2Cor 9 | KxfSCKXF | STEP | Sî tô ma̤jè̌ Cǒmara a kòyò dǒ a hǎwě̤shèwè̤ dǒ a ô̌ bǎ Wî̤̌yarǔshôle akû nutokhlǒ awe̤akènu, he lǎ̤lṳ̂ wě̤ sělě bǎ pô̤̌ pe nô̌ sî tô̤̌.

2 Corinthians 9

Khrǐphû̌ tôpwa̤ kû̌ tôpwa̤ a ta̤phǐjè̌ ma̤jè̌ lû̌û

1 Sî tô ma̤jè̌ Cǒmara a kòyò dǒ a hǎwě̤shèwè̤ dǒ a ô̌ bǎ Wî̤̌yarǔshôle akû nutokhlǒ awe̤akènu, he lǎ̤lṳ̂ wě̤ sělě bǎ pô̤̌ pe nô̌ sî tô̤̌. 2 Ma̤titèhî̌dě sî sǎphlǒshû̌ ma̤jè̌ asî pwǐ꤮ tènu, he sî̌ganǎ̤. He htû̌sò̌htò̌ǐ bǎ pa khô dǒ Mèsǐdûnǐya gǎkû nutokhlǒ kû̌ sîwe̤sîkè tokhlǒ hǒ. He hî̌ bǎ asî kû̌ sî ta̤dòkûphû̌ dǒ Akheya gǎkû tokhlǒnu, a tîwî̌tòwò nǎ ru dǒ něhǎnô̌ pe. Sî ta̤sǎphlǒshû̌nu, a htû̌wṳ̂̌bǎ dû̌wî̤ Mèsidûnǐ̤ya gǎphû̌ tokhlǒ asǎphlǒ dǒ a gǔ ma̤jè̌ kòyò pô̤̌nu pe hǒ. 3 Pô̤̌khô sî gǔ tîwî̌tòwò nǎ lô̌khô sî ta̤ma̤lṳ pô̤̌ he shôbǐlṳ̌hto bǎ asînu, htokhôtô̤̌ pa htû̌sò̌htò̌ǐ bǎ kòyò kû̌ sîwe̤sîkè tokhlǒnu, pô̤̌khô a gǔ htûhtò̌ ta̤htû̌sò̌ǐ lòhô tô̤̌ nudě, he nohèhǒ pa pṳ̌wè̤̌ nutokhlǒ dǒ sîô̌ hǒ. 4 Pô̤̌nudě bǎ he hè pě akhanu, pa pṳ̌wè̤̌ Khrǐphû̌ dǒ Mèsidûnǐ̤yagǎ tokhlǒ gû̌hè kû̌ he pě kǎlè. He sǎyṳ nokè̌shǐ asî kû̌ sî tîwî̌tòwò nǎ htobò ru ta̤ma̤lṳ nutokhlǒ. Sî kè̌ tîwî̌tòwò nǎ tôcǒ꤮ tô̤̌ hî̌nu, ta̤ dǒ he yṳ̌ǎnṳ̌ sî tokhlǒnu a gǔ htûhtò̌ ta̤sòwò̤̌ dǒ heya kû̌ sîya pě. 5 Pô̤̌nudě, he bè̌lò̤ he sǎphlǒ dǒ he lǎ̤lṳ̂ nohè wǐ pa pṳ̌wè̤̌ tokhlǒ dǒ sîô̌ dě a gǔ ma̤jè̌ ta̤kûplǒ ta̤ma̤lṳ dǒ sî olò̤ kû̌ sî gǔ ma̤jè̌ kòyò nutokhlǒ. Kè̌ ma̤pô̤̌nu htodě htû̌꤮ he hètǒ̤ pěnu, sî gǔ tîwî̌tòwò nǎ htobòhǒ sî ta̤ma̤lṳ nutokhlǒ hǒ. Pa kè̌ ma̤pô̤̌nudě kòyò gǔ kè̌shǐ kû̌ kòyò noshû̌ sî tôpwǎ̤꤮ tô̤̌nu, sî sǎphlǒshû̌ ma̤ tûû̌ pwǎ pô̤̌nu pě.

