2Cor 8 | KxfSCKXF | STEP | Pa khô sî, pa sǎyṳ shôbǐǐlṳ̌ bǎ sî kû̌ Cǒmara ǐlò̤ bǎ ta̤bwǐta̤sîrî dǒ ta̤dòkû dǒ a ô̌ lô̌khô dǒ Mèsidûnǐ̤ya gǎkû nutokhlǒ awe̤akè.

2 Corinthians 8

Kôrituphû̌ ata̤ǐ ta̤lṳta̤tòhtò̌ tokhlǒ

1 Pa khô sî, pa sǎyṳ shôbǐǐlṳ̌ bǎ sî kû̌ Cǒmara ǐlò̤ bǎ ta̤bwǐta̤sîrî dǒ ta̤dòkû dǒ a ô̌ lô̌khô dǒ Mèsidûnǐ̤ya gǎkû nutokhlǒ awe̤akè. ^a 2 Ta̤dòkûphû̌ bǎnutokhlǒ mî̌, a khòbǎ jî̌ ta̤pò̤̌ta̤sha dǒ ajî̌ajû̌ gutṳ̌ tokhlǒ bǎbǎkǎlè asî sǎlě̤sǎlò̤ lô̌khô jòjî̌lî. Asî shuphǔshèwè̤ jî̌ bǎbǎkǎlè a sǎphlǒshû̌ ma̤lṳma̤tò ma̤jè̌ bǎ jî̌ ta̤dòkûphû̌ dǒ Wî̤̌yarǔshôle akû nutokhlǒ jòjî̌lî. 3 Bǎ asî ǐbò̌nu asî ǐ pwǎ, htokhôtô̤̌ a ǐlǒkhlo pe kû̌ bǎ a ǐbò̌nu dě asî sǎphlǒshû̌ ǐ lô̌khô pwǎ numî̌ he hî̌bǔ pwǎ. 4 Asî sǎphlǒshû̌ ma̤lṳ lô̌khô dě a kwisǎyṳ pa dǒ pa gǔ plû asî dǒ a gǔ ma̤jè̌ Cǒmara a kòyò tokhlǒ. 5 Asî ma̤ta̤ numî̌, adû̌khlo pe kû̌ pa ta̤kè̌shuǐ tokhlǒ. Pô̤̌khô Cǒmara sǎyṳ noma̤ asînu, awǐlǒ dě asî bè̌plò̌shǐ asǎphlǒ dǒ Běcǎ aya, htodě asî bè̌plò̌shǐ lô̌khô asǎphlǒ dǒ paya. 6 Pô̤̌nu akhû̌akhî, pô̤̌khô Khûtǐtǔ gǔ ma̤jè̌ htophlǔ sî ta̤sǎphlǒshû̌ ma̤jè̌ kòyò tokhlǒ ayanu pa tûsû shò̌gû̌ a kò hǒ. Ma̤titèhî̌dě pwa̤ dǒ a sahtò̌ ǐkhû̌ǐǎ wǐlǒ sî kû̌ sî gǔ ma̤jè̌ bǎ ta̤dòkûphû̌ dǒ a ô̌ lô̌khô dǒ Wî̤̌yarǔshôle akû nutokhlǒ tôpwa̤ numî̌ Khûtǐtǔ hǒ. 7 Sî lǒbe kû̌ ta̤pṳ̂̌꤮ tocǒ. Sî ta̤yṳ̌ta̤nǎ̤ mî̌ ashû̌, sî hî̌bǎjò hî̌bǎnǐ̤, sî lǒbe kû̌ ta̤sî̌ta̤jò̌, sî sǎphlǒshû̌ ma̤jè̌ kòyò, htokhôtô̤̌ sî mô̤wô̌ pa. Pô̤̌nu akhû̌akhî, pa sǎyṳ pô̤̌ dǒ sî gǔ lǒbe kû̌ ta̤sǎphlǒshû̌ ma̤jè̌ kòyò tokhlǒ.

8 He hî̌ pô̤̌o dě he noshû̌ sî pô̤̌nu mè̤̌tô̤̌. Pô̤̌khô sî gǔ kè̌lû̌ kû̌ kòyò dǒ ashǔshawa̤ tokhlǒ sǎphlǒshû̌ ma̤jè̌ kòyò nudě, he sǎyṳ dǐsî̌ganǎ̤ bǎ sî pô̤̌nu pwǎ. Dǒ he dǔlè̌lṳ̌ sî pô̤̌o akhû̌akhîdě sî mô̤ mè̤̌mî̌ca kòyò ya, sî mô̤tô̤̌ yanu, he gǔ sî̌ganǎ̤hè pě pô̤̌nu pwǎ. 9 Pa Běcǎ Yeshǔ Khrǐnu abwǐdû̌ asîrîhtû pwǐ꤮ tènu, sî sî̌ganǎ̤ tû̌ hǒ. A ô̌ dǒ mǒkhû̌ akhanu, a dû̌yò̤̌htò̌sa jî̌jî̌ bǎbǎkǎlè bǎ a hè tûlû anǎ̤ pô̤̌ kòyò hǎkhû̌phû̌ tôpwa̤ akhanu, a bǎhè htû kòyò pwa̤shèwè̤phû̌ tôpwa̤ dǒ paya. Pô̤̌khô sî gǔ dû̌yò̤̌htò̌sa gû̌ kòyò ayanudě, a bǎhè htû kòyò pwa̤shèwè̤phû̌ tôpwa̤ pô̤̌nu.

