2Pe 2 | KxfSCKXF | STEP | Piwi̤pèshè sûlûlòhô anǎ̤ tokhlǒ ô̌htò̌lṳ̌ htohǒ dǒ kòyò saprṳ̂ akla dǒ awǐkha hǒ. Pô̤̌nu, sara jî̌lòhô anǎ̤ tokhlǒ gǔ hè ô̌htò̌lṳ̌ kû̌ dǒ sîkla pě. Asî phǐhèhǔnṳ̌ ta̤sû̌ǐtòwòǐsǔ dǒ a ma̤pî̌kèta̤ tokhlǒ pě. A htè̌shěshu Běcǎ dǒ a ihtǒge htohǒ asî nutôpwa̤ pě. Dǒ asî ma̤pô̤̌nu akhû̌akhî, Cǒmara ma̤pî̌kè lǎphwè asî pě.

2 Peter 2

Sara jî̌lòhô anǎ̤ tokhlǒ

1 Piwi̤pèshè sûlûlòhô anǎ̤ tokhlǒ ô̌htò̌lṳ̌ htohǒ dǒ kòyò saprṳ̂ akla dǒ awǐkha hǒ. Pô̤̌nu, sara jî̌lòhô anǎ̤ tokhlǒ gǔ hè ô̌htò̌lṳ̌ kû̌ dǒ sîkla pě. Asî phǐhèhǔnṳ̌ ta̤sû̌ǐtòwòǐsǔ dǒ a ma̤pî̌kèta̤ tokhlǒ pě. A htè̌shěshu Běcǎ dǒ a ihtǒge htohǒ asî nutôpwa̤ pě. Dǒ asî ma̤pô̤̌nu akhû̌akhî, Cǒmara ma̤pî̌kè lǎphwè asî pě. 2 Dě kòyò gǔ gû̌wô̤̌ mî̌ca asî klè̌ dǒ a lṳ̂ sǐshi a ta̤sǎyṳsǎbǎ phû̌mò̌nu tokhlǒ pě. Dǒ asî ma̤pô̤̌nu akhû̌akhî, kòyò dǒ ashǔshawa̤ tokhlǒ hî̌bǎ pîjî̌ǐsho ta̤tě̤ta̤mè̤̌ aklè̌ pě. 3 Sara jî̌lòhô anǎ̤ tokhlǒnu, dǒ a ta̤kè̌lǎ pṳ̂̌sôgwǐ yǒsaphǎ ǎtûû̌ aya kû̌ a dô̌kènè lòhô bǎ sî ta̤dô̌kènè dǒ kòyò sî̌jò̌dô̌jò nutokhlǒ akhû̌akhî, dě a kè̌lǎ ma̤ǎshǎ dǒ sîkhû̌ pě. Pwa̤ dǒ a gǔ cî̌htò̌ asînu a ô̌tîwî̌tòwònǎ anǎ̤ yi̤hǒ, htodě dǒ a gǔ ma̤pî̌kè asî ayanu a hǎmôô̌ shepě̤ tô̤̌.

