2Cor 5 | KxfSCKXF | STEP | Pa nǎ̤glǒ dǒ asô̌sô̌kû̌ hǐ dǒ pa ô̌ ǐ a dǒ hǎkhû̌ hǒtômènu, htû̌꤮ kòyò ma̤pò̌kè a pěnu, a sǎyṳ hî̌ kû̌ htû̌꤮ pa si pěmî̌, pa sî̌ganǎ̤ kû̌ Cǒmara gǔ ma̤bǎ pa hǐsa amè̤̌kû̌ panǎ̤glǒ asa dǒ mǒkhû̌nu hǒ. A gǔ ma̤ kû̌ anǎ̤ dě hǐsa amè̤̌kû̌ panǎ̤glǒ asanu, a sijò pe tô̤̌, a gǔ ô̌měô̌gle̤ tûjû̌pwa̤ pě.

2 Corinthians 5

1 Pa nǎ̤glǒ dǒ asô̌sô̌kû̌ hǐ dǒ pa ô̌ ǐ a dǒ hǎkhû̌ hǒtômènu, htû̌꤮ kòyò ma̤pò̌kè a pěnu, a sǎyṳ hî̌ kû̌ htû̌꤮ pa si pěmî̌, pa sî̌ganǎ̤ kû̌ Cǒmara gǔ ma̤bǎ pa hǐsa amè̤̌kû̌ panǎ̤glǒ asa dǒ mǒkhû̌nu hǒ. A gǔ ma̤ kû̌ anǎ̤ dě hǐsa amè̤̌kû̌ panǎ̤glǒ asanu, a sijò pe tô̤̌, a gǔ ô̌měô̌gle̤ tûjû̌pwa̤ pě. 2 Bǎbǎkǎlè, pa kè̌shuǐ sǎyṳ geô̌ hǐ dǒ mǒkhû̌ hǒtômè akhû̌akhî, bǎ pa ô̌pe dǒ hǐ bǎ hǎkhû̌nu tômèkû akhanu, pa kookasha nǎsǔ mî̌ca. 3 Pô̤̌khô panǎ̤glǒ a gǔ ô̌ sělě ayanu, Cǒmara gǔ ǐ tèplè̌ panǎ̤glǒ asanu dǒ mǒkhû̌ pě. 4 Bǎ pa ô̌pe hǐ amè̤̌kû̌ panǎ̤glǒ bǎ hǎkhû̌ tômèkû akhanu, pa kè̌shǐbǎ kû̌ ta̤pò̤̌ta̤sha akhû̌akhî, pa ta̤kookasha. He hî̌ kû̌ pa sǎyṳ ô̌tephekè kû̌ panǎ̤glǒ pô̤̌nu mè̤̌tô̤̌. He sǎyṳ hî̌ kû̌, pô̤̌khô panǎ̤glǒ dǒ a sijònu, a gǔ htû̌lè̌ tèplè̌kè kû̌ panǎ̤glǒ dǒ a htûpwa̤ tûjû̌pwa̤ pě ayanu, pa sǎyṳ geô̌ jî̌jî̌ dǒ nǎ̤glǒ asanu akû hǒ, pô̤̌nu pwǎ. 5 Pwa̤ dǒ a tîwî̌tòwò nǎ bǎ pa dǒ pa gǔ nǐ̤bǎ nǎ̤glǒ asa tôpwa̤ numî̌ Cǒmara nuhǒ. Htokhôtô̤̌ a ǐlò̤ pô̤̌ pa Yôla Plò̌shǐ Běcǎ numî̌ a sô̌sô̌kû̌ ta̤ma̤mǎnǎ dǒ aměagle tôcǒ dě a ma̤lǒma̤be bǎ pa lǒ̤꤮ bò a olò̤ nutokhlǒ hǒ.

