2Th 2 | KxfSCKXF | STEP | Sapṳ̌wè̤̌ Khrǐphû̌ sî, he sǎyṳ pwe̤ǐlṳ̌ bǎ sî kû̌ dǒ Běcǎ Yeshǔ Khrǐ hè akha pě awe̤akè kû̌ pa gǔ geô̌plǒ sô̌ lû̌û dǒ a ô̌ pě awe̤akènu pwǎ.

2 Thessalonians 2

Kòyò phû̌mò̤̌ jî̌jû̌ tôpwa̤

1 Sapṳ̌wè̤̌ Khrǐphû̌ sî, he sǎyṳ pwe̤ǐlṳ̌ bǎ sî kû̌ dǒ Běcǎ Yeshǔ Khrǐ hè akha pě awe̤akè kû̌ pa gǔ geô̌plǒ sô̌ lû̌û dǒ a ô̌ pě awe̤akènu pwǎ. ^a 2 Kòyò tôpwa̤pwa̤ kè̌ hî̌ sî kû̌ Běcǎ alṳmṳ̌ni̤ hètǒ̤ hto numî̌ pa kwisǎyṳ sî, yṳ̌ǎ yokǎkwe lô̌khô tǎ̤mǎ̤ nî̌꤮, ǐshǔǐsha lô̌khô tǎ̤mǎ̤ nî̌꤮. A kè̌ hî̌ bǎ sî kû̌, Cǒmara no hî̌pô̤nǎ he kè̌mè̤̌tô̤̌dě kòyò shôbǐǐ sî̌yalṳ̌ bǎ he pô̤̌nu a hî̌cǒ bǎbǎ, kè̌mè̤̌tô̤̌dě a kè̌ hî̌ lô̌khô kû̌ lî̤ hètǒ̤ dǒ pa ô̌ tôbǎ, a kè̌ hî̌cǒ pô̤̌nu bǎbǎ yṳ̌ǎ lô̌khô tǎ̤mǎ̤ nî̌꤮. 3 Nolô̌ǐplò̤ǐ tǎ̤ sînǎ̤ tǎ̤mǎ̤ nî̌꤮. Běcǎ Yeshǔ Khrǐ hè tǒ̤ nò̌khôtô̤̌nu, kòyò tokhlǒ shěpè̤̌ Cǒmara pě dě kòyò dǒ a htè̌shěshu Cǒmara kû̌ Cǒmara a ta̤sû̌ta̤tòwò nutôpwa̤ ô̌lṳ̌htò̌ pě. Ta̤nu tokhlǒ htûhtò̌wǐ htopědě Běcǎ Yeshǔ Khrǐ hè sô̌ pě alṳmṳ̌ni̤nu a hè htûhtò̌ nô̌ pě. Htodě Cǒmara ma̤pî̌phlǔkè kòyò phû̌mò̤̌ nutôpwa̤ dǒ larakû pě. 4 Lǒ̤bò ta̤dǒ kòyò kaǎ kû̌ Cǒmara, mè̤̌tô̤̌mî̌, lǒ̤bò ta̤dǒ kòyò cabahtò̌ a tokhlǒnu, kòyò phû̌mò̤̌ nutôpwa̤ htè̌geshěshu pě dě a gǔ phî̌htò̌yô̤̌ anǎ̤ kû̌ adû̌lǒkhlo kû̌ lǒ̤bò ta̤nutokhlǒ pô̤̌nu pě. Pô̤̌nu akhû̌akhî, a gǔ hènṳ̌ hǎnòò̌ dǒ Cǒmara ta̤lṳhtò̌hô akû pě dě a gǔ dôkôǐ tûû̌ anǎ̤ kû̌ he mî̌ Cǒmara tôpwa̤ pô̤̌nu pě. ^b