4 Mǒkhû̌tanaphû̌ dǒ a ma̤sǔta̤ tokhlǒnu, Cǒmara bè̌lû̌kè asî tô̤̌. A wîtě̤kè asî dǒ larakû. A dǒnṳ̌ asî dǒ hǎkû khǐsiwi̤ tokhlǒ akû dě a dǐô̌ tǒ̤ asî dǒ ta̤cî̌htò̌ alṳmṳ̌ni̤ nutôni̤ pě. 5 Kòyò hǎkhû̌phû̌ dǒ a bè̌dubè̌nǎ̤ kû̌ Cǒmara tô̤̌ dǒnô̌dǒhǎ nutokhlǒnu, Cǒmara bè̌lû̌kè asî tô̤̌tô̤̌, a nodû̌bǐ sikè lǒ̤꤮ bò asî kû̌ shi. A ma̤hǎplǎkè pwǎtǒ̤ Phanṳ̂̌a dǒ a shôbǐǐlṳ̌ bǎ kòyò kû̌ ta̤tě̤ta̤mè̤̌nu tôpwa̤ kû̌ dǒ ashǔshawa̤ susô̌tôpwa̤ pwǎ. ^a 6 Cǒmara cî̌htò̌ Wî̤̌sadû kû̌ Wî̤̌gamûra, dě a nolò̤tě̤gè̌ pî̌kèbò kû̌ mî̌. A ma̤htûhtò̌ bǎ kòyò dǒ nô̌kò tokhlǒ dǒ a bè̌dubè̌nǎ̤ kû̌ kòyò Cǒmara tô̤̌ tokhlǒ alǎ̤kè̌lû̌mò̌mṳ aya pwǎ. ^b 7 A ǐ ma̤hǎplǎkè kòyò cǒtè̤ tôpwa̤ dǒ ami̤ kû̌ Phalòtǎ. Dǒ kòyòkhu hǒtokhlǒ lṳ̂ asǐshi a ta̤sǎyṳsǎbǎ phû̌mò̤̌ tokhlǒ akhû̌akhî, Phalòtǎ sǎphlǒmô̤ tîkî̌꤮ tô̤̌. ^c 8 Kòyò cǒtè̤ hǒtôpwa̤ ô̌htûpwa̤ gû̌ dǒ asîkla dě bǎ a kè̌shǐ ganǎ̤debǎ asî ô̌htûpwa̤ phû̌mò̤̌ tôni̤ hto tôni̤ akhanu, ajě mè̤mè̤̌ lû̌sǎphlǒ. 9 Pô̤̌nudě Běcǎ Cǒmara ma̤hǎplǎge kòyò dǒ a ma̤tô lû̌sǎphlǒ dě a ô̌ dǒ ta̤jî̌ta̤jû̌ akû nutokhlǒ hî̌tè pěnu a sî̌ganǎ̤ pwǎ. Htokhôtô̤̌ a pṳ̂̌měǐ kòyòkhu hǒtokhlǒ dě a cî̌htò̌ sělě asî tǒ̤dǒ ta̤cî̌htò̌ alṳmṳ̌ni̤ nutôni̤ pě. 10 Lǒ̤꤮ bò kòyò dǒ a gû̌ma̤kû̌ pô̤̌ asî sǎphlǒ a ta̤sǎyṳ patǎ phû̌mò̤̌ akò dě a ma̤ takǎshěshu Cǒmara a ta̤siwi̤sòwò̤ tokhlǒnu, Cǒmara gǔ cî̌htò̌ jî̌khlo asî pě. Kòyò pô̤̌nutokhlǒ mî̌ kòyòkhu, kòyò phǐdû̌ anǎ̤ tokhlǒ. Mǒkhû̌phû̌ dǒ kòyò bè̌yṳ̌bè̌nǎ̤ ǐtû̌ lû̌û tokhlǒnu, asî pî̤jî̌ǐsho lô̌khô, a ǐsha kû̌ kò tîkî̌꤮ tô̤̌. 11 Mǒkhû̌tanaphû̌ dǒ a khû̌ǎshû̌shokhlo dě a ta̤siwi̤sòwò̤ lǒkhlo kû̌ sara jî̌lòhô anǎ̤ nutokhlǒ dě, a bè̌ ta̤sǔ mǒkhû̌phû̌ tokhlǒ bǎbǎ, a pîjî̌ǐsho asî bǎbǎ, a ma̤nô̌ pô̤̌nu dǒ Běcǎ a lô̤mô̤̌ tôkhò̌꤮ tô̤̌. 12 Asî mî̌ asô̌sô̌kû̌ ta̤phû̌ta̤wè̤ dǒ a gènè̤jò gû̌ kòyò tô̤̌ tokhlǒ. Htodě a ma̤ lô̌khô pô̤̌ alǎ̤klô sǎyṳô̌nu dě a ô̌phijǎlò̤ dǒ kòyò lǎ̤lṳ̂pṳ̂̌ ma̤si asî aya pwǎ. Kòyò hǒtokhlǒ numî̌ ahtè̌cawa shǔ, pîjî̌ǐsho shǔ ta̤ dǒ a sî̌ganǎ̤ lò̤phlǔtô̤̌ tokhlǒ. Kòyò ma̤sikè asî pô̤̌ kòyò ma̤si ta̤mi̤ta̤mò̤̌ nupě.

13 Dǒ asî ma̤jî̌ma̤jû̌ kòyò akhû̌akhî, Cǒmara gǔ ma̤shǔ getîkhî asî pô̤̌nu pě. Lṳmṳ̌sha bǎbǎ asî sǎlě̤sǎlò̤ lṳ̂ma̤mô̤ shôpe̤ lô̌khô asǐshi a ta̤sǎyṳ putupatǎ nutokhlǒ. Bǎ sî ma̤pwèma̤lû akhanu, asî hè ǎcuôcu khô̌kû̌tû̌ kû̌ sî dě, asî ma̤ sělě gutṳ̌ pě lô̌khô ta̤sǔ dǒ kòyò ma̤yǒ̤ nutokhlǒ, a kè̌ lòhôǐ sî hî̌nu amô̤jòjî̌ asî. Pô̤̌nudě a ma̤mi̤pǐ̤ shidô̌ sî mi̤ tokhlǒ, htokhôtô̤̌ a ma̤sòwò̤̌ lǒ̤bò sî. 14 Asî kè̌ pwa̤mǒ̤ tôpwa̤pwa̤ hî̌dě a sǎyṳ hǎmôô̌ kû̌ lû̌ còcè̌pwǎ. Asî ma̤ta̤sǔnu a ô̌kǔ pe tô̤̌ hǒ. Asî lô̌ǐ pî̌jò kòyò dǒ ata̤yṳ̌ sho khôtô̤̌ tokhlǒ gû̌ ma̤kû̌ ta̤sǔta̤phû̌mò̤̌ tokhlǒ. Dě asî sû̌ǐlò̤ nṳ̌wô̌ ǐ lô̌khô anǎ̤ kû̌ ta̤phǐsîgwǐ ǎnṳ̌tû̌aya. Asî ô̌ lô̌khô dǒ Cǒmara a ta̤ǐsho alǎ̤ hǒ. 15 Asî hǎhtò̌cû̌pǎ̤kè kû̌ klè̌tô dě a cû̌ sǎphlǒ shôpe̤kè. Asî cû̌gû̌kû̌ klè̌ dǒ Phabaûra aphû̌khû Khûbala cû̌ nutôbô. Klè̌ nutôbô mî̌ klè̌ dǒ a kè̌dû̌ ru dě a nǐ̤bǎ lô̌khô ru dǒ ta̤tě̤ta̤mè̤̌ akû mè̤̌tô̤̌. ^d 16 Bǎbǎkǎlè tîsî̌ mǐû̌lǎ tôdo sû̌ǐ getîkhî sô̌ piwi̤pèshè Bala ma̤ǐ ta̤sǔnu. Mòû̌lǎ nutôdo hî̌bǎ jòtô̤̌ bǎbǎkǎlè a hî̌bǎhtò̌ lû̌û kû̌ kòyòhǎkhû̌phû̌ ayô̤̌ dě a no ô̌kǔbǎ piwi̤pèshè dǒ a ma̤ta̤ kimwi phû̌mò̤̌ hǒtôpwa̤.

