2Pe 3 | KxfSCKXF | STEP | Sû̌khômô̤ sî, he wě̤cû̌ bǎpô̤̌ sî lî̤ ginǐ̤bǎ tôbǎ. Lî̤ ginǐ̤bǎbò dǒ he wě̤cû̌ bǎ sî numî̌, pô̤̌khô sî gǔ gènè̤ mṳ̂̌plî lô̌khô gû̌ kòyò nudě, he jî̌pwǐ̤ htû̌wṳ̂̌ gènè̤bǎ sô̌ sî kû̌ ta̤ dǒ sî sû̌ǐhto nutokhlǒ pwǎ.

2 Peter 3

Yeshǔ gǔ hè sô̌ pě

1 Sû̌khômô̤ sî, he wě̤cû̌ bǎpô̤̌ sî lî̤ ginǐ̤bǎ tôbǎ. Lî̤ ginǐ̤bǎbò dǒ he wě̤cû̌ bǎ sî numî̌, pô̤̌khô sî gǔ gènè̤ mṳ̂̌plî lô̌khô gû̌ kòyò nudě, he jî̌pwǐ̤ htû̌wṳ̂̌ gènè̤bǎ sô̌ sî kû̌ ta̤ dǒ sî sû̌ǐhto nutokhlǒ pwǎ. 2 He sǎphlǒô̌ dǒ sî gǔ gènè̤bǎ piwi̤pèshè aplò̌shǐ tokhlǒ a ta̤shôbǐǐlṳ̌nǎ hto dǒ awǐnu tokhlǒ, htodě pa Běcǎ kû̌ pwa̤ma̤hǎplǎge pa hǒtôpwa̤ a ta̤mǎlò̤ dǒ sî pwa̤nophû̌ tokhlǒ ǐ hto sî nutokhlǒ.

3 Awǐlǒmî̌, sî tôbǎ sî̌yaphlô kû̌ dǒ lṳmṳ̌ni̤ gutṳ̌ pě kòyò tokhlǒkhlǒ gǔ ô̌lṳ̌htò̌ pě dě a gǔ pîjî̌ǐsho sǎyî̤̌ bò pě. Asî nutokhlǒ mî̌ a gǔ gû̌ ma̤còcè̌pwǎ a ta̤sǎyṳ phû̌mò̤̌ tokhlǒ pě. ^a 4 Dě asî gǔ gwè̌ sî pě kû̌, “Sî Běcǎ Yeshǔ olò̤kè sî kû̌ a gǔ hè sô̌ pě yahě? Pô̤̌nudě a ô̌ bǎtèya? Paphipaphu tokhlǒ sibò htohǒ bǎbǎkǎlè ta̤lǒ̤ bònu, a sô̌sô̌bò pepwǎ kû̌ pô̤̌ Cǒmara bô̌lò̤ sakhû̌lû̌ hǎkhû̌ dǒwǐkhanu pepwǎ ya.” 5 Dǒ awǐkhanu, Cǒmara hî̌ pwǎ ayô̤̌ tômṳ̂ dě mǒlǎ̤ kû̌ hǎkhû̌ htûhtò̌, dě a phî̌htò̌ shi tokhlǒ dǒ shikla dě a ma̤ htûhtò̌ kû̌ hǎkhû̌, asî jî̌ shôpe̤ takǎkè lô̌khô pwǎ. ^b 6 Bǎ a nodû̌shi dě a ma̤pî̌kè hǎkhû̌li̤ nutôbǎ akhanu bǎbǎ, a noǎpwǎ shi nuhǒ. ^c 7 Bǎbǎkǎlè dǒ Cǒmara hî̌bǎhtò̌ sô̌ ayô̤̌ pô̤̌ a bô̌lò̤ sakhû̌lû̌ mǒlǎ̤ kû̌ hǎkhû̌ akhanu akhû̌akhî, mǒlǎ̤ kû̌ hǎkhû̌ dǒ pa kè̌shǐ a khònò̤̌ tokhlǒnu, Cǒmara pṳ̂̌mě ô̌kǔ asî dě a gǔ ma̤pî̌kè asî kû̌ mî̌ pě. Cǒmara gǔ pṳ̂̌mě ô̌kǔ padô̌ asî dǒ lṳmṳ̌ni̤ bǎ a cî̌htò̌ ma̤pî̌kè kòyò dǒ a bè̌dubè̌nǎ̤kû̌ lû̌û tô̤̌ nutokhlǒ pě.

