2 Timothy 3
Ta̤phû̌mò̤̌shǐhtô htû̌꤮ lṳmṳ̌ni̤ gutṳ̌pě tokhlǒ
1Bǎbǎkǎlè htû̌꤮ lṳmṳ̌ni̤ dǒ a gutṳ̌pě tokhlǒnu sî tôbǎ sî̌ganǎ̤ kû̌ ta̤shěta̤khǎ apò̤̌asha ô̌htò̌ pě. 2Bǎnu akhapěnu, kòyò tokhlǒkhlǒnu, a mô̤ǐlò̤ tûû̌ anǎ̤, a mô̤ǐ ru, a phî̌dû̌ anǎ̤, a bè̌htò̌yô̤̌ asǎphlǒ pě. Asî mî̌ kòyò dǒ a pîjî̌ǐsho ta̤, jûlě̤phî̌yô̤̌ mǒ̤lě̤phayô̤̌ tô̤̌, sî̌ganǎ̤ kòbwǐkòsîrî tô̤̌, sî̌ganǎ̤ ta̤plò̌shǐ tô̤̌. 3Asî mî̌ kòyò dǒ a mô̤ǐ kòyò tô̤̌, a plûkè kòyò ta̤sǔ tô̤̌, hî̌pǐ̤ kòyòmi̤, pǒǐjò wô̌bǎ anǎ̤tô̤̌, kòyòkhu kòyòhe, asî mî̌ kòyò dǒ a sǎkhî̌ ta̤wô̌ tokhlǒ pě. 4Asî mî̌ kòyò dǒ a gǔ shaǎ kòmi̤, a shaǎ kònǎ̤ dě ma̤bǐma̤ô̌ anǎ̤, htò̌mǒhtò̌phô anǎ̤, sǎyṳ ma̤mô̤nṳ̌ tûlû̌shû̌lě anǎ̤nu adû̌khlo ta̤mô̤ǐ Cǒmara pě. 5Asî jî̌ gû̌ma̤bǐma̤ô̌ pwǎ pa ta̤cubucaba alǎ̤klô lǎ̤kha pě. Bǎbǎkǎlè asî htè̌shěshu ta̤cubucaba a ta̤siwi̤sòwò̤ dǒ a mè̤̌mî̌ca nutokhlǒ pě. Cû̌ tephekè kû̌ kòyò pô̤̌nu tokhlǒ alǎ̤nî̌꤮. 6Asî tokhlǒkhlǒnu, a nṳ̌cû̌nṳ̌kha dǒ kòyò hǐdǒkû dě asî pǒǐ pṳ̂̌mě pwa̤mǒ̤ dǒ a yṳ̌ǎ yûkǎkwe nutokhlǒ. Pwa̤mǒ̤ nutokhlǒ mî̌ pwa̤mǒ̤ dǒ a ô̌ kû̌ a ta̤sǔta̤plě a ta̤wǐta̤ò̌ dě a gû̌kû̌ ta̤sǎyṳsǎbǎ apṳ̂̌mishicǒ akò nutokhlǒ pwǎ. 7Pwa̤mǒ̤ nutokhlǒ mî̌ a sû̌ǐ tagahto ta̤ bǎbǎkǎlè a sî̌ganǎ̤ bò̌htò̌ kû̌ kòyò Cǒmara a ta̤tě̤ta̤mè̤̌ tôkhò̌꤮ tô̤̌ nutokhlǒ pwǎ. 8A ma̤ pô̤̌khô Khûyanǐ kû̌ Khûyabrǐ ma̤ takǎshěshu Khûmṳ̂shě nuhǒ. a Kòyò nutokhlǒmî̌ a htè̌shěshu ta̤tě̤ta̤mè̤̌. Asî mî̌ kòyò dǒ a gènè̤ phû̌mò̤̌ ta̤ tokhlǒ, dě a ta̤yṳ̌ta̤nǎ̤ pî̌kè nutokhlǒ pwǎ. 9Bǎbǎkǎlè asî ta̤ma̤nu yî̤khôtô̤̌ pěnu a hǎmǎkè pwǎ. Kòyò pṳ̂̌꤮ tôpwa̤ kè̌shǐ kû̌ asî sǎphlǒ numî̌ a wò̌wè̌ pwǎ. Ta̤pô̤̌nu tokhlǒ mî̌ a htûhtò̌ hto dǒ Khûyanǐ kû̌ Khûyabrǐ ahtukha nuhǒ.Ta̤sû̌ǐtòwòǐ Khûtîmôte dǒ gutṳ̌kò
