Acts 12
Khûya̤kû si kû̌ Khûpetarǔ lò̤tě̤ apô̤kû awe̤akè.
1Bǎnuakha KhwǐHerû ▼▼KhwǐHerû nutôpwa̤ mî̌ KhwǐHerû Akrǐpa.
Sahtò̌ ma̤jî̌ma̤jû̌ ta̤dòkûphû̌ tokhlǒ. 2Dǒ a ta̤hî̌bǎ akhû̌akhî, kòyò shusikè Khûyṳ̂ha awè̤̌ Khûya̤kû kû̌ nò̌she. 3A kè̌shǐ kû̌ a ma̤ta̤ pô̤̌onu, atô kû̌ Yǔdaphû̌ tokhlǒ asǎphlǒ akhû̌akhî, a hî̌ lò̤pô̤̌ ayô̤̌ kû̌ bǎ pṳ̂̌ pô̤̌ Khûpetarǔ. Ta̤ma̤nu a htûhtò̌ bǎ mû̌pwè shôdô ta̤bû akhanu. 4Kòyò pṳ̂̌ Khûpetarǔ dě kòyò dǒtě̤ lû̌û dǒ apô̤kû. Kòyò ǐlò̤ kliphû̌ lǐ̤prṳ̂ ata̤ma̤ dǒ asî bǎ ô̌pǒ̤ǐ lû̌û. Asî ô̌pǒ̤ tôprṳ̂ hto tôprṳ̂. Tôprṳ̂nu a ô̌ sò̌lǐ̤. Bǎ pwè htohǒ akhanu, Khwǐherû gènè̤ kû̌ a gǔ ma̤kè̌kè̌ Khûpetarǔ dě a gǔ cî̌htò̌ lû̌û dǒ kòyò saprṳ̂ a lô̤mô̤̌ pě. b 5Pô̤̌nudě kòyò dǒô̌ pepwǎ Khûpetarǔ dǒ apô̤kû. Bǎbǎkǎlè ta̤dòkûphû̌ tokhlǒ sǎphlǒshû̌ kwicaba mè̤mè̤̌ dǒ aya. Mǒkhû̌tanaphû̌ ma̤hǎplǎkè Khûpetarǔ dǒ apô̤kû
6Bǎ Khwǐherû kaǎhtò̌ Khûpetarǔ dǒ kòyò saprṳ̂ a lô̤mô̤̌ nò̌khôtô̤̌ tôsanu, Khûpetarǔ hǎmôô̌ dǒ kliphû̌ sò̌ginǐ̤ aplǎkû. Kòyò comě a kû̌ sǒpli̤tè̤glè ginǐ̤bô. Htokhôtô̤̌ kliphû̌ tokhlǒ ô̌pǒ̤ bò bǎ lǎ̤dǒlò̤tě̤ kòyò apô̤ takhahtunu. 7Běcǎ a mǒkhû̌ tanaphû̌ tôpwa̤ hè ihtǒ ô̌lṳ̌ sumṳ̌htò̌ bǎnu dě a lîhtò̌ bò bǎ Khûpetarǔ ô̌ ǐ a pô̤kûnu. Mǒkhû̌tanaphû̌ plǎ̤ Khûpetarǔ plîdò̌khû̌ dě a htû̌wṳ̂̌ ihtǒ lû̌û dě a hî̌ lû̌û kû̌, “Ihtǒ phwèmò̌” Tôplǎnô̤̌ sǒpli̤tè̤glè ô̌ dǒ Khûpetarǔ acǔde ginǐ̤khô akû nu a lò̤tě̤ hǎphlǔ bòkè tûû̌ anǎ̤. 8Htodě mǒkhû̌ tanaphû̌ hî̌ lû̌û kû̌, “Pamě na sǎto̤ dě dò̌nṳ̌ na khò̌phěnu.” Dě Khûpetarǔ gû̌ma̤ pô̤̌ mǒkhû̌ tanaphû̌ hî̌ a nu. Dě a hî̌ pô̤̌ lû̌û kû̌, “Gôpô̤̌nṳ̌ na hugò̌pwǐ dě gû̌cû̌ kû̌ hekò.” 9Dě Khûpetarǔ gû̌hǎhtò̌ lû̌kò tǒ̤dǒ apô̤khlo. Bǎbǎkǎlè mǒkhû̌ tanaphû̌ ma̤ bǎ lû̌û pô̤̌ numî̌ a mè̤̌mî̌ca ya, mè̤̌tô̤̌ ya nu Khûpetarǔ sî̌ganǎ̤ tě̤tě̤mè̤̌mè̤̌ tô̤̌. A gènè̤pwǎ kû̌ a kè̌shǐlṳ̌ ta̤cǒcǒ pwǎ. 10Asî cû̌tûlû̌bò̌ htokè