Acts 20

Khûpò̌lǔ cû̌pô̤̌ dǒ Mèsidûnǐ̤yagǎ kû̌ Grěgǎ

1Bǎ ta̤shû̌shǎ ô̌sǔkè hto akhanu, Khûpò̌lǔ kaǎplǒ ta̤dòkûphû̌ tokhlǒ dě a ǐkhû̌ǐǎ asî, a hî̌mô̤hî̌wô̌ asî htodě a hǎhtò̌cû̌ dǒ Mèsidûnǐ̤ya gǎkû. 2Bǎ a cû̌bò̌ do ô̌ bǎ klè̌lô̤ tokhlǒ akhanu, a ǐkhû̌ǐǎ cû̌ jûgrûbǎ kòyò. Htodě a cû̌ sělě pô̤̌ dǒ Grěgǎ. 3A cû̌ô̌ bǎnu sula htodě a ô̌ tîwî̌tòwòhto anǎ̤ kû̌ a gǔ hǎhtò̌cû̌ dǒ Shurǐgǎ kû̌ sǒkhlidû̌ taplǎnô̤̌ a sî̌ganǎ̤ kû̌ Yǔdaphû̌ tokhlǒ glè̌ ma̤si lû̌û akhû̌akhî, a bè̌lò̤ tîkhî sô̌ asǎphlǒ kû̌ a gǔ genṳ̌ cû̌tûlû̌ sô̌ Mèsidûnǐ̤yagǎ kû̌ akhò̌lô̤pô̤̌. 4Wî̤̌berǐphû̌ Phaphǔrusho aphû̌khû Khûshû̌patarǔ kû̌ Wî̤̌tîsalònǐphû̌ KhûArǐshataku kû̌ Khûshekadǔ, htodě Wî̤̌tebephû̌ Khûkayǔ, kû̌ Khûtîmôte, kû̌ Ashǎgǎphû̌ Khûtǔkǐkǔ kû̌ Khûtaròphǐmǔ tokhlǒ gû̌cû̌ kû̌ lû̌û. 5Asî cû̌ô̌pǒ̤wǐ pa dǒ Wî̤̌taròǎ akû. 6Pwè mû̌ shôdô ta̤bû htohǒ dě tôplǎnô̤̌ pa htò̌dò̌ sǒkhlidû̌ bǎ Wî̤̌phǐlǐpǐnu dě pa hèkè̌shǐ kû̌ asî dǒ Wî̤̌taròǎ. Pa hè dǒ klè̌lô̤nu a ô̌ yè̤̌sa hǒdě pa hè ô̌yî̤ bǎnu susô̌tôni̤.

Khûpò̌lǔ cû̌ô̌lèkû̌ ta̤dòkûphû̌ tokhlǒ dǒ Wî̤̌taròǎ gutṳ̌kò tôplǎ

7Bǎ mô̤gètè̤ lṳmṳ̌hǎ akhanu, pa ô̌plǒô̌cu tîkhî sô̌ lû̌û kû̌ gǔ běphò̌ mû̌ aya. Pe̤wô̤pě nu Khûpò̌lǔ gǔ hǎhtò̌cû̌hǒ akhû̌akhî a hî̌bǎ kòyò saprṳ̂ nutokhlǒ tǒ̤dǒ lṳmṳ̌klama. 8Hǐdǒkû dǒ akhû̌tôtô̤̌ bǎ pa lǎ̤ô̌kǔ lû̌û agûlǎ̤ nu, kòyò dǎlî dû̌wî̤ mî̌. 9Pwa̤khû phû̌sǎphû̌ dǒ ami̤ kû̌ Khûǔtukhǔ tôpwa̤nu a hǎnòò̌ dǒ takhaphû̌khû̌. Khûpò̌lǔ shôbǐǐ yî̤gîpî̤ hǒdě Khûǔtukhǔ hǎmôô̌khwekè dě a hǎmôô̌nṳ̌ sělěkè. Hǒtaplǎdě a ô̌dǒ hǐkhû̌ sutô̤̌tôtô̤̌ dě a lò̤tě̤ dǒ hǎkhû̌. Bǎ kòyò cû̌ phô̌htò̌ lû̌û akhanu, a sikèhǒ. 10Dě Khûpò̌lǔ hǎtě̤ dǒ hǐlǎ̤ dě a û̌jogo phô̌ lû̌û dě a hî̌ kû̌, “Gû̌gè̌ ta̤mǎ̤. A ô̌htûpwa̤pe pwǎ!” 11Htodě a ihtǒ sô̌ dǒ hǐdǒkû dě a htò̌běphò̌ mû̌ dě a gǔ ǎô ta̤ kû̌ ta̤dòkûphû̌ tokhlǒ. A hî̌bǎyî̤̌꤮ kû̌ asî tǒ̤dǒ lṳmṳ̌shî̌ dě a hǎhtò̌cû̌ nô̌ pwǎ. 12Asî gesû pwa̤khû phû̌sǎ Khûǔtukhǔnu dǒ ahǐ. A htûpwa̤ pepwǎ akhû̌akhî, a mô̤ jî̌jî̌ asî sǎphlǒ.