10Bǎbǎkǎlè na dě, na gû̌ kû̌ he ta̤sû̌ǐtòwòǐ akò kû̌ he ta̤ô̌htûpwa̤ aklè̌aklò nutokhlǒ kû̌ he ta̤ô̌htûpwa̤ a ta̤yè̤lò̤nǎ nutokhlǒ hǒ. Na kè̌shǐ he ta̤yṳ̌ta̤nǎ̤, he ta̤khòsǎdô, he ta̤mô̤ǐ, he ta̤khòsǎphlǒhtû tokhlǒhǒ, 11Htodě he khòbǎ kòyò ma̤jî̌ma̤jû̌ henu, kû̌ he tṳ̌bǎ kû̌ ta̤pò̤̌ta̤sha tokhlǒ dǒ Wî̤̌Atiò, b Wî̤̌ikani̤ c kû̌ Wî̤̌lǔshatara akû d numî̌, a ma̤kwè̌ anǎ̤ kû̌ he hî̌tènu na sî̌ganǎ̤ htohǒ. He khòbǎ kòyò ma̤jî̌ma̤jû̌ he bǎbǎkǎlè lǒ̤bò ta̤ nutokhlǒ mî̌, Běcǎ ma̤hǎplǎge bǎ bò he pwǎ. 12Kòyò pṳ̂̌꤮ tôpwa̤ dǒ a sǎyṳ ô̌htûpwa̤ tô pô̤̌ Cǒmara asǎphlǒ a ta̤sǎyṳ dǒ Yeshǔ Khrǐ akû tokhlǒnu, kòyò gǔ ma̤jî̌ma̤jû̌ mè̤̌mî̌ca asî pě. 13Kòyò phû̌mò̤̌ kû̌ pwa̤lòhǎlòhô kòyò tokhlǒnu, yî̤shû̌shû̌ ajî̌hè shû̌shû̌ pě. Dě a gǔ lô̌ǐplò̤ǐ kòyò tokhlǒ pě, dě kòyò gǔ lô̌ǐplò̤ǐ lô̌khô asî pě. 14Bǎbǎkǎlè nadě, tûlû̌ cû̌sělě pô̤̌ ta̤tě̤ta̤mè̤̌ dǒ na sû̌ǐ htonu, dě na yṳ̌nǐ̤nǎ̤nǐ̤ měgle hto nutokhlǒ nî̌꤮, ma̤titèhî̌dě na sî̌ya kû̌ sara dǒ a sû̌ǐ na tokhlǒ numî̌ sara dǒ atôabǎ tokhlǒ akhû̌akhî, tûlû̌ cû̌sělě pô̤̌nu nî̌꤮. 15Dǒ na phijǎkhanu, kòyò sû̌ǐ hto na kû̌ lî̤plò̌shǐ nuhǒ. Pô̤̌khô na gǔ yṳ̌ǎ Běcǎ Yeshǔ Khrǐ dě na gǔ nǐ̤bǎ Cǒmara a ta̤ma̤hǎplǎge na ayanu, lî̤plò̌shǐ ǐhto na ta̤sî̌ta̤jò̌ hǒ. 16Lî̤plò̌shǐ lǒ̤꤮ bò numî̌ Cǒmara ǐ pa dě a ô̌ kû̌ abwǐsîrî dǒ a sû̌ǐ ta̤tě̤ta̤mè̤̌ tokhlǒ, a sû̌ǐtòwòǐ wô̌tîkhî ta̤yṳ̌nǐ̤nǎ̤nǐ̤sǔ tokhlǒ, a ma̤wô̌ getîkhî sô̌ ta̤ma̤ dǒ asǔ tokhlǒ, kû̌ ta̤sû̌ǐ dǒ a sû kòyò dǒ ta̤ô̌htûpwa̤ acǒatè̤ tokhlǒ aya hǒ, 17Ma̤titèhî̌dě pô̤̌khô Cǒmara a kòyò gǔ lǒhtò̌behtò̌ dě ô̌ tîwî̌tòwò anǎ̤ kû̌ a gǔ ma̤ta̤ awô̌ pṳ̂̌tocǒ ayanudě, a sû̌ǐ bǎ kòyò hǒ.
Copyright information for
KxfSCKXF