2 Corinthians 7
1Khôbǒsû̌ sî lǒ̤bò Cǒmara olò̤ tokhlǒ numî̌ paya lǒ̤bò hǒ. Pô̤̌nudě, pa gǔ cû̌ tephekè kû̌ panǎ̤glǒ a ta̤sǎyṳ phû̌mò̤̌ tokhlǒ kû̌ pa sǎphlǒ a ta̤gènè̤ phû̌mò̤̌nu tokhlǒ tǎ. Dě dǒ pa ǐsha bè̌dubè̌nǎ̤ Cǒmaranu akhû̌akhîdě pa gǔ htûhtò̌ lô̌khô kòyò dǒ a aplò̌shǐ tokhlǒ tǎ.Khûpò̌lǔ a ta̤sǎlě̤sǎlò̤
2Pṳ̌wè̤̌ sî, dǔlṳ̌ mò̌ lô̌khô sî ta̤mô̤ panu nî̌꤮. Pa ma̤sǔma̤plě nô̌ kòyò tôpwǎ̤꤮ tô̤̌. Pa ma̤pò̤̌ma̤sha nô̌ kòyò tôpwǎ̤꤮ tô̤̌. Pa cû̌ǎtṳ̌ôkè nô̌ kòyòkhû̌ tôpwǎ̤꤮ tô̤̌. 3He hî̌ pô̤̌o dě he sǎyṳ bè̌ sî ta̤sǔ pô̤̌nu mè̤̌tô̤̌. Ma̤titèhî̌dě pô̤̌ he hî̌hto sînu, sî mî̌ kòyò dǒ pa mô̤ǐ a tokhlǒ. Pô̤̌nudě pa si bǎbǎ, pa htûpwa̤ bǎbǎ, pa mô̤ǐ sî pwǎ. 4He yṳ̌ǎ tě̤tě̤mè̤̌mè̤̌ jî̌ sî dě he htû̌sò̌ǐ jî̌ sî pṳ̂̌꤮ taplǎ nǒ̤. Pô̤̌nu akhû̌akhî pa kè̌shǐbǎ dû̌wî̤ kû̌ ta̤pò̤̌ta̤sha bǎbǎkǎlè pa sǎlě̤sǎlò̤ pwǎ, htokhôtô̤̌ pa sǎphlǒmô̤ pwǎ. 5Bǎ pa hètǒ̤ dǒ Mèsidûnǐ̤yagǎ akhanu, ta̤pò̤̌ta̤sha nî̌ a gû̌ kû̌ pa, a ô̌kǔ tô̤̌, ma̤titèhî̌dě bǎnukha kòyò dǒ a sǎkhî̌ pa tokhlǒnu a hètǒ̤klǐ pa dě pa sǎphlǒgû̌ sǎphlǒgè̌ jî̌jî̌. a 6Bǎbǎkǎlè Cǒmara dǒ a ǐshoǐshò̌htò̌ kòyò dǒ a sǎphlǒpî̌ tokhlǒ tôpwa̤nu, a ǐkhû̌ǐǎ pa hǒ, ma̤titèhî̌dě Khûtǐtǔ hètǒ̤ kû̌ pa hǒ. 7Khûtǐtǔ hètǒ̤ dě pa sǎlě̤ gutṳ̌ mè̤̌tô̤̌, a shôbǐǐ bǎ pa kû̌ sî ǐkhû̌ǐǎ lû̌û hî̌tènu akhû̌akhî a ma̤sǎlě̤ mî̌ca pa. A shôbǐǐlṳ̌ bǎ pa kû̌ sî nǎsǔ kè̌shǐ he nu, htodě sî gènè̤sǎplǎ̤ǐ sî ta̤ma̤sǔ tokhlǒ, htokhôtô̤̌ sî ô̌ tîwî̌tòwò nǎhto dǒ sî gǔ hî̌bǎ takabǐ bǎ he, a shôbǐǐlṳ̌ bǎ he pô̤̌o akhû̌akhî, khònò̤̌dě sǔ he sǎlě̤khlo pěpě. 8Lî̤ dǒ he wě̤cû̌ bǎ sî dǒ awǐkha tôbǎ numî̌, a kè̌ ma̤sǎplǎ̤ jî̌ sî bǎbǎkǎlè he gènè̤ gû̌gè̌ bǎ tô̤̌, he bè̌ kû̌ awô̌ pwǎ. He sûcû̌ bǎ sî lî̤ akhanu, he kè̌shǐ kû̌ a ma̤sǎplǎ̤ sî akhû̌akhî, he gènè̤ gû̌gè̌ tûû̌, bǎbǎkǎlè a ma̤sǎplǎ̤ pwǎ sî tashò̌phû̌nô̤̌ pwǎ. 9Bǎbǎkǎlè khònò̤̌, he sǎlě̤ hǒ. Sî sǎplǎ̤ akhû̌akhîdě he sǎlě̤ pô̤̌nu mè̤̌tô̤̌. Sî ta̤sǎplǎ̤nu, a dǐhtûhtò̌ sî ta̤yò̤lǎ̤plǎdî̌kè sîsǎphlǒ akhû̌akhîdě he sǎlě̤ pwǎ. Cǒmara sǎyṳgwèbǎǐ kòyò dǒ a sǎplǎ̤sǎyṳ pô̤̌nu tokhlǒ hǒ. Pô̤̌nu akhû̌akhî pa ma̤pò̤̌ma̤sha sî tôcǒ꤮ tô̤̌. 