2Pe 1 | KxfSCKXF | STEP | Pa Cǒmara kû̌ pwa̤ma̤hǎplǎge pa Běcǎ Yeshǔ Khrǐ hǒtôpwa̤ a ta̤tě̤ta̤mè̤̌ akhû̌akhî, sî mî̌ kòyò tokhlǒ dǒ a nṳ̌bǎtû̌ ta̤yṳ̌ta̤nǎ̤ dǒ asô̌sô̌kû̌ pa hǒtokhlǒ hǒ. Dě he wě̤cû̌bǎ sî lî̤nu. He mî̌ Khûshǐmû Petarǔ, dě he htûtû̌ Yeshǔ Khrǐ jû̌ kû̌ a pwa̤nophû̌ tôpwa̤.

a Matè̌ 17:1-5; Makǔ 9:3-7; Lǔka 9:28-35

2 Peter 1

Petarǔ a ta̤hî̌mô̤hî̌wô̌

1 Pa Cǒmara kû̌ pwa̤ma̤hǎplǎge pa Běcǎ Yeshǔ Khrǐ hǒtôpwa̤ a ta̤tě̤ta̤mè̤̌ akhû̌akhî, sî mî̌ kòyò tokhlǒ dǒ a nṳ̌bǎtû̌ ta̤yṳ̌ta̤nǎ̤ dǒ asô̌sô̌kû̌ pa hǒtokhlǒ hǒ. Dě he wě̤cû̌bǎ sî lî̤nu. He mî̌ Khûshǐmû Petarǔ, dě he htûtû̌ Yeshǔ Khrǐ jû̌ kû̌ a pwa̤nophû̌ tôpwa̤.

2 Sî sî̌ganǎ̤ Cǒmara kû̌ pa Běcǎ Yeshǔ Khrǐ akhû̌akhî, ta̤bwǐta̤sîrî kû̌ ta̤gûjû̌kabǎ gǔ ô̌lǒô̌be kû̌ sî nî̌꤮.

Cǒmara ata̤kaǎ kû̌ a ta̤rû̌htò̌

3 Dǒ Yeshǔ a ta̤pô̤ta̤phǎnu akhû̌akhî, bǎ pa sî̌ganǎ̤hè to̤khlo lû̌û akhanu, pô̤̌khô pa gǔ ô̌cu kû̌ ta̤htûpwa̤, htodě pô̤̌khô pa gǔ ma̤kû̌pô̤̌ atô lû̌sǎphlǒ ayanu, a ǐlò̤hto pa lǒ̤꤮ bò pa lǎ̤lṳ̂ nutokhlǒ hǒ. Dǒ a ta̤pô̤ta̤phǎ dǒ adû̌htû kû̌ ata̤wô̌ mè̤̌mî̌ca tû̌ hǒtokhlǒ akhû̌akhîdě a kaǎ pa hǒ. 4 Dǒ a ta̤pô̤ta̤phǎ dǒ adû̌htû kû̌ ata̤wô̌ mè̤̌mî̌ca tû̌ nutokhlǒ akhû̌akhî, a ǐlò̤ htohǒ pa a ta̤olò̤ dǒ apwî̤dû̌ dě adû̌ayô̤̌ hǒtokhlǒ hǒ. Dǒ a ǐlò̤ ta̤nutokhlǒ akhû̌akhî, sî gǔ hǎplǎhtò̌kè kû̌ ta̤gènè̤ patǎ phû̌mò̤̌ dǒ a ma̤pî̌ sî dǒ hǎkhû̌ nutokhlǒ pě. Htokhôtô̤̌ sî htûhtò̌ sô̌sô̌ pô̤̌ Cǒmara alǎ̤klô nupě.