8 Khômò̤̌mô̤ sî, shěpě̤tǎ̤ ta̤hǒtocǒ tǎ̤mǎ̤ nî̌. Dǒ Běcǎ ayanu, tôni̤numî̌ asô̌sô̌kû̌ anětôrǐ dě anětôrǐ numî̌ a sô̌sô̌pwǎ kû̌ tôni̤ pwǎ. ^d 9 Pô̤̌nudě kòyò tokhlǒkhlǒ gènè̤ kû̌ shěkhǎyî̤ bǎbǎkǎlè, Běcǎ olò̤ dǒ a gǔ hè sô̌ pěnu, a ma̤yî̤ nô̌ tô̤̌. Cǒmara sǎyṳ no cû̌tǒ̤ kòyò dǒ ta̤pî̌ta̤lṳ̂̌ tôpwa̤꤮ tô̤̌, htodě a sǎyṳ no yò̤lǎ̤plǎdî̌ bò kòyò sǎphlǒ pṳ̂̌꤮ tôpwa̤ akhû̌akhî, a khòsǎdô bǎ dǒ sîya pwǎ.

10 Bǎbǎkǎlè Běcǎ alṳmṳ̌ni̤nu, a gǔ hètǒ̤ sumṳ̌ sô̌sô̌kû̌ pwa̤ǎhǔ tôpwa̤ hènṳ̌ pě. Bǎnu tôni̤ pěnu, mǒkhû̌ gǔ gǒ tôshò̌phû̌ pě dě a gǔ hǎmǎkè pě. Mî̌ gǔ upǐ̤ lîtîlî̌ bò lṳmṳ̌, la, shǎ dǒ a ô̌ dǒ mǒlǎ̤ sîtokhlǒ pě. Dě a gǔ upî̌ lîtòplò̌ bò hǎkhû̌ kû̌ ta̤ dǒ a ô̌ dǒ lû̌ûkû nutokhlǒ lǒ̤꤮ bò pě. ^e

11 Cǒmara gǔ ma̤pî̌kè lǒ̤꤮ bò pô̤̌onu pě akhû̌akhî, sî dě, sî tôbǎ ô̌htûpwa̤ hî̌tè numî̌, bǎ sî ô̌pǒ̤ kè̌shuǐ Cǒmara hè pě akhanu, sî tô ô̌htûpwa̤ plò̌shǐ dě, sî tô ô̌htûpwa̤ tô kû̌ Cǒmara asǎphlǒ. 12 Dě pô̤̌khô Cǒmara alṳmṳ̌ni̤ gǔ hètǒ̤ phwèphwè ayanu, ô̌htûpwa̤ wô̌wô̌ lô̌khô. Bǎnu tôni̤ pěnu, mî̌ gǔ gè̌htò̌ dǒ mǒlǎ̤ pě dě a gǔ ma̤pî̌kè bò mǒlǎ̤ pě. Mî̌gè̌ shû̌lě akhû̌akhî, mǒlǎ̤ ayô̤agî̌ lǒ̤꤮ bò jolò̤tě̤pro lǒ̤bò pě. 13 Bǎbǎkǎlè pa dě, pa ô̌pǒ̤kè̌shǔ ta̤dǒ Cǒmara olò̤ hto pa kû̌ a bô̌tèplè̌ bǎ pa mǒkhû̌sa kû̌ hǎkhû̌sa pě. Dě gûlǎ̤ bǎnu tôkû pěnu, kòyò ô̌htûpwa̤ ma̤tô Cǒmara asǎphlǒ pě. ^f

