Act 19 | KxfSCKXF | STEP | Bǎ Khûapò̌lǔ ô̌bǎ Wî̤̌kôritu akû akhanu, Khûpò̌lǔ cû̌tûlû̌kè Galatǐgǎ kû̌ Pishitǐyagǎ, dě a cû̌tǒ̤ dǒ Wî̤̌Ěphěsu akû. A kè̌shǐ kû̌ ta̤dòkûphû̌ tokhlǒ bǎ Wî̤̌Ěphěsu akûnu.

a Matè̌ 3:11; Makǔ 1:4,7,8; Lǔka 3:4,16; Yṳ̂ha 1:26,27

Acts 19

Khûpò̌lǔ cû̌ dǒ Wî̤̌Ěphěsu

1 Bǎ Khûapò̌lǔ ô̌bǎ Wî̤̌kôritu akû akhanu, Khûpò̌lǔ cû̌tûlû̌kè Galatǐgǎ kû̌ Pishitǐyagǎ, dě a cû̌tǒ̤ dǒ Wî̤̌Ěphěsu akû. A kè̌shǐ kû̌ ta̤dòkûphû̌ tokhlǒ bǎ Wî̤̌Ěphěsu akûnu. 2 Dě a gwè̌ asî kû̌, “Bǎ sî yṳ̌ǎnǎ̤ǎta̤ akhanu, sî nǐ̤bǎ hto Yôla Plò̌shǐ Běcǎ ya?”

Dě asî hî̌shěshu lû̌û kû̌, “Pa nǐ̤bǎ nò̌khôtô̤̌. Htodě Yôla Plò̌shǐ Běcǎ ô̌ hî̌nu, pa ganǎ̤de nô̌ kû̌ kòyò taplǎ꤮ tô̤̌.”

3 Khûpò̌lǔ gwè̌ asî kû̌, “Kè̌ ma̤pô̤̌nudě sî jubǎ lôkhô shi hî̌tè tocǒya?”

Dě asî hî̌shěshu lû̌û kû̌, “Pa jubǎ pwǎ Khûyṳ̂ha ju panu pwǎ.”

4 Dě Khûpò̌lǔ hî̌ bǎ asî kû̌, “Khûyṳ̂ha ju bǎ kòyò dǒ a yò̤lǎ̤plǎdî̌ asǎphlǒ nutokhlǒ aya pwǎ. A hî̌ kòyò nutokhlǒ kû̌ yṳ̌ǎnǎ̤ǎ pwa̤ dǒ a gǔ hè dǒnô̌khîkò nutôpwa̤ nî̌꤮, a mî̌ Yeshǔ hǒ.” ^a 5 Asî ganǎ̤de a hî̌ bǎ asî pô̤̌o dě, asî ju lôkhô anǎ̤ kû̌ shi dǒ Běcǎ Yeshǔ ami̤ akû. 6 Bǎ Khûpò̌lǔ bè̌htò̌ acǔde dǒ asîlô̤ akha, Yôla Plò̌shǐ Běcǎ hèlò̤ dǒ asîlô̤ dě dǒ Yôla Plò̌shǐ Běcǎ akhû̌akhî, asî hî̌bǎhtò̌ ta̤hî̌bǎ dǒ a khô̌ tokhlǒ dě a shôbǐǐ bǎ lôkhô kòyò kû̌ Cǒmara alěayô̤̌ tokhlǒ. 7 Lǒ̤bò numî̌ a ô̌ shǐsò̌ginǐ̤ pwǎ.

8 Khûpò̌lǔ cû̌nṳ̌ dǒ ta̤cabahǐkû dě a hî̌bǎ shôbǐǐ khuhe kû̌ kòyò saprṳ̂ bǎnu sula akû. Khûpò̌lǔ hî̌bǎ htè̌ǐ asî kû̌, Cǒmara ashigǎ awe̤akè dě a cî̌nṳ̌ asî asǎphlǒ. 9 Bǎbǎkǎlè tokhlǒkhlǒ a nò̌kudu dě yṳ̌ǎ gû̌kò tô̤̌. Dě a pi̤jǐǐsho lôkhô Běcǎ aklè̌aklò dǒ kòyò dǔlṳ̌ bǎ kòyò tûplṳ̂taphǎ alô̤mô̤̌. Pô̤̌nu akhû̌akhî, Khûpò̌lǔ hǎhtò̌cû̌ tephekè kû̌ asî. Dě a kaǎnṳ̌ akhôphijǎ tokhlǒ dě pṳ̂̌꤮ ni̤ni̤ a kû̌ akhôphijǎ tokhlǒ cû̌ hî̌bǎ shôbǐǐ wô̤̌ kò dǒ kòyò kaǎ kû̌ Sara Turǔnusô lǎ̤sû̌ǐta̤ gûlǎ̤ nutûkû. 10 Dě a cû̌ ma̤wô̤̌wô̤̌kû̌ ta̤ bǎnu ginǐ̤ně. Pô̤̌nudě lǒ̤bò Yǔdaphû̌ kû̌ Yǔdaphû̌ mè̤̌tô̤̌ tokhlǒ dǒ a ô̌ bǎ Ashǎgǎkû tokhlǒ ganǎ̤debǎ kû̌ Běcǎ alěayô̤̌.