pwa̤ô̌po̤takha awǐlǒ tôtô̤̌ htodě a cû̌ tûlû̌bò̌ pô̤̌ ginǐ̤tô̤̌ tôtô̤̌. Dǒnô̌kòlǒ dě a cû̌tǒ̤ dǒ takha tě̤htò̌ nutûkû. Dě a lûmôkè tûû̌ ata, htodě asî hǎhtò̌cû̌bò̌ tûlû̌ kû̌ takhade nutôbǎ. Takhade klè̌ nutôbô nî̌ anṳ̌tǒ̤ dǒ wî̤̌kû. Dě asî cû̌꤮ pwǎ kû̌ wî̤̌klè̌ nutôbô dě mǒkhû̌ tanaphû̌ hǎmǎ sumṳ̌kè bǎ Khûpetarǔ. 11A hǎmǎ hto bǎ lû̌û dě Khûpetarǔ sî̌yalò̤ nô̌ anǎ̤ dě a hî̌ kû̌, “Khònò̤̌ he sî̌yahto kû̌ ta̤ma̤htûhtò̌ anǎ̤ pô̤̌o numî̌ a mè̤̌mî̌ca. Běcǎ Cǒmara nohè a mǒkhû̌ tanaphû̌ dě a hè ma̤hǎplǎ he dǒ Khwǐherû a ta̤siwi̤sòwò̤ alǎ̤, htokhôtô̤̌ a hè ma̤hǎplǎge he dǒ Yǔdaphû̌ dǒ a kè̌shuǐ dǒ a gǔ ma̤jî̌jû̌ he tokhlǒ a cǔdekû.” 12Bǎ a sî̌yahèlò̤ kû̌ ta̤ma̤htûhtò̌ anǎ̤ numî̌ a mè̤̌mî̌ca akhanu, a cû̌ dǒ Khûyṳ̂ha dǒ kòyò kaǎ pô̤̌ ami̤ kû̌ Khûmakǔ nutôpwa̤ amǒ̤ Mǒ̤ma̤rǐ ahǐ, dě bǎnu akhanu, a tôtǐ kû̌ kòyò hè ô̌plǒô̌cu kwicaba wô̤̌wô̤̌ lû̌û bǎnu. 13Khûpetarǔ getôglô̌ hǐ lô̤mô̤̌ takhadû̌ dě pô̤̌khô asî gǔ sî̌ganǎ̤ kû̌ mò̌pè tôglô̌ takha nu dě pwa̤ma̤ta̤phû̌ pwa̤mǒ̤phû̌ dǒ ami̤ kû̌ Mǒ̤ròdě nutôpwa̤ cû̌kè̌ lû̌û. 14Dě a sî̌ganǎ̤ Khûpetarǔ alě̤ dě a sǎlě̤sǎlò̤ tûlû̌shû̌lě dě a shôpě̤ bǔmô bǎ lû̌û takha dě a khlè̌ genṳ̌ shôbǐǐ bǎ asî kû̌ Khûpetarǔ ihtǒô̌ dǒ akhlonu. 15“Mî̌ na kimwi ya?” Asî hî̌shěshu Mǒ̤ròdě pô̤̌nu, bǎbǎkǎlè a mè̤̌mî̌ca nî̌ Mǒ̤ròdě hî̌shěshu asî pô̤̌nu, “Khûpetarǔ ayôla pwǎhò̌” Asî hî̌shěshu getîkhî lû̌û pô̤̌nu. 16Bǎnuakha Khûpetarǔ tôglô̌ sělě pô̤̌ takha dě asî bǔmô takha dě a kè̌shǐ Khûpetarǔ dě asî ǒò̌ kiti̤kaa kû̌ lû̌û. 17Khûpetarǔ sǎyṳ no ô̌ sǔtǔkǔ asî dě a dǔlè̌lṳ̌ bǎ asî kû̌ acǔde. Dě a shôbǐǐ bǎ asî kû̌ Běcǎ Cǒmara ma̤hǎplǎ kwè̌kè꤮ bǎ a dǒ apô̤kû hî̌tè awe̤akè. Dě a hî̌ kû̌, “Shôbǐǐ padô̌ Khûya̤kû ▼▼Pwa̤sî̌jò̌ tokhlǒ gènè̤ kû̌ Khûya̤kû hǒtôpwa̤ nî̌ Běcǎ Yeshǔ apṳ̌ ahî̌
