Act 24 | KxfSCKXF | STEP | Ô̌pô̤̌ yè̤̌ni̤ dě, pwa̤lṳhtò̌ ikǒdû̌ KhûAnanǐ kû̌ Yǔdaphû̌ mǒ̤khumǒ̤pwǎ̤ ikǒlǒkòdû̌to̤yobǎ tokhlǒ kaǎhèǐ kû̌ kòyò jòhî̌bǎ shigǎ a ta̤sû̌ǐtòwòǐ tôpwa̤ dǒ ami̤ kû̌ Khûterahtulǔsho, dě a hèlò̤ lôkhô dǒ Wî̤̌kè̌sharǐ. Asî hènṳ̌ dǒ khwǐdû̌ Běli̤ alô̤mô̤̌ dě a hèbè̌htò̌ Khûpò̌lǔ ta̤sǔ.

Acts 24

Yǔdaphû̌ pè̤̌wǎ̤ Khûpò̌lǔ ata̤sǔ dǒ khwǐdû̌ Běli̤ a lô̤mô̤̌

1 Ô̌pô̤̌ yè̤̌ni̤ dě, pwa̤lṳhtò̌ ikǒdû̌ KhûAnanǐ kû̌ Yǔdaphû̌ mǒ̤khumǒ̤pwǎ̤ ikǒlǒkòdû̌to̤yobǎ tokhlǒ kaǎhèǐ kû̌ kòyò jòhî̌bǎ shigǎ a ta̤sû̌ǐtòwòǐ tôpwa̤ dǒ ami̤ kû̌ Khûterahtulǔsho, dě a hèlò̤ lôkhô dǒ Wî̤̌kè̌sharǐ. Asî hènṳ̌ dǒ khwǐdû̌ Běli̤ alô̤mô̤̌ dě a hèbè̌htò̌ Khûpò̌lǔ ta̤sǔ. 2 Kòyò kaǎnṳ̌hto Khûpò̌lǔ dě Khûterahtulǔsho bè̌ Khûpò̌lǔ ta̤sǔ dě a hî̌ kû̌, “Khwǐdû̌ Běli̤, dǒ na pǒǐwô̌ ta̤ akhû̌akhî, pa nǐ̤bǎ yî̤̌꤮ ta̤pè̤̌ta̤dû hǒ. Htokhôtô̤̌ na kè̌shǐ nǎ ta̤ dǒ alô̤mô̤̌ akhû̌akhî, ta̤ dǒ a tô htû̌tèlè̌ tokhlǒnu na htû̌tèlè̌ htohǒ. 3 Na ma̤ta̤ tokhlǒ bǎtètûkû̌꤮ bǎbǎ, atô꤮ bò pa sǎphlǒ pṳ̂̌꤮ tûkû akhû̌akhî, pa hî̌bwǐhî̌sîrî mî̌ca na. 4 He sǎyṳ ma̤bòyî̤kè na ta̤shěta̤khǎ tô̤̌. Ma̤hî̌nudě he kwisǎyṳ na kû̌ na gǔ Khòsǎdô ganǎ̤de bǎ pa ta̤we̤ta̤kè hǒo. He shôbǐǐhtû bǎ nô̌ na tô̤̌.

