2 Corinthians 6
1Pa mî̌ pwa̤ma̤wô̤̌wô̤̌ta̤ kû̌ Cǒmara tokhlǒ akhû̌akhî, pa shò̌gû̌ sî kû̌ sî gǔ ô̌htûpwa̤ pô̤̌ Cǒmara sǎyṳ no ô̌htûpwa̤ sînu. Sî mî̌ kòyò dǒ a nǐ̤bǎ hto Cǒmara abwǐsîrî tokhlǒ hǒ akhû̌akhî, sî bǎ ô̌htûpwa̤ lô̌khô pô̤̌nu. 2Ma̤titèhî̌dě Cǒmara hî̌ kû̌, “Bǎ shěkhǎ hètǒ̤ dǒ he tôbǎ kè̌dû̌ sî nutôni̤nu, he ganǎ̤de sî ta̤kwicaba hǒ, bǎ shěkhǎ hètǒ̤ dǒ he tôbǎ ma̤hǎplǎge sî nutôni̤nu, he ma̤jè̌ sî hǒ.” a Pô̤̌nudě, he hî̌ sî, ganǎ̤de lô̌khô, khò̌tini̤ mî̌ lṳmṳ̌ni̤ dǒ Cǒmara kè̌dû̌nǐ̤ sî alṳmṳ̌ni̤ hǒ. Khò̌tini̤ mî̌ ta̤ma̤hǎplǎge sî alṳmṳ̌ni̤ hǒ. 3Pa shôbǐǐ bǎ kòyò kû̌ Yeshǔ Khrǐ awe̤akè pô̤̌khô kòyò gǔ htè̌shěshu tô̤̌ nudě, ta̤ma̤ dǒ a htûhtò̌ asî ta̤pi̤jî̌ǐsho tokhlǒnu pa ma̤ tôcǒ꤮ tô̤̌. 4Pa ma̤ ta̤ titètè̌꤮ bǎbǎ, pô̤̌khô kòyò gǔ kè̌shǐ kû̌ pa mî̌ Cǒmara apwa̤ma̤ta̤phû̌ tokhlǒ ayanu, pa dǔlè̌lṳ̌ bǎ kòyò kû̌ pa khòsǎphlǒhtû ta̤jî̌ta̤jû̌ tokhlǒ, kû̌ pa khò shèwè̤ ta̤tokhlǒ kû̌ pa khòbǎ ta̤pò̤̌ta̤sha sîtokhlǒ hǒ. 5Kòyòpo̤ kòyòplè pa. Kòyò dǒtě̤ pa dǒ apô̤kû. Kòyò ma̤ shû̌shushû̌shǎ pa dě kòyò wṳ̂̌hǎhtò̌cû̌kè pa, pa ma̤ta̤ sǎphlǒlò̤de pṳ̂̌ni̤pṳ̂̌sa, tanǎ̤mṳ̌shî̌ hǎmôô̌nṳ̌ tô̤̌nu a ô̌ asa ô̌ dû̌wî̤lî, htodě ǎnṳ̌ônṳ̌ tô̤̌ numî̌ a ôô. b 6Dǒ pa htû Cǒmara apwa̤ma̤ta̤phû̌ tokhlǒ akhû̌akhî, pa dǔlè̌lṳ̌ bǎ kòyò kû̌ pa sǎphlǒ ma̤mṳ̂̌plî, pa ta̤sî̌khû̌sî̌ya, pa ta̤sǎphlǒhtû, pa ta̤sǎyṳgwèbǎǐ kòyò tokhlǒ hǒ. Yôla Plò̌shǐ Běcǎ ô̌ dǒ pakû dě pa mô̤ lǒ̤sû̌lǒ̤sò̌ kòyò. 7Pa sû̌ǐ bǎ kòyò Cǒmara alě̤ayô̤̌ dǒ acǒatè̤ tokhlǒ, dě Cǒmara a ta̤pô̤ta̤phǎ ashû̌asho ma̤jè̌ pa. Pô̤̌nu akhû̌akhî pa hǒtokhlǒnu Cǒmara ǐlṳ̌phlô kû̌ pa htû apwa̤ma̤ta̤phû̌ tokhlǒ hǒ. Pa ô̌ kû̌ lǎ̤takaǐ dǒ lǎ̤tě̤tṳnu kû̌ nò̌she amè̤̌kû̌ ta̤tě̤ta̤mè̤̌ dǒ Cǒmara ǐ pa tokhlǒnu, dě a sô̌sô̌ kû̌ kliphû̌ tôpwa̤ noǎ a ta̤wè̤̌ta̤htò dǒ a gǔ shělò̤ aya nuhǒ. 8Pwa̤ htû̌sò̌ pa mî̌ a ô̌ô̌, pwa̤ pî̤jî̌ pa mî̌ a ô̌ô̌. Pwa̤ hî̌bǎwô̌ pa mî̌ a ô̌ô̌, pwa̤ hî̌phǔmò̤̌ pa mî̌ a ô̌ô̌. Pwa̤ hî̌ pa kû̌ kòyòlòhô tokhlǒ numî̌ a ô̌ô̌, bǎbǎkǎlè pa mî̌ kòyò dǒ a hî̌bǎcǒ ta̤ tokhlǒ pwǎ. 9Kòyò dǒ a gènè̤pî̌tî̌ panu a ô̌ tokhlǒ bǎbǎkǎlè pawe̤pakè nu, Cǒmara sî̌ganǎ̤ bò pwǎ. Pa glè̌ sitètè̤̌ taga bǎbǎkǎlè pa ô̌htûpwa̤ pe tǒ̤ khònò̤̌. Kòyòpo̤ kòyòplè pa bǎbǎkǎlè pa si khôtô̤̌tô̤̌. 