6 Gènè̤kè̌ lô̌khô kòyò dǒ a wǐ̤lò̤ pî̌tî̌pwǎ ta̤khli tôpwa̤nu a gǔ nǐ̤bǎ getîkhî pî̌tî̌ sô̌ pwǎ ta̤sǎta̤phô pě. Bǎbǎkǎlè kòyò dǒ a wǐ̤lò̤ dû̌wî̤ ta̤khli tôpwa̤nu, a gǔ nǐ̤bǎ getîkhî dû̌ sô̌ ta̤sǎta̤phô pě. 7 Pô̤̌nudě, mòpèpè̌꤮ bǎbǎ, a tôbǎ ǐ pô̤̌ a bè̌lò̤ hto asǎphlǒ dǒ a glè̌ ǐ pwǐ꤮ tè akhû̌nu pwǎ. A bǎ sǎleǐ getîkhî tô̤̌. A bǎ bè̌ asǎphlǒ kû̌ a lò̤bǎ lû̌khû̌ dě a tôbǎ ǐ pô̤̌nu anǐ̤ tô̤̌, ma̤titèhî̌dě Cǒmara mô̤ǐ kòyò dǒ a sǎlě̤sǎlò̤ ǐkò nutokhlǒ pwǎ. 8 Pô̤̌khô sî gǔ nǐ̤bǎ lǒbe bò̌꤮ bò ta̤ dǒ sî lǎ̤lṳ̂ nutokhlǒ, htokhôtô̤̌ pô̤̌khô sî ta̤ gǔ ô̌ lǒbe htò̌sa dǒ sî gǔ ǐpadô̌ tutṳ̌ kû̌ kòyò dǒ ashǔshawa̤ tokhlǒ ayanu, Cǒmara gǔ ǐshowî̤ dû̌wî̤ lǒkhlope kû̌ lǒ̤bò sî lǎ̤lṳ̂ tokhlǒ numî̌ a ma̤jò pwǎ. 9 Lî̤plò̌shǐkû hî̌ kû̌,

“Pwa̤cǒpwa̤tè̤ tôpwa̤ sǎphlǒshû̌ ma̤jè̌ kòyò hǎwǐ̤shèwè̤ tokhlǒ hǒ, dě a ta̤tě̤ta̤mè̤̌nu, a ô̌měô̌gle tûjû̌pwa̤ hǒ.” ^a

10 Ma̤titèhî̌dě pwa̤ dǒ a ǐlò̤ bǎ pwa̤ma̤ǎhǔkla tokhlǒ ta̤khlita̤lè dǒ a gǔ shǒǐ aya kû̌ lǎ̤ǎlǎ̤ô aya tokhlǒ numî̌ Cǒmara hǒ. Pô̤̌nudě, Cǒmara gǔ ǐ sî lǒ̤bò ta̤khli dǒ sî lǎ̤lṳ̂ tokhlǒnu pě. Ta̤khli numî̌ a mè̤̌mî̌ca lǒ̤bò sî lṳ̂bǎ ma̤wô̌ kòyò nutokhlǒ hǒ. Cǒmara gǔ no sǎhtò̌phôhtò̌ sǔ sǔ dû̌htò̌ pô̤̌ sî ta̤sǎta̤phô pě. Sî ta̤sǎta̤phô numî̌ amè̤̌kû̌ lǒ̤bò ta̤wô̌ dǒ a hè dǒ sî ta̤sǎphlǒshû̌ ǐkò nutokhlǒ a ô̌ nuhǒ. ^b 11 Pô̤̌khô sî gǔ sǎphlǒshû̌ ǐbò̌ kòyò pṳ̂̌꤮ taplǎ, htokhôtô̤̌ pô̤̌khô kòyò dǒ a nǐ̤bǎ sî ta̤ma̤lṳ dǒ paô̌ tokhlǒ gǔ hî̌bwǐhî̌sîrî Cǒmara ayanu Cǒmara gǔ ǐ dû̌yò̤̌htò̌sa lǒbe tû̌ sî pṳ̂̌꤮ taplǎ pě.

12 Ma̤titèhî̌dě ta̤ma̤lṳma̤tònu a ma̤jè̌ bǎ Cǒmara kòyò dǒ a hǎwǐ̤shèwè̤ nutokhlǒ pwǎ mè̤̌tô̤̌, a htû̌wṳ̂̌bǎ tǒ̤ kòyò sǎphlǒ dǒ kòyò gǔ hî̌bwǐhî̌sîrî htû̌sò̌htò̌ lô̌khô Cǒmara. 13 Sî ta̤ma̤jè̌nu a khòlṳ̌ kû̌ sî yṳ̌ǎ mè̤̌mî̌ca Běcǎ Yeshǔ hǒ. Dǒ sî yṳ̌ǎ ma̤gû̌ pô̤̌ Khrǐ a ta̤sǎlě̤we̤kè hî̌nu akhû̌akhî kòyò gǔ htû̌sò̌htò̌ dû̌wî̤ Cǒmara pě. Ma̤titèhî̌dě dǒ sî sǎphlǒshû̌ ma̤jè̌ bǎ asî kû̌ kòyò pṳ̂̌tôpwa̤ akhû̌akhî, kòyò saprṳ̂ gǔ htû̌sò̌htò̌ lô̌khô Cǒmara pô̤̌nu pě. 14 Pô̤̌nudě Cǒmara ata̤bwǐta̤sîrî dǒ a cǒklǐkhô̌nu, a dǔlè̌lṳ̌ bǎ sî dě sî dǔlè̌lṳ̌ tutṳ̌ bǎ asî akhû̌akhî, asî gǔ kwicaba bǎ dǒ sîya pě, htokhôtô̤̌ asî gǔ nǎsǔ kè̌shǐ mî̌ca sî pě. 15 Pa gǔ htû̌sò̌htò̌ wô̤̌wô̤̌ lû̌ Cǒmara dǒ a ǐlò̤ pa sû amè̤̌kû̌ aphû̌khû dǒ a lě̤dû̌pwî̤htû dě pa hî̌jòpe tô̤̌nu tôpwa̤ tǎ꤮.