Acts 13

Pwa̤yṳ̌ǎta̤plǒcu rû̌htò̌ Khûbanabǎ kû̌ Khûsò̌lǔ dě a nocû̌ asî

1Ta̤dòkûphû̌ bǎ Wî̤̌Atiò akûnu, piwi̤pèshè kû̌ sara ô̌ tokhlǒ. Mò̌pè numî̌ Khûbanabǎ, Khûsǐmû (dǒ kòyò kaǎ lû̌û kû̌ pwa̤lo̤kǎkre) kû̌ Khûlǔshǐya (Wî̤̌ Kurenephû̌) Khûmanǎe (kòyò bǔ dû̌htò̌ wô̤̌wô̤̌ a kû̌ Khwǐherû) ▼

▼Khwǐherû hǒtôpwa̤ numî̌ Khwǐherû Atǐpa dǒ a pǒ Galilè̤̌ nutôpwa̤.

Kû̌ Khûsò̌lǔ nutokhlǒ hǒ. 2Bǎ asî cubucabahtò̌ Běcǎ dě dǔǎ shǎǎshǎô akhanu, Yôla Plò̌shǐ Běcǎ hî̌ asî kû̌, “Rû̌htò̌ khô̌kè bǎ he Khûbanabǎ kû̌ Khûsò̌lǔ nu. Ma̤titèhî̌dě he rû̌htò̌nǎ hto asî dǒ a gǔ ma̤ bǎ he ta̤ma̤nu.” 3Asî dǔǎ shǎǎshǎô dě a kwicaba, htodě asî dò̌htò̌ acǔde dǒ Khûsò̌lǔ kû̌ Khûbanabǎ alô̤ dě a nohǎhtò̌cû̌ asî.

Khûbanabǎ kû̌ Khûsò̌lǔ shôbǐǐ bǎ kòyò ta̤sǎlě̤we̤kè dǒ Kuprǔ shikhokhû̌

4Khûbanabǎ kû̌ Khûsò̌lǔ cû̌ ma̤pô̤̌ Yôla Plò̌shǐ Běcǎ nocû̌ asî nu. Asî gelò̤ dǒ Wî̤̌silǔkiya bǎ kòyò lǎ̤bè̌ô̌ sǒkhlidû̌ agûlǎ̤ nutûkû dě asî htò̌ dò̌ lô̌khô bǎnu dě hǎhtò̌cû̌ dǒ Kuprǔ shikhokhû̌. 5Bǎ asî cû̌tǒ̤ dǒ Wî̤̌shalamǐ akhanu, a cû̌ shôbǐǐlṳ̌ bǎ kòyò kû̌ Cǒmara alě̤ayô̤̌ dǒ Yǔdaphû̌ ta̤cabahǐ tokhlǒ akû. Khûyṳ̂ha Makǔ cû̌ kû̌ asî dě a ma̤jè̌ kû̌ asî.

6Asî cû̌lè te̤we̤bò Kuprǔ shikhokhû̌ dě asî cû̌ tǒ̤dǒ Wî̤̌phabû nutîwî̤̌. Asî kè̌shǐ kû̌ Yǔda piwi̤pèshè lòhôphû̌ dǒ a cû̌lè dǔlè̌lṳ̌ bǎ kòyò kû̌ ma̤ tèplè̌ kòyò mǐ̤sǎ tôpwa̤. Ami̤ kû̌ Khûbayeshǔ. 7A mî̌ a ma̤ bǎ khwǐdû̌ Shîkǐphò̌lǔshô ta̤ma̤. Khwǐdû̌ Shîkǐphò̌lǔshô mî̌ kòyò dǒ a sî̌jò̌ tôpwa̤. A sǎyṳ ganǎ̤de Cǒmara alě̤ayô̤̌ dě a kaǎ Khûbanabǎ kû̌ Khûsò̌lǔ. 8Bǎbǎkǎlè KhûElǔma mî̌ pwa̤ma̤ tèplè̌ kò mǐ̤sǎ tôpwa̤nu, (Khûbayeshǔ ami̤ kû̌ Grěyô̤̌ mî̌ KhûElǔma) pô̤̌khô khwǐdû̌ glè̌yṳ̌nǐ̤nǎ̤nǐ̤ tô̤̌ nudě, acû̌ ma̤dǐdò tě̤tṳ asî. 9Bǎnudě, Khûsò̌lǔ (kòyò sî̌ganǎ̤ pô̤̌ ami̤ kû̌ Khûpò̌lǔ) tôpwa̤nu, a lǒbe kû̌ Yôla Plò̌shǐ Běcǎ. Dě a kè̌cû̌ tôtǐ kòyò ma̤ tèplè̌ kòyò mǐ̤sǎ nutôpwa̤. 10Dě a hî̌ lû̌û kû̌, “Pa mî̌ kòyò dǒ a ma̤ hǎkhû̌tana ata̤ma̤ tôpwa̤. Na mî̌ kòyò dǒ a sǎkhěbò ta̤ dǒ acǒatè̤ nutokhlǒ. Na lǒbe kû̌ ta̤lòhô kû̌ ta̤phû̌mò̤̌shǐhtô pṳ̂̌꤮tocǒ, na kè̌lǎ ma̤ tuplǔtèplè̌ bò Běcǎ a ta̤tě̤ta̤mè̤̌ nu pṳ̂̌꤮ taplǎ. 11Khònò̤̌dě Běcǎ gǔ cî̌htò̌ na pě, na gǔ mǐ̤sǎkhǐ pě, Cǒmara kè̌ no lîtîkhî na tô̤̌ numî̌, na gǔ kè̌shǐjò pě ta̤lî tô̤̌.”