Phashakebǎ aphû̌pwa̤khû tokhlǒ wṳ̂̌hǎhtò̌kè̌kè̌ khînǎkhîno

11 Cǒmara ǐ Khûpò̌lǔ ta̤cô̌klǐcô̌sè dǒ adû̌ayô̤̌ tokhlǒ. 12 Pô̤̌nu akhû̌akhî, Khûpò̌lǔ noǎ ǐ a khǔphô tokhlǒ kû̌ a hugò̌pwǐ dǒ a lǎ̤ma̤bǐtě̤tṳ dǒ alô̤mô̤̌ dǒ a noǎ ǐ hto tokhlǒnu, kòyò kè̌ phî̌cû̌ dǒ kòyòshǐ kòyòsha tokhlǒ a ô̌, kû̌ khînǎkhîno ma̤bǎ lû̌û tokhlǒ a ô̌ hî̌nu, a ta̤shǐta̤sha hǎmǎkè. Htodě khînǎkhîno tokhlǒ hǎhtò̌khlè̌ tephekè bò̌bò.

13 Yǔdaphû̌ dǒ a lǎ̤wṳ̂̌hǎhtò̌kè khînǎkhînonu a ô̌ tokhlǒ. Asî cû̌ wṳ̂̌hǎhtò̌kè khînǎkhîno kû̌ Yeshǔ ami̤. Asî hî̌ khînǎkhîno tokhlǒ kû̌, “Dǒ Khûpò̌lǔ shôbǐǐ kû̌ Yeshǔ nutôpwa̤ ami̤kûnu, he nocû̌kè sî,” A wṳ̂̌hǎhtò̌ pô̤̌nu. 14 Yǔdaphû̌ pwa̤lṳhtò̌ ikǒdû̌ dǒ ami̤ kû̌ Phashakebǎ tôpwa̤nu, a phû̌pwa̤khû ô̌ susô̌tôpwa̤. Aphû̌ nutokhlǒ numî̌ a cû̌ wṳ̂̌hǎhtò̌ lôkhô khînǎkhîno pô̤̌nu tokhlǒ. 15 Bǎbǎkǎlè khînǎkhîno hî̌shěshu asî kû̌, “Yeshǔ mî̌ he sî̌ganǎ̤. Khûpò̌lǔ mî̌ mî̌ he sî̌ganǎ̤nǎ̤. Bǎbǎkǎlè he sî̌ganǎ̤ sî tô̤̌. Sî mî̌ mò̌pè?” 16 Kòyò dǒ khînǎkhîno ma̤bǎ a tôpwa̤nu, a pě̤htò̌ dǒ asîlô̤ dě a pè̤̌bò̌ asî. Pô̤̌nudě khînǎ ma̤sha dû̌wî̤ asî dě asî khlè̌hǎhtò̌ kôglěkaba bò lôkhô dǒ hǐdòkû̌.

