyò kû̌ Khrǐ a ta̤bwǐdû̌sîrîhtû awe̤akè tǎ̤mǎ̤nu, a ma̤kiti̤kaa ǒò̌pè̌kè asî pô̤̌nu hǒ. Pwa̤ dǒ a dǔlè̌lṳ̌ tě̤tě̤mè̤̌mè̤̌ pa kû̌ Cǒmara mî̌ Khrǐ hǒ. 5 Pa cû̌ shôbǐǐlṳ̌ bǎ pawe̤pakè mè̤̌tô̤̌. Bǎbǎkǎlè pa cû̌ shôbǐǐlṳ̌ lṳ̌ bǎ kòyò kû̌ Yeshǔ Khrǐ mî̌ Běcǎ tôpwa̤ awe̤akè. Pô̤̌nudě dǒ Khrǐ akhû̌akhî, pa htû sî jû̌ tokhlǒ hǒ. 6 Bǎ Cǒmara bô̌lò̤ ta̤lǒ̤꤮ bò akhanu, a hî̌ kû̌, “Ta̤khǐ gǔ sǒ tephekè cû̌kè dě ta̤lî gǔ ô̌lṳ̌htò̌ pû nî̌,” a hî̌ pô̤̌nu. Cǒmara ma̤hto bǎ pa pô̤̌nu hǒ. Bǎ pa sî̌ganǎ̤ Khrǐ khôtô̤̌ akhanu, pa sǎphlǒ a khǐsiwi̤ pwǎ bǎbǎkǎlè Cǒmara ma̤lîge bǎ pa sǎphlǒ hǒ. Pô̤̌khô pa gǔ sî̌yaphlôwô̌ Cǒmara a ta̤bwǐdû̌sîrîhtû dǒ a dǔlè̌lṳ̌htò̌ tutṳ̌ kû̌ Khrǐ tokhlǒnu, a mî̌ pwa̤ dǒ a dǐshělîhtò̌ bǎ pa sǎphlǒ a ta̤gènè̤ tokhlǒ tôpwa̤ hǒ. ^a

7 Bǎbǎkǎlè pa dǒ a shôbǐǐlṳ̌ bǎ kòyò tokhlǒnu, a sô̌sô̌ pwǎ kû̌ gopo̤hǎ dǒ kòyò shû̌nṳ̌be a kû̌ ta̤lě̤dû̌pwî̤htû dǒ akû tômè nuhǒ. Ta̤lě̤dû̌pwî̤htû numî̌ ma̤ ta̤sǎlě̤we̤kè nuhǒ. A ma̤pô̤̌nu ma̤titèhî̌dě pô̤̌khô Cǒmara gǔ dǔlè̌lṳ̌ kû̌ ta̤pô̤ta̤phǎ shû̌sho numî̌ a ô̌ dǒ pakû hǎhtò̌ mè̤̌tô̤̌, a ô̌ dǒ lû̌ô̌ hè pwǎ. 8 Pa kè̌shǐbǎ dû̌wî̤ kû̌ ta̤pò̤̌ta̤sha bǎbǎkǎlè a ma̤pè̤̌nô̌ kû̌ pa tôkhò̌꤮ tô̤̌. Tôplǎplǎnu pa tôbǎ ma̤hî̌tènu pa sî̌ganǎ̤ pe tôcǒ꤮ tô̤̌ bǎbǎkǎlè pa sǎphlǒpî̌ nô̌ gû̌ kòyò tôkhò̌꤮ tô̤̌. 9 Kòyò ma̤jî̌ma̤jû̌ pa bǎbǎkǎlè Cǒmara wîkè pa tô̤̌ lè. Asî ma̤lò̤khǔpo̤ pa bǎbǎkǎlè pa ihtǒ sô̌ dě pa ma̤ sělě gutṳ̌pe pwǎ ta̤ma̤ ya. 10 Pa cû̌ bǎtè꤮ tôkû bǎbǎ, pa bǎkhòbǎ ta̤jî̌ta̤jû̌ pṳ̂̌꤮ tôplǎ asô̌sô̌kû̌ pa kè̌shǐbǎ kû̌ ta̤sinu pa ô̌htûpwa̤ asô̌sô̌kû̌ Khrǐ dǒ a ô̌htûpwa̤ bǎ hǎkhû̌ akhanu. Pô̤̌khô kòyò gǔ kè̌shǐ kû̌ Khrǐ ô̌htûpwa̤ dǒ pakû dě a ma̤jè̌ pa pṳ̂̌꤮ tôplǎ ayanu, ta̤nutokhlǒ htûhtò̌ pwǎ. 11 Pa kòyò ta̤ô̌htûpwa̤ hǒtôhtunu, pa gû̌ Yeshǔ nô̌kò akhû̌akhî, pa bǎ kè̌shǐbǎ kû̌ ta̤tirǐsò̌ ǐsha dǒ kòyò gǔ ma̤si pa. Pô̤̌khô kòyò gǔ kè̌shǐtǒ̤ kû̌ Khrǐ ô̌htûpwa̤ dǒ panǎ̤glǒ dǒ tôni̤kha pě a sijò akûnu, pa bǎ kè̌shǐbǎ pô̤̌o pwǎ. 12 Dǒ pa shôbǐǐlṳ̌ bǎ kòyò ta̤sǎlě̤we̤kè akhû̌akhî, pa kè̌shǐ sala̤ kû̌ kòyò glè̌ ma̤si pa. Bǎbǎkǎlè dǒ pa kè̌shǐ pô̤̌o akhû̌akhî, sî nǐ̤bǎ ta̤htûpwa̤ hǒ.

