2Th 3 | KxfSCKXF | STEP | Pa sapṳ̌wè̤̌ sî, pa sǎyṳ shôbǐǐkè sî dǒ gutṳ̌kò kû̌, pô̤̌khô Běcǎ a ta̤sǎlě̤we̤kè gǔ lṳ̌peshecû̌ phwèphwè ayanu, kwicabanṳ̌ bǎ paya nî̌꤮. Htokhôtô̤̌ pô̤̌ sî phî̌shěshu hto ta̤sǎlě̤we̤kènu kû̌ dǒ ta̤bè̌dubè̌nǎ̤ akûnu pô̤̌khô kòyò gǔ phî̌shǐshu sô̌sô̌ pô̤̌ sî phî̌shǐshu nudě, kwicabanṳ̌ bǎ pô̤̌ lô̌khô paya nî̌꤮.

2 Thessalonians 3

Kwicaba padô̌ paya

1 Pa sapṳ̌wè̤̌ sî, pa sǎyṳ shôbǐǐkè sî dǒ gutṳ̌kò kû̌, pô̤̌khô Běcǎ a ta̤sǎlě̤we̤kè gǔ lṳ̌peshecû̌ phwèphwè ayanu, kwicabanṳ̌ bǎ paya nî̌꤮. Htokhôtô̤̌ pô̤̌ sî phî̌shěshu hto ta̤sǎlě̤we̤kènu kû̌ dǒ ta̤bè̌dubè̌nǎ̤ akûnu pô̤̌khô kòyò gǔ phî̌shǐshu sô̌sô̌ pô̤̌ sî phî̌shǐshu nudě, kwicabanṳ̌ bǎ pô̤̌ lô̌khô paya nî̌꤮. 2 Kwicaba pô̤̌ padô̌ pa kû̌ Běcǎ gǔ ma̤hǎplǎ pa kû̌ dǒ kòyòphû̌mò̤̌ nutokhlǒ kû̌ kòyòkhu nutokhlǒ a cǔdekû nî̌꤮. Ma̤titèhî̌dě Cǒmara a ta̤sǎlě̤we̤kènu kòyò yṳ̌ǎ bò pṳ̂̌꤮ tôpwa̤ mè̤̌tô̤̌. 3 Bǎbǎkǎlè Běcǎnu acǒ kû̌ ayô̤̌ dě a ǐshû̌htò̌ sî sǎphlǒ akhû̌aǎ pě, dě a tègè̌tògò tě̤tṳ bǎ sî kû̌ kòyòhe nutôpwa̤ pě. 4 Dǒ pa yṳ̌ǎnṳ̌ Běcǎ akhû̌akhîdě, pa sî̌ganǎ̤ kû̌ sî bǎ꤮ gû̌ma̤ sělě gutṳ̌ pô̤̌khô pa mǎnǎ sî nuhǒ. 5 Běcǎ sûcû̌ pû sî dǒ Cǒmara ta̤mô̤ akû kû̌ Khrǐ a ta̤khòsǎdô sǎphlǒhtû akûnu pě nî̌꤮.

Ta̤ma̤ lò̤bǎ dǒ bǎma̤ ta̤phǐta̤ma̤ aya

6 Pṳ̌wè̤̌ Khrǐphû̌ sî, dǒ Běcǎ Yeshǔ Khrǐ ami̤ akû, pa mǎnǎ sî yô̤̌sǎ kû̌, lǒ̤bò pṳ̌wè̤̌ dǒ a cè̌klè dě a gû̌ma̤ kû̌ kòyò pô̤̌ pa lǎ̤klôma̤ dǒ pa ǐ kè sînu tô̤̌ tokhlǒnu cû̌ bǒsû̌ tǎ̤ kû̌ asî tǎ̤mǎ̤ nî̌. 7 Sî nǎ̤běcǎ tô gû̌ kè̌ ma̤kû̌ pa hî̌tènu sî sî̌ganǎ̤ tě̤tě̤mè̤̌mè̤̌ htotûû̌. Ma̤titèhî̌dě bǎ pa ô̌plǒ kû̌ sî akhanu, pa cè̌klèbǎ tô̤̌. 8 Kòyò ma̤hǎlǒ̤kè padô̌ pa lǎ̤ǎlǎ̤ô aya tô̤̌. Mè̤̌mè̤tôkhônu, pô̤̌khô a gǔ htûhtò̌ ta̤wǐta̤ò̌ dǒ sîya tôpwa̤ tô̤̌nu, pa jî̌pwǐ̤ǎ jî̌pwǐ̤wè̤ pwǎ. 9 Pa kè̌ kwima̤jè̌ sî kû̌ pa lǎ̤ǎlǎ̤ô kû̌ lǎ̤ô̌doshô̌ numî̌ a gwǎ pwǎ. Bǎbǎkǎlè pô̤̌khô pa gǔ htûhtò̌ sî lǎ̤kè̌ǐ dě sî gǔ gû̌ma̤ pô̤̌ pa ma̤ ayanu, pa bǎ gôǎgôwè̤ ǐtûû̌ pwǎ. 10 Bǎ pa ô̌pe kû̌ sî akhanu, pa ta̤sû̌ǐ sî kû̌, “Kòyò dǒ a cè̌klè tôpwa̤nu, kòyò tôbǎ dǐǎyǎ tôcǒ꤮ tô̤̌.”

