2Ti 4 | KxfSCKXF | STEP | Htû̌ Yeshǔ Khrǐ hèpǒta̤ pô̤̌ khwǐ côphǎ tôpwa̤ akhapěnu, a gǔ hè cî̌htò̌ kòyò htûpwa̤ kû̌ kòyòsi tokhlǒ gînǐ̤cǒbò pě. Pô̤̌nudě dǒ Cǒmara kû̌ Yeshǔ Khrǐ a lô̤mô̤̌nu he sǎyṳ hî̌měteglekè heyô̤̌ kû̌ na pô̤̌o,

2 Timothy 4

Shôbǐǐlṳ̌ bǎ kòyò ta̤sǎlě̤we̤kè

1 Htû̌ Yeshǔ Khrǐ hèpǒta̤ pô̤̌ khwǐ côphǎ tôpwa̤ akhapěnu, a gǔ hè cî̌htò̌ kòyò htûpwa̤ kû̌ kòyòsi tokhlǒ gînǐ̤cǒbò pě. Pô̤̌nudě dǒ Cǒmara kû̌ Yeshǔ Khrǐ a lô̤mô̤̌nu he sǎyṳ hî̌měteglekè heyô̤̌ kû̌ na pô̤̌o, 2 Shôbǐǐlṳ̌ lô̌khô ta̤sǎlě̤we̤kè nî̌꤮. Shěkhǎ wô̌ bǎbǎ, shěkhǎ wô̌tô̤̌ bǎbǎ, tûlû̌ hî̌ǐ hènè pô̤̌ ta̤sǎlě̤we̤kè nunî̌꤮, htodě sǎhtǎnṳ̌ asî nî̌꤮, sû̌ǐtòwòǐ wô̌ sô̌ asî nî̌꤮, dě ǐkhû̌ǐǎ asî, sû̌ǐtòwòǐ asî kû̌ ta̤khòsǎdô nunî̌꤮. 3 Ta̤shěta̤khǎ dǒ kòyò ganǎ̤depe ta̤sû̌ǐtòwòǐ acǒatè̤ tô̤̌nu a gǔ hètǒ̤ pě. Dě asî sǎphlǒ guyṳ̌kèsè̌ lô̌khô dǒ a gǔ bè̌plǒ ô̌wô̤̌dû̌htò̌ tûû̌ asarasǔ tokhlǒ dǒ a shôbǐǐlṳ̌ bǎ asî pô̤̌ asî sǎphlǒ guyṳ̌kèsè̌ ganǎ̤denu tokhlǒ pě. 4 Asî gǔ tiwǐ̤ cû̌khô̌kè anǎ̤ kû̌ ganǎ̤de ta̤tě̤ta̤mè̤̌ pě, dě asî sǎyṳ ganǎ̤de lô̌khô pwǎ ta̤ dǒ kòyò ma̤mô̤ma̤bǎ bǎ asî kû̌ ta̤dô̌kènè lò̤wě̤lò̤sô nutokhlǒ pě. 5 Bǎbǎkǎlè na nudě, pǒǐ nanǎ̤ dǒ ta̤pṳ̂̌tocǒ akûnu nî̌꤮, sǎphlǒhtû ta̤jî̌ta̤jû̌ dě ma̤pwǎ pwa̤shôbǐǐ ta̤sǎlě̤we̤kè a ta̤phǐta̤ma̤ dě ma̤lǒbebò ta̤phǐta̤ma̤ dǒ Cǒmara noma̤ nanu pwǎ nî̌꤮.

6 Ma̤titèhî̌dě, shěkhǎ tǒ̤ dǒ he gǔ hǎhtò̌cû̌kè kû̌ hǎkhû̌ hǒ. Ta̤shěta̤khǎ hètǒ̤ dǒ he gǔ bè̌kè he ta̤ô̌htûpwa̤ hǒ. 7 Ta̤shěpě̤ dǒ awô̌lǒnu he shěhtohǒ. Ta̤ bèkhlè̌tǎ̤nu he khlè̌ htohǒ. He pṳ̂̌měǐ wô̌ he ta̤yṳ̌ tǒ̤dǒ agutṳ̌hǒ. 8 Khònò̤̌dě Cǒmara bè̌wô̌ hto he ta̤tě̤ta̤mè̤̌ a khû̌glû̌hta dǒ amè̤̌kû̌ ta̤ma̤nǐ̤ khû̌kǎ tômè nuhǒ. Htodě htû̌꤮ lṳmṳ̌ni̤ gutṳ̌ pěnu, pwa̤cî̌htò̌cǒta̤ a Běcǎ nutôpwa̤ gǔ ǐlò̤ he pě bǎbǎkǎlè hǒo numî̌ heya nô̤̌ mè̤̌bǎtô̤̌. Lǒ̤꤮ bò kòyò dǒ a ô̌pǒ̤kè̌shuǐ Běcǎ gǔ hè ô̌lṳ̌htò̌ sô̌ pě nutokhlǒ ayamî̌ a ô̌padô̌ pěpě.