13 Lî̤plò̌shǐkû hî̌ kû̌, “He yṳ̌ǎ Cǒmara, dě he gǔ shôbǐǐlṳ̌ bǎ kòyò pě,” A ma̤pô̤̌nu, pa yṳ̌ǎ Cǒmara akhû̌akhî, pa gǔ shôbǐǐlṳ̌ bǎ kòyò kû̌ Khrǐ a ta̤sǎlě̤we̤kè awe̤akè pě. ^b 14 Pa lě̤ htûhtò̌ hǒ ta̤tôcǒ꤮ nô̌ kû̌ Běcǎ Yeshǔ hǒ akhû̌akhî, pa sî̌ganǎ̤ kû̌ Cǒmara dǒ a ma̤htûpwa̤ getîkhî pa Běcǎ Yeshǔ hǒtôpwa̤nu, a gǔ ma̤htûpwa̤ getîkhî gû̌ pa pě. Htokhôtô̤̌ a gǔ ma̤htûpwa̤ getîkhî gû̌ sî kû̌ pa dǒ ta̤si pě dě a gǔ kaǎge ô̌plǒbò pa dǒ a lô̤mô̤̌ pě. 15 Pô̤̌khô a gǔ nǐbwǐsirî dǒ sîya dě, lǒ̤꤮ bò ta̤jî̌ta̤jû̌ hǒtokhlǒnu, pa khòsǎphlǒhtû bò pṳ̂̌꤮ tôcǒ dě pa shôbǐǐlṳ̌ bǎ kòyò kû̌ ta̤sǎlě̤we̤kè. Htǔ꤮ kòyò saprṳ̂ kè̌shǐ hèbǎwô̤̌ hǒ Cǒmara abwǐsîrî akhapěnu, kòyò dǒ a gǔ hî̌bwǐhî̌sîrî Cǒmara tokhlǒ gǔ ô̌ wô̤̌pě, dě kòyò lǒ̤꤮ bò gǔ htû̌sò̌htò̌ Cǒmara pě.

Ô̌htûpwa̤ kû̌ ta̤yṳ̌

16 Dǒ hǒtokhlǒ akhû̌akhî, dě pa sǎphlǒpî̌ tîkî̌꤮ tô̤̌. Panǎ̤glǒ akhû̌aǎ tôplǎtîkî̌, tôplǎtîkî̌ a khû̌shiǎjǎ hè bǎbǎkǎlè pa sǎphlǒnu, tôni̤ kû̌ tôni̤ a hèshû̌shohtò̌ pwǎ. 17 Ma̤titèhî̌dě ta̤pò̤̌ta̤sha dǒ pa khòbǎ a bǎ hǎkhû̌ hǒtokhlǒ numî̌ tòshò̌phû̌ pwǎ. Pa kè̌ tûlû̌kè kû̌ ta̤tôta̤wô̌ dǒ pa gǔ nǐ̤bǎ a htǔ nô̌kòpě tôhtu pě tokhlǒ hǒnumî̌, amè̤̌ kû̌ tôcǒ hǐ tô̤̌. Bǎ hǎkhû̌nu pa khòbǎ ta̤pò̤̌ta̤sha hǒtokhlǒ bǎbǎkǎlè dǒ mǒkhû̌ pěnu ta̤bwǐdû̌sîrîhtû tûjû̌pwa̤ dǒ awî̤awô̌ khlo, dě alò̤htǒ lǒkhlo kû̌ ta̤pò̤̌ta̤sha dǒ pa khòbǎ dǒ hǎkhû̌nu, pa gǔ nǐ̤bǎ pě. 18 Pô̤̌nudě, ta̤pò̤̌ta̤sha dǒ he kè̌shǐbǎ hǒtokhlǒnu, he bè̌dubè̌nǎ̤ nô̌ a tôcǒ꤮ tô̤̌. Ta̤ dǒ a ô̌ icumě dǒ he sǎphlǒkû tôcǒnu amè̤̌hǒ ta̤tôta̤wô̌ dǒ Cǒmara gǔ ǐ he pěnu pwǎ. Ta̤ dǒ pa kè̌shǐjò tokhlǒnu, a gǔ ô̌lṳ̌yî̤ pwǎ tashò̌phû̌nô̤̌ pwǎ, bǎbǎkǎlè ta̤ dǒ pa kè̌shǐjòtô̤̌ tokhlǒnu, a gǔ ô̌yî̤ tûjû̌pwa̤ pě.