Acts 23

1Khûpò̌lǔ kè̌cû̌tô Yǔdaphû̌ dǒ a htûdû̌htûpwǎ̤ nutokhlǒ dě a hî̌ asî kû̌, “He pṳ̌wè̤̌ sî꤮, dǒ he sǎphlǒkûnu a dǔlè̌lṳ̌ he kû̌ he ta̤ô̌htûpwa̤ dǒ Cǒmara alômô̤̌ tǒ̤lò̤ khònò̤̌nu, amṳ̂̌aplî lǒbe bò pwǎ.” 2Pwa̤lṳhtò̌ ikǒdû̌lǒ KhûAnanǐ noplǎ̤ Khûpò̌lǔ khû̌phě kû̌ kòyò dǒ a ihtǒ ô̌phǔ kû̌ lû̌û nutokhlǒ. 3Htodě Khûpò̌lǔ hî̌shěshu a kû̌, “O! dǒdǎ dǒ kòyò plṳ̌bû yǎ, Cǒmara gǔ plǎ̤ na pě! na hǎnòò̌ bǎnu kû̌ na gǔ cî̌htò̌ he pô̤̌ ta̤sû̌ta̤tòwò aklè̌ hènu bǎbǎkǎlè dǒ na noplǎ̤ kòyò kû̌ he khû̌phě akhû̌akhî na tûlû̌ kè ta̤sû̌ta̤tòwò hǒ.” ^a

4Kòyò dǒ a ô̌phǔ kû̌ Khûpò̌lǔ tokhlǒ hî̌shěshu lû̌û kû̌, “O, na cû̌ hî̌bǎ phû̌mò̤̌shǐhtô bǔtǒ̤ Cǒmara a pwa̤lṳhtò̌ ikǒdû̌ nutôpwa̤ ya?”

5Khûpò̌lǔ hî̌shěshu kû̌, “He pṳ̌wè̤̌ sî, he sî̌ganǎ̤ kû̌ a mî̌ a htû pwa̤lṳhtò̌ ikǒdû̌nu mè̤̌tô̤̌. Lî̤plò̌shǐ hî̌nǎ kû̌, ‘kòyò htû ikǒlǒkò dǒ a pǒǐ na kòyò tokhlǒ tôpwa̤nu, na tôbǎ hî̌ phû̌mò̤̌shǐhtô ǐyǎ tô̤̌,’” a hî̌ pô̤̌nu. ^b

6Khûpò̌lǔ kè̌shǐ kû̌ kòyò ô̌bǎnu tokhlǒ mî̌ tokhlǒkhlǒ dě Sadukè̌phû̌, tokhlǒkhlǒ dě Pharishè̌phû̌ akhû̌akhî, a kaǎgǔcû̌lṳ̌ bǎ Yǔdaphû̌ dǒ a htû ikǒdû̌ tokhlǒ kû̌, “He pṳ̌wè̤̌ sî, he mî̌ Pharishè̌phû̌ tôpwa̤. He mî̌ Pharishè̌phû̌ tokhlǒ a phû̌pwa̤khû mî̌ amè̤̌mè̤̌. He kè̌shuǐ kû̌ kòyò dǒ a si tokhlǒnu, a gǔ ihtǒ htûpwa̤ getîkhî sô̌ pě akhû̌akhîdě sî gwè̌kè̌kè̌ he pwǎ.” ^c 7Dǒ a hî̌lṳ̌htò̌ ta̤ pô̤̌o akhû̌akhî, Pharishè̌phû̌ kû̌ Sadukè̌phû̌ tokhlǒ htè̌ kè̌khî lû̌û dě asî lûpeshekè ginǐ̤prṳ̂. 8(Ma̤titèmî̌ Sadukè̌phû̌ tokhlǒnu, a hî̌ lôkhô kû̌, kòyò si hto tokhlǒnu, a ihtǒ htûpwa̤ getîkhî petô̤̌. Kǎtô̤̌ mǒkhû̌ tanaphû̌ bǎbǎ, yôla bǎbǎ, a ô̌ tocǒ tô̤̌. Bǎbǎkǎlè Pharishè̌phû̌ tokhlǒ dě, a yṳ̌ǎ bò kû̌ a ô̌bò sucǒ.) ^d