17 Lǒ̤bò Yǔdaphû̌ kû̌ Grěkhlilèphû̌ ashǔshawa̤ dǒ a ô̌ bǎ Wî̤̌Ěphěsu akû nutokhlǒ ganǎ̤de bò̌꤮ bò ta̤ma̤htûhtò̌ anǎ̤ nutôcǒ. Dě asî ǐshabò dě asî bè̌dubè̌nǎ̤, dě htû̌sò̌htò̌ǐ lôkhô Běcǎ Yeshǔ ami̤. 18 Pwa̤yṳ̌ǎta̤phû̌ tokhlǒ hèdû̌hèwî̤ dǒ Khûpò̌lǔ ô̌ dě asî hè olò̤wǎ̤lò̤ lôkhô dǒ kòyò tûplṳ̂taphǎ alô̤mô̤̌, htodě asî dǔlè̌lṳ̌htò̌ lôkhô a ta̤phû̌mò̤̌shǐhtô dǒ asî ma̤hto nutokhlǒ. 19 Kòyò nutokhlǒ aklanu, tokhlǒkhlǒ dě a htû khînǎkhîno sara dě a phî̌hènṳ̌ lôkhô alî̤ dǒ a cû̌sû̌ǐtòwòǐ kû̌ ta̤ma̤nu dǒ kòyòlô̤ awe̤akè nutokhlǒ dě a hè shû̌ugè̌kè kû̌ mî̌ bǎ kòyò tûplṳ̂taphǎ alô̤mô̤̌. Asî dô̌bǎ kè̌kè̌bò lî̤ hǒtokhlǒ apwî̤nu, a lò̤tě̤ ruyî̌ yè̤̌sò̌ gûlǎ̤. 20 Dǒ Cǒmara ta̤pô̤ta̤phǎ ô̌lṳ̌htò̌ dǒ aklè̌aklò pô̤̌o akhû̌akhî, Cǒmara alěayô̤̌ lṳ̌peshe cû̌lè̤̌htò̌ pô̤̌ dě a dû̌htò̌htûhtò̌ hènè pô̤̌ dǒ alô̤mô̤̌.

Ta̤shû̌shǎ ô̌htò̌ dǒ Wî̤̌Ěphěsu akû

21 Ta̤ma̤anǎ̤ pô̤̌o tokhlǒ htodě Khûpò̌lǔ bè̌lò̤ asǎphlǒ kû̌ a gǔ cû̌tûlû̌ Mèsidûnǐ̤yagǎ kû̌ Akheyagǎ dě a gǔ cû̌ dǒ Wî̤̌yarǔshôle pě. Htodě a hî̌ kû̌, “He cû̌hto dǒ Wî̤̌yarǔshôle dě he bǎ cû̌ sělě pô̤̌ dǒ Wî̤̌rṳ̂̌me̤ pě.” 22 Bǎ a cû̌ ô̌kǔ bǎ Ashǎgǎ tôshò̌phû̌ akhanu, a nocû̌ Khûtîmôte kû̌ KhûĚrashatǔ dǒ a ma̤jè̌ lû̌û nusò̌ginǐ̤ dǒ Mèsidûnǐ̤yagǎ.

23 Bǎnukha, dǒ kòyò yṳ̌ǎ Běcǎ Yeshǔ aklè̌aklò akhû̌akhî, ta̤pò̤̌ta̤sha dû̌ tocǒ ô̌htò̌ dǒ Wî̤̌Ěphěsu akû. 24 Pwa̤lòru dǒ ami̤ kû̌ Khûdemetarǐ tôpwa̤nu, a bô̌htò̌ Běcǎ mǒ̤ Aratemi ^{▼▼pô̤̌khô Grěphû̌ tokhlǒ gǔ phû̌ô̌dû̌ ayanu, asî lṳhtò̌ lôkhô Běcǎ mǒ̤ Aratemi.} Ta̤lṳhtò̌hǐphû̌ dǒ a bô̌ kû̌ ru tokhlǒ dě pwa̤ma̤ta̤phû̌ tokhlǒ nǐ̤bwǐnǐ̤sîrî kû̌ ta̤phǐta̤ma̤ hǒo akhû̌akhî pwǎ. 25 Pô̤̌nu akhû̌akhî, a kaǎplǒbò pwa̤ma̤ta̤phû̌ tokhlǒ kû̌ pwa̤ma̤ta̤phû̌ dǒ ata̤ma̤ sô̌sô̌kû̌ lû̌û dǒ ashǔshawa tokhlǒ dě a hî̌ asî kû̌, “Pṳ̌wè̤̌ sî, pa dû̌yò̤̌htò̌sa pwǎ kû̌ pa ta̤phǐta̤ma̤ hǒtocǒ akhû̌akhî pwǎ numî̌ sî sî̌ganǎ̤ tû̌hǒ. 26 Khûpò̌lǔ tôpwa̤nu a ma̤kwè̌꤮ titè numî̌ sî kè̌shǐ ganǎ̤debò tûû̌ kû̌ sînǎ̤ hǒ. A cû̌ tili̤tôlô̌ bò kòyò kû̌ Cǒmara dǒ kòyò bô̌ kû̌ acǔde tokhlǒnu, Cǒmara mè̤̌ tîkî̌꤮ tô̤̌, a hî̌ pô̤̌nu. Dě a tili̤tôlô̌ nǐ̤ dû̌wî̤ kòyò tǒ̤dǒ kòyò ô̌bǎ Wî̤̌Ěphěsu akû tokhlǒnu mè̤̌tô̤̌, a phǔ tili̤tôlô̌nṳ̌bò tònò̤̌ Ashǎgǎ tôgǎlǎ̤ hǒ. 27 Pô̤̌nudě, ǐsha kû̌ pa ta̤phǐta̤ma̤ pî̌kè pěnu. Htokhôtô̤̌ he bǎyô̤ kû̌ hî̌pěmî̌ kòyò bè̌dubè̌nǎ̤ pe běcǎ mǒ̤ Aratemi a ta̤cabahǐ tô̤̌ pě. Ashǎgǎ tôgǎbò kû̌ hǎkhû̌ taběbò cabahtò̌ bò Aratemi. He bǎyô̤ kû̌ Běcǎ mǒ̤ Aratemi ami̤ lṳ̌shilṳ̌gǎnu, hî̌pěmî̌ a hǎmǎkè pě.”