Dě amǐ̤sǎ ta̤yô̤ dě a khǐkè taplǎnô̤̌. Dě sûphûsèwè̤ cû̌pwǎ dě a kè̌lǎ kòyò dǒ a gǔ pṳ̂̌cû̌ sûcû̌ lû̌û pwǎ. 12Bǎ khwǐdû̌ nutôpwa̤ kè̌shǐ ta̤ma̤htûhtò̌ anǎ̤ pô̤̌o akhanu, a gû̌ yṳ̌nǐ̤nǎ̤nǐ̤ Yeshǔ. A ganǎ̤de kòyò sû̌ǐ bǎ lû̌û Běcǎ awe̤akè dě a ǒò̌ kiti̤kaa jî̌jî̌.

Cû̌lè shôbǐǐ ta̤sǎlě̤we̤kè bǎ Wî̤̌Atiò dǒ Pisidǐya gǎkû

13Khûpò̌lǔ kû̌ kòyò dǒ a cû̌ kû̌ lû̌û tokhlǒ dò̌cû̌ sǒkhlidû̌ bǎ Wî̤̌phabû nudě hǎhtò̌cû̌ dǒ Wî̤̌peraka dǒ a ô̌ bǎ Phaphǔliya gǎkûnu. Cû̌tǒ̤ bǎnu dě Khûyṳ̂ha Makǔ hǎhtò̌cû̌ khô̌kè kû̌ asî dě a getîkhî sô̌ dǒ Wî̤̌yarǔshôle. 14Asî ô̌dǒ Wî̤̌peraka dě hǎhtò̌cû̌ lô̌khô dǒ Wî̤̌Atiò bǎ Pisidǐya gǎkûnu tîwî̤̌. Dě bǎ Yǔdaphû̌ lṳmṳ̌dǔ bǎ akhanu, asî cû̌nṳ̌ hǎnòò̌ dǒ ta̤cabahǐkû. 15Bǎ kòyò dô̌htò̌ Khûmṳ̂shě alî̤ ta̤sû̌ta̤tòwò kû̌ lî̤ dǒ piwi̤pèshè wě̤ nǎ nutokhlǒ akhanu, ta̤cabahǐ ikǒdû̌ tokhlǒ nocû̌gwè̌ kòyò tôpwa̤ kû̌ asî dě a hî̌ asî kû̌, “Pṳ̌wè̤̌ sî, sî lǎ̤ǐkhû̌ǐǎ kòyò saprṳ̂ tokhlǒ kè̌ ô̌ tômṳ̂mṳ̂ hî̌dě, pa sǎyṳ no dǐ ǐkhû̌ǐǎ sî.”

