Lî̤ Yṳ̂ha subǎ tôbǎ nî̌ amè̤̌pwǎ lî̤ dǒ mǒ̤pwa̤ tôpwa̤ wě̤cû̌ bǎ Khûkayǔ dě a htû ta̤dòkû ikǒdû̌ nutôpwa̤ a ô̌. Khûkayǔ nî̌ a ma̤jè̌ bǎ mî̌ca khrǐphû̌ tokhlǒ akhû̌akhî, pwa̤wě̤lî̤ nutôpwa̤ htû̌sò̌ǐ mè̤mè̤̌ yǎ. Na bǒsû̌ kû̌ Dǐotarephǐ numî̌ sè̌rè̌ǐ nanǎ̤ tîkî̌ nî̌꤮, a mǎcû̌ lû̌û yô̤̌ pô̤̌nu.

Ta̤hî̌bǎ tôtô̤̌ kû̌ tôtô̤̌

Ta̤hî̌bǎ wǐ 1:1-4

Kòyò htû̌sò̌ǐ Kayǔ 1:5-8

Kòyò pǐ̤jǐ Khûdǐûtarephǐ 1:9-10

Kòyò htû̌sò̌ǐ Khûdemetarǐ 1:10-12

Ta̤hî̌bǎ dǒ gutṳ̌kò 1:13-15

3 John

1He mî̌ mǒ̤khumǒ̤pwǎ̤ dǒ a htû ikǒlǒkòdû̌ tôpwa̤ dě he wě̤cû̌bǎ lî̤hǒtôbǎ dǒ Khûkayǔ a ô̌. Khûkayǔ mî̌ kòyò dǒ he mô̤ǐ mè̤̌mî̌ca a tôpwa̤. ^a

2He khô mô̤ sî, pô̤̌khô ta̤lǒ̤bò gǔ cû̌ wô̌wô̌bǎbǎ kû̌ nanu dě, he kwicaba bǎ naya. Pô̤̌ he sî̌yahto kû̌ na ô̌shû̌ô̌mô̤ wô̌ dǒsû̌dǒsò̌ tôkhônu, he kwicaba bǎ na nǎ̤glǒ phěyî̌ tôkhônu, a gǔ ô̌shû̌ô̌mô̤ wô̌ pô̤̌nu nî̌꤮. 3Ma̤titèhî̌dě bǎ pa pṳ̌wè̤̌ dǒsû̌dǒsò̌ tokhlǒ hètǒ̤kû̌ he akha, a shôbǐǐlṳ̌ bǎ he kû̌ nawe̤nakè. Dě a hî̌ bǎ he, na sǎphlǒcǒ kû̌ ta̤tě̤ta̤mè̤̌ dě na ô̌htûpwa̤ kû̌ pô̤̌nu pṳ̂̌꤮ taplǎ akhû̌akhî, he sǎlě̤sǎlò̤ jî̌ jî̌. 4Bǎ he ganǎ̤de kû̌ hephû̌heli̤ dǒsû̌dǒsò̌ tokhlǒ ô̌htûpwa̤ dǒ ta̤tě̤ta̤mè̤̌ akû akhanu, he sǎlě̤sǎlò̤ pṳ̂̌꤮ taplǎ. Ta̤ dǒ a gǔ ma̤sǎlě̤ khlo he kû̌ hǒonu a ô̌ pe tôcǒ꤮ tô̤̌.

Kòyò htû̌sò̌ǐ Khûkayǔ

5He khô mô̤ sî, na sǎphlǒcǒ mî̌ca kû̌ ta̤ma̤ dǒ na ma̤jè̌ bǎ pṳ̌wè̤̌ khrǐphû̌ nutokhlǒ. Asî mî̌ shǐpwǎ̤shǐmè̤ dǒ na sî̌ganǎ̤bǎnǒ lû̌û tô̤̌ tokhlǒ bǎbǎkǎlè na ma̤jè̌ bǎ asî. 6Asî shôbǐǐlṳ̌ lô̌khô bǎ ta̤dòkû bǒo tokhlǒ kû̌ na ta̤mô̤ǐ awe̤akè. Pô̤̌khô asî gǔ cû̌ sělě pô̤̌ klè̌ dǒ alô̤mô̤̌ tôkhônu, khòsǎdô ma̤jè̌ bǎ asî pô̤̌ atô kû̌ Cǒmara a ta̤sǎyṳ nutokhlǒ nî̌꤮. 7Ma̤titèhî̌dě asî hǎhtò̌cû̌ bǎ klè̌ dǒ Khrǐ aya bǎbǎkǎlè a phî̌ gû̌ kòyò ta̤ma̤jè̌ dǒ kòyò yṳ̌ǎ Khrǐ tô̤̌ nutokhlǒ a ô̌ tôcǒ꤮ tô̤̌. 8Pô̤̌nu akhû̌akhî, pô̤̌khô pa gǔ ma̤ wô̤̌wô̤̌ kû̌ asî dǒ a ma̤ lô̌khô ta̤tě̤ta̤mè̤̌ ata̤ma̤ nutokhlǒ ayanu, pa khrǐphû̌ tokhlǒ tôbǎ ma̤jè̌ bǎ kòyò pô̤̌nu tokhlǒ hǒ.