28 Pwa̤ma̤ta̤phû̌ nutokhlǒ ganǎ̤de ta̤hî̌bǎ nutokhlǒ dě asî sǎphlǒdû̌ jî̌jî̌, dě asî yî̤̌kǒhtò̌ bò kû̌, “Ěphěsu Běcǎ mǒ̤ Aratemi nutôpwa̤ mî̌ a sîrîshû̌sîrîsho shû̌lě!” 29 Ta̤ma̤pwe̤nǎ̤sǎgô̌ ô̌htûhtò̌ dě a peshecû̌ bò tîwî̤̌lǎ̤. Kòyò saprṳ̂ pṳ̂̌ Mèsidûnǐ̤yaphû̌ Khûkayǔ kû̌ Khûarǐshataku dǒ a cû̌ bǒsû̌ kû̌ Khûpò̌lǔ nusò̌ginǐ̤. Dě kòyò cî̌cû̌ asî dǒ kòyò lǎ̤dǔlè̌lṳ̌ ta̤lò̤wě̤lòsô agûlǎ̤ bǎ wî̤̌kûnu. 30 Khûpò̌lǔ sǎyṳ cû̌ dǔlè̌lṳ̌ anǎ̤ dǒ kòyò saprṳ̂ tokhlǒ alô̤mô̤̌ bǎbǎ ta̤dòkûphû̌ tokhlǒ dǐcû̌ lû̌û tô̤̌. 31 Khûpò̌lǔ a khô dǒ a htû Ashǎgǎ ikǒlǒkò nutokhlǒ bǎbǎ, a nosûhè ta̤we̤ta̤kè dǒ lû̌ûô̌ dě a kwisǎyṳ lû̌û kû̌ nohè dǔlè̌lṳ̌ tǎ̤ anǎ̤ dǒ kòyò lǎ̤lò̤wě̤lòsô agûlǎ̤nu ta̤mǎ̤ a hî̌lṳ̌ cû̌ lû̌û pô̤̌nu.

32 Bǎnuakha, kòyò dǒ a hèô̌plǒ lôkhô bǎnu tokhlǒ ma̤shû̌shu shû̌shǎ pwe̤rupwe̤tè̌ tôpwa̤ tocǒcǒ a kaǎgǔhtò̌ bò lôkhô. Asî hè ô̌plǒô̌cubò lôkhô bǎnu kû̌ ta̤we̤ta̤kè titènu a sî̌ganǎ̤ kè̌khî lô̌khô anǎ̤tô̤̌ tokhlǒnu, a phǔ ô̌ tònò̤̌ pṳ̂̌꤮ pwa̤. 33 Yǔdaphû̌ tokhlǒkhlǒ a nohǎhtò̌ Khûalè̌sadru dǒ kòyò saprṳ̂ alô̤mô̤̌, dě kòyò saprṳ̂ nutokhlǒ hî̌ lû̌û kû̌ hî̌bǎ mò̌ pa. Dě KhûAlèshadru yṳ̂̌htò̌ acǔde dě a noô̌sǔtukǔ asî. Dě a hî̌lṳ̌pô̤̌ bǎ kòyò saprṳ̂ nutokhlǒ kû̌ ta̤ma̤htûhtò̌ anǎ̤ nutokhlǒ. 34 Bǎbǎkǎlè bǎ asî sî̌ganǎ̤ kû̌ a mî̌ Yǔdaphû̌ tôpwa̤pwǎ akhanu, asî yî̤̌kǒhtò̌ wô̤̌wô̤̌bò lû̌û dě a hî̌ lôkhô kû̌, “Ěphěsu Běcǎ mǒ̤ Aratemi numî̌ asîrîdû̌ shû̌lě! a yî̤̌kǒhtò̌ nunî̌, ayî̤ tònò̤̌ ginǐ̤narî gûlǎ̤.”