9Hǒtaplǎdě kòyò kaǎgǔhtò̌ shû̌shû̌ dě dǒ asî aklanu pwa̤sû̌ǐ ta̤sû̌ta̤tòwò asara ô̌ tokhlǒ, asî kû̌ Pharishè̌phû̌ nî̌ tôprṳ̂ nô̤̌ pwǎ, dě dǒ asîkla tokhlǒkhlǒ, a ihtǒ dě a htè̌ tîkhî shěshu kû̌, “Pa kè̌shǐ kòyò nutôpwa̤ a ta̤ma̤sǔ tocǒ tô̤̌. Yôla Plò̌shǐ mè̤̌tô̤̌mî̌ mǒkhû̌ tanaphû̌ no hî̌bǎ lû̌û pwǎkǎ.” 10Ta̤tô̤̌klǐ hǒo a shû̌htò̌ tǒ̤dǒ kli tôrǐ aikǒdû̌ nutôpwa̤ gû̌gè̌ kû̌ ǐsha kòyò pě̤tṳ̌pě̤klò Khûpò̌lǔ akhû̌akhî, a nokaǎ hǎhtò̌kè Khûpò̌lǔ kû̌ akliphû̌ tokhlǒ dǒ asîkla, dě a sûcû̌kè lû̌û dǒ kliphû̌ tokhlǒ lǎ̤ô̌ hǐ nutokhlǒ akû.

11Bǎ nutôsa, Becǎ hè ihtǒô̌ dǒ Khûpò̌lǔ kòshǐ dě a hî̌ lû̌û kû̌, “Bè̌khuhe na sǎphlǒ nî̌꤮. Pô̤̌ na khòlṳ̌ hto kû̌ hewe̤hekè bǎ Wî̤̌yarǔshôle akûnu, na gǔ khòlṳ̌ pô̤̌ ta̤we̤ta̤kè nu dǒ Wî̤̌rṳ̂̌me̤ akû nupě.”

Kòyò gǔ ma̤si Khûpò̌lǔ

12Nô̌kòtôwô̤ lṳmṳ̌shî̌ akhanu, Yǔdaphû̌ tokhlǒ hèô̌plǒ hî̌bǎ lû̌û dě asî hî̌bǎhǔhî̌bǎsè̌ kè̌khî lû̌û ayô̤̌ dě a wṳ̂̌dòlò̤ kè̌khî lû̌û kû̌, “Pa kè̌ ma̤si bǎ Khûpò̌lǔ tô̤̌ nu, paǎ paô tocǒ꤮ tô̤̌.” 13Kòyò dǒ a hî̌bǎhǔ hî̌bǎsè̌ lû̌û ayô̤ nutokhlǒ, a ô̌ kòyò lǐ̤shi lǒ. 14Htodě asî cû̌ dǒ pwa̤lṳhtò̌ ikǒlǒkò tokhlǒ kû̌ Yǔdaphû̌ mǒ̤khumǒ̤pwǎ̤ dǒ a htû ikǒlǒkò tokhlǒ a ô̌ dě a hî̌ kû̌, “Pa wṳ̂̌dòlò̤ hto panǎ̤ kû̌ pa kè̌ ma̤si bǎ Khûpò̌lǔ tô̤̌ hî̌dě paǎ paô tocǒ꤮ tô̤̌. 15Pô̤̌nu akhû̌akhî, sî kû̌ Yǔdaphû̌ dǒ a htû ikǒlǒkò tokhlǒ wě̤cǒ lî̤ tôbǎ dǒ Rṳ̂̌me̤ kli tôrǐ aikǒdû̌ nutôpwa̤ a ô̌ dě hî̌ lû̌û kû̌, nosûge tîkhî sô̌ Khûpò̌lǔ dǒ sî ô̌nu. Dě nè̤̌ma̤ lôkhô pô̤̌ sî sǎyṳ sî̌ganǎ̤ dû̌htò̌pô̤̌ mè̤̌ca ta̤we̤ta̤kènu. Dě bǎ kòyò sûge tîkhî lû̌û dǒ klè̌lô̤ akha pěnu, pa tîwî̌tòwò nǎ tûû̌ panǎ̤ pě dě pa gǔ ma̤si shěshu a pě.”

16Bǎbǎkǎlè Khûpò̌lǔ apṳ̌wè̤̌ pwa̤mǒ̤ a phû̌pwa̤khû ganǎ̤de kû̌ kòyò glè̌ ma̤si Khûpò̌lǔ dě, a cû̌nṳ̌ dǒ kliphû̌ tokhlǒ lǎ̤ô̌ hǐ akû dě a cû̌nṳ̌ shôbǐǐlṳ̌ kû̌ Khûpò̌lǔ kû̌ ta̤we̤ta̤kè nutôcǒ.

