2 Timothy 2

Yeshǔ Khrǐ akliphû̌ dǒ a sǎphlǒcǒ tôpwa̤

1Pô̤̌nu akhû̌akhî, he phû̌khû꤮ bè̌shû̌bè̌sho na sǎphlǒ kû̌ ta̤bwǐta̤sîrî dǒ a ô̌ dǒ Yeshǔ Khrǐ akû nunî̌꤮. 2Phî̌nṳ̌ ta̤sû̌ǐ dǒ na ganǎ̤de hto dǒ he shôbǐǐ hto na dǒ pwa̤khòlṳ̌ saprṳ̂ a lô̤mô̤̌ nutokhlǒ nî̌꤮, dě ǐlò̤ tutṳ̌ ta̤ nutokhlǒ kû̌ kòyò dǒ acǒatè̤ lǎ̤nǎla̤ǐ dě a sû̌ǐjò tutṳ̌ bǎ kòyò nutokhlǒ a cǔdekû nî̌꤮. 3Khòwô̤̌wô̤̌ ta̤pò̤̌ta̤sha kû̌ khrǐphû̌ dǒ ashǔshawa̤ tokhlǒ pô̤̌ Yeshǔ Khrǐ akliphû̌ dǒ awô̌ tôpwa̤nu nî̌꤮. 4Kliphû̌ dǒ a ô̌ bǎ ta̤phǐta̤ma̤ akû tôpwa̤nu, a sǎyṳ ma̤tôma̤mô̤ a khli ikǒdû̌ asǎphlǒ akhû̌akhî, a tô ma̤ dǐkhû̌dǐdò anǎ̤ kû̌ ta̤phǐta̤ma̤ dǒ ashǔshawa̤ tokhlǒ tô̤̌. 5Kòyò dǒ a bè lò̤wě̤ ta̤ tôpwa̤nu, kè̌ a ganǎ̤de ma̤ gû̌ ta̤bè a ta̤sû̌ta̤tòwò tô̤̌ numî̌ a nǐ̤bǎjò nô̌ kû̌ kòyò ta̤bè akhû̌akǎ tô̤̌. 6Kòyò ma̤ǎlè̤̌ dǒ agô tôpwa̤nu, a tô nǐ̤bǎ wǐgutṳ̌ sǒsǎwû̌phô tokhlǒ pwǎ. 7Gènè̤ tě̤tě̤mè̤̌mè̤̌ lô̌khô ta̤ dǒ he hî̌nu, ma̤titèhî̌dě Běcǎ gǔ dǐsî̌yaphlô bò na ta̤pṳ̂̌꤮ tocǒ pě.

8Gènè̤bǎ lô̌khô Yeshǔ Khrǐ dǒ Cǒmara ma̤htûpwa̤ gesô̌ a dǒ ta̤si nutôpwa̤. A mî̌ Khûdawi̤ akhlialè hǒ. Ta̤sǎlě̤we̤kè dǒ he shôbǐǐlṳ̌ bǎ sî numî̌ Yeshǔ awe̤akè hǒ. 9He shôbǐǐlṳ̌ bǎ kòyò ta̤sǎlě̤we̤kè akhû̌akhî, he khòbǎhto ta̤jî̌ta̤jû̌ dě kòyò comě he kû̌ sǒpli̤tè̤glè sô̌sô̌kû̌ kòyò ma̤sǔ ta̤mǎlò̤ tôpwa̤. Bǎbǎkǎlè Cǒmara alě̤ayô̤̌nu kòyò cǒmějò nô̌ a tô̤̌. 10Pô̤̌nudě pô̤̌khô kòyò dǒ Cǒmara rû̌htò̌ lû̌û tokhlǒ gǔ nǐ̤bǎ ta̤phǔgekhò̌ge kû̌ ta̤bwǐdû̌sîrîhtû tûjû̌pwa̤ dǒ Yeshǔ Khrǐ akûnu dě, he sǎphlǒhtû bǎ asî pwǎ.

11Ta̤hî̌bǎ ô̌ kû̌,

“Pa kè̌ si kû̌ Khrǐ dě pa gǔ htûpwa̤ kû̌ a pě.