35 Dǒnô̌kò dě wî̤̌ a pwa̤wě̤lî̤ nutôpwa̤ noô̌ sǔtukǔ kòyò saprṳ̂ nutokhlǒ, dě a hî̌ asî kû̌, “Wî̤̌Ěphěsuphû̌ lǒ̤bò sî, kòyò pṳ̂̌꤮ tôpwa̤ sî̌ganǎ̤ kû̌ pa Wî̤̌Ěphěsuphû̌ tokhlǒmî̌ pwa̤ dǒ akè̌akhwè̌ Běcǎ khwǐmǒ̤ Aratemi ta̤lṳ̌htò̌hô kû̌ lǒ̤ aplò̌shǐ dǒ a ô̌ dǒ mǒkhû̌ lò̤tě̤ nutômè numî̌ kòyò sî̌ganǎ̤ lôkhô pṳ̂̌꤮ tôpwa̤. 36 Kòyò hî̌bǐma̤bǐ pî̌jò kû̌ ta̤we̤ta̤kè nutokhlǒ tôpwǎ̤ tô̤̌. Ma̤pô̤̌nudě, sǔsǔ sî tô ô̌ lôkhô dě sî lṳ̂ ma̤phô̌phô̌ khôtô̤̌. 37 Kòyò dǒ sî kaǎhè lû̌û bǒo tokhlǒ numî̌ kòyò dǒ a pṳ̂̌sigwǐ yǒsaphǎ kòta dǒ ta̤lṳ̌htò̌hô akû nutokhlǒ kû̌ a pîjî̌ǐsho pa Běcǎ mǒ̤ nutokhlǒ mè̤̌tô̤̌. 38 Khûdemetarǐ kû̌ pwa̤ma̤ta̤phû̌ nutokhlǒ, a kè̌ sǎyṳ pè̤̌wǎ̤ kòyò ta̤sǔ tôpwa̤pwa̤ hî̌dě anǐ̤ pwǎ. Ma̤titèmî̌ ta̤cî̌htò̌hô bǔmô pwǎ, htodě ashěkhǎ tôpwǎ kû̌ pwa̤cî̌tôta̤ tokhlǒ hèô̌ tô lôkhô bǒo pwǎ. Bǎtè tôprṳ̂ bǎbǎ, a kè̌ bè̌htò̌ ata̤sǔ dǒ kòyòǐkodû̌ô̌, dě a kè̌ sǎyṳ hî̌bǎ kòyò kû̌ kòyòdû̌ numî̌ anǐ̤ pwǎ. 39 Ma̤hî̌nudě ta̤cî̌htò̌ dǒ ashǔshawa kè̌ ô̌khô̌pe hî̌dě, asî tôbǎ cî̌htò̌ bǎ khwǐ lǎ̤klô kaǎ ô̌plǒ shiphû̌gǎphû̌ akhanu. 40 Ta̤htûhtò̌ anǎ̤ hǒtôni̤ akûnu, pa ǐsha kû̌ Rṳ̂̌me̤phû̌ tokhlǒ pè̤̌wǎ̤ ta̤sǔ dǒ palô̤ dě a gǔ hî̌ pa kû̌ sî ma̤dû̌htò̌ ta̤shû̌shushû̌shǎ pô̤̌nu. Ta̤shû̌shushû̌shǎ htûhtò̌dû̌ pô̤̌onumî̌, pa hî̌bǎhǎplǎjò tûû̌ panǎ̤ tocǒ꤮ tô̤̌. Ta̤shû̌shushû̌shǎ htûhtò̌ kû̌ ta̤we̤ta̤kè hî̌tènu, pa shôbǐǐjò bǎ kòyò tocǒ꤮ tô̤̌.” 41 A hî̌hto pô̤̌o dě, a plûgebò kòyò saprṳ̂ nutokhlǒ.