5 “Pa sî̌ganǎ̤ kû̌ kòyò nutôpwa̤ mî̌ kòyò dǒ a cû̌ma̤dǐdò kòyò. Kòyò dǒ a ma̤ô̌htò̌bò ta̤shû̌shushû̌shǎ dǒ Yǔdaphû̌ tokhlǒ akla tǒ̤dǒ hǎkhû̌ tôběbò numî̌ a hǒ. A mî̌ Wî̤̌na̤sôrè̤̌phû̌ saprṳ̂ aikǒdû̌ tôpwa̤. 6 A cû̌ ma̤ phû̌mò̤̌shǐhtô pô̤̌ ta̤lṳhtò̌hô dě pa pṳ̂̌ yǎ pwǎ. (Pa hî̌lò̤phlǔ hto payô̤̌ kû̌ pa gǔ cî̌htò̌ a pô̤̌ pa ta̤sû̌ta̤tòwò ô̌nu hǒ. 7 Bǎbǎkǎlè, kli tôrǐ aikǒ Khûlǔsǐ jî̌pwǐ̤ hè cî̌hǎhtò̌kè lû̌û dǒ pa cǔdekû. 8 Htodě Khûlǔsǐ hî̌lò̤ ayô̤̌ kû̌ pa tô bè̌ Khûpò̌lǔ ta̤sǔ dǒ nalô̤mô̤̌.) ^{▼▼kòyò wě̤ lî̤bě bǎ nukha tokhlǒkhlǒ, lî̤plò̌shî̌ dǒ a ô̌ bǎ sôkômô sôkôbǐ akû tôshǒnu, kòyò kè̌shǐ padô̌kû̌ lû̌û tô̤̌.} na kè̌ gwè̌ kòyò tôpwa̤ numî̌, lǒ̤bò pa bè̌htò̌ ta̤sǔ dǒ alô̤ tokhlǒnu, na gǔ sî̌ganǎ̤bò tûû̌ pě.”

9 Hǒtaplǎdě, Yǔdaphû̌ tokhlǒ dě a bè̌bò ta̤sǔ dǒ Khûpò̌lǔ alô̤. Dě asî hî̌ lôkhô kû̌ lǒ̤bò a hî̌ tokhlǒ numî̌ a tô꤮ bò pwǎ.

Khûpò̌lǔ hî̌bǎ hǎplǎ anǎ̤ dǒ khwǐdû̌ Běli̤ alô̤mô̤

10 Bǎnuakha khwǐdû̌ nutôpwa̤ yṳ̂̌htò̌lṳ̌ acǔde dǒ Khûpò̌lǔ gǔ hî̌bǎ ta̤ dě Khûpò̌lǔ hî̌shěshu kû̌, “Na htû pwa̤cî̌htò̌ ta̤ dǒ kòyò khlilèphû̌ nutôcǒ akhû̌ mî̌ aněala yî̤gipi̤hǒ numî̌ he sî̌ganǎ̤ pwǎ. Pô̤̌nu akhû̌akhî, he gǔ hî̌bǎ hǎplǎ henǎ̤ dǒ na lô̤mô̤̌ pô̤̌o numî̌, he sǎlě̤sǎlò̤ mî̌ca. 11 He cû̌caba dǒ Wî̤̌yarǔshôle numî̌ aô̌mǒ̤pe shǐginǐ̤sa. Na kè̌ kè̌lǎsî̌ya kû̌ nanǎ̤ numî̌ anǐ̤ pwǎ. 12 Yǔdaphû̌ tokhlǒ a kè̌shǐ nô̌ he cû̌gè̌gô kû̌ kòyò dǒ ta̤lṳhtò̌hô akûnu tôpwǎ̤꤮ tô̤̌, he cû̌ma̤ pwî̤nǎ̤sǎgô̌ kòyò saprṳ̂ dǒ ta̤cabahǐkûnu bǎbǎ, gûlǎ̤ dǒ ashǔshawa dǒ wî̤̌kûnu bǎbǎ, asî kè̌shǐ nô̌ taplǎ tô̤̌. 13 Tǒ̤ hǒonu mè̤̌bǎtô̤̌ asî bè̌ta̤sǔ dǒ helô̤ khònò̤̌ tokhlǒnumî̌, asî hè bè̌ he ta̤sǔ nî̌ anè̌lṳ̌bò̌ kû̌ a tônu a ô̌ tocǒ꤮ tô̤̌. 14 Bǎbǎkǎlè, he olò̤ kû̌ he cubucabahtò̌ pa mǒ̤phaphiphu dǒ awǐkhanu tokhlǒ a Cǒmara, dě kè̌ dǒ he gû̌ kû̌ klè̌ dǒ Běcǎ dǔlè̌lṳ̌ nudě asî hî̌ lô̌khô he kû̌ he yṳ̌ǎna̤ǎ sǔ ta̤hǒ, a hî̌ lô̌khô pô̤̌nu. Lǒ̤꤮ bò Khûmṳ̂shě a ta̤sû̌ta̤tòwò dǒ a wě̤nǎ wǐ tokhlǒnu kû̌ lǒ̤꤮ bò piwi̤pèshè alî̤ tokhlǒnu, he yṳ̌ǎ bò pwǎpwǎ. 15 He ta̤kè̌shuǐ dǒ Cǒmara akû numî̌ asô̌sô̌ asî nupwǎ. He yṳ̌ǎ kè̌shuǐ kû̌ kòyò cǒtè̤, kòyò cǒtè̤tô̤̌ bǎbǎ, a gǔ ihtǒ htûpwa̤ getîkhî bòsô̌ pě. 16 Pô̤̌khô he sǎphlǒ a ta̤gènè̤ nî̌ a gǔ mṳ̂̌plî dǒ Cǒmara kû̌ kòyòhǎkhû̌phû̌ alô̤mô̤̌nu, he jî̌pwǐ̤ ma̤ta̤ awô̌ gutṳ̌nu pṳ̂̌꤮ plǎplǎ.