14 Pô̤̌nudě sû̌khô sî, dǒ sî ô̌pǒ̤kè̌shuǐ ta̤nu akhû̌akhî, pô̤̌khô Cǒmara gǔ kè̌shǐ sî kû̌ kòyò dǒ awǐ kû̌ ta̤sǔ tǎ̤mǎ̤, htodě pô̤̌khô alǎ̤bè̌ ta̤sǔ dǒ sîlô̤ gǔ ô̌ tǎ̤mǎ̤, htokhôtô̤̌ pô̤̌khô sî gǔ ô̌pè̤̌dû tǒ̤ kû̌ a pěnu, jî̌pwǐ̤jî̌li̤ gutṳ̌ lô̌khô nî̌꤮. 15 Sî̌ya gènè̤̌htò̌ lô̌khô kû̌ pa Běcǎnu a khòsǎdô pwǎ, a hè pò̤̌yǎ̤ ma̤titèhî̌dě pô̤̌khô kòyò tokhlǒ gǔ nǐ̤bǎ gû̌ kòyò ta̤ma̤hǎplǎge nudě a sǎyṳ ǐ pepwǎ asî ashěakhǎ pô̤̌nupwǎ. Pa khô sapṳ̌wè̤̌ Khûpò̌lǔ wě̤ padô̌ sî pô̤̌ he hî̌ bǎ sî nuhǒ. A wě̤ hto sî pô̤̌ Cǒmara ǐ lû̌û ta̤sî̌ta̤jò̌ nutokhlǒ hǒ. 16 Khûpò̌lǔ alî̤ pṳ̂̌tôbǎnu a wě̤ bò pô̤̌o pṳ̂̌꤮ tôplǎ. Dǒ ata̤wě̤ akûnu, ta̤dǒ kòyò sî̌ganǎ̤ phlôtô̤̌nu a ô̌ tokhlǒ, dě kòyò dǒ a jò̌lî̤tô̤̌ tokhlǒ dě asǎphlǒ lûhtôlûlò̤ tokhlǒnu, a phî̌sǔkè kòyò wě̤ lî̤nu ayô̤̌mûyô̤̌sǎ. Kǎtô̤̌ a phî̌sǔkè lî̤plò̌shǐ dǒ ashǔshawa̤ tokhlǒ yô̤̌mûyô̤̌sǎ pô̤̌nu. Dǒ asî phî̌sǔ lô̌khô pô̤̌nu akhû̌akhî, a ma̤pî̌kè tûû̌ lô̌khô anǎ̤ pwǎ.

17 Bǎbǎkǎlè he sû̌khô꤮ sî, sî sî̌ganǎ̤ htohǒ ta̤nutokhlǒ hǒ. Pô̤̌nudě pô̤̌khô kòyò phû̌mò̤̌ nutokhlǒ gǔ lô̌ǐ tikhlǐkhû̌ tikhlǐkò cû̌nṳ̌ tǎ̤ sî dǒ a ta̤gènè̤ sǔ hǒtokhlǒ akû tǎ̤mǎ̤nu, ô̌sè̌rè̌ lô̌khô sînǎ̤ nî̌. Sî kè̌ ganǎ̤de asî yô̤̌ numî̌, sî ô̌měô̌gle pe dǒ sî ta̤yṳ̌ta̤nǎ̤ akû tô̤̌ hǒ. 18 Mè̤̌mè̤tôkhônu, dû̌htò̌ hèsělě pô̤̌ lô̌khô dǒ ta̤bwǐta̤sîrî akû kû̌ dǒ ta̤sî̌ya pwa̤ dǒ a ma̤hǎplǎge pa Běcǎ Yeshǔ Khrǐnu akû nî̌꤮. Khònò̤̌ hèsělěnu, kòyò htû̌sò̌htò̌ pû pa Běcǎ Yeshǔ Khrǐ tûjû̌pwa̤ talakhǎ nî̌꤮. Ame̤.