11 Pa cû̌hî̌tǒ̤ pô̤̌o ma̤titènumî̌, pa ganǎ̤de kû̌ dǒ sîklanu kòyò cè̌klè dě aǎawè̤ gû̌ kòyò tôcǒ tô̤̌nu a ô̌ tokhlǒ. Dě a cû̌nṳ̌ ma̤shû̌shǎ bò kòyò shǔshawa̤ a ta̤we̤ta̤kènu a ô̌ tokhlǒ, pa ganǎ̤de pô̤̌nu. 12 Dǒ Běcǎ Yeshǔ Khrǐ akû, pa mǎnǎ payô̤̌nu kû̌ kòyò cè̌klèlèbô̌ hǒtokhlǒ aya. Pô̤̌khô asî gǔ ô̌htûpwa̤ lò̤tôbǎ kû̌ kòyò, kǎtô̤̌ a gǔǎgǔwè̤ kû̌ lô̌khô kòyò dě a gǔ bǔǎlò̤ ǐgû̌ lô̌khô tûû̌ a ta̤ô̌htûpwa̤ ayanu, pa ǐshû̌ǐshokè asî hǒ. 13 Bǎbǎkǎlè, pṳ̌wè̤̌ Khrǐphû̌ sî, bǎ sî ma̤ ta̤wô̌ akhanu, sǎphlǒpî̌ tǎ̤ lô̌khô tǎ̤mǎ̤ nî̌. Tûlû̌ ma̤ sělě hènè lô̌khô pô̤̌nu nî̌.

14 Kòyò tôpwa̤pwa̤ kè̌ jûǎ kû̌ kòyò lî̤ dǒ pa sûbǎ sî hǒtôbǎ a ta̤sû̌ǐtòwòǐ tô̤̌ hǒnumî̌ kè̌mǎnǎ a nî̌. Pô̤̌khô a gǔ sòwò̤̌ lò̤tû̌ anǎ̤ pěnu dě, bǒsû̌ tǎ̤ lô̌khô a tǎ̤mǎ̤ nî̌. 15 Bǎbǎkǎlè sǎphlǒdû̌ tǎ̤ a tǎ̤mǎ̤ nî̌, mè̤̌mè̤tôkhônu ǐsè̌rè̌ a pô̤̌ na ǐsè̌rè̌ na pṳ̌wè̤̌ Khrǐphû̌ tôpwa̤nu pwǎ nî̌.

Ta̤hî̌bǎ gutṳ̌kò

16 Ta̤gûjû̌kabǎ a Běcǎ gǔ ǐlò̤tû̌ sî ta̤gûjû̌kabǎ pṳ̂̌꤮ tôplǎ dǒ klè̌ pṳ̂̌ tôbô akû nî̌꤮. Běcǎ gǔ ô̌cu tû̌ kû̌ sî pṳ̂̌tôpwa̤ nî̌꤮.

17 He mî̌ Khûpò̌lǔ dě he wě̤ ta̤hî̌mô̤hî̌wô̌nu kû̌ he cǔde tûû̌. Lî̤ pṳ̂̌꤮ tôbǎ dǒ he wě̤ hto dě dǒ agutṳ̌ nu, he wě̤ ma̤mǎma̤dò khô̌ pô̤̌nu. He wě̤ ma̤mǎma̤dò pô̤̌nu pṳ̂̌꤮ tôplǎ.

18 Pa Běcǎ Yeshǔ Khrǐ abwǐsîrî gǔ ô̌ pû kû̌ sî pṳ̂̌꤮ tôpwa̤ nî̌꤮.