2Ti 1 | KxfSCKXF | STEP | He mî̌ Khûpò̌lǔ. He wě̤cû̌ nṳ̌bǎ sî lî̤hǒtôbǎ. Cǒmara sǎphlǒô̌ he dǒ he glè̌ htûhtò̌ Yeshǔ Khrǐ a pwa̤nophû̌ tôpwa̤, htodě Cǒmara olò̤ hto kû̌ a ǐ pa ta̤htûpwa̤ dǒ Yeshǔ Khrǐ akû pě awe̤akènu he shôbǐǐ bò kòyò pṳ̂̌꤮ tôpwa̤ hǒ.

2 Timothy 1

1 He mî̌ Khûpò̌lǔ. He wě̤cû̌ nṳ̌bǎ sî lî̤hǒtôbǎ. Cǒmara sǎphlǒô̌ he dǒ he glè̌ htûhtò̌ Yeshǔ Khrǐ a pwa̤nophû̌ tôpwa̤, htodě Cǒmara olò̤ hto kû̌ a ǐ pa ta̤htûpwa̤ dǒ Yeshǔ Khrǐ akû pě awe̤akènu he shôbǐǐ bò kòyò pṳ̂̌꤮ tôpwa̤ hǒ.

2 He wě̤cû̌ bǎ hephû̌pwa̤khû dǒsû̌dǒsò̌ Khûtîmôte dǒ he mô̤ǐ a tôpwa̤ a ô̌. Pha Cǒmara kû̌ pa Běcǎ Yeshǔ Khrǐ gǔ ǐlò̤ pû na ta̤bwǐta̤sîrî, ta̤sǎyṳgwèbǎǐ kû̌ ta̤gûjû̌kabǎ nî̌꤮. ^a

Ta̤hî̌bwǐhî̌sîrî kû̌ ta̤ǐkhû̌ǐǎ

3 He hî̌bwǐhî̌sîrî Cǒmara dǒ naya. A mî̌ Cǒmara tôpwa̤ dǒ he ma̤ ata̤ kû̌ he sǎphlǒ a ta̤gènè̤ mṳ̂̌plî pô̤̌ he mǒ̤phaphiphu dǒ꤮ wǐnu tokhlǒ ma̤hto nuhǒ. Bǎ he gènè̤htò̌bǎ sô̌ na pṳ̂̌꤮ tôplǎ akhanu, he hî̌bwǐhî̌sîrî Cǒmara dě he kwicaba dǒ naya lṳmṳ̌khǐkhǐ lṳmṳ̌shasha. 4 Bǎ he gènè̤htò̌bǎ na mǐ̤sǎshilò̤ akhanu, he sǎyṳ kè̌shǐ jî̌ na, ma̤titèhî̌dě pô̤̌khô he gǔ sǎlě̤sǎlò̤ lǒlǒbebe ayanudě, he sǎyṳ kè̌shǐ na pwǎ. 5 He gènè̤htò̌sô̌ na ta̤yṳ̌ta̤nǎ̤ dǒ a tě̤tě̤mè̤̌mè̤̌ htodě dǒ a mè̤̌kû̌ naphi Lṳ̂ǎ kû̌ namǒ̤ Mǒ̤ǔnǐke yṳ̌ǎ hto tôcǒ nô̤̌ nutokhlǒ. He yṳ̌ǎ shapwǎ̤ kû̌ asî ta̤yṳ̌nu a ô̌ dǒ nakû pwǎ. ^b 6 Dǒ na yṳ̌nǐ̤nǎ̤nǐ̤ wô̌bǎ akhû̌akhî, he dǐ sî̌ganǎ̤bǎ na kû̌ na gǔ noǎ hènè na sûnu. Bǎ he bè̌htò̌ he cǔde dǒ nalô̤ akhanu, Cǒmara ǐhto na sûhǒ. 7 Ma̤titèhî̌dě, Yôla Plò̌shǐ Běcǎ dǒ Cǒmara ǐlò̤ hto panu, a nohtûhtò̌ pe pa kû̌ kòyò dǒ a ǐsha ta̤ tokhlǒnu mè̤̌petô̤̌. Mè̤mè̤̌tôkhônu Yôla Plò̌shǐ Běcǎ ma̤benṳ̌ hto pa sǎphlǒ kû̌ ta̤shû̌ta̤sho kû̌ ta̤mô̤ǐ kû̌ ta̤pǒǐlò̤jò panǎ̤ nuhǒ.