16Khûpò̌lǔ ihtǒ dě a dǔlè̌lṳ̌ acǔde, ma̤titèmî̌ a sǎyṳ no ô̌ sǔtǔkǔ kòyò tokhlǒ dě a sahtò̌ hî̌bǎ kû̌, “Pṳ̌wè̤̌ Isôrěla akhlialè sîtokhlǒ kû̌ Yǔdaphû̌ mè̤̌tô̤̌ bǎbǎ a cubucabahtò̌ Cǒmara bǒo sîtokhlǒ lǒ̤꤮ bò, ganǎ̤de lô̌khô. 17Yǔdaphû̌ a Cǒmara rû̌htò̌ pa mǒ̤phaphiphu dǒ awǐkhanu tokhlǒ dě bǎ asî cû̌ô̌ gû̌mṳ̂̌ dǒ Ijî̌gǎ akhanu, a dǐ htûhtò̌ asî kû̌ kòyò amṳ̌dû̌ tocǒ. ^b Cǒmara kaǎhtò̌ gekè asî dǒ Ijî̌gǎkû kû̌mî̌ a ta̤pô̤ta̤phǎ dǒ adû̌ayô̤̌ nu hǒ. ^c 18Dě a bǎ sǎphlǒhtû asî dǒ lǒ̤mî̌shô̌kla nu aně lǐ̤shi. ^d 19Kòyò khlilèphû̌ acǒ susô̌ tocǒ dǒ a ô̌ bǎ Khanagǎkû tokhlǒnu Cǒmara ma̤pî̌kè bǎ asî, ^e dě a ǐ gǎ nutôbǎ kû̌ Isôrělaphû̌ dě a htû kè asîgǎ. ^f 20Ta̤ dǒ a gǔ htûhtò̌ pô̤̌o nu, ayî̤ aně lǐ̤ya̤ yè̤̌shi. ^g

“Pô̤̌nu htodě dǒnô̌khîkònu, a tǒ̤dǒ piwi̤pèshè Shamuěla htûhtò̌ ikǒlǒkòdû̌ akha nò̌khôtô̤̌nu, Cǒmara ǐlò̤ bǎ asî pwa̤cî̌htò̌ta̤ tokhlǒ. ^h 21Htodě asî kwi Khûshamuěla kû̌ a gǔ rû̌htò̌ bǎ asî khwǐ dǒ a gǔ pǒǐ bǎ asî tôpwa̤. ⁱ Dě Cǒmara rû̌htò̌ bǎ asî kû̌ Phakǐsha aphû̌khû Khûsò̌lǔ. A mî̌ Khûbîyame̤ akhlialè dě a htû bǎ asî khwǐ aně lǐ̤shi. ^j 22Dǒnô̌kò dě Cǒmara bè̌tě̤kè Khûsò̌lǔ dǒ khwǐ agûlǎ̤ dě a nohtûhtò̌kè Khûdawi̤ kû̌ asî khwǐ. ^k Khûdawi̤ awe̤akè nu Cǒmara hî̌ kû̌, ‘He kè̌shǐhto Phayeshè̌ aphû̌khû Khûdawi̤ mî̌ kòyò tôpwa̤ dǒ a ma̤mô̤ he sǎphlǒ dě a gǔ ma̤bò pô̤̌ he sǎyṳ noma̤ a nu pě.’ ^l

23“Pô̤̌ Cǒmara olò̤ nǎ hto kû̌ a gǔ nohèlò̤ Yeshǔ pô̤̌ pwa̤ma̤hǎplǎge Isôrěla akhlialè sîtokhlǒ aya tôpwa̤ pě nu, a gǔ ô̌htûhtò̌ dǒ Khûdawi̤ akhlialè hèlò̤ tutṳ̌ nu pě a hî̌ pô̤̌nu. 24Yeshǔ hè tǒ̤ khôtô̤̌ nu, Khûyṳ̂ha shôbǐǐlṳ̌ bǎ bò Isôrělaphû̌ tokhlǒ kû̌ asî gǔ yò̤lǎ̤plǎdî̌ lô̌khô asǎphlǒ dě a gǔ ju lô̌khô anǎ̤ kû̌ shi, pô̤̌nu. ^m 25Bǎ Khûyṳ̂ha ma̤ ata̤ma̤ glè̌ pô̌hǒ akhanu, a shôbǐǐ bǎ kòyò saprṳ̂ tokhlǒ kû̌, ‘Sî gènè̤ he kû̌ mò̌pè? He mî̌ kòyò dǒ sî ô̌pǒ̤ kè̌shuǐ Me̤shǐya nutôpwa̤ mè̤̌tô̤̌. ⁿ Hǒnu tôpwa̤ mî̌ a gǔ hè dǒ hekò pě, dě he gǔ bôphlǔ bǎpwǎ lû̌û khò̌phě pli̤ pwǎ nu he gwǎ kû̌ a tô̤̌.’ ^o