17Hǒtaplǎdě Khûpò̌lǔ kaǎ kli tôya a ikǒdû̌ tokhlǒ akla tôpwa̤ dě a hî̌ lû̌û kû̌, “Sûcû̌ phijǎ pwa̤khûphû̌ nutôpwa̤ dǒ kli tôrǐ ikǒdû̌ nutôpwa̤ a ô̌nu. Ta̤we̤ta̤kè dǒ a sǎyṳ hî̌ bǎ lû̌ûnu, a ô̌ tocǒ.” 18Dě kli tôya ikǒdû̌ tôpwa̤ sûcû̌ lû̌û dǒ kli tôrǐ ikǒdû̌ nutôpwa̤ a ô̌ dě a hî̌ lû̌û kû̌, “Khûpò̌lǔ dǒ kòyò bè̌nṳ̌ lû̌û dǒ apô̤kû nutôpwa̤ kaǎ he dě a nosûcû̌ he kû̌ phijǎ pwa̤khûphû̌ hǒtôpwa̤ dǒ naô̌. A sǎyṳ hî̌bǎ kû̌ na, a ô̌ tocǒ, a hî̌ pô̤̌nu.”

19Kli tôrǐ ikǒdû̌ cî̌nṳ̌ lû̌û cǔde dě a kaǎcû̌ lû̌û dǒ gûlǎ̤ tûdû tôkû dě a gwè̌hǔ lû̌û kû̌, “Ta̤we̤ta̤kè dǒ na sǎyṳ hî̌ henu mǐtitè?”

20Dě a shôbǐǐ bǎ lû̌û kû̌, “Yǔdaphû̌ tokhlǒ sǎphlǒ sô̌sô̌ wô̤̌wô̤̌bò lû̌û kû̌ pe̤wô̤pěnu, asî gǔ jî̌ma̤ anǎ̤ pô̤̌ Yǔda kòyò htûdû̌htûpwǎ̤ tokhlǒ sǎyṳ sî̌ganǎ̤ mè̤̌ca Khûpò̌lǔ awe̤akè pě dě a nosûhè na kû̌ Khûpò̌lǔnu dǒ Yǔda kòyò htûdû̌ nutokhlǒ a ô̌ pě. 21Bǎbǎkǎlè cû̌ganǎ̤de tǎ̤ asîyô̤̌ ta̤mǎ̤ nî̌, ma̤titèmî̌ kòyò gǔ ô̌pǒ̤ ma̤sihǔ anu a ô̌ pwa̤lǐ̤shilǒ. Asî wṳ̂̌dòlò̤ ayô̤̌ tôpwa̤ kû̌ tôpwa̤ kû̌, asî kè̌ ma̤sinṳ̌ Khûpò̌lǔ nò̌khôtô̤̌nu, asî ǎô ta̤ tocǒ꤮ tô̤̌, a hî̌ lôkhô pô̤̌nu. Khònò̤̌ asî ô̌ tîwî̌tòwò nǎ bò anǎ̤ kû̌ a gǔ ma̤ lôkhô pô̤̌o akhû̌akhî, asî ô̌pǒ̤ ganǎ̤de pwǎ na ta̤hî̌ getîkhî shěshu hî̌tè nupwǎ.”

22Kli tôrǐ aikǒ nutôpwa̤ hî̌ lû̌û kû̌, “Na hî̌bǎ he ta̤we̤ta̤kè hǒtocǒ nu, cû̌shôbǐǐ tǎ̤ kòyò tôpwǎ̤꤮ ta̤mǎ̤ nî̌꤮.” A hî̌hto pô̤̌nu dě a plûgekè pwa̤khûphû̌ nutôpwa̤.

kòyò sûhtò̌ Khûpò̌lǔ dǒ khwǐdû̌ Běli̤ a ô̌

23Pô̤̌nu htodě, kli tôrǐ ikǒdû̌ kaǎhè kli tôya ikǒdû̌ sò̌ginǐ̤ dě a hî̌ asî kû̌, “No ô̌ tîwî̌tòwò nǎ kliphû̌ ginǐ̤ya, dě nocû̌ kû̌ pwa̤dò̌ tîsî̌ apwa̤ susô̌tôshi, kû̌ pwa̤pṳ̂̌ sòbò apwa̤ ginǐ̤yanu, dě hǒtôsa bǎ lǐ̤sô̌tanari bǎ pě akhanu, nohǎhtò̌cû̌ asî dǒ Wî̤̌kè̌sharǐ pě nî̌꤮. 24Tîwî̌tòwò nǎ bǎ tîsî̌ tokhlǒ dǒ Khûpò̌lǔ aya pě nî̌꤮, dě sûcû̌ mô̤mô̤bǎbǎ a dǒ khwǐdû̌ Běli̤ a ô̌ pě nî̌꤮, dě sûhǎplǎ cû̌gewô̌ a kû̌ pwa̤dǔdǎ lû̌û nutokhlǒ a cǔdekû nî̌꤮.”