6 Pô̤̌nu akhû̌akhî pa yṳ̌ǎ tě̤tě̤mè̤̌mè̤̌ ta̤nutokhlǒ hǒ. Pa nǎ̤glǒ kè̌ ô̌ pepwǎ dǒ hǎkhû̌ akû pwǎ numî̌, pa cû̌ ô̌ bǎ Běcǎ Yeshǔ lǎ̤ô̌ gûlǎ̤nu mè̤̌khôtô̤̌. 7 Ma̤titèhî̌dě pa ô̌htûpwa̤ kû̌ ta̤ dǒ pa yṳ̌ǎnṳ̌ a tokhlǒ pwǎ, pa ô̌htûpwa̤ kû̌ ta̤ dǒ pa kè̌shǐ a nutokhlǒ mè̤̌tô̤̌. 8 He gǔ hî̌ kû̌, pa yṳ̌ǎ Běcǎnu ashû̌asho dě pa sǎyṳ hǎhtò̌cû̌kè kû̌ panǎ̤glǒnu dě pa sǎyṳcû̌ ô̌plǒkè kû̌ Běcǎ dǒ mǒkhû̌ hǒ. 9 Bǎbǎkǎlè, pa ô̌ bǎtè tôkû̌꤮ bǎbǎ, pa ô̌ pepwǎ bǒo bǎbǎ, pa cû̌ ô̌ hǐ dǒ mǒkhû̌ pě bǎbǎ, pa sǎyṳ ma̤tô pwǎ Cǒmara asǎphlǒ pwǎ. 10 Ma̤titèhî̌dě, dǒ nô̌kòpěmî̌ pa pṳ̂̌꤮ tôpwa̤ bǎhè ô̌bò dǒ Khrǐ lǎ̤cî̌htò̌ tòcòhta alô̤mô̤̌ pě. Bǎ pa ô̌ dǒ hǎkhû̌ akhanu, lǒ̤bò pa ma̤hto ta̤ dǒ awô̌ tokhlǒnu bǎbǎ, ta̤ dǒ asǔ tokhlǒnu bǎbǎ, pa gǔ nǐ̤bǎ tîkhîsô̌ ta̤ma̤nǐ̤khû̌kǎ pě ya, mî̌ pa nǐ̤bǎ tô̤̌ yanu, a gǔ ma̤kè̌kè̌ bò pa pṳ̂̌꤮ tôpwa̤ pě. ^a

Dǒ Khrǐ akhû̌akhîdě pa htûhtò̌ Cǒmara a khô

11 Ma̤titèhî̌dě pa sî̌ganǎ̤ kû̌ dǒ nô̌kòpěnu, Běcǎ gǔ ma̤kè̌kè̌ bò kòyòhǎkhû̌phû̌ tokhlǒ ata̤ma̤ pô̤̌nu pě akhû̌akhî, pa gǔ ǐsha bè̌dubè̌nǎ̤ mî̌ca yǎ pě. Pô̤̌nudě pô̤̌khô kòyò gǔ yṳ̌nǐ̤nǎ̤nǐ̤ ge Běcǎ Yeshǔ ayanu, pa sǎphlǒshû̌ shôbǐǐlṳ̌ bǎ kòyò hǒ. Mî̌titè̤ ô̌ kwè̌ dǒ pa sǎphlǒkûnu, Cǒmara sî̌ganǎ̤ bò kû̌ anǎ̤ pwǎ. Pô̤̌nudě, pa mî̌ kòyò hî̌tè tokhlǒnu, he kè̌shuǐ kû̌ sî bǎ sî̌ganǎ̤hè nò pě pwǎ. 12 Gènè̤ tǎ̤ lô̌khô kû̌ pa sǎyṳ hî̌bǎ htò̌mǒhtò̌phô̌ǐ sô̌ panǎ̤ pô̤̌nu tǎ̤mǎ̤. Pa hî̌ sî pô̤̌nu ma̤titèhî̌dě pô̤̌khô sî gǔ hî̌ geshěshu jò kòyò dǒ a pîjî̌ǐsho pa nutokhlǒ ayanu, pa sǎyṳ nosî̌ganǎ̤ tě̤tě̤mè̤̌mè̤̌ sî kû̌ pa ma̤kwè̌꤮ titè pô̤̌nu pwǎ. Kòyò nutokhlǒ mî̌ a bè̌dû̌ phî̌htò̌lǒ tûû̌ anǎ̤ pwǎ ta̤sî̌ta̤jò̌ dǒ a ô̌lṳ̌ dǒ akhlo nutokhlǒ pwǎ, a bè̌dû̌ kû̌ kòyò ta̤ dǒ a ô̌ dǒ kòyò tôpwa̤pwa̤ a sǎphlǒkû nutokhlǒ tô̤̌. 13 Kòyò kè̌ hî̌ pa kû̌ kòyò kimwi kè̌hî̌dě, lǎ̤hî̌ nô̌ tô̤̌, lǒ̤bò pa ma̤ tokhlǒ numî̌ Cǒmara aya pwǎ. Kòyò kè̌ hî̌ pa kû̌ pa ma̤ta̤ tô kè̌hî̌dě, amè̤̌, pa ma̤ numî̌ abǎ nǐ̤bwǐnǐ̤sirî dǒ sîya nǒ̤꤮. 14 Khrǐ ata̤mô̤ ma̤pè̤̌kè pa akhû̌akhî, pa ô̌htûpwa̤ bǎ dǒ Cǒmara aya pô̤̌o hǒ. Pa sî̌ganǎ̤ kû̌ Khrǐ si bǎ kòyò pṳ̂̌꤮ tôpwa̤ aya. Yô̤̌sǎyô̤̌mû mî̌ kòyò pṳ̂̌꤮ tôpwa̤ si kû̌ Khrǐ hǒ. 15 Pa dǒ a htûpwa̤ tokhlǒnu, pô̤̌khô pa gǔ ô̌htûpwa̤ sělě pô̤̌ pa sǎphlǒ a ta̤sǎyṳsǎbǎ nutokhlǒ tô̤̌, pô̤̌khô pa gǔ ô̌htûpwa̤ sělě pô̤̌ pwa̤ dǒ a tṳ̌sikhòsi hto dǒ paya dě a ihtǒhtûpwa̤ getîkhî hto nutôpwa̤ ayanu, Běcǎ tṳ̌sikhòsi bǎ dǒ pa pṳ̂̌꤮ tôpwa̤ aya hǒ.