5 Dǒ ta̤we̤ta̤kènu akhû̌akhî, jî̌pwǐ̤ hèsělě wô̌pô̤̌ lô̌khô dǒ alô̤mô̤̌ nî̌꤮. Dǒ sî ta̤yṳ̌ta̤nǎ̤ akhû̌nu, bè̌plǒ dû̌wî̤pô̤̌ ta̤bè̌ sǎphlǒsǔshi dǒ awô̌, dǒ ta̤bè̌ sǎphlǒsǔshi dǒ awô̌ akhû̌nu, bè̌plǒ dû̌wî̤pô̤̌ ta̤sî̌ta̤jò̌, 6 Dǒ ta̤sî̌khû̌sî̌ya akhû̌nu, bè̌plǒ dû̌wî̤pô̤̌ ta̤khòbò̌ ǐtû̌ nǎ̤, dǒ ta̤khòbò̌ ǐtûû̌ nǎ̤ akhû̌nu, bè̌plǒ dû̌wî̤pô̤̌ ta̤khòsǎdô sǎphlǒhtû, dǒ ta̤khòsǎdô sǎphlǒhtû akhû̌nu, bè̌plǒ dû̌wî̤pô̤̌ ta̤ô̌htûpwa̤ tôbǎ kû̌ Cǒmara, 7 Dǒ ta̤ô̌htûpwa̤ tôbǎ kû̌ Cǒmara akhû̌nu, bè̌plǒ dû̌wî̤pô̤̌ ta̤mô̤ǐ pṳ̌wè̤̌, dǒ ta̤mô̤ǐ pṳ̌wè̤̌ akhû̌nu, bè̌plǒ dû̌wî̤pô̤̌ ta̤mô̤ta̤kla nî̌꤮. 8 Ta̤nutokhlǒ kè̌ ô̌dû̌htò̌ kû̌ ô̌dû̌htò̌ hî̌dě, a htûbwǐ htûsîrî dǒ sîya dě sî gǔ sî̌ganǎ̤hè shapwǎ̤ Běcǎ Yeshǔ Khrǐ pě. 9 Bǎbǎkǎlè kòyò dǒ a ô̌cu kû̌ ta̤nutokhlǒ tô̤̌ tokhlǒnu, asô̌sô̌kû̌ kòyò dǒ a mǐ̤sǎkhǐ. Dě a shôpe̤kè Cǒmara ma̤mṳ̂̌plî htohǒ lû̌ta̤sǔ dǒ awǐkha nutokhlǒ pwǎ.

10 Pô̤̌nudě pṳ̌wè̤̌ sî꤮, pô̤̌khô Cǒmara ata̤kaǎ sînu kû̌ a ta̤rû̌htò̌ sînu gǔ htûhtò̌ hènè mè̤̌mî̌ca ayanu, jî̌pwǐ̤jî̌li̤ dû̌wî̤pô̤̌ lô̌khô dǒ alô̤mô̤̌ tôkhô nî̌꤮. Sî kè̌ ma̤pô̤̌nu hî̌dě sî htò̌tukhu lò̤khǔpo̤ pe tôkhò̌꤮ tô̤̌ hǒ. 11 Pô̤̌nudě Cǒmara sǎlě̤sǎlò̤ kaǎmô̤shǔ sî dǒ pa Běcǎ Yeshǔ Khrǐ dǒ a amè̤̌ pwa̤ma̤hǎplǎge pa hǒtôpwa̤ ashiagǎ dǒ a ô̌ tûjû̌pwa̤ talakhǎ akûnu pě.

12 Sî sî̌ganǎ̤ htohǒ ta̤nutokhlǒ hǒ dě sî ô̌měô̌gle hǒ kû̌ ta̤tě̤ta̤mè̤̌ dǒ sî nǐ̤bǎ hto nutokhlǒ bǎbǎkǎlè pṳ̂̌plǎplǎ꤮ he ǐ gènè̤bǎ sô̌ sî kû̌ ta̤we̤ta̤kè hǒtokhlǒ pô̤̌nu pwǎ. 13 Bǎ he ô̌htûpwa̤pe akha, he htû̌wṳ̂̌ gènè̤bǎ sô̌ sî kû̌ ta̤we̤ta̤kè nutokhlǒ mî̌ he gènè̤ kû̌ atô pwǎ. 14 Ma̤titèhî̌dě he sî̌ganǎ̤ kû̌ yî̤khôtô̤̌ pěmî̌, he tôbǎ bè̌kè he nǎ̤glǒnu pô̤̌ pa Běcǎ Yeshǔ Khrǐ dǔlè̌lṳ̌ nǎ htohǒ he nupwǎ. 15 Pô̤̌nudě htû̌꤮ he sihto pěnu, pô̤̌khô sî gǔ sî̌ganǎ̤ htò̌bò̌tǒ̤ ta̤dǒ he ta̤sû̌ǐ sî nutokhlǒ pěnudě khònò̤̌nu he jî̌pwǐ̤jî̌li̤ ma̤ mî̌ca ta̤ hǒ.