5 Mî̌ sî to̤ǐ pe ya? Bǎ he ô̌ pe kû̌ sî akhanu, he shôbǐǐlṳ̌ bǎbò hto sî hǒ, yahî̌? 6 Khònò̤̌ ta̤dǒ a ma̤dǐdò tě̤tṳ bǎ kòyò phû̌mò̤̌ nutôpwa̤ aklè̌nu a ô̌ dě titè numî̌ sî sî̌yatû̌. Pô̤̌nudě dǒ ashěakhǎ hètǒ̤ pěnu mî̌ kòyòhe nutôpwa̤ gǔ ô̌lṳ̌htò̌ pě. 7 Ta̤ô̌hǔô̌sè̌ dǒ a amè̤̌ ta̤phû̌mò̤̌shǐhtô tokhlǒnu, a ma̤hto ta̤dǒ hǎkhû̌nu hǒ. Bǎbǎkǎlè kòyò dǒ a ma̤dǐdò tě̤tṳ ta̤phû̌mò̤̌shǐhtô tôpwa̤nu, a gǔ ma̤dǐdò tě̤tṳ hènè tǒ̤dǒ Cǒmara phî̌tephekè a nupě. 8 Htodě kòyò phû̌mò̤̌ nutôpwa̤ gǔ ô̌lṳ̌htò̌ pě bǎbǎkǎlè bǎ Běcǎ Yeshǔ Khrǐ hè pě akhanu, a gǔ ma̤sikè lû̌û kû̌ a ta̤sǎhtò̌ dǒ agô̌kûnu pě, dě a hè ma̤pî̌kè lû̌û kû̌ a ta̤bwǐdû̌sîrîhtû nupě. ^c 9 Kòyò phû̌mò̤̌ tôpwa̤nu a gǔ nǐ̤bǎ hǎkhû̌tana a ta̤pô̤ta̤phǎ dě a dǔlè̌lṳ̌ lòhǎlòhô bǎbò kòyò kû̌ ta̤cô̌klǐcô̌sè pṳ̂̌꤮ tocǒ, ta̤ma̤mǎnǎ pṳ̂̌꤮ tocǒ kû̌ ta̤cô̌klǐ ǒò̌ tokhlǒ pṳ̂̌꤮ tocǒ pě. ^d 10 Pô̤̌khô a gǔ lòhǎlòhô kòyò dǒ a glè̌ si dǒsû̌dǒsò̌ tokhlǒ ayanu, a noǎ a ta̤phû̌mò̤̌shǐhtô nutokhlǒ pṳ̂̌꤮ tocǒ pě. Asî sǎlě̤sǎlò̤ phî̌shěshu kû̌ kòyò ta̤tě̤ta̤mè̤̌ tô̤̌ akhû̌akhî, a si lô̌khô pě. Asî kè̌ phî̌shěshu hî̌dě a nǐ̤bǎ lô̌khô ta̤hǎplǎge pě. 11 – 12 Pô̤̌nudě pô̤̌khô asî yṳ̌ǎ kû̌ kòyò ta̤lòhônu pě, kǎtô̤̌ pô̤̌khô Cǒmara gǔ cî̌htò̌kè kòyò dǒ a yṳ̌ǎ kû̌ kòyò ta̤tě̤ta̤mè̤̌ tô̤̌ ayanu, htodě pô̤̌khô a cû̌ sǎlě̤sǎlò̤ yṳ̌ǎ ta̤phû̌mò̤̌shǐhtô nutokhlǒ ayanu, Cǒmara plûhè khô̌tû̌ asî ta̤lòhǎlòhô ashû̌asho nutôcǒ hǒ.

Pwa̤yṳ̌ǎ ta̤phû̌ tokhlǒ tô ihtǒ měgle sělě gutṳ̌ dǒ a ta̤yṳ̌ta̤nǎ̤ akû

13 Pṳ̌wè̤̌ sî, sî mî̌ kòyò dǒ Běcǎ mô̤ǐ sîtokhlǒ dě pa bǎ hî̌bwǐhî̌sîrî Cǒmara dǒ sîya pṳ̂̌꤮ taplǎ. Ma̤titèhî̌dě pô̤̌khô sî gǔ nǐ̤bǎ ta̤ma̤hǎplǎge ayanu, Cǒmara rû̌htò̌ nǎ hto sî dǒ asakhû̌lû̌kha penu hǒ. Dǒ Yôla Plò̌shǐ Běcǎ ma̤plò̌shǐ sî kû̌ sî yṳ̌ǎ ta̤tě̤ta̤mè̤̌ akhû̌akhî, Cǒmara ma̤hǎplǎge sî hǒ. 14 Dǒ pa shôbǐǐ bǎ sî ta̤sǎlě̤we̤kènu khû̌khîdě Cǒmara kaǎ hǒ sî pô̤̌nu hǒ. Ma̤titèhî̌dě pô̤̌khô sî gǔ nǐ̤bǎ Běcǎ Yeshǔ Khrǐ a ta̤bwǐdû̌sîrîhtû dě a kaǎ sî hǒ. 15 Pô̤̌nudě pṳ̌wè̤̌ sî꤮, pa sû̌ǐtòwòǐ shôbǐǐlṳ̌ hto sî kû̌ pa khû̌phě nutokhlǒ bǎbǎ, mè̤̌tô̤̌dě pa sû̌ǐtòwòǐ hto sî kû̌ lî̤ dǒ pa wě̤ cû̌ bǎ sî tokhlǒ akûnu bǎbǎ, ô̌měô̌gle kû̌ lô̌khô kòyò dě pṳ̂̌měǐ wô̌ kû̌ lô̌khô kòyò nî̌꤮.

16 – 17 Papha Cǒmara abwǐsîrî akhû̌akhî dě a ǐlò̤ pa a ta̤ǐkhû̌ǐǎ tûjû̌pwa̤ kû̌ ta̤kè̌shuǐ dǒ acǒatè̤ tokhlǒnu hǒ. Pa Běcǎ Yeshǔ Khrǐ kû̌ papha Cǒmara dǒ a mô̤ǐ pa nutôpwa̤ ǐkhû̌ǐǎ pû sî nî̌꤮. Kǎtô̤̌ pô̤̌khô lǒ̤꤮ bò sî ta̤phǐta̤ma̤ nutokhlǒ kû̌ lǒ̤꤮ bò sî ta̤hî̌bǎ tokhlǒ gǔ wô̌ ayanu, a gǔ ǐshû̌ǐshohtò̌ pû sî sǎphlǒ nî̌꤮.