12Pa kè̌ sǎphlǒhtû ta̤ hî̌dě pa pǒǐ ta̤ kû̌ a pě,

pa kè̌ htè̌bî̌kè a dě a htè̌bî̌kè pa pě. ^a

13Pa kè̌ cǒ kû̌ a tô̤̌ bǎbǎkǎlè acǒ tûû̌ pa pě, ma̤titèhî̌dě a htè̌bǐ hè jò anǎ̤tô̤̌.”

Ta̤hî̌bǎ hǒtokhlǒ mî̌ acǒatè̤ pwǎ.

Pwa̤ma̤ta̤phû̌ dǒ atôbǎ kû̌ Cǒmara asǎphlǒ tôpwa̤

14Dǐ gènè̤bǎbò sô̌ ta̤dòkûphû̌ nutokhlǒ kû̌ ta̤nutokhlǒ nî̌꤮, dě pô̤̌khô asî gègotô̤̌klǐ ǐ kè̌khî lû̌û kû̌ ta̤hî̌bǎ nutokhlǒ tô̤̌nu, nosè̌rè̌ shapwǎ̤ asî dǒ Běcǎ a lô̤mô̤̌ nunî̌꤮. Ta̤nutokhlǒ mî̌ a ma̤wô̌ ta̤ mè̤̌tô̤̌. Mè̤mè̤̌tôkhônu a ma̤pî̌ma̤lṳ̂̌ pwǎ kòyò dǒ a hè ganǎ̤de asî htè̌ ǐ kè̌khî lû̌û kû̌ ayô̤̌ nutokhlǒ pwǎ. 15Pô̤̌khô na gǔ ma̤tô̤ma̤bǎ pô̤̌ Cǒmara a ta̤sǎyṳnu, htokhôtô̤̌ pô̤̌khô na gǔ sô̌sô̌kû̌ pwa̤ma̤ta̤phû̌ tôpwa̤ dǒ a sòwò̤̌ ǐ a ta̤phǐta̤ma̤ tô̤̌, kǎtô̤̌ pô̤̌khô na htû kòyò dǒ a sû̌ǐtô sû̌ǐbǎ kòyò kû̌ Cǒmara alě̤ayô̤̌ dǒ a ta̤tě̤ta̤mè̤̌ tôpwa̤ ayanu, jî̌pwǐ̤ ma̤wô̌wô̌ yǎnî̌꤮. 16Cû̌tephe khatephekè ta̤hî̌bǎ dǒ a bè̌dubè̌nǎ̤ Cǒmara tô̤̌ nutokhlǒ nî̌, ma̤titèhî̌dě ta̤hî̌bǎ pô̤̌nu tokhlǒ mî̌ sǔ sǔ a sû tephekè yî̤cû̌kè kòyò kû̌ ta̤bè̌dubè̌nǎ̤ Cǒmara nupwǎ. 17Ta̤ dǒ kòyò nutokhlǒ shôbǐǐ numî̌, asô̌sô̌kû̌ ta̤shata̤htò dǒ a ǎ lò̤tě̤pro̤kè phěyî̌ nutokhlǒ pwǎ. Kòyò ô̌ sò̌ginǐ̤ dǒ a ma̤ta̤ pô̤̌o numî̌ amè̤̌kû̌ Khûhǔmenè̌ kû̌ Khûphǐlǐtǔ. 18Asî cû̌ tephekè ta̤tě̤ta̤mè̤̌ aklè̌ dě asî hî̌ lô̌khô kû̌, ta̤si ihtǒ htûpwa̤ getîkhî numî̌ a htûhtò̌ htohǒ a hî̌ lô̌khô pô̤̌nu akhû̌akhî, a ma̤pî̌kèbò kòyò nutokhlǒ a ta̤yṳ̌ta̤nǎ̤. 19Bǎbǎkǎlè kòyò ma̤ guyṳ̌jò Cǒmara a ta̤kòshî̌gutṳ̌ měgle nutô̤̌. Dǒ ta̤kòshî̌gutṳ̌ alô̤nu kòyò wě̤nǎ kû̌, “Běcǎ sî̌ganǎ̤ tûû̌ a kòyò” ^b dě “Kòyò pṳ̂̌꤮ tôpwa̤ dǒ a hî̌ kû̌ he mî̌ Běcǎ a kòyò tokhlǒnumî̌, a tôbǎ ti̤wǐ̤ cû̌khô̌kè anǎ̤ kû̌ ta̤sǔnu.”