26“Pṳ̌wè̤̌ PhaAbraha akhlialè sîtokhlǒ kû̌ Yǔdaphû̌ mè̤̌tô̤̌ bǎbǎ a ô̌ bǒo dě a cubucabahtò̌ Cǒmara tokhlǒ lǒ̤꤮ bò sî, ta̤ma̤hǎplǎge awe̤akè hǒo nu, kòyò sûhè bǎ paya pwǎ. 27Ma̤titèhî̌dě Wî̤̌yarǔshôlephû̌ tokhlǒ kû̌ asî a ikǒdû̌ tokhlǒnu a sî̌ganǎ̤ lô̌khô kû̌ a mî̌ pwa̤ma̤hǎplǎge a Běcǎ tôpwa̤ pô̤̌nu tô̤̌. Htokhôtô̤̌ piwi̤pèshè tokhlǒ alě̤ayô̤̌ dǒ kòyò dô̌lṳ̌htò̌ a bǎ Yǔdaphû̌ a lṳmṳ̌dǔ ▼

▼Yǔdaphû̌ lṳmṳ̌dǔ mî̌ bǎ Mô̤gètè̤ nutini̤.

pṳ̂̌꤮ taplǎ nutokhlǒ bǎbǎ, asî sî̌ganǎ̤ phlǔ gû̌ kòyò yô̤̌mûyô̤̌sǎ tô̤̌. Pô̤̌nudě pô̤̌khô piwi̤pèshè tokhlǒ alě̤ayô̤̌ gǔ lǒhtò̌behtò̌ ayanu, a no cî̌htò̌ sikè Yeshǔ pwǎ. 28Ta̤sǔta̤plě dǒ a gǔ cî̌htò̌ sikè Yeshǔ ayanudě a kè̌shǐ tocǒ꤮ tô̤̌, bǎbǎkǎlè kòyò no shû̌ Khwǐpǐlǎ dǒ a gǔ cî̌htò̌ sikè lû̌û nu. ^q 29Bǎ asî ma̤hto bòkè pô̤̌ lî̤plò̌shǐ hî̌nǎ awe̤akè akhanu, asî cû̌phî̌lò̤tě̤kè lû̌û dǒ nò̌dò̌htǔlô̤ dě asî cû̌lǔnṳ̌kè lû̌û dǒ lṳ̌kû. ^r 30Bǎbǎkǎlè Cǒmara ma̤htûpwa̤ getîkhî sô̌ lû̌û dǒ ta̤si. 31Htodě Běcǎ Yeshǔ nu, a dǔlè̌lṳ̌ dû̌wî̤ lṳlṳmṳ̌ni̤lṳmṳ̌sa anǎ̤ kû̌ kòyò dǒ a sahtò̌ gû̌ kû̌ lû̌û kò, sahtò̌ dǒ Galilè̤̌gǎ tǒ̤dǒ Wî̤̌yarǔshôle nutokhlǒ. Khònò̤̌dě, asî htûhtò̌kè pwa̤khòlṳ̌ dǒ aya dě a cû̌ khòlṳ̌hto Isôrělaphû̌ tokhlǒ hǒ. ^s

32“Khònò̤̌dě pa shôbǐǐ bǎ sî ta̤sǎlě̤we̤kè. Dě ta̤sǎlě̤we̤kè numî̌ Cǒmara olò̤ hto kû̌ paphipaphu dǒ awǐnukhanu tokhlǒ hǒ, ^t 33dě khònò̤̌, dǒ Cǒmara ma̤ ihtǒ htûpwa̤ tîkhî sô̌ Yeshǔ dǒ ta̤si akhû̌akhî, a ma̤lǒhtò̌behtò̌ bǎ aphû̌ali̤ hǎtě̤ gelò̤ tutṳ̌ panu tokhlǒ hǒ. Pô̤̌ kòyò wě̤ dǒ lî̤htû̌sò̌htò̌ amèdû̌ ginǐ̤tô̤̌tôtô̤̌ akûnu a hî̌ kû̌,

‘Na mî̌ hephû̌pwa̤khû, khò̌tôni̤ dě, he htû napha hǒ.’ ^u

34Cǒmara ma̤ihtǒ htûpwa̤ getîkhî Khrǐ dǒ ta̤si hǒ dě aso aû jò petô̤̌ dě Cǒmara hî̌ kû̌,

‘He gǔ ǐ sî ta̤ǐshowî̤ dǒ aplò̌shǐ kû̌ atě̤amè̤̌ tokhlǒ pô̤̌ he olò̤wǎ̤lò̤ hto Khûdawi̤ dǒ he gǔ ǐ yǎ nutokhlǒ pě.’ ^v