Khûpò̌lǔ nohè Khûtîmôte dǒ a ô̌

9 Jî̌pwǐ̤ hè phwèphwè dǒ he ô̌ nî̌꤮. 10 Ma̤titèhî̌dě, Khûdemǎ ^a mô̤ǐ ta̤ pṳ̂̌꤮ tôcǒ dǒ hǎkhû̌ akhû̌akhî, a cû̌ tephekè kû̌ he hǒ, dě a cû̌ dǒ Wî̤̌tîsalònǐ hǒ. Khûkhrǐshaki dě a cû̌ dǒ Galatǐgǎ dě Khûtǐtǔ ^b dě a cû̌ dǒ Dalamǎtigǎ hǒ. 11 Kòyò ô̌kè kû̌ he nî̌ Khûlǔka tôpwa̤pwǎ̤ nô̤̌ pwǎ. Cû̌ kaǎ geǐ Khûmakǔ nî̌꤮. Ma̤titèhî̌dě a ta̤ma̤jè̌ he tokhlǒnu, a htûbwǐhtûsîrî jî̌ dǒ he ta̤phǐta̤ma̤ aya. ^c 12 He nolò̤ Khûtǔkǐkǔ dǒ Wî̤̌Ěphěsu akû hǒ. ^d 13 Htû̌꤮ na hè pě dě phǐhèǐ bǎ he jekhlonu nî̌꤮. He bè̌kè a bǎ Wî̤̌taròǎ dǒ Khûkapǔ a ô̌ nu. Phî̌hè padô̌ lî̤tûlû nutokhlǒ. A lṳ̂dû̌lǒ mî̌ lî̤bě nutokhlǒ hǒ. ^e

14 Pwa̤de tîlî Khûalè̌sadru nutôpwa̤ mî̌, a ma̤ phû̌mò̤̌ jî̌ he. ^f Lǒ̤bò a ma̤hto he tokhlǒnu Běcǎ cî̌htò̌ tûû̌ lû̌û pô̤̌nu pě. 15 Ô̌sè̌rè̌ nanǎ̤ kû̌ anu nî̌꤮, ma̤titèhî̌dě a sǎphlǒdû̌ ma̤dǐkhû̌dǐdò shû̌shojî̌jî̌ pa ta̤sǎlě̤we̤kè.

16 Bǎ he hî̌bǎ taka bǐǐ henǎ̤ kû̌ kòyò cî̌htò̌ he awǐlǒ tôplǎ akhanu, kòyò ô̌cu dǒ he kòshî̌ tôpwa̤꤮ tô̤̌. Kòyò khlè̌ tephekèbò helǎ̤. Ǒ꤮ Cǒmara, bè̌ tǎ̤ ta̤sǔ dǒ asîlô̤ tôpwa̤ tǎ̤mǎ̤ nî̌꤮. 17 Bǎbǎkǎlè pô̤̌khô Yǔdaphû̌ mè̤̌tô̤̌ tokhlǒ gǔ ganǎ̤de ta̤sǎlě̤we̤kè ayanudě, Běcǎ ô̌cu kû̌ he dě a ǐ he ta̤khû̌ta̤ǎ dě he shôbǐǐlṳ̌ lǒbe hto asî hǒ. Pô̤̌nudě he hǎplǎ hǎhtò̌kè numî̌ asô̌sô̌kû̌ he hǎplǎ htò̌kè dǒ khîdû̌ gô̌kû akûhǒ. 18 Běcǎ gǔ ma̤hǎplǎ he kû̌ ta̤phû̌mò̤̌shǐhtô lǒ̤bò tokhlǒ pě, htokhôtô̤̌ a gǔ phî̌ge he pě dě a tugǔtaka ǐ he dǒ mǒkhû̌ a shilǎ̤gǎkû pě. Ta̤sîrîdû̌sîrîhtû lò̤bǎ pû Běcǎ tûjû̌pwa̤ talakhǎ nî̌. Ame̤.

Ta̤hî̌mô̤hî̌wô̌ dǒ nô̌kò gutṳ̌

19 He sûhè bǎ he ta̤hî̌mô̤hî̌wô̌ nutokhlǒ dǒ Mǒ̤phrishila, ^g Phaakǔlǎ kû̌ Khûò̌nǐshaphrǔ a hǐphû̌phòphû̌ tokhlǒ a ô̌. ^h 20 KhûĚrashatǔ dě a ô̌kè bǎ Wî̤̌kôritu akûnu. ⁱ htodě Khûtaròphǐmǔ dě a ô̌shû̌ô̌mô̤ wô̌bǎtô̤̌ akhû̌akhî, he bè̌kè yǎ dǒ Wî̤̌milětǔ akûnu. ^j 21 Bǎ gǎwô̤̌kha hètǒ̤ nò̌khôtô̤̌nu, jî̌pwǐ̤ hè phwè dǒ he ô̌ nî̌, KhûǓbǔlǔ, Khûpǔdi, Khûlinṳ̌sô kû̌ Mǒ̤klòdiya sûhè a ta̤hî̌mô̤hî̌wô̌ tokhlǒ. Htodě pṳ̌wè̤̌ Khrǐphû̌ dǒ ashǔshawa̤ tokhlǒ sûhè padô̌ a ta̤hî̌mô̤hî̌wô̌ tokhlǒ pô̤̌nu.

22 Běcǎ ô̌kû̌ pû na nî̌꤮. Ta̤bwǐta̤sîrî ô̌kû̌ pû sî lǒ̤bò nî̌꤮.