Act 14 | KxfSCKXF | STEP | Dě pô̤̌khô asî ma̤hto dǒ Wî̤̌Atiò akûnu, Khûpò̌lǔ kû̌ Khûbanabǎ cû̌nṳ̌ dǒ Yǔdaphû̌ tokhlǒ ta̤cabahǐkû dǒ a ô̌ bǎ Wî̤̌Ikani̤ akû nutômè. Dě asî hî̌bǎ phlô wô̌ bǎ kòyò kû̌ Běcǎ Yeshǔ awe̤akè akhû̌akhî Yǔdaphû̌ kû̌ Yǔdaphû̌ mè̤̌tô̤̌ tokhlǒ yṳ̌nǐ̤nǎ̤nǐ̤ jûgrû kû̌ asî.

Acts 14

1 Dě pô̤̌khô asî ma̤hto dǒ Wî̤̌Atiò akûnu, Khûpò̌lǔ kû̌ Khûbanabǎ cû̌nṳ̌ dǒ Yǔdaphû̌ tokhlǒ ta̤cabahǐkû dǒ a ô̌ bǎ Wî̤̌Ikani̤ akû nutômè. Dě asî hî̌bǎ phlô wô̌ bǎ kòyò kû̌ Běcǎ Yeshǔ awe̤akè akhû̌akhî Yǔdaphû̌ kû̌ Yǔdaphû̌ mè̤̌tô̤̌ tokhlǒ yṳ̌nǐ̤nǎ̤nǐ̤ jûgrû kû̌ asî. 2 Bǎbǎkǎlè Yǔdaphû̌ dǒ a yṳ̌ǎ kû̌ kòyò tô̤̌ tokhlǒnu, a cû̌ noshû̌ Yǔdaphû̌ mè̤̌tô̤̌ tokhlǒ dǒ gǔ ma̤sǎphlǒdû̌ pwa̤yṳ̌ǎnǎ̤ǎ nutokhlǒ. 3 Pwa̤nophû̌ sò̌ginǐ̤ ô̌yî̤ kû̌mṳ̂̌ bǎnu. Dě asî nǎla̤ǐ Běcǎ Yeshǔ dǒ a gǔ ma̤jè̌ asî akhû̌akhî, a shôbǐǐlṳ̌ khuhe bǎ kòyò. Běcǎ ǐ asî ta̤ma̤jò ǒò̌ kiti̤kaa sîtokhlǒ kû̌ ta̤cô̌klǐcô̌sè a ta̤ma̤ mǎnǎ tokhlǒ numî̌ Běcǎ khòlṳ̌ kû̌ ta̤bwǐta̤sîrî awe̤akè dǒ pwa̤nophû̌ shôbǐǐ bǎ kòyò tokhlǒ numî̌ a mè̤̌mǐca nupwǎ. 4 Wî̤̌kûphû̌ bǎnu tokhlǒ lûpò̌kè ginǐ̤prṳ̂, tôprṳ̂ dě a ô̌ pa kû̌ Yǔdaphû̌, tôprṳ̂ dě a ô̌ pa kû̌ pwa̤nophû̌ tokhlǒ. 5 Yǔdaphû̌ mè̤̌tô̤̌ tokhlǒ kû̌ Yǔdaphû̌ tokhlǒ cû̌ô̌plǒ kû̌ asî ikǒlǒkòdû̌ dě hî̌bǎ phlǔhto wô̤̌wô̤̌kè lû̌ ayô̤̌ kû̌ gǔ ma̤jî̌ma̤jû̌ pwa̤nophû̌ tokhlǒ dě gǔ tě̤ asî kû̌ lǒ̤ pě. 6 Bǎ pwa̤nophû̌ tokhlǒ sî̌yahto kû̌ kòyò gènè̤ phû̌mò̤̌shǐhtô asî akhanu, asî hǎhtò̌khlè̌ cû̌kè dǒ Wî̤̌lǔshatara kû̌ Wî̤̌debe dǒ a ô̌ bǎ Lǔkònigǎ a ta̤pǒalǎ̤ nutokhlǒ, kû̌ gûlǎ̤ ô̌te̤we̤lû̌ bǎnu tokhlǒ. 7 Dě asî cû̌lè shôbǐǐlṳ̌ sělě pô̤̌ kòyò ta̤sǎlě̤we̤kè te̤we̤lû̌bò bǎnutûkû.