35Pô̤̌ pwa̤wě̤lî̤ sǎwǐ htû̌sò̌htò̌ hî̌ pô̤̌ kû̌,

‘na nosonoûkè na jû̌ plò̌shǐ nutôpwa̤ dǒ lṳ̌kû tô̤̌.’ ^w

36“Ma̤titèhî̌dě Cǒmara tayè̤lò̤nǎ hto bǎ Khûdawi̤ dǒwǐkha dě Khûdawi̤ ma̤hto bǎ ahtukha nuhǒ, dě dǒnô̌kònu a sikè. Dě kòyò lǔnṳ̌ lû̌û kû̌ apha dǒ awǐnu tokhlǒ dě anǎ̤glǒ sokè bǎnu. 37Bǎbǎkǎlè kòyò dǒ Cǒmara dǐ htûpwa̤ getîkhî a tôpwa̤nu aso aû tô̤̌.

38“Pô̤̌nu akhû̌akhî, pṳ̌wè̤̌ lǒ̤bò sî he sǎyṳ no sî̌ganǎ̤ tě̤tě̤mè̤̌mè̤̌ sî kû̌ kòyò shôbǐǐlṳ̌ bǎ sî ta̤ma̤hǎplǎge sî ta̤sǔ numî̌ Yeshǔ Khrǐ akhû̌akhî pwǎ. 39Dǒ Yeshǔ ma̤htohǒ akhû̌akhî, kòyò dǒ a yṳ̌ǎ Yeshǔ pṳ̂̌꤮ tôpwa̤ nu Cǒmara plûkèbò a ta̤sǔ hǒ dě a bè̌cǒbè̌tè̤ lû̌û hǒ. Dǒ sî gû̌ ma̤ Khûmṳ̂shě a ta̤sû̌ta̤tòwò akhû̌akhî, Cǒmara plûkèjò sî ta̤sǔ nutokhlǒ tîkî̌꤮ tô̤̌. 40Pô̤̌nudě ô̌sè̌rè̌ lô̌khô sînǎ̤, ma̤titè̌hî̌dě ma̤htûhtò̌ tǎ̤ sînǎ̤ pô̤̌ piwi̤pèshè tokhlǒ hî̌nǎ hto nutokhlǒ tǎ̤mǎ̤. 41Piwi̤pèshè hî̌ kû̌,

‘Sî dǒ a hî̌bǎ takǎ tokhlǒ sî, ganǎ̤de lô̌khô! ǒò̌ kiti̤kaa dě sikè lô̌khô mò̌. Ma̤titèhî̌dě, bǎ sî htukha nu he gǔ ma̤ bǎ sî ta̤tôcǒcǒ dǒ kòyò shôbǐǐ bǎ sînu pě, bǎbǎkǎlè sî yṳ̌ǎ gû̌ kòyò tîkî̌꤮ tô̤̌ pě,’ piwi̤pèshè hî̌ pô̤̌nu.” ^x

42Bǎ Khûpò̌lǔ kû̌ Khûbanabǎ hǎhtò̌cû̌kè dǒ ta̤cabahǐkû akhanu, kòyò saprṳ̂ tokhlǒ nohèpô̤̌ asî bǎ꤮ Yǔdaphû̌ a lṳmṳ̌dǔ bǎ sô̌ dǒ nô̌kò susô̌tôni̤ pě dě a no shôbǐǐ dû̌wî̤ pô̤̌ asî kû̌ ta̤we̤ta̤kè sîtokhlǒ. 43Dě bǎ kòyò caba hto dǒ ta̤cabahǐkû akhanu, Yǔdaphû̌ tokhlǒ kû̌ Yǔdaphû̌ mè̤̌tô̤̌ dǒ a yṳ̌nǐ̤nǎ̤nǐ̤ gû̌ Yǔdaphû̌ a ta̤cubucaba tokhlǒnu, a gû̌prṳ̂gû̌phǎ bò Khûpò̌lǔ kû̌ Khûbanabǎ akò. Dě asî ǐkhû̌ǐǎ htû̌sò̌bǎ kòyò dǒ a gû̌kû̌ lû̌kò nutokhlǒ kû̌ a gǔ ô̌htûpwa̤ hènè lô̌khô anǎ̤ dǒ Cǒmara abwǐsîrî akûnu.