Khûpò̌lǔ ô̌dǒ Wî̤̌taròǎ dě hǎhtò̌cû̌ dǒ Wî̤̌milětǔ

13Khûpò̌lǔ mǎnǎ pa kû̌ cû̌dò̌ sǒkhlidû̌ dě hǎhtò̌cû̌ wǐ dǒ Wî̤̌Ashǔ nu, dě Khûpò̌lǔ cû̌ htò̌dò̌ kû̌ pa bǎnu pě. Ma̤titè̌hî̌dě a dě a gǔ cû̌ kû̌ akhò̌lô̤pô̤̌ dǒ hǎkhû̌ tôkhônu pě. 14Pa kè̌shǐ shěshu lû̌û dǒ Wî̤̌Ashǔ, dě pa dò̌꤮ cû̌ wô̤̌wô̤̌ lû̌û sǒkhlidû̌ dǒ Wî̤̌mitele. 15Pa htò̌dò̌ cû̌ sǒkhlidû̌nu dě nô̌kò tôni̤nu, pa cû̌tǒ̤ dǒ Khǐǔ shikhokhû̌. Dǒnô̌kòtôni̤ dě pa cû̌tǒ̤ dǒ Shamǔ shikhokhû̌. Dǒnô̌kòtôni̤ pô̤̌ dě pa cû̌ dǒ Wî̤̌milětǔ. 16Pô̤̌khô ta̤shěta̤khǎ gǔ hǎbò bǎ Ashǎgǎkû tô̤̌nu, Khûpò̌lǔ bè̌lò̤ asǎphlǒ kû̌ a gǔ cû̌ tûlû̌kè Wî̤̌Ěphěsu. Kè̌ awô̌mò̌ dě Khûpò̌lǔ sǎyṳ cû̌tǒ̤ phwè kû̌ ta̤cû̌bò̌tûlû̌pwè ashěakhǎ bǎ Wî̤̌yarǔshôle akûnu.

Khûpò̌lǔ hî̌bǎ kû̌ Wî̤̌Ěphěsu ta̤dòkû bò̌bò mǒ̤khumǒ̤pwǎ̤ ikǒlǒkò tokhlǒ dǒ agutṳ̌kò tôplǎ