8 Pô̤̌nudě, na glè̌ khòlṳ̌ nanǎ̤ dǒ pa Běcǎ ayanu sòwò̤̌ tǎ̤mǎ̤, dǒ Běcǎ akhû̌akhîdě, kòyò dǒlò̤tě̤ he dǒ apô̤kûnu bǎbǎ, sòwò̤̌ tǎ̤mǎ̤mǎ̤. Mè̤mè̤̌tôkhônu khòwô̤̌wô̤̌ ta̤pò̤̌ta̤sha kû̌ he dǒ ta̤sǎlě̤we̤kè aya pô̤̌ Cǒmara ǐ na ta̤khû̌ta̤ǎnu. 9 Pô̤̌khô pa glè̌ htûhtò̌ Cǒmara a pwa̤plò̌shǐphû̌ tokhlǒ ayanudě, a ma̤hǎplǎge pa hǒ, dě a kaǎ pa hǒ, dǒ pa ma̤hto ta̤phǐta̤ma̤ nutokhlǒ akhû̌akhîdě, a kaǎ pa mè̤̌bǎtô̤̌. Hǒomî̌ a ta̤yè̤lò̤nǎ kû̌ abwǐasîrî pwǎ. Bǎ a bô̌lò̤ hǎkhû̌ nò̌khôtô̤̌nu, a ǐlò̤ pa ta̤bwǐta̤sîrînu dǒ Yeshǔ Khrǐ akû nuhǒ. 10 Bǎbǎkǎlè khònò̤̌ pa Běcǎ Yeshǔ Khrǐ dǒ a ma̤hǎplǎge pa nutôpwa̤ hè akhû̌akhî, a dǔlè̌lṳ̌ hto pa ta̤bwǐta̤sîrî nuhǒ. A ma̤pî̌kè ta̤si a ta̤siwi̤sòwò̤ dǒ a pè̤̌ǎpè̤̌ô pa tokhlǒ hǒ. Htodě dǒ ta̤sǎlě̤we̤kè akhû̌akhî, a dǔlè̌lṳ̌ hto ta̤htûpwa̤ dǒ a si jòtô̤̌ nuhǒ. 11 Cǒmara rû̌htò̌ he pô̤̌ pwa̤shôbǐǐ bǎ kòyò ta̤ tôpwa̤ nuhǒ, htodě a rû̌htò̌ he pô̤̌ pwa̤nophû̌ tôpwa̤ kû̌ sara dǒ a sû̌ǐ ta̤sǎlě̤we̤kè tôpwa̤ nuhǒ. ^c 12 Ma̤pô̤̌nudě dǒ ta̤hǒo tokhlǒ akhû̌akhî, he khòbǎhto ta̤hǒo tokhlǒ hǒ. Bǎbǎkǎlè he sòwò̤̌ tô̤̌, ma̤titèhî̌dě, he sî̌yahto pwa̤ dǒ he yṳ̌nǐ̤nǎ̤nǐ̤ a tôpwa̤ hǒ, htodě he yṳ̌ǎhto kû̌ ta̤ dǒ a ǐlò̤ dǒ he cǔdekû tokhlǒnu, a gǔ ô̌pǒ̤ǐ tǒ̤dǒ lṳmṳ̌ni̤ gutṳ̌ nutôni̤ pě.

13 Pô̤̌ na sû̌ǐ nǐ̤hto dǒ helô̤ tokhlǒnu, pṳ̂̌mě dě gû̌ kè̌lû̌ ma̤ pû nî̌꤮. Dě na tô yṳ̌ǎ hènè Khrǐ dě na tô mô̤ǐ kòyò dǒ ashǔshawa̤ tokhlǒ. Na kû̌ Yeshǔ Khrǐ htûhtò̌ lû̌û tôcǒ꤮ nô̤̌ akhû̌akhî na ma̤bò̌ta̤ pwǎ. 14 Ô̌pǒ̤ǐ ta̤ awô̌ dǒ Cǒmara ǐlò̤ hto na nutôcǒnu nî̌꤮. Yôla Plò̌shǐ Běcǎ dǒ a ô̌htûpwa̤ dǒ nakû nutôpwa̤ a ta̤siwi̤sòwò̤ khû̌khîdě pṳ̂̌mě pû ta̤wô̌ nutôcǒ nî̌꤮.

15 Na sî̌ganǎ̤ kû̌ lǒ̤꤮ bò kòyò ô̌ dǒ Ashǎgǎkû tokhlǒnu asî tiwǐ̤ cû̌khô̌kè bò he gûlǎ̤ hǒ dě dǒ asî nutokhlǒ aklanu, Khûphǔkelǔ kû̌ Khûěrimûkěne ô̌pa bǎnu.

16 Běcǎ Cǒmara gǔ sǎyṳgwèbǎǐ pû Khûò̌nǐshaphrǔ kû̌ a hǐphû̌phòphû̌ kû̌ kòyò ashǔshawa̤ dǒ a ô̌cu kû̌ a lǒ̤꤮ bò nutokhlǒ nî̌꤮. Ma̤titèhî̌dě, Khûò̌nǐshaphrǔ mî̌ a ma̤mô̤ sǎla̤la̤ he sǎphlǒ hǒ, htodě kòyò dǒnṳ̌ he dǒ apô̤kû bǎbǎkǎlè dǒ hekhû̌khî dě a sòwò̤̌ tô̤̌. 17 Bǎ a hètǒ̤ dǒ Wî̤̌rṳ̂̌me̤ akû akhanu, a bǎ kè̌shǐ nò he a gènè̤ dě a jî̌pwǐ̤jî̌li̤ kè̌lǎ he. 18 Běcǎ hè alṳmṳ̌ni̤ tôni̤ pěnu Běcǎ gǔ dǐ kè̌shǐ pû lû̌û kû̌ a ta̤sǎyṳgwèbǎǐ pěnî̌. A ma̤jè̌ he dǒ Wî̤̌Ěphěsu akû pwǐ꤮ tènu, na sî̌ganǎ̤ tě̤tě̤mè̤̌mè̤̌ tûû̌hǒ.