Lî̤yṳ̂ha ginǐ̤bǎ tôbǎ mî̌ lî̤ dǒ mǒ̤pwǎ̤ tôpwa̤ wě̤cû̌ bǎ mǒ̤ tôpwa̤ kû̌ aphû̌ali̤ tokhlǒ. A sǎyṳ hî̌ yô̤̌mûyô̤̌sǎ mî̌, ta̤dòkû kû̌ ta̤dòkûphû̌ tokhlǒ alî̤ pô̤̌nu pwǎ. Lî̤pǔtǔphû̌ hǒtôbǎ mî̌ kòyò wě̤ ǐkhû̌ǐǎ ta̤dòkûphû̌ tokhlǒ gǔ mô̤ lû̌û tôpwa̤ kû̌ tôpwa̤, htokhôtô̤̌ a sǎyṳ dǐsè̌rè̌nǎ ta̤dòkûphû̌ tokhlǒ kû̌ sara nè̤̌lòhô anǎ̤ nutokhlǒ kû̌ asî a ta̤sû̌ǐtòwòǐ nutokhlǒ awe̤akè pwǎ.

Ta̤hî̌bǎ tôtô̤̌ kû̌ tôtô̤̌

Ta̤hî̌bǎ wǐ 1:1-3

Ta̤ dǒ a lṳ̂dû̌lǒ mî̌ ta̤mô̤ 1:4-6

Ta̤ǐsè̌rè̌ nǎ kû̌ kaǎshǔ tǎ̤ sara jî̌lòhô anǎ̤ nutokhlǒ tǎ̤mǎ̤ 1:7-11

Ta̤hî̌bǎ dǒ gutṳ̌kò 1:12-13

2 John

1He mî̌ mǒ̤phumǒ̤pwǎ̤ dǒ a htû ikǒlǒkòdû̌ tôpwa̤ dě he wě̤cû̌bǎ lî̤hǒo dǒ mǒ̤ dǒ Cǒmara rû̌htò̌ anu tôpwa̤ kû̌ aphû̌ sîtokhlǒ a ô̌. ▼

▼mǒ̤ dǒ Cǒmara rû̌htò̌ a nutôpwa̤ mî̌ ta̤dòkû.

sî mî̌ kòyò dǒ he mô̤ǐ mè̤̌caca tokhlǒ. He tôpwa̤ mô̤nṳ̌ tû̌ sînu mè̤̌tô̤̌, kòyò dǒ a sî̌ganǎ̤ ta̤tě̤ta̤mè̤̌ pṳ̂̌ tôpwa̤ tokhlǒ mô̤ǐ sîsî. 2Dǒ ta̤tě̤ta̤mè̤̌ ô̌ mè̤̌mè̤̌ dǒ pakû akhû̌akhî, pa mô̤ǐ sî pwǎ. Ta̤cǒta̤tè̤ nî̌ a ô̌ hènè kû̌ pa tûjû̌pwa̤ talakhǎ pě.

Ta̤hî̌mô̤hî̌wô̌

3Kòyò dǒ a ganǎ̤de ta̤tě̤ta̤mè̤̌ dě mô̤ǐ kè̌khî lû̌û tôpwa̤ kû̌ tôpwa̤ tokhlǒ alô̤nu, Pha Cǒmara kû̌ aphû̌khû Yeshǔ Khrǐ gǔ ǐ lò̤ pû a ta̤bwǐta̤sîrî, ta̤sǎyṳgwèbǎǐ kû̌ ta̤pè̤̌ta̤dû nutokhlǒ nî̌꤮.

Ta̤cǒta̤tè̤ kû̌ ta̤mô̤ǐ

4He kè̌shǐbǎ naphû̌nali̤ tokhlǒ ô̌htûpwa̤ dǒ ta̤tě̤ta̤mè̤̌ akû pô̤̌ pha Cǒmara mǎnǎ pa ayô̤̌sǎ nu akhû̌akhî, he sǎlě̤sǎlò̤ jî̌ jî̌. 5Mǒ̤, khònò̤̌ he kwisǎyṳ na, pa mô̤ǐ bò kè̌khî mò̌ lû̌û tôpwa̤ kû̌ tôpwa̤ tǎ꤮. He wě̤ bǎ na yô̤̌mǎnǎ hǒtômû numî̌ asa mè̤̌tô̤̌, yô̤̌mǎnǎ dǒ pa nǐ̤bǎ hto dǒ asakhû̌lû̌nu tômû pwǎ. ^b 6Ta̤mô̤ǐ yô̤̌mûyô̤̌sǎ mî̌, pa ô̌htûpwa̤ gû̌ ganǎ̤de Cǒmara mǎnǎayô̤̌ nutokhlǒ hǒ. Pô̤̌ sî lǒ̤bò ganǎ̤de hto yô̤̌mǎnǎ dǒ asakhû̌lû̌ dě a hî̌ kû̌, sî lǒ̤bò tokhlǒnu sî tôbǎ ô̌htûpwa̤ dǒ ta̤mô̤ǐ lû̌û akû, a hî̌ pô̤̌nu.