Cû̌ma̤ ta̤ma̤ dǒ Wî̤̌lǔshatara kû̌ Wî̤̌dî̌ba akû

8 Bǎ Wî̤̌lǔshatara akûnu kòyò khò̌lôpô̤̌dě pe dǒ a mǒ̤hǐphukû dě a cû̌jòtô̤̌ nî̌ a ô̌ tôpwa̤. 9 – 10 A hǎnòò̌ ganǎ̤de Khûpò̌lǔ shôbǐǐta̤ bǎnu. Khûpò̌lǔ kè̌tě̤tě̤mè̤̌mè̤ lû̌û dě a sî̌ganǎ̤ kû̌ a ô̌ kû̌ a ta̤yṳ̌ta̤nǎ̤ dǒ a ma̤hǎmǎbò̌ lû̌û khò̌lôpô̤̌dě akhû̌akhî, a yî̤̌kǒhtò̌ lû̌û kû̌, “Ihtǒmò̌” Dě kòyò khò̌lôpô̤̌dě nutôpwa̤ pě̤ ihtǒ cû̌le̤cû̌ge bǎnu.

11 Bǎ kòyò saprṳ̂ kè̌shǐ Khûpò̌lǔ ma̤ta̤ pô̤̌o akhanu, asî kaǎgǔ hî̌bǎ lû̌û dě a hî̌ kû̌, “Cǒmara tokhlǒ hèlò̤ anǎ̤ pô̤̌ kòyòhǎkhû̌phû̌ dǒ paô̌ hǒ.” A hî̌ kû̌ Lǔkòniphû̌ ayô̤̌. 12 Asî kaǎ Khûbanabǎ ami̤ kû̌ Běcǎ “Shusô” htodě a kaǎ Khûpò̌lǔ mi̤ kû̌ Běcǎ “Hama”. ^{▼▼Běcǎ Shusô mî̌ Grěphû̌ tokhlǒ a Cǒmara dǒ adû̌lǒkhlo kòyò tôpwa̤. Htodě Běcǎ Hama mî̌ pwa̤sû bǎ Cǒmara tokhlǒ ta̤we̤ta̤kè.} Ma̤titèhî̌dě Khûpò̌lǔ hî̌bǎ dû̌khlo kû̌ kòyò akhû̌akhî, dě a kaǎ lû̌û pô̤̌nu. 13 Běcǎ Shusô a ta̤lṳhtò̌hônu, a ô̌ dǒ wî̤̌khlo dě Běcǎ Shusô a pwa̤shû̌gǎ tôpwa̤nu, a kû̌ kòyò saprṳ̂ tokhlǒ sǎyṳ hè lṳhtò̌ pwa̤nophû̌ tokhlǒ akhû̌akhî, a kǒlǒnṳ̌bǎ pṳ̂̌pha tokhlǒ kû̌ ta̤phô dě acî̌hèǐ lû̌û dǒ ta̤lṳhtò̌hô takha kòshî̌. Dě pwa̤shû̌gǎ tokhlǒ ma̤si lô̌khô pṳ̂̌ tokhlǒ dě a sǎyṳ lṳhtò̌ kû̌ Khûpò̌lǔ kû̌mî̌ Khûbanabǎ.