20Dǒ kòyò dû̌yò̤̌ hǐtômè akûnu bètṳ̌balě ô̌ acǒcǒ. Tokhlǒkhlǒnu kòyò ma̤ a kû̌ ruhta, tokhlǒkhlǒnu kòyò ma̤ a kû̌ sǒ, tokhlǒkhlǒnu kòyò ma̤ hǎkhû̌ kû̌ tokhlǒkhlǒ dě kòyò noǎ a bǎ kòyò lǎ̤lṳ̂dû̌ ashěkhǎnu, tokhlǒkhlǒ nu, kòyò bè̌ kû̌ lǎ̤noǎ a lṳmṳ̌khilṳmṳ̌lî aya pwǎ. 21Kòyò tôpwa̤pwa̤ kè̌ ma̤ mṳ̂̌plî sô̌ anǎ̤ kû̌ ta̤ dǒ a wǐ lû̌û nutokhlǒ hî̌nu, a htûhtò̌ bètṳ̌balě tôcǒ dǒ kòyò noǎ a bǎ kòyò lǎ̤lṳ̂dû̌ akhanu hǒ. A bè̌plò̌shǐ anǎ̤ akhû̌akhîdě, a htûbwǐhtûsîrî dǒ a Běcǎ aya. Htodě a ô̌ tîwî̌tòwò anǎ̤ kû̌ a glè̌ ma̤wô̌ ta̤ lǒ̤bò aya hǒ. 22Cû̌ tephekè kû̌ phû̌sǎ a ta̤sǎyṳsǎbǎ wô̌tô̤̌ nutokhlǒ nî̌꤮, dě gû̌lṳ̂ lô̌khô ta̤tě̤ta̤mè̤̌, ta̤yṳ̌ta̤nǎ̤, ta̤mô̤ǐ kû̌ ta̤gûjû̌kabǎ, dě ô̌plǒ kû̌ kòyò dǒ a kaǎgǔhtò̌ Běcǎ kû̌ asǎphlǒ dǒ a ma̤mṳ̂̌plî nutokhlǒ nî̌. 23Cû̌ tephekè kû̌ ta̤gègo nòdû̌ dǒ yô̤̌mûyô̤̌sǎ ô̌tô̤̌ nutokhlǒ nî̌꤮. Na sî̌ganǎ̤ kû̌ ta̤ nutokhlǒ nî̌ dǒ nô̌kò gutṳ̌ pě a dǐô̌ htûhtò̌ ta̤tô̤̌klǐ kè̌khî lû̌û pwǎ. 24Běcǎ jû̌ tôpwa̤ numî̌ a tô tô̤̌klǐǐ kòyò tô̤̌, mè̤mè̤̌tôkhônu, a tô hî̌bǎ sǎdôhôbî̌ dǒ kòyò lǒ̤bò akhû̌, htodě a tôbǎ mè̤̌ sara dǒ awô̌ dě khòsǎdô ta̤ tôpwa̤. 25Bǎ a sû̌ǐ wô̌ tîkhî sô̌ kòyò dǒ a htè̌shěshu a tokhlǒ akhanu, a tô hî̌bǎ sǎdôhôbî̌ kòyò. Cǒmara gǔ ǐ bǎ asî ashěakhǎ wô̌ dǒ a yò̤lǎ̤plǎdî̌ sô̌ asǎphlǒ pě dě a sî̌ganǎ̤ htò̌gesô̌ ta̤tě̤ta̤mè̤̌ pě. 26Dě asî sî̌yahtò̌ sô̌ tûû̌ anǎ̤ pě dě a ma̤hǎplǎge ǐtûû̌ anǎ̤ kû̌ hǎkhû̌tana ahtò̌glǒ akûnu pě. Ma̤titè̌hî̌dě hǎkhû̌tana pṳ̂̌mě asî dě a noma̤ asî pô̤̌ atô lû̌sǎphlǒnu hǒ.