16 Pô̤̌nudě khònò̤̌ pa htûhtò̌ kû̌ Khrǐ tôcǒ꤮ nô̤̌ akhû̌akhî, pô̤̌ kòyò dǒ a yṳ̌ǎ Khrǐ tô̤̌ tokhlǒ bè̌dû̌ ta̤ô̌lṳ̌ dǒ akhlo tokhlǒnu, pa bè̌dû̌ pe pô̤̌nutô̤̌ hǒ. Dǒ awǐkha pa gènè̤sǔ Khrǐ pô̤̌nudě bǎbǎkǎlè khònò̤̌ pa gènè̤sǔ pe a pô̤̌nu tô̤̌ hǒ. 17 Kòyò tôpwa̤pwa̤ dǒ a htûhtò̌ kû̌ Khrǐ tôcǒ꤮ nô̤̌nu, a htûhtò̌ kòyò tôpwa̤ dǒ Cǒmara bô̌lò̤ tèplè̌sa lû̌û hǒ. A wîkè a ta̤ô̌htûpwa̤ ali̤ tokhlǒ dě a ô̌htûpwa̤ tèplè̌kè dǒ asa hǒ. 18 Lǒ̤bò ta̤nutokhlǒ numî̌ Cǒmara ma̤ bò pwǎ. Dǒ Khrǐ hè ma̤ bǎ pa akhû̌akhî, pa htûhtò̌ Cǒmara a khô hǒ. Dě a ǐlò̤ pa ta̤phî̌ta̤ma̤ dǒ pa gǔ cû̌ shôbǐǐlṳ̌ bǎ kòyò kû̌ Khrǐ ma̤htûhtò̌ getîkhî sô̌ pa kû̌ Cǒmara a khô, pô̤̌nu pwǎ. 19 Pa sǎyṳ numî̌ pô̤̌hî̌tèhî̌dě, dǒ Khrǐ akhû̌akhîdě Cǒmara ma̤htûhtò̌ kòyòhǎkhû̌phû̌ pṳ̂̌꤮ tôpwa̤ kû̌ a khô hǒ. Cǒmara bè̌ pe kòyòhǎkhû̌phû̌ tokhlǒ a ta̤ma̤sǔ tô̤̌ hǒ. Dě a ǐlò̤kè pa ta̤ma̤nu dǒ pa gǔ cû̌ shôbǐǐlṳ̌ bǎ kòyò kû̌ Cǒmara ma̤htoge sô̌ kòyòhǎkhû̌phû̌ tokhlǒ kû̌ a khô hǒ. 20 Pô̤̌nudě, khònò̤̌ pa htû bǎ pwa̤hî̌bǎta̤ dǒ Khrǐ agûlǎ̤. Cǒmara běcǎ sanǎ̤ nokwigwèbǎǐ tutṳ̌ pa kû̌ sî dǒ sî gǔ ganǎ̤de pa ta̤shôbǐǐlṳ̌ sî hǒo. Dǒ Khrǐ agûlǎ̤nu pa kwi sǎyṳ sî, noma̤ lô̌khô Khrǐ kû̌ a gǔ ma̤htûhtò̌ bǎ tîkhî sô̌ sî kû̌ Cǒmara akhô nu nî̌꤮. 21 Khrǐnu ata̤sǔ ô̌ tôcǒ꤮ tô̤̌. Bǎbǎkǎlè, pô̤̌khô a gǔ plî̌lîkè bǎ pa ta̤sǔ ashû̌ tokhlǒ ayanu, Cǒmara notṳ̌sikhòsi lû̌û dǒ pa ta̤sǔ aya hǒ. Dǒ Khrǐ ma̤ bǎ pa pô̤̌nu akhû̌akhî, pa gǔ htûhtò̌ kû̌ Khrǐ tôcǒ꤮ nô̤̌ hǒ dě, Cǒmara gǔ bè̌cǒbè̌tè̤ pa dǒ alô̤mô̤̌ pě.