Khûdǐûtarephǐ kû̌ Khûdeme̤tarǐ

9He wě̤cû̌ bǎ hto lî̤ dǒ ta̤dòkû a ô̌ tôbǎ bǎbǎkǎlè Khûdǐûtarephǐ dǒ a sǎyṳ htû asî ikǒlǒkòdû̌ tôpwa̤ nî̌, a ganǎ̤de kû̌ kòyò pa wě̤cû̌ lî̤nu tokhlǒ tô̤̌. 10Pô̤̌nu akhû̌akhî, htû̌ he hètǒ̤ pě dě he gǔ pwe̤ǐ bǎ sî kû̌ lǒ̤bò a ma̤sǔ nutokhlǒ pě. A dô̌ payô̤ dě a hî̌ phû̌mò̤̌ pa, htokhôtô̤̌ bǎ pṳ̌wè̤̌ tokhlǒ cû̌tǒ̤ hètǒ̤ kû̌ a akha nu, a kaǎshǔ gû̌ asî tô̤̌. Htokhôtô̤̌ kòyò dǒ a sǎyṳ kaǎshǔ pṳ̌wè̤̌ tokhlǒnu a ma̤dǐdò tě̤tṳ dě a wṳ̂̌hǎhtò̌kè kòyò dǒ asî ta̤dòkû akhlo.

11He sû̌khô, ta̤phû̌mò̤̌shǐhtô pô̤̌nu tokhlǒnu kè̌lû̌ma̤lû̌ tǎ̤ kòyò tǎ̤mǎ̤ nî̌꤮. Kè̌lû̌mò̌mṳ kû̌ kòyò ta̤ dǒ awô̌ nutokhlǒ nî̌꤮. Kòyò tôpwa̤pwa̤ dǒ a ma̤ ta̤wô̌nu, a mî̌ Cǒmara a kòyò tôpwa̤ hǒ. Kòyò dǒ a ma̤ ta̤phû̌mò̤̌ tôpwa̤pwa̤ numî̌ kòyò dǒ a sî̌ganǎ̤ tě̤tě̤mè̤̌mè̤̌ kû̌ kòyò Cǒmara nò̌khôtô̤̌. 12Kòyò htû̌sò̌bò Khûdemetarǐ. Ta̤cǒta̤tè̤ khòlṳ̌ bǎ kû̌mî̌ a wô̌ awe̤akè. He htû̌sò̌ǐ awe̤akè, dě na sî̌ganǎ̤ kû̌ pa numî̌ acǒatè̤ pwǎ.

Ta̤hî̌mô̤hî̌wô̌ dǒ gutṳ̌kò

13Ta̤we̤ta̤kè dǒ he sǎyṳ shôbǐǐ na numî̌ a ô̌ dû̌wî̤ bǎbǎkǎlè he sǎyṳ wě̤cû̌ bǎ na kû̌ lî̤ tô̤̌. 14Bǎbǎkǎlè he kè̌shuǐ dǒ he kè̌shǐ phwè kû̌ na pě dě pa hî̌bǎshěshu kè̌khîlû̌û tôpwa̤ kû̌ tôpwa̤ pě.

15Ta̤pè̤̌ta̤dû gǔ ô̌cu kû̌ na nî̌. Lǒ̤bò pa khô bǎo tokhlǒ hî̌mô̤hî̌bǎwô̌ pû na. Hî̌mô̤hî̌bǎwô̌ pô̤̌ tutṳ̌ pû pa khô nutokhlǒ tôpwa̤ hto tôpwa̤ nî̌.