10 Pô̤̌nudě he ta̤gènè̤ mî̌ pô̤̌o, he kè̌shǐ kû̌ ta̤ma̤ dǒ sî sahtò̌ ma̤ dǒ něhǎnô̤̌ tokhlǒnu, sî kè̌ ma̤hto khònò̤̌ numî̌ awô̌khlo dǒ sîya. Sî mî̌ kòyò tôprṳ̂ dǒ a sahtò̌ kûplǒ wǐlǒ ta̤ma̤lṳ dě a gǔ ma̤jè̌ bǎ kû̌ kòyò ô̌ bǎ Wî̤̌yarǔshôle akû nutokhlǒ nu pě, tǒ̤ hǒopwǎ mè̤̌tô̤̌, sî mî̌ kòyò tôprṳ̂ dǒ a sǎphlǒshû̌ ma̤lṳma̤tò jî̌ ta̤ tokhlǒ. 11 Pô̤̌nu akhû̌akhî, ma̤hto bòkè ta̤ dǒ sî sahtò̌ ma̤ tôcǒnu. Sî sahtò̌ kûplǒ lû̌ ta̤ma̤lṳ akhanu, sî sǎphlǒshû̌ ma̤jè̌ jî̌ kòyò. Pô̤̌nudě khònò̤̌ sî tô sǎphlǒshû̌ ma̤hto bòkè sî ta̤ma̤nu. Sî tô ǐ lô̌khô bǎ sî ǐbò̌nu pṳ̂̌꤮ tôpwa̤. 12 Sî kè̌ sǎphlǒshû̌ ǐ mè̤̌mî̌ca hî̌dě Cǒmara sǎyṳ pô̤̌nu hǒ. Sî ǐbò̌ pwǐ꤮ tètè̌nu, a lṳ̂dû̌lǒ mè̤̌tô̤̌. Cǒmara sǎyṳ noǐ sî pwǐ sî ǐbò̌ nupwǎ. Ta̤ dǒ sî ǐbò̌tô̤̌nu a kwi nô̌ sî tîkî̌꤮ tô̤̌.

13 He ma̤phi bǎ kòyò dǒ ashǔshawa̤ tokhlǒ a ta̤wǐta̤ò̌ dě he bè̌htò̌htǒkè dǒ sîlô̤ pô̤̌nu mè̤̌tô̤̌. He sǎyṳ dǒ sî kè̌ jî̌ dě jî̌wô̤̌wô̤̌ lû̌û, sî kè̌ mô̤ dě mô̤wô̤̌wô̤̌ lû̌û pô̤̌nu tôcǒpwǎ. 14 Ma̤titèhî̌dě, khònò̤̌ sî dû̌yò̤̌htò̌sa hǒ akhû̌akhî, sî tô ma̤jè̌ padô̌ ta̤dòkûphû̌ dǒ a hǎwǐ̤shèwè̤ nutokhlǒ. Htû̌꤮ nô̌kòpě sî kè̌ lǎ̤lûge kè̌hî̌dě asî gǔ ma̤jè̌ ge sî pě. Sî kè̌ ma̤jè̌le̤ ma̤jè̌ge lû̌û pô̤̌nu hî̌dě, dǒ sîklanu pwa̤ dǒ apò̤̌asha tokhlǒnu a ô̌ pe tô̤̌. 15 Lî̤plò̌shǐkû hî̌ kû̌, “Kòyò dǒ a bè̌plǒ dû̌wî̤ a lǎ̤ǎlǎ̤ô tokhlǒnu ata̤ ô̌dû̌wî̤ tûlû̌ shû̌lě bǎtô̤̌. Kòyò dǒ a bè̌ plǒ pî̌tî̌phû̌pwǎ a lǎ̤ǎlǎ̤ô tokhlǒnu, a ô̌ pî̌tî̌ tûlû̌ shû̌lě bǎ tô̤̌.” ^b