14 Bǎ Khûbanabǎ kû̌ Khûpò̌lǔ ganǎ̤de kû̌ kòyò glè̌ lṳhtò̌ asî akhanu, asî cî̌gwě aje dě, asî khlè̌hènṳ̌ dǒ kòyò saprṳ̂ tokhlǒ akla dě asî kaǎgǔ hî̌ kòyò nutokhlǒ kû̌, 15 “Sî cû̌ma̤ pô̤̌o ma̤titè? Pa mî̌ kòyò sô̌sô̌kû̌ sî pwǎ. Pa hè shôbǐǐ bǎ sî ta̤sǎlě̤we̤kè pwǎ. Pa sǎyṳ shôbǐǐlṳ̌ bǎ sî kû̌ cabape tǎ̤ lô̌khô ta̤ dǒ yô̤̌mûyô̤̌sǎ ô̌tô̤̌ nutokhlǒ tǎ̤mǎ̤. Pa sǎyṳ nocaba sî kû̌ Cǒmara dǒ a htûpwa̤ nutôpwa̤. A mî̌ Cǒmara dǒ a bô̌lò̤ mǒkhû̌hǎkhû̌, shidû̌te̤we̤ kû̌ ta̤ dǒ a ô̌ dǒ ta̤nutokhlǒ akû lǒ̤꤮bò tôpwa̤ pwǎ. ^b 16 Dǒ awǐkha mî̌ Cǒmara jû bò kòyò pṳ̂̌mi̤sicǒ kû̌ jû̌꤮ kòyò sǎyṳ ma̤ pô̤̌nu. 17 Bǎbǎkǎlè Cǒmara dǔlè̌lṳ̌hto kòyò kû̌ a ta̤khòlṳ̌ pṳ̂̌꤮ plǎ hǒ. A ta̤khòlṳ̌ tokhlǒ mî̌ mî̌titè hî̌dě a ma̤wô̌ta̤ tokhlǒ dǒ sîya akhû̌akhî, hǒomî̌ a dǔlè̌lṳ̌ kû̌ a ô̌ mè̤̌mî̌ca nuhǒ. A no julò̤ bǎ sî gǎ, a no sǎhtò̌ tôshětôkhǎ bǎ sî bǔhudî kû̌ sǒsǎsǒphô tokhlǒ, a ǐlò̤ lǒbe bǎ sî shǎǎshǎô dě a ma̤ sǎlě̤sǎlò̤ bǎ sî sǎphlǒ.” 18 Pwa̤nophû̌ tokhlǒ hî̌shěshu asî pwǐo bǎbǎkǎlè asî glè̌ ma̤tě̤tṳbò̌ kòyò saprṳ̂ dǒ a glè̌ lṳhtò̌ ta̤ dǒ asî ô̌ tokhlǒ nu ayû tô̤̌.

19 Htodě Yǔdaphû̌ tokhlǒkhlǒnu, a ô̌ dǒ Wî̤̌Atiò kû̌ Wî̤̌Ikani̤ dě a hè. Pô̤̌khô kòyò saprṳ̂ tokhlǒ gǔ sǎkhěkè Khûpò̌lǔ kû̌ Khûbanabǎ, dě a gǔ sǎphlǒ ô̌cu asî tôkhô ayanu, a cû̌lô̌ǐ kòyò saprṳ̂ tokhlǒ. Htodě asî tě̤ Khûpò̌lǔ kû̌ lǒ̤ dě a gènè̤ lô̌khô kû̌ a sihǒ dě asî cî̌hǎhtò̌ wîkè lû̌û dǒ wî̤̌khlo. 20 Bǎbǎkǎlè bǎ ta̤dòkûphû̌ tokhlǒ hèô̌pǒ̤ te̤we̤ kè̌ yǎ akhanu, a ihtǒ sô̌ dě a genṳ̌ sô̌ dǒ wî̤̌kû. Dǒ nô̌kò tôni̤nu, a kû̌ Khûbanabǎ hǎhtò̌cû̌ dǒ Wî̤̌debe.