25A hî̌ pô̤̌nu htodě, kli tôrǐ ikǒdû̌ nutôpwa̤ wě̤nṳ̌ lî̤ tôbǎ dě a hî̌cû̌ pô̤̌ dǒ alǎ̤nu kû̌,
26Pwa̤wě̤lî̤nu mî̌ he dǒ ami̤ kû̌ Khûklòdǐlusǐ. He wě̤cû̌ bǎ na dǒ a mî̌ Běcǎ khwǐdû̌ Běli̤. Na ô̌shû̌ô̌mô̤ pû nî̌꤮.
27Yǔdaphû̌ tokhlǒ pṳ̂̌ǐ kòyò tôpwa̤ dě a gǔ ma̤si lû̌û pě. Kòyò dǐsî̌ganǎ̤ he kû̌ a mî̌ Rṳ̂̌me̤ shiphû̌gǎphû̌ tôpwa̤ akhû̌akhî, he kaǎǐ he kliphû̌ tokhlǒ dě he cû̌ ma̤hǎplǎge yǎ pě. 28Asî cû̌bè̌ lû̌û ta̤sǔ kû̌ ta̤we̤ta̤kè hî̌tènu, he sǎyṳ sî̌ganǎ̤ akhû̌akhî, he sûcû̌ a dǒ asî Yǔdaphû̌ dǒ a htûdû̌htûpwǎ̤ tokhlǒ a ô̌. 29Ata̤sǔ dǒ a tǒ̤dǒ a tôbǎ sinu bǎbǎ, kòyò tôbǎ bè̌nṳ̌ yǎ dǒ apô̤kûnu bǎbǎ, he kè̌shǐ a ô̌ tocǒ tô̤̌. Kòyò bè̌htò̌ ta̤sǔ dǒ alô̤ khònò̤̌ numî̌, mè̤̌pwǎ asî ata̤sû̌ta̤tòwò tûû̌ nutokhlǒ pwǎ. 30Bǎ kòyò ǐsî̌ya he kû̌ Yǔdaphû̌ tokhlǒ cû̌hî̌bǎ ô̌plǒ kè̌khî lû̌û dě asî hî̌bǎ hǔsè̌ kè̌khî lû̌û kû̌ asî glè̌ ma̤si Khûpò̌lǔnu, he bè̌lò̤ he sǎphlǒ kû̌ he gǔ nosûcû̌ phwèkè a dǒ na ô̌ taplǎnô̤̌. Dě he hî̌tûû̌ kòyò dǒ a bè̌ lû̌û ta̤sǔnu tokhlǒ kû̌ a gǔ hè bè̌htò̌lṳ̌ Khûpò̌lǔ ata̤sǔ awe̤akè dǒ na lô̤mô̤̌ pě.

31Dě kliphû̌ tokhlǒ ma̤pô̤̌ kòyò no asînu. Dě asî kaǎnṳ̌ Khûpò̌lǔ dě a sûcû̌ tǒ̤ lû̌û dǒ Wî̤̌Atǐpatirǐ bǎnu tôsa. 32Dǒnô̌kò tôni̤nu, kliphû̌ dǒ a cû̌ kû̌ akhò̌lôpô̤̌ tokhlǒnu a getîkhî sô̌ dǒ kliphû̌ tokhlǒ lǎ̤ô̌ agûlǎ̤. Dě pô̤̌khô pwa̤dò̌ tîsî̌ tokhlǒ gǔ cû̌ sělě pô̤̌ kû̌ Khûpò̌lǔ dǒ alômô̤̌ tôkhô ayanu, a noô̌kè pwa̤dò̌ tîsî̌ tokhlǒ bǎnu. 33Asî cû̌ dǒ Wî̤̌kè̌sharǐ dě, a cû̌ǐ lî̤ nutôbǎ dǒ khwǐdû̌ cǔdekû dě asî sûhtò̌kè Khûpò̌lǔ dǒ khwǐdû̌ hǒtôpwa̤ a ô̌. 34Khwǐdû̌ dô̌bǎhto lî̤nu dě a gwè̌ Khûpò̌lǔ kû̌ a ô̌dǒ gǎbǎtè tôgǎ hè, dě bǎ a sî̌ganǎ̤ kû̌ Khûpò̌lǔ ô̌ dǒ Shilishiyagǎ hè akhanu, 35A hî̌ lû̌û kû̌, “Htû̌꤮ kòyò dǒ a bè̌ na ta̤sǔ nutokhlǒ kè̌ hètǒ̤ pě dě he ganǎ̤de kè̌kè̌ na ta̤hî̌bǎ pě.” Htodě, a hî̌lò̤ ayô̤̌ dǒ kliphû̌ tokhlǒ alô̤ kû̌ cû̌bè̌ Khûpò̌lǔ dǒ Khwǐherû ma̤htò̌ tûû̌ ahô nutômè akûnu, dě ô̌pǒ̤kè̌ǐ yǎnî̌꤮.