17 “He cû̌ ô̌ tepheyî̤kè kû̌ Wî̤̌yarǔshôle dǒ aněně, alalakûhǒ, dě dǒnô̌kònu, pô̤̌khô he gǔ cû̌sû bǎ he khlilèphû̌ sanǎ̤ tokhlǒ aru, htokhôtô̤̌ pô̤̌khô he gǔ lṳhtò̌tòhtò̌ ta̤ bǎnu aya nudě, he getîkhî sô̌ bǎ Wî̤̌yarǔshôle nupwǎ. ^b 18 Bǎ he lṳhtò̌ ta̤ dǒ ta̤lṳhtò̌hôkû akhanu, asî kè̌shǐ he. He ma̤ htophlǔwô̌bǎ ta̤ma̤mṳ̂̌plîhtò̌ henǎ̤ pô̤̌ ta̤cubucaba lǎ̤bû̌lǎ̤klô ô̌ nupwǎ. Dě he ma̤mṳ̂̌plî hto henǎ̤ dě, dǒnô̌kònu he ma̤ shû̌shushû̌shǎ sǎkhěkhû̌khwè kòyò tocǒ꤮ tô̤̌. Bǎ he kòshǐnu kòyò ô̌pwǎ tôpwa̤ nô̤̌ pwǎ, kòyò saprṳ̂ ô̌ nô̌ bǎ tô̤̌. 19 Bǎbǎkǎlè Yǔdaphû̌ dǒ a ô̌ dǒ Ashǎgǎ tokhlǒ hènṳ̌ ô̌bǎnu tokhlǒ. Asî kè̌ sǎyṳ bè̌ he ta̤sǔ hî̌dě a tô hètǒ̤ kû̌ anǎ̤ dǒ naô̌, dě a tô bè̌lṳ̌htò̌ ta̤we̤ta̤kè nutokhlǒ. 20 Kè̌mè̤̌tô̤̌dě bǎ he ihtǒô̌ dǒ Yǔda kòyò htûdû̌htûpwǎ̤ tokhlǒ alô̤mô̤̌ akhanu, kòyò bǒo tokhlǒ tô hî̌lṳ̌htò̌ lôkhô lǒ̤꤮ bò he ta̤sǔ dǒ a kè̌shǐ nutokhlǒ. 21 Ta̤sǔ kè̌ ô̌ numî̌ a ô̌pwǎtǒ̤ he ihtǒô̌ dǒ asîlô̤mô̤ dě he yî̤̌kǒhtò̌ kû̌, ‘sî cî̌htò̌ he hǒtôni̤ numî̌ dǒ he yṳ̌ǎ kû̌ kòyò dǒ a si tokhlǒ ihtǒ htûpwa̤ getîkhî pě, hǒtômû akhû̌akhî pwǎ,’” Khûpò̌lǔ hî̌ bǎ lû̌û pô̤̌nu. ^c