17 Kòyò hǒtokhlǒ mî̌ asô̌sô̌kû̌ shipǒ̤hǎhtò̌ petô̤̌ nutokhlǒ. Htodě asô̌sô̌kû̌ poǒlṳ̌ dǒ gili̤sǎdû̌ htû̌cû̌kè lû̌û nutokhlǒ. Dě Cǒmara ma̤ô̌bǎ hǒ asî agûlǎ̤ dǒ a khǐsîwi̤ tôkûhǒ. 18 Asî hî̌bǎ hî̌bǐhî̌ô̌ lô̌khô ayô̤̌ dǒ abwǐsîrî ô̌tô̤̌ tokhlǒ. Asî cû̌ sû̌ǐ kòyò kû̌ kòyò gǔ ma̤ta̤sòwò̤̌ dǒ sǐshi ta̤sǎyṳ patǎ tokhlǒ. Asî tili̤tôlô̌cû̌ tephekè kòyò kû̌ klè̌tôklè̌bǎ tokhlǒ. Kòyò dǒ asî lô̌ǐ tokhlǒnu, a ô̌kǔsa mô̤̌pepwǎ kû̌ ta̤sǔnu pô̤̌ asî nutokhlǒ ma̤nu pwǎ. 19 Sara jî̌lòhô anǎ̤ hǒtokhlǒnu, a olò̤ asî kû̌ asî nǐ̤bǎ ta̤pi̤li̤ pě, bǎbǎkǎlè asî nǎ̤běcǎ tû̌nu, a htû ta̤phû̌mò̤̌shǐhtô a lǎ̤bû̌lǎ̤klô tokhlǒ ajû̌, ma̤titèhî̌dě titètè̌꤮ bǎbǎ, a kè̌ pè̤̌ na numî̌, a htûhtò̌ naběcǎ hǒ. 20 Dǒ asî sî̌ganǎ̤ pa Běcǎ kû̌ Yeshǔ Khrǐ dǒ a ma̤hǎplǎge pa hǒtôpwa̤ akhû̌akhî, asî hǎplǎgekè kû̌ hǎkhû̌ a ta̤phû̌mò̤̌shǐhtô hǒtokhlǒ hǒ. Bǎbǎkǎlè khònò̤̌ asî kè̌ nṳ̌ma̤ shû̌shatǒ̤ gesô̌ kû̌ ta̤phû̌mò̤̌shǐhtô hǒtokhlǒ hî̌dě ta̤phû̌mò̤̌ hǒtokhlǒ htûkè lû̌běcǎ hǒ. Kòyò pô̤̌nutokhlǒ a ta̤ô̌htûpwa̤ mî̌, a jî̌khlo pě kû̌ a gûlǎ̤li̤nu. 21 Dǒ asî ayanu, kè̌ a sî̌ganǎ̤bǎnô̌ ta̤tě̤ta̤mè̤̌ aklè̌ tôkhò̌꤮ tô̤̌ numî̌, awô̌khlo pě kû̌ a sî̌ganǎ̤ htodě a cû̌ wîkè ǐtûû̌ kò ta̤mǎlò̤ aplò̌shǐ dǒ kòyò ǐlò̤ htohǒ asî nutokhlǒ. 22 Ta̤ dǒ asî ma̤htohǒ nutokhlǒ mî̌, atô mè̤̌mî̌ca pô̤̌ yô̤̌sǎkhěkhô̌ hî̌ tômṳ̂ kû̌, “Htwǐ htû̌tiwǐ ge dě ǎ tûû̌ sô̌ apô̌,” ^e htodě “Kòyò ushò̌bò htohǒ htô̌, dě a tokloge sô̌ hǎpèè̌” a hî̌ pô̤̌nu.