10Pa kè̌shǐ dû̌wî̤ ta̤pò̤̌ta̤sha bǎbǎkǎlè pa sǎlě̤ pṳ̂̌꤮ taplǎ. A sô̌sô̌ kû̌ pa shuphǔshèwè̤ mî̌ca bǎbǎkǎlè dǒ pa sû̌ǐtòwòǐ bǎ kòyò akhû̌akhî, dě kòyò dû̌yò̤̌htò̌sa dǒsû̌dǒsò̌ tôkhônu a ô̌ dû̌wî̤ hǒ. A sô̌sô̌ kû̌ pata ô̌ gû̌ kòyò tôcǒ꤮ tô̤̌ bǎbǎkǎlè pa nǐ̤bǎ bòkè ta̤pṳ̂̌꤮ tocǒ hǒ. 11Khôbǒsû̌ Wî̤̌kôrituphû̌ sî꤮, lǒ̤꤮ bò ta̤ dǒ a ô̌ dǒ pa sǎphlǒkû tokhlǒnu, pa shôbǐǐlṳ̌ bǎbò sî hǒ. Pa mô̤ǐ jòjî̌꤮ sî tô̤̌. 12Pa mî̌ kòyò dǒ a phî̌ge tîkhî ata̤mô̤ tokhlǒ mè̤̌tô̤̌. Kòyò dǒ a phî̌ge tîkhî ata̤mô̤ tokhlǒ numî̌ sî hǒ. 13Khònò̤̌dě he gǔ hî̌ sî pô̤̌ hephû̌heli̤ kû̌ henǎ̤nu. Mô̤ǐge tîkhîsô̌ pa pô̤̌ pa mô̤ sînu.Sî mî̌ Cǒmara dǒ a htûpwa̤ tôpwa̤ a ta̤lṳhtò̌hô
14Pṳ̌wè̤̌ sî, pô̤̌khô pṳ̂̌ dò̌htò̌ a iè̌ nu, dò̌htò̌ cu iè̌ kû̌ kòyò dǒ a yṳ̌ǎ pa Běcǎ Yeshǔ tô̤̌ nutokhlǒ tǎ̤mǎ̤ nî̌꤮. Ma̤titèhî̌dě acǒ kû̌ ategwenu a jèmè̤̌ icujò lû̌û tô̤̌. A lî kû̌ akhǐnu bǎbǎ, a ô̌cujò lû̌û tô̤̌tô̤̌. 15Khrǐ kû̌ hǎkhû̌tana cû̌ sǎphlǒ lò̤tôlò̤bǎ jò lû̌û hî̌tè? Pô̤̌nudě Khrǐ aphû̌ali̤ tôpwa̤ kû̌ hǎkhû̌tana aphû̌ali̤ tôpwa̤nu a cû̌ sǎphlǒ icujò lû̌û tômènô̤̌ hî̌tè? 16Cǒmara a ta̤lṳhtò̌hônu a ô̌plǒjò kû̌ ta̤yô̤ta̤gî̌ ya. c Pô̤̌nudě, pa tokhlǒ numî̌ Cǒmara dǒ a htûpwa̤ tôpwa̤ a ta̤lṳhtò̌hô. Cǒmara hî̌ kû̌, “He gǔ hèô̌ dǒ hekòyò tokhlǒ a sǎphlǒkû pě dě he gǔ cû̌ kû̌ asî pě. Dě he gǔ htû asî Cǒmara pě, dě asî gǔ htû hekòyò tokhlǒ pě.” d 17Htokhôtô̤̌ Cǒmara hî̌ pô̤̌ kû̌, “Hǎhtò̌cû̌ tephekè dǒ asî aklanu dě cû̌ô̌ khô̌kè kû̌ asînu. Ta̤ dǒ a ma̤mṳ̂̌plî tô̤̌ tokhlǒnu tô̌bǎ tǎ̤ a tôcǒ꤮ tǎ̤mǎ̤, sî kè̌ ma̤pô̤̌nu mî̌ he kaǎshǔ nô̌ sî pě pwǎ. e 18Dě he gǔ htû sîpha pě. Dě sî gǔ htû hephû̌heli̤ tokhlǒ pě,” f Běcǎ dǒ apô̤aphǎ tôpwa̤ hî̌ pô̤̌nu.
Copyright information for
KxfSCKXF