kû̌ lǒ̤bò pwa̤yṳ̌ǎta̤phû̌ dǒ ashǔshawa̤ nutokhlǒ kû̌ ta̤we̤ta̤kè hǒonu nî̌꤮,” Khûpetarǔ hî̌hto bǎ asî pô̤̌nu dě a hǎhtò̌cû̌kè dǒ ashǔshawa̤ tûkû. 18Lṳmṳ̌shî̌ nu dě pwa̤ô̌pǒ̤ apô̤ tokhlǒ gènè̤ sǎphlǒshû̌shǎ jî̌ dě a hî̌ kè̌khî tûû̌ lû̌û kû̌, “Khûpetarǔ cû̌hǎhtò̌ hǎplǎjò hî̌tè?” 19Hǒtôplǎdě, Khwǐherû hî̌lò̤ ata̤hî̌bǎ kû̌, a no kè̌lǎ sô̌ akliphû̌ tokhlǒ kû̌ Khûpetarǔ bǎbǎkǎlè asî kè̌shǐ pe lû̌û tô̤̌. Pô̤̌nu akhû̌akhî, a cû̌ sǐkè̌kè̌ pwa̤ô̌pǒ̤ apô̤ nutokhlǒ dě ahî̌lò̤ ata̤hî̌bǎ kû̌ ma̤sikè pwa̤ô̌pǒ̤ apô̤ nutokhlǒ. Ta̤htûhtò̌anǎ̤ pô̤̌nu htodě dǒnô̌kònu Khwǐherû hǎhtò̌cû̌kè bǎ Yǔdagǎnu dě a hǎhtò̌cû̌ ô̌kǔ dǒ Wî̤̌kèsharǐ. Khwǐherû sikè awe̤akè
20Bǎnuakha mî̌ Khwǐherû sǎphlǒdû̌ jî̌ Wî̤̌tǔriphû̌ tokhlǒ kû̌ Wî̤̌shǐdûphû̌ tokhlǒ. Pô̤̌nu akhû̌khîdě pô̤̌khô asî gǔ cû̌kè̌shǐ hî̌bǎ kû̌ Khwǐherû nudě asî wî̤̌phû̌ tokhlǒ cû̌wô̤̌wô̤̌lû̌û dǒ Khwǐherû a ô̌. Awǐlǒ dě asî cû̌hî̌bǎ plǒwǐ kû̌ Khûbalǎshatǔ dǒ a gǔ ma̤jè̌ bǎ asî aya, ma̤titè̌hî̌dě a mî̌ a htû pwa̤nè̌klè̌nè̌klò pwa̤ma̤jè̌ khwǐ dě kòyò dǒ khwǐ yṳ̌ǎ yǎ nutôpwa̤. Dǒ nô̌kò dě asî cû̌kwi ta̤pè̤̌ta̤dû dǒ khwǐ a ô̌, ma̤titè̌hî̌dě khwǐ nutôpwa̤ ashiagǎnu, a ma̤jè̌ bǎ asî shiphû̌gǎphû̌ kû̌ shǎǎshǎô tokhlǒ. 21Tini̤kha bǎ kòyò rû̌htò̌ khô̌ Khwǐherû akhanu, akûasô̌htò̌ǐ khwǐje dě a hǎnòò̌ dǒ khwǐ a gògǒhta dě a hî̌bǎlò̤ kòyò saprṳ̂ tokhlǒ. 22Dě asî yî̤̌kǒhtò̌ kû̌, “Khwǐ dǒ a hî̌bǎ nutôpwa̤ mî̌ kòyòhǎkhû̌phû̌ mè̤̌tô̤̌. A mî̌ Cǒmara tôpwa̤ nô̤̌ pwǎ.” 23Tôplǎ꤮nô̤̌, Běcǎ a mǒkhû̌ tanaphû̌ tôpwa̤ ma̤shǐma̤sha Khwǐherû, ma̤titè̌hî̌dě a tô htû̌sò̌htò̌ Cǒmara bǎbǎkǎlè a cû̌ no htû̌sû̌htò̌ anǎ̤ kû̌ kòyòhǎkhû̌phû̌. Dě yě̤ ě sikè yǎ. 24Bǎbǎkǎlè Cǒmara alě̤ayô̤̌nu, a lṳ̌peshe cû̌ yî̤ pô̤̌ dǒ alô̤mô̤̌ dě kòyò yṳ̌nǐ̤nǎ̤nǐ̤ sǔ sǔ aô̌wô̤̌htò̌ pwǎ. 25Dě Khûbanabǎ kû̌ Khûsò̌lǔ ma̤hto ata̤ma̤ bǎ Wî̤̌yarǔshôle akû nudě a kaǎnṳ̌ Khûyṳ̂ha dǒ kòyò kaǎpô̤̌ lû̌mi̤ kû̌ KhûMakǔ nutôpwa̤ dě a hǎhtò̌ gekè.
Copyright information for
KxfSCKXF