17Bǎ Khûpò̌lǔ ô̌bǎ Wî̤̌milětǔ akhanu, a mǎhèbò ta̤dòkû mǒ̤khumǒ̤pwǎ̤ dǒ a htû ikǒlǒkò dě a ô̌ lôkhô dǒ Wî̤̌Ěphěsu akû nutokhlǒ dǒ a ô̌. Dě a hî̌ asî kû̌ a gǔ hè kè̌shǐ kè̌khî lû̌û bǎ Wî̤̌milětǔ akûnu. 18Bǎ asî hètǒ̤ akhanu, Khûpò̌lǔ hî̌ asî kû̌, “Sahtò̌ bǎ he hètǒ̤ dǒ Ashǎgǎ nutini̤ hènè, he ihtǒhǎnòò̌ kû̌ sî pô̤̌hî̌tènu sî sî̌ganǎ̤ hto tûû̌hǒ. 19Bǎ he kè̌shǐbǎ kû̌ ta̤pò̤̌ta̤sha dǒ Yǔdaphû̌ tokhlǒ phû̌mò̤̌shǐhtô he akhanu taplǎnô̤̌ he ma̤ta̤ dǒ Cǒmara aya akhû̌akhî he mǐ̤sǎshi lò̤bǎ htokhôtô̤̌ he bǎ shò̌lò̤ kudǔdǔ he sǎphlǒ. 20Sî sî̌ganǎ̤hto kû̌ ta̤shôbǐǐ tocǒcǒ dǒ a gǔ htûhtò̌ ta̤ma̤jè̌ dǒ sîyanu, he ma̤bǐma̤hǔ bǎ tocǒ꤮ tô̤̌. Dě dǒ kòyò saprṳ̂ akla bǎbǎ, dǒ sîhǐsîphò akû bǎbǎ, he sû̌ǐtòwòǐ hto bǎ sî hǒ. 21Yǔdaphû̌ tokhlǒ bǎbǎ, Yǔdaphû̌ mè̤̌tô̤̌ tokhlǒ bǎbǎ, he hî̌lò̤shû̌ shû̌lě asî ginǐ̤prṳ̂ kû̌, yò̤lǎ̤plǎdî̌ lôkhô sî sǎphlǒ dě yṳ̌ǎnǎ̤ǎ lôkhô Běcǎ Yeshǔ, he hî̌ bǎ asî pô̤̌nu nu.

22“Khònò̤̌nu, he ganǎ̤de Yôla Plò̌shǐ Běcǎ ayô̤̌ dě he gǔ cû̌ dǒ Wî̤̌yarǔshôle. Bǎnu pědě ta̤ gǔ ma̤anǎ̤ kû̌ he pô̤̌hî̌tè pěnu, he sî̌yatô̤̌. 23He sî̌ganǎ̤ pwǎ tocǒ꤮ nô̤̌ kû̌, dǒ wî̤̌ pṳ̂̌꤮ tîwî̤̌ akûnu, Yôla Plò̌shǐ Běcǎ dǐ sè̌rè̌ he kû̌ kòyò bǎ comě he pě, dě pwa̤ ma̤pò̤̌ma̤sha he tokhlǒnu, a ô̌pǒ̤ nǎ hto heklè̌ hǒ. 24Bǎbǎkǎlè pô̤̌khô he gǔ ma̤htokè ta̤ma̤ dǒ Běcǎ Yeshǔ ǐlò̤kè he ayanu, he sǎleǐ pe he ta̤htûpwa̤nu tô̤̌ hǒ. Ta̤ma̤ dǒ a noma̤ he tokhlǒ numî̌ he bǎ khòlṳ̌ kû̌ Cǒmara abwǐsîrî a ta̤sǎlě̤we̤kè nuhǒ. ^a

25“Khònò̤̌nu he sî̌ganǎ̤ kû̌ lǒ̤bò sî dǒ he shôbǐǐ bǎhto bò kû̌ Cǒmara ashiagǎ awe̤akè tokhlǒ nu, sahtò̌ khònò̤̌ hènè nu sî kè̌shǐ pe he tôpwǎ̤꤮ tô̤̌ hǒ. 26Pô̤̌nu akhû̌akhî, khò̌tôni̤, he gǔ hî̌lṳ̌ sî̌ganǎ̤ tě̤tě̤mè̤̌mè̤̌ bǎ sî kû̌ lǒ̤bò sî hǒtokhlǒ nî̌, kè̌ sî yôla htûpwa̤ pî̌kè tôpwa̤pwa̤ kè̌hî̌ numî̌ he ta̤sǔ mè̤̌ pe bǎtô̤̌. 27Ma̤titèmî̌ lǒ̤bò ta̤ dǒ Cǒmara ta̤yè̤lò̤nǎ tokhlǒnu, he dǒû̌dǒshò̌ nô̌ tocǒ꤮ tô̤̌. He shôbǐǐ bǎ htobò sî hǒ. 28Kè̌ǐ kè̌khî tûû̌ lôkhô sînǎ̤ dě kè̌ǐ kè̌khî bò lô̌khô sû̌phû̌ dǒ Yôla Plò̌shǐ Běca ǐlò̤hto sî dǒ sî bǎ kè̌ǐ nutokhlǒ nî̌꤮. Htû lôkhô pwa̤ dǒ a kè̌ǐ asû̌phû̌sî nutokhlǒ nî̌꤮. Kè̌ǐ lôkhô Cǒmara a ta̤dòkû dǒ aphû̌khû pwî̤ge hto kû̌ asǐ sanǎ̤ nunî̌. 29He hǎhtò̌cû̌ hto pěnu, he sî̌ganǎ̤ kû̌ kòyò dǒ a sô̌sô̌ kû̌ shǐmi̤ dǒ ajî̌akhu tokhlǒ gǔ hènṳ̌ dǒ sîkla pě, dě a gǔ nṳ̌ma̤bǎma̤sha bò sû̌phû̌ amṳ̌ tokhlǒ pě. 30Dě dǒ sîklanu kòyò gǔ ô̌lṳ̌htò̌ tokhlǒkhlǒ pě. Dě pô̤̌khô asî gǔ tili̤tôlô̌ cû̌ ta̤dòkûphû̌ tokhlǒ aya nudě, a tili̤tôlô̌ cû̌ asî pě. 31Pô̤̌nu akhû̌akhî, ô̌sè̌rè̌ lôkhô sînǎ̤ nî̌꤮. Dě he sû̌ǐtòwòǐ sî lṳmṳ̌khǐkhǐ lṳmṳ̌shasha suně akû. Htokhôtô̤̌ pṳ̂̌꤮ plǎplǎ he mǐ̤sǎshilò̤ dû̌wî̤ sîyanu gènè̤htò̌ge lôkhô tû̌pû nî̌꤮.