Khûpò̌lṳ kû̌ Khûbanabǎ getîkhî sô̌ dǒ asî ta̤dòkû akû

21 Khûpò̌lǔ kû̌ Khûbanabǎ shôbǐǐlṳ̌ bǎ kòyò kû̌ ta̤sǎlě̤we̤kè bǎ Wî̤̌debe akû nu, dě kòyò htûhtò̌ dû̌wî̤ akhôphijǎ. Htodě dǒnô̌kònu, asî getîkhî sô̌ dǒ Wî̤̌lǔshatara kû̌ Wî̤̌Ikani̤ kû̌ Wî̤̌Atiò dǒ a ô̌ bǎ Pisidǐya gǎkûnu tokhlǒ. 22 Pô̤̌khô ta̤dòkûphû̌ tokhlǒ gǔ ô̌měô̌gle dǒ a ta̤yṳ̌ta̤nǎ̤ akû ayanu, Khûpò̌lǔ kû̌ Khûbanabǎ ǐkhû̌ǐǎ htò̌ asî, htokhôtô̤̌ shò̌gû̌ asîkò. Asî sû̌ǐtòwòǐ bǎ kòyò kû̌, “Pa glè̌ cû̌nṳ̌tǒ̤ dǒ Cǒmara ashiagǎkû numî̌ pa bǎ cû̌tûlû̌ dû̌wî̤ kû̌ ta̤pò̤̌ta̤sha sîtokhlǒ.” 23 Dǒ ta̤dòkû tôprṳ̂ kû̌ tôprṳ̂ akûnu, Khûpò̌lǔ kû̌ Khûbanabǎ rû̌htò̌ bǎ asî mǒ̤khumǒ̤pwǎ̤ dǒ a bǎ htû ikǒlǒkòdû̌ tokhlǒ. Dě a kwicaba bǎ asî, htodě a dǔǎ shǎǎshǎô, a ma̤hto pô̤̌nudě a ǐlò̤kè kòyò nutokhlǒ dǒ Běcǎ dǒ asî yṳ̌ǎ sanǎ̤ tûû̌ nutôpwa̤ a cǔdekû. 24 Asî cû̌bò̌ tûlû̌kè Pishidikagǎ dě asî cû̌tǒ̤ dǒ Phaphǔliya gǎkû. 25 Asî shôbǐǐlṳ̌ hto kòyò kû̌ ta̤sǎlě̤we̤kè bǎ Wî̤̌peraka akûnu dě asî cû̌ tutṳ̌ pô̤̌ dǒ Wî̤̌Ataliya.

26 Asî dò̌nṳ̌ sǒkhlidû̌ bǎ Wî̤̌ataliya nu dě getîkhî sô̌ lô̌khô dǒ Wî̤̌atiò. Wî̤̌atiò mî̌ wî̤̌ dǒ a ǐlò̤ Khûpò̌lǔ kû̌ Khûbanabǎ dǒ Cǒmara abwǐsîrî a cǔdekû dǒ a gǔkè̌ gǔkhwè̌ asî dǒ a ta̤cû̌lè hî̌ǐ kû̌ Cǒmara alě̤ayô̤̌ nuhǒ. Dě asî ma̤hto ta̤phǐta̤ma̤ tokhlǒ nuhǒ. 27 Bǎ asî getǒ̤ dǒ Wî̤̌Atiò akhanu, asî kaǎplǒ ta̤dòkû tokhlǒ dě a shôbǐǐlṳ̌ bǎ bò asî kû̌ lǒ̤꤮ bò Cǒmara ma̤ta̤ kû̌ asî nutokhlǒ dě Yǔdaphû̌ mè̤̌tô̤̌ tokhlǒ gǔ yṳ̌nǐ̤nǎ̤nǐ̤ ayanu, Cǒmara bǔmôhtò̌ bǎ asî takha. 28 Asî ô̌yî̤gipi̤ kû̌ pwa̤yṳ̌ǎnǎ̤ǎphû̌ sîtokhlǒ bǎnu.