7Pwa̤tili̤tôlô̌ kòyò ô̌lṳ̌htò̌ dû̌wî̤ dǒ hǎkhû̌nu hǒ. Yeshǔ Khrǐ hèlò̤ dǒ hǎkhû̌nu, a hè kû̌ kòyòhǎkhû̌phû̌ a sǐshiphěyî̌nu, asî nutokhlǒ mî̌ a olò̤ gû̌ kòyò tô̤̌. Kòyò dǒ a olò̤ kû̌ kòyò pô̤̌nu tô̤̌ tôpwa̤pwa̤ numî̌ a tili̤tôlô̌ kòyò hǒ, dě a mî̌ kòyò dǒ a sǎkhě Khrǐ nutôpwa̤ hǒ. 8Pô̤̌nu akhû̌akhî, pô̤̌khô sî nǐ̤bǎ hto ta̤nutokhlǒ gǔ hǎmǎkè bǎ sî tô̤̌nu, htokhôtô̤̌ pô̤̌khô sî gǔ nǐ̤bǎ lǒbe bò sî ta̤ma̤nǐ̤khû̌kǎ ayanu, sè̌rè̌ lô̌khô sînǎ̤ nî̌꤮. 9Kòyò dǒ a ô̌měô̌gle kû̌ Khrǐ a ta̤sû̌ǐtòwòǐ akû tô̤̌, dě a bè̌nṳ̌khlo a ta̤sû̌ǐtòwòǐ tokhlǒ dǒ Khrǐ a ta̤sû̌ǐtòwòǐ akû tokhlǒnu, Cǒmara ô̌kû̌nô̌ asî tô̤̌. Kòyò dǒ a ô̌měô̌gle dǒ Khrǐ a ta̤sû̌ǐtòwòǐ akû tokhlǒnu, pha kû̌ phû̌ sò̌ginǐ̤ ô̌měô̌gle kû̌ asî pě. 10Pô̤̌nu akhû̌akhî, kòyò tôpwa̤pwa̤ kè̌ hè dǒ sî ô̌ hî̌dě a kè̌ phǐhèǐ ta̤sû̌ǐtòwòǐ nutokhlǒ tô̤̌nu, kaǎshǔ tǎ̤ a dǒ sî hǐdǒkû tǎ̤mǎ̤ nî̌꤮. “Ta̤pè̤̌ta̤dû gǔ ô̌ kû̌ pû na nî̌꤮,” hî̌shǐshǔ tǎ̤ a pô̤̌nu tǎ̤mǎ̤ mǎ̤. 11Ma̤titèhî̌dě kòyò tôpwa̤pwa̤ dǒ a kaǎshǔ lû̌ûnu, a htûhtò̌kè pwa̤ma̤ wô̤̌wô̤̌ta̤ kû̌ lû̌û dǒ ama̤ ta̤phû̌mò̤̌shǐhtô akû hǒ.

Hî̌bǎ gutṳ̌kè yô̤̌ gutṳ̌kò

12He sǎyṳ shôbǐǐ bǎ dû̌ pe sî ta̤hî̌bǎ tokhlǒ bǎbǎkǎlè he sǎyṳ wě̤ a kû̌ lî̤plî̌ kû̌ cubôli̤shi tô̤̌. Bǎbǎkǎlè pô̤̌khô pa gǔ ô̌ kû̌ ta̤sǎlě̤sǎlò̤ lǒlǒbebe ayanu, he kè̌shuǐ dǒ he hè dǒ sî ô̌ dě pa gǔ kè̌shǐ shěshu hî̌bǎ tîkhîsô̌lû̌ tôpwa̤ kû̌ tôpwa̤ pě.

13Sî pṳ̌wè̤̌ pwa̤mǒ̤ dǒ Cǒmara rû̌htò̌ a tôpwa̤ aphû̌ali̤ tokhlǒ sûhè bǎ sî ata̤hî̌mô̤hî̌wô̌ tokhlǒ pwǎ.