22 Htodě khwǐdû̌ Běli̤ dǒ a sî̌ganǎ̤ hto wô̌wô̌bǎbǎ klè̌ dǒ Běcǎ dǔlè̌lṳ̌ nudě, a bè̌ gutṳ̌kè ta̤gwè̌kè̌bǎǐ hǒo dě a hî̌ kû̌, “Htû̌꤮ kli tôrǐ ikǒdû̌ Khûlǔsǐ hètǒ̤ akhapenu, he gǔ cî̌htò̌ bǎ sî ta̤we̤ta̤kè hǒtocǒ pě,” a hî̌ asî pô̤̌nu. 23 Dě a hî̌lò̤ ayô̤̌ dǒ kli tôya ikǒdû̌ nutôpwa̤ a ô̌ kû̌, ô̌pǒ̤wô̌ Khûpò̌lǔnu nî̌, bǎbǎkǎlè plû cû̌htôcû̌lò̤ bǎ shû̌lě tûû̌ a jû̌꤮ asǎphlǒ sǎyṳma̤nu tokhlǒkhlǒ nî̌꤮. Asû̌akhô tokhlǒ gǔ hèkè̌hèǐ lû̌û ta̤ dǒ a lǎ̤lṳ̂ tokhlǒ kè̌hî̌dě plû bǎ yǎ nî̌꤮.

Khûpò̌lǔ ô̌ dǒ khwǐdû̌ Běli̤ kû̌ ama Mǒ̤drǔsǐla lô̤mô̤̌

24 Dǒnô̌kò suni̤lǐ̤ni̤nu, khwǐdû̌ Běli̤ kû̌ ama mǒ̤drǔsǐla dǒ Yǔdamǒ̤ hǒtôpwa̤ hè dě a nocû̌ kaǎ kòyò kû̌ Khûpò̌lǔ dě a ganǎ̤dekè̌ Khûpò̌lǔ hî̌bǎ lû̌û kû̌ ta̤yṳ̌ǎnǎ̤ǎ Yeshǔ Khrǐ awe̤akè. 25 Dě bǎ Khûpò̌lǔ hî̌bǎ pô̤̌ lû̌û kû̌ ta̤cǒtè̤, ta̤khòǐ anǎ̤ kû̌ ta̤cî̌htò̌ alṳmṳ̌ni̤ dǒ a gǔ hè pě awe̤akè akhanu, khwǐdû̌ Běli̤ ǐsha dě a hî̌ lû̌û kû̌, “Hǒtôplǎ dě na ge anǐ̤ hǒ. He ta̤shěta̤khǎ kè̌ ô̌ pě hî̌dě, he gǔ kaǎhèpô̤̌ sô̌ na pě.” 26 Pô̤̌nu akhû̌akhî, a mǎhè sǎlala Khûpò̌lǔ dǒ a gǔ hèhî̌bǎ kû̌ lû̌û, ma̤titèmî̌ a kè̌shuǐ kû̌ tôni̤ni̤ pěnu, Khûpò̌lǔ gǔ ǐ lû̌û ru pě a gènè̤ pô̤̌nu.

27 A tûlû̌ hèkè ginǐ̤ně htodě, Khûpòkibesôtǔ htûhtò̌ khwǐdû̌ dǒ Běli̤ agûlǎ̤, dě khwǐdû̌ Běli̤ sǎyṳ mǐ̤sǎô̌ kû̌ dǒ Yǔdaphû̌ tokhlǒ alô̤mô̤̌ akhû̌akhî, a dǒlò̤tě̤ tû̌ Khûpò̌lǔ dǒ apô̤kû.