Khûpetarǔ kû̌ pwa̤nophû̌ dǒ ashǔshawa̤ tokhlǒ kè̌shǐ Khrǐ a ta̤lîta̤kakha

16 Bǎ pa ǐsî̌ganǎ̤ bǎ sî kû̌ pa Běcǎ Yeshǔ Khrǐ a ta̤pô̤ta̤phǎ kû̌ ata̤hè awe̤akè akhanu, ta̤dô̌kènè dǒ amè̤̌tô̤̌ bǎbǎkǎlè kòyò sî̌jò̌ lòhô tokhlǒ dô̌bǎ sî tokhlǒnu, pa gû̌dô̌ kû̌ kòyò tô̤̌. Pa kè̌shǐ a ta̤lîta̤kakha tokhlǒ kû̌ pamǐ̤sǎ tûû̌. 17 Bǎ pha Cǒmara ǐlò̤ a ta̤bè̌dubè̌nǎ̤ kû̌ a ta̤bwǐdû̌sîrîhtû dǒ Yeshǔlô̤ akhanu, pa ô̌cu bǎnu. Cǒmara dǒ apô̤aphǎ adû̌ahtûlǒkhlo kû̌ ta̤lǒ̤꤮ bò hǒtôpwa̤nu, a hî̌ kû̌, “Hǒnumî̌ hephû̌pwa̤khû dǒ he mô̤ ǐtûû̌ a dě atô he sǎphlǒ tôpwa̤.” ^a 18 Bǎ pa ô̌cu kû̌ a dǒ khôlôplò̌shǐkhû̌ dě ayô̤̌ ô̌ dǒ mǒkhû̌ pwe̤lò̤ akhanu, pa ganǎ̤dekǎ kû̌ panǎ̤.

19 Pô̤̌nudě piwi̤pèshè tokhlǒ shôbǐǐkè ta̤we̤ta̤kè tokhlǒnu, a tě̤mè̤̌ lǒpô̤̌ dǒ paya. Sî tô bè̌sû̌bè̌sǎ wô̌ ta̤we̤ta̤kè dǒ asô̌sô̌kû̌ mî̌tè̌ko lîhtò̌ dǒ ta̤khǐkla dě ata̤lî tǒ̤dǒ lṳ̌mṳ̌lîbû tômènu dě lṳ̌mṳ̌lîbû hè hǒ akhanu, shǎto̤wô̤ nutômè ^{▼▼shǎto̤wô̤ mî̌ a hî̌hto Yeshǔ Khrǐ nuhǒ} htò̌ dǒ sî sǎphlǒkû pě. 20 Ta̤ dǒ a lṳ̂dû̌lǒ mî̌, sî tôbǎ sî̌ganǎ̤ kû̌ Cǒmara alî̤ dǒ piwi̤pèshè wě̤nǎ tokhlǒnumî̌, a wě̤ ǐtûû̌ lô̌khô kû̌ a ta̤gènè̤ tûû̌ tokhlǒnu mè̤̌tô̤̌. 21 Ma̤titèhî̌dě, piwi̤pèshè a ta̤shôbǐǐlṳ̌ tokhlǒ numî̌, a hè pô̤̌ kòyò sǎyṳ nohî̌nu mè̤̌tô̤̌. Asî shôbǐǐlṳ̌ bǎ kòyò ta̤we̤ta̤kè numî̌ a shôbǐǐlṳ̌ bǎ kòyò pô̤̌ Yôla Plò̌shǐ Běcǎ shôbǐǐ bǎ asî nupwǎ, dě ta̤we̤ta̤kè numî̌ a ô̌ dǒ Cǒmara a ô̌ hè.