44Dǒ nô̌kò susô̌tini̤ bǎ Yǔdaphû̌ a lṳmṳ̌dǔ bǎ sô̌ akhanu, kòyò dǒ a hè ganǎ̤de lô̌khô Běcǎ Cǒmara alě̤ayô̤̌ tokhlǒnu a glè̌ ô̌ bò̌bò tîwî̤̌ lǎ̤. 45Bǎ Yǔdaphû̌ tokhlǒ kè̌shǐ kòyò hèjûgrû akhanu, asî sǎkhěkhû̌khwè shû̌lě Khûpò̌lǔ dě a htè̌shěshu pîjî̌ǐsho Khûpò̌lǔ a ta̤hî̌bǎ tokhlǒ.

46Htodě Khûpò̌lǔ kû̌ Khûbanabǎ lî̤̌꤮ hî̌bǎ khuhekhlo pô̤̌pô̤̌ dě a hî̌ kû̌, “Pa tôbǎ shôbǐǐlṳ̌ wǐ bǎ sî kû̌ Cǒmara alě̤ayô̤̌. Bǎbǎkǎlè sî yṳ̌nǐ̤nǎ̤nǐ̤ pa ta̤shôbǐǐ nutô̤̌ akhû̌akhî, sî cî̌htò̌ tûû̌ sînǎ̤ pô̤̌ kòyò dǒ a gwǎ nǐ̤bǎ gû̌ kòyò yôla htûpwa̤ tûjû̌pwa̤ tô̤̌ nutokhlǒ hǒ. Pô̤̌nudě pa bè̌kè sî dě pa cû̌ dǒ Yǔdaphû̌ mè̤̌tô̤̌ tokhlǒ a ô̌. 47Ma̤titèhî̌dě, Běcǎ mǎnǎ pa ayô̤̌ kû̌,

‘Pô̤̌khô hǎkhû̌běkhû̌ pṳ̂̌꤮ běbě gǔ nǐ̤bǎ kû̌ kòyò ta̤ma̤hǎplǎge ayanu, he nohtûhtò̌hto sî pô̤̌ ta̤lî tômè dǒ Yǔdaphû̌ mè̤̌tô̤̌ tokhlǒ aya hǒ.’” Běcǎ hî̌nǎ pô̤̌nu. ^y

48Bǎ Yǔdaphû̌ mè̤̌tô̤̌ tokhlǒ ganǎ̤de kû̌ ta̤hǒo akhanu, asî sǎlě̤sǎlò̤ dě htû̌sò̌htò̌ Běcǎ alě̤ayô̤̌ tokhlǒ. Dě kòyò dǒ Cǒmara rû̌htò̌ asî dǒ a gǔ nǐ̤bǎ yôla htûpwa̤ tûjû̌pwa̤ tokhlǒnu, a htûkè lô̌khô ta̤dòkûphû̌ tokhlǒ hǒ.

49Běcǎ Cǒmara alě̤ayô̤̌ nu, kòyò shôbǐǐlṳ̌ peshecû̌ bò a tôgǎ hǒ. 50Bǎbǎkǎlè pô̤̌khô kòyò gǔ ma̤jî̌ma̤jû̌ Khûpò̌lǔ kû̌ Khûbanabǎ nudě, Yǔdaphû̌ sî tokhlǒnu a noshû̌ nokò pwa̤mǒ̤ dǒ a caba Cǒmara dě a htû ikǒdû̌ tokhlǒ, kû̌ pwa̤khû dǒ a htû ikǒdû̌ dǒ wî̤̌kû nutokhlǒ, dě a sahtò̌ ma̤jî̌ma̤jû̌ Khûpò̌lǔ kû̌ Khûbanabǎ. Dě asî wṳ̂̌hǎhtò̌kè Khûpò̌lǔ kû̌ Khûbanabǎ dǒ asî gǎkû. 51Pô̤̌nudě pwa̤nophû̌ tokhlǒ tuphlǔlò̤tě̤kè hǎkumṳ̌ dǒ a khǎlǎlô̤. Hǒomî̌ a dǔlè̌lṳ̌kè wî̤̌kûphû̌ bǎnu tokhlǒ kû̌ ta̤ma̤ mǎnǎ tocǒ hǒ, ma̤titè̌hî̌dě asî wî̤̌kûphû̌ tokhlǒnu, a htè̌shěshu wṳ̂̌hǎhtò̌kè asî, dě asî hǎhtò̌cû̌kè dǒ Wî̤̌Ikani̤. ^z 52Dě ta̤dòkûphû̌ ô̌ bǎ Pishidikagǎ, Wî̤̌Atiò akû tokhlǒnu, asî sǎlě̤sǎlò̤ jî̌ dě a lǒbe lô̌khô kû̌ Yôla Plò̌shǐ Běcǎ.