2Th 1 | KxfSCKXF | STEP | Pa mî̌ Khûpò̌lǔ, Khûshǐla, kû̌ Khûtîmôte. Pa wě̤cû̌ wô̤̌wô̤̌ lû̌û lî̤ hǒtôbǎ dǒ sî Tîsalònǐ ta̤dòkûphû̌ tokhlǒ a ô̌. Sî mî̌ papha Cǒmara kû̌ Běcǎ Yeshǔ Khrǐ a kòyò tokhlǒ.

2 Thessalonians 1

1 Pa mî̌ Khûpò̌lǔ, Khûshǐla, ^{▼▼dǒ Grěyô̤̌ mî̌ a hî̌ kû̌ “Khûshǐlabanu”} kû̌ Khûtîmôte. Pa wě̤cû̌ wô̤̌wô̤̌ lû̌û lî̤ hǒtôbǎ dǒ sî Tîsalònǐ ta̤dòkûphû̌ tokhlǒ a ô̌. Sî mî̌ papha Cǒmara kû̌ Běcǎ Yeshǔ Khrǐ a kòyò tokhlǒ. ^b 2 Pha Cǒmara kû̌ Běcǎ Yeshǔ Khrǐ ǐ pû sî ta̤bwǐta̤sîrî kû̌ ta̤gûjû̌kabǎ nî̌꤮.

Khûpò̌lǔ a ta̤hî̌bwǐhî̌sîrîhtò̌ Cǒmara kû̌ a ta̤kwicaba

3 Sapṳ̌wè̤̌ Khrǐphû̌ sî, pa gènè̤htò̌nṳ̌ bǎ sî bǎkhò̌tè꤮ bǎbǎnu, pa bǎ hî̌bwǐhî̌sîrî Cǒmara dǒ sîya pṳ̂̌꤮ taplǎ, ma̤titèhî̌dě sî ta̤yṳ̌ta̤nǎ̤ kû̌ sî ta̤mô̤ǐ lû̌û tôpwa̤ kû̌ tôpwa̤nu, sǔ sǔ adû̌htò̌ akhû̌akhî, pa tôbǎ hî̌bwǐhî̌sîrî hǒ. 4 Pô̤̌nu akhû̌akhî, pa sanǎ̤tû̌ pa pwe̤ǐlṳ̌bǎ ta̤dòkûphû̌ dǒ ashǔshawa̤ tokhlǒ kû̌ sîwe̤sîkè. Bǎ sî khòbǎ ta̤ma̤jî̌ma̤jû̌ kû̌ ta̤pò̤̌ta̤sha tokhlǒ akhanu, sî khòsǎdôbò̌ dě sî ô̌měô̌gle dǒ sî ta̤yṳ̌ta̤nǎ̤ akû akhû̌akhî, pa lǎ̤phî̌htò̌yô̤̌ mô̤̌꤮ mî̌ca pa sǎphlǒ.

5 Lǒ̤bò ta̤nu tokhlǒ khò asǎphlǒ kû̌ Cǒmara cî̌htò̌ ta̤ numî̌ acǒatè̤ pwǎ. Pô̤̌nu akhû̌akhî, Cǒmara gǔ bè̌sî kû̌ sîtôbǎ kû̌ ashiagǎkû pě. Sî khòbǎ ta̤jî̌ta̤jû̌ khònò̤̌ numî̌ dǒ Cǒmara shigǎ aya pwǎ. 6 Cǒmara ma̤ ta̤ numî̌ atôabǎ pwǎ. Kòyò dǒ a ma̤jî̌ma̤jû̌ sî tokhlǒnu, Cǒmara gǔ ǐ tîkhî shěshu sô̌ asî ta̤jî̌ta̤jû̌ pě. 7 Bǎbǎkǎlè sî kû̌ pa khòbǎ ta̤jî̌ta̤jû̌ tokhlǒnu, Cǒmara ma̤mô̤ getîkhî sô̌ pa pě. Dǒ Běcǎ Yeshǔ ô̌lṳ̌htò̌ akhapěnu, a ma̤mô̤htò̌ sô̌ pa pě. A hè dǒ mî̌plô̤̌ akû pě. A hè kû̌ a tanaphû̌ dǒ a ô̌ kû̌ a ta̤pô̤ta̤phǎ nutokhlǒ pě. 8 A gǔ cî̌htò̌ kòyò dǒ a sî̌ganǎ̤ kû̌ kòyò Cǒmara tô̤̌ nutokhlǒ kû̌ kòyò dǒ a jûǎ kû̌ pa Běcǎ Yeshǔ a ta̤sǎlě̤we̤kè tô̤̌ nutokhlǒ pě. 9 Asî gǔ khòbǎ ta̤pî̌ta̤lṳ̂̌ tûjû̌pwa̤ a ta̤cî̌htò̌nu pě. Htodě Běcǎ gǔ bè̌tephekè asî dǒ alô̤mô̤̌ kû̌ a ta̤bwǐdû̌sîrîhtû dǒ apô̤aphǎ nutokhlǒ alô̤mô̤̌ pě. ^c 10 Dǒ Běcǎ Yeshǔ hèsô̌ alṳmṳ̌ni̤ tôni̤ pěnu, a gǔ htûhtò̌ tû̌ pô̤̌nu pě. Bǎ nutôni̤ pěnu, a kòyò plò̌shǐ tokhlǒ gǔ ma̤sîrîdû̌sîrîhtû lû̌û pě dě kòyò dǒ a yṳ̌ǎ lû̌û tokhlǒnu, a gǔ ǒò̌ bò lû̌ pě. Pô̤̌nudě sî tokhlǒkhlǒ bǎbǎ, sî gǔ htû̌sò̌htò̌ bǎ asîkla pě, ma̤titèhî̌dě sî yṳ̌ǎ hto ta̤sǎlě̤we̤kè dǒ pa shôbǐǐlṳ̌ htobǎ sî nutokhlǒ hǒ.

11 Pô̤̌nudě pô̤̌khô Cǒmara gǔ ma̤jè̌ sî dě sî gǔ ô̌htûpwa̤ tôbǎ kû̌ ata̤kaǎ sî ayanu, pa kwicaba bǎ dǒ sîya pṳ̂̌꤮ taplǎ. Pa kwicaba bǎ pô̤̌ dǒ sîya kû̌ Cǒmara gǔ ma̤lǒbe bǎ sî, lǒ̤bò sî ta̤ma̤wô̌ dǒ sî sǎyṳma̤ nutokhlǒ, kû̌ ta̤ma̤ dǒ sî ma̤ kû̌ ta̤yṳ̌ta̤nǎ̤ nutokhlǒ. Dě Cǒmara ma̤ bǎ sî kû̌ a ta̤pô̤ta̤phǎ pě. 12 Pa kwicaba pô̤̌o numî̌ pô̤̌khô pa Běcǎ Yeshǔ gǔ nǐ̤bǎ ta̤sîrîdû̌sîrîhtû dǒ sî ô̌ dě sî nǐ̤bǎ ta̤sîrîdû̌sîrîhtû dǒ a ô̌ pě aya nupwǎ. Dǒ pa Cǒmara kû̌ pa Běcǎ Yeshǔ Khrǐ abwǐsîrî akhû̌akhî, dě a htûhtò̌ tûû̌ pô̤̌o pě nî̌꤮.