32“Khònò̤̌nu, he ǐlò̤hto sî dǒ Cǒmara a ta̤kè̌ǐ akû kû̌ abwǐsîrî a ta̤sǎlě̤we̤kè akûnu hǒ. A ta̤sǎlě̤we̤kè nî̌ sǔ sǔ ama̤dû̌htò̌ jò sî dě a gǔ ǐ sî û̌tě̤û̌ca dǒ a bè̌dû̌ nǎ bǎ kû̌ a kòyò plò̌shǐ lǒ̤bò nutokhlǒ aya nupě. 33Ru bǎbǎ, hta bǎbǎ, je lǎ̤kûlǎ̤sô̌ bǎbǎ, he sǎyṳsǎbǎ bǎ kòta tôpwǎ̤꤮ tô̤̌. 34Lǒ̤bò ta̤ dǒ he kû̌ he khô lṳ̂bǎ tokhlǒnu, he ma̤jè̌ pwǎ kû̌ henǎ̤ numî̌ sî sî̌ganǎ̤ bòtû̌hǒ. 35Pô̤̌khô pa gǔ ma̤jè̌ bò̌ kòyò dǒ a khû̌shiǎjǎ tokhlǒnudě, he ma̤kè̌lû̌mò̌mṳ bò hto sî ta̤kè̌lû̌ pṳ̂̌꤮ tocǒ kû̌ pa tôbǎ jî̌pwǐ̤ ta̤, pô̤̌nu. Dě sî̌yahtò̌ lôkhô Běcǎ Yeshǔ a ta̤hî̌bǎ dǒ a hî̌ kû̌, ‘ǐta̤nu ta̤ǐshowî̤ bǎ dû̌khlo pe kû̌ nǐ̤bǎta̤,’” Khûpò̌lǔ hî̌ bǎ asî pô̤̌nu.

36Bǎ Khûpò̌lǔ hî̌bǎhto akhanu, a dô̌gînî̤û̌lò̤ kû̌ asî pṳ̂̌꤮ tôpwa̤ dě a kwicaba. 37Dě asî phô̌ gômô̤ hî̌mô̤hî̌wô̌ Khûpò̌lǔ dě a hǎ lôkhô pṳ̂̌꤮ tôpwa̤. 38Asî sǎplǎ̤nǎ̤bǎ lǒ mî̌ Khûpò̌lǔ hî̌ asî kû̌ sî kè̌shǐ pe nô̌ he taplǎ꤮ tô̤̌nu pě, a hî̌ asî nutômû nuhǒ. Dě asî sûcû̌ lû̌û dǒ kòyò lǎ̤bè̌ô̌kǔ sǒkhlidû̌ gûlǎ̤nu.