10Ma̤titèhî̌dě, ta̤sǎplǎ̤ dǒ Cǒmara dǐhtûhtò̌ numî̌, a no htû̌lè̌ tèplè̌kè pa sǎphlǒ dǒ pa gǔ nǐ̤bǎ ta̤phǔgekhò̌ge aya pwǎ akhû̌akhî, pa lǎ̤lṳ̂ gènè̤kû̌ ta̤sǎplǎ̤ dǒ Cǒmara dǐhtûhtò̌ nutokhlǒ tô̤̌. Bǎbǎkǎlè kòyòhǎkhû̌phû̌ alǎ̤klô sǎplǎ̤ tokhlǒnu, a dǐô̌htò̌ pwǎ ta̤si pwǎ. 11Dǒ sî sǎplǎ̤sǎyṳ akhû̌akhîdě Cǒmara ma̤ bǎ sî hî̌tè nu, kè̌mò̌ lô̌khô! Sî sǎphlǒshû̌ ma̤hè lô̌khô ta̤tě̤ta̤mè̤̌ tokhlǒ hǒ, sî sǎphlǒshû̌ dǔlè̌lṳ̌ sî ma̤ta̤ dǒ atô tokhlǒ hǒ. Sî sǎphlǒdû̌ hè kòyò ma̤ta̤sǔ dǒ sîkla tokhlǒnu hǒ, sî ǐsha hè kû̌ Cǒmara gǔ cî̌htò̌ sî pě hǒ. Sî sǎyṳ kè̌shǐ sô̌ pa hǒ. Sî sǎphlǒshû̌ ganǎ̤de ayô̤̌ dě sî gǔ cî̌htò̌ kòyò dǒ a ma̤sǔta̤ nutokhlǒ hǒ. Dǒ sî ma̤ lô̌khô pô̤̌o akhû̌akhî, sî dǔlè̌lṳ̌ kû̌ khònò̤̌ sî ta̤sǔ ô̌ petô̤̌ hǒ. 12Pô̤̌nudě, lî̤ dǒ he wě̤cû̌bǎ sî dǒ awǐkha tôbǎnu mî̌, he wě̤cû̌ bǎ kòyò dǒ a ma̤sǔta̤ nutôpwa̤ kû̌ kòyò nutôpwa̤ ma̤sǔkòyò nutokhlǒ akhû̌akhî tûû̌ mè̤̌tô̤̌, pô̤̌khô sî gǔ sî̌ganǎ̤ kû̌ sî ǐlò̤ sîsǎphlǒ dǒ paya pwǐ tènu, he wě̤cû̌ pwǎ pô̤̌nu. Sî mô̤ pa pwǐ꤮ tènu Cǒmara sî̌ganǎ̤ tě̤tě̤mè̤̌mè̤̌ lǒ̤bò. 13Pô̤̌nu akhû̌akhî, amô̤̌꤮ sikè pa hǒ. Htokhôtô̤̌ sî ma̤sǎlě̤ Khûtǐtǔ akhû̌akhî, pa kè̌shǐ a sǎlě̤sǎlò̤ dě pa lî̤̌ sǎlě̤sǎlò̤ hèshû̌shû̌ pô̤̌. 14Bǎ Khûtǐtǔ cû̌ dǒ sî ô̌ khôtô̤̌ nu, he htû̌sò̌ ǐ sî dǒ Khûtǐtǔ alô̤mô̤̌ pwǎnî̌. Sî ma̤ mè̤̌mî̌ca pô̤̌ he htû̌sò̌ ǐ sî nuhǒ. Sî ma̤sòwò̤̌nô̌ he tôkhò̌꤮ tô̤̌. Pô̤̌ he hî̌bǎcǒhî̌bǎtè̤ sî pṳ̂̌꤮ tôplǎnu, pa hî̌ bǎ Khûtǐtǔ kû̌ sîwe̤sîkè numî̌ pa hî̌bǎcǒhî̌bǎtè̤ pwǎ. 15Pô̤̌nudě, bǎ a gènè̤ to̤ǐbǎ sô̌ sî ô̌ tîwî̌tòwò nǎ sînǎ̤ kû̌ sî ganǎ̤de a ta̤sû̌ǐtòwòǐ htokhôtô̤̌ sî kaǎmô̤shǔ lû̌û kû̌ ta̤ǐsha, gònò̤̌gòglè akhanu, a lî̤̌ mô̤ sî hǒ. 16He yṳ̌ǎ bòmǔte̤gle sî dě ama̤ sǎlě̤ jî̌ he.
Copyright information for
KxfSCKXF