Khûtǐtǔ kû̌ a khô tokhlǒ

16 Cǒmara dǐ sǎphlǒshû̌ Khûtǐtǔ dǒ a ma̤jè̌ sî pô̤̌ pa sǎphlǒshû̌ ma̤jè̌ sînu akhû̌akhî, pa hî̌bwǐhî̌sîrî mî̌ca Cǒmara. 17 Bǎ pa kwisǎyṳ lû̌û kû̌ a gǔ cû̌kè̌ sî akhanu, a jû payô̤̌ dě a sǎlě̤sǎlò̤ cû̌kè̌ sî. Hî̌bòbò dě anǎ̤běcǎ tûû̌ sǎyṳ cû̌kè̌shǐ nǐ̤tû̌ sî hǒ. 18 Pa plûcû̌ pṳ̌wè̤̌ tôpwa̤ kû̌ a. Ta̤dòkûphû̌ pṳ̂̌tômṳ̌ htû̌sò̌ jî̌ yǎ nî̌, ma̤titèhî̌dě a mî̌ pwa̤ma̤ Cǒmara ata̤ma̤ dǒ a cû̌ shôbǐǐlṳ̌ bǎ kòyò kû̌ ta̤sǎlě̤we̤kè awe̤akè tôpwa̤. 19 Tǒ̤hǒonu mè̤̌tô̤̌, a mî̌ ta̤dòkû bǒo tokhlǒ bè̌htò̌ hto lû̌û kû̌ a gǔ cû̌ kû̌ pa hǒ. Htû̌꤮ pa hèphǐ ta̤ma̤lṳ dǒ sî sǎphlǒshû̌ ma̤jè̌ kòyò tokhlǒ dě pa gǔ cû̌ yû̌lò̤ bǎ kû̌ kòyò hǎwǐ̤shèwè̤phû̌ dǒ Wî̤̌yarǔshôle akû nutokhlǒ akhapěnu, a gǔ cû̌ kû̌ pa pě. Pô̤̌khô kòyò gǔ htû̌sò̌htò̌ lô̌khô Yeshǔ Khrǐ, htokhôtô̤̌ pô̤̌khô kòyò gǔ kè̌shǐ lô̌khô kû̌ pa sǎphlǒshû̌ ma̤jè̌ mè̤̌mî̌ca asî ayanu, pa gǔ cû̌lè yṳ̂̌lò̤bǎ kòyò ta̤ma̤jè̌ nupě. 20 Pô̤̌khô kòyò gǔ bè̌ pa ta̤sǔ tô̤̌nu, pa cû̌wô̤̌wô̤̌ lû̌û pô̤̌o pwǎ. Ta̤ma̤lṳ dǒ kòyò sǎphlǒshû̌ ǐ tokhlǒnu, pa bǎ ma̤tôma̤bǎ ǐ wô̌ bǎ kòyò. 21 Pa bè̌ kû̌ pa gǔ ma̤cǒ pwǎtǒ̤ bǎ Cǒmara a lô̤mô̤̌nu mè̤̌tô̤̌, dǒ kòyòhǎkhû̌phû̌ aya numî̌ pa bǎ ma̤cǒma̤tè̤tè̤. ^c

22 Pô̤̌nudě pa nohè pô̤̌ kòyò dǒ ashǔshawa̤ kû̌ pa pṳ̌wè̤̌ hǒo sò̌ginǐ̤. Pa kè̌shǐ sî̌ganǎ̤ kû̌ a mî̌ kòyò tôpwa̤ dǒ lǎ̤yṳ̌ǎ mî̌ca a dǒ Cǒmara a ta̤phǐta̤ma̤ akû tôpwa̤. Khònò̤̌dě a yṳ̌ǎnṳ̌ mî̌ca sî akhû̌akhî a lě̤꤮ sǎphlǒshû̌ ma̤jè̌ lǒpû pe sîsî. 23 Khûtǐtǔ mî̌ pwa̤ dǒ a ma̤ ta̤ kû̌ he dě a ma̤jè̌ sî tôpwa̤. Pa pṳ̌wè̤̌ dǒ a gû̌hè lû̌nu sò̌ginǐ̤ mî̌, ta̤dòkû bǒo tokhlǒ nohè asî pwǎ. Asî mî̌ kòyò tokhlǒ dǒ a bè̌dubè̌nǎ̤ mî̌ca Khrǐ tokhlǒ. 24 Pô̤̌khô ta̤dòkûphû̌ dǒ a ô̌ dǒ ta̤dòkûphû̌ akû pṳ̂̌tômṳ̌ nutokhlǒ gǔ sî̌ganǎ̤ tě̤tě̤mè̤̌mè̤̌ kû̌ sî mô̤ mè̤̌mî̌ca kòyò ayanu, dǔlè̌lṳ̌ lô̌khô sî ta̤mô̤nṳ̌ asî tokhlǒnu nî̌꤮. Htokhôtô̤̌ pô̤̌khô asî gǔ sî̌ganǎ̤ lô̌khô kû̌ pa htû̌sò̌htò̌ǐ sî tokhlǒnu atô mè̤̌mî̌ca ayanu, ma̤ lô̌khô pô̤̌nu nî̌꤮.