Acts 25

Khûpò̌lǔ kwi cû̌ dǒ Rṳ̂̌me̤ khwǐdû̌ a ô̌

1Khwǐdû̌ Pòkibesôtǔ hètǒ̤ bǎ gǎ nutôgǎ akû dě a be suni̤ hǒ, a ô̌ bǎ Wî̤̌kè̌sharǐnu dě a cû̌ dǒ Wî̤̌yarǔshôle. 2Pwa̤lṳhtò̌ ikǒlǒkò tokhlǒ kû̌ Yǔdaphû̌ a ikǒdû̌ tokhlǒ hè bè̌lṳ̌htò̌ Khûpò̌lǔ ta̤sǔ tokhlǒ dǒ khwǐdû̌ pòkibesôtǔ a ô̌. 3Asî kwisǎyṳ khwǐdû̌ pòkibesôtǔ kû̌ a gǔ ma̤bwǐma̤sîrî bǎ asî dě asî sǎyṳ kû̌ khwǐdû̌ pòkibesôtǔ gǔ nosûhè kòyò kû̌ Khûpò̌lǔ dě agǔ sûhè bǎ asî dǒ Wî̤̌yarǔshôle, ma̤titè̌hî̌dě asî gǔ ma̤si Khûpò̌lǔ dǒ klè̌lô̤ nupě. 4Khwǐdû̌ Pòkibesôtǔ hî̌shěshu kû̌, “Kòyò dǒlò̤tě̤ Khûpò̌lǔ dǒ Wî̤̌kè̌sharǐ, dě hî̌pě nî̌ he gǔ cû̌ bǎnu pě. 5Dě nocû̌ padô̌ sî kòyòdû̌ tokhlǒ kû̌ he dǒ Wî̤̌kè̌sharǐ pě nî̌꤮, dě kè̌ Khûpò̌lǔ ma̤mè̤̌mî̌ca ta̤sǔ dǒ kòyò tô cî̌htò̌ a pě hî̌dě, sî kòyòdû̌ tokhlǒ gǔ bè̌htò̌lṳ̌ a ta̤sǔ pěmî̌ anǐ̤ pwǎ.”

6Khwǐdû̌ Pòkibesôtǔ ô̌ pô̤̌ bǎ Yarǔshôle wî̤̌nu ani̤lǐ̤sô̌, tô̤̌mî̌ ni̤shǐ bǎnu tûkû dě a lò̤ dǒ Wî̤̌kè̌sharǐ pě. Anô̌kò tôni̤ dě a hǎnòò̌ dǒ pwa̤cî̌htò̌tôta̤ agûlǎ̤ akhû̌ dě a hî̌lò̤ ayô̤̌ kû̌mî̌ kòyò gǔ sûhènṳ̌ Khûpò̌lǔ dǒ a ô̌. 7Bǎ Khûpò̌lǔ hètǒ̤ akhanu, Yǔdaphû̌ dǒ a ô̌ bǎ Wî̤̌yarǔshôle dě a hè tokhlǒnu a hè ihtǒô̌ te̤we̤ bò Khûpò̌lǔ. Dě asî hèbè̌htò̌ dû̌wî̤ ta̤sǔ dǒ adû̌ayô̤̌ tokhlǒ bǎbǎkǎlè asî hè pè̤̌wǎ̤ lû̌û ta̤sǔ tokhlǒnu, atô tocǒ꤮ tô̤̌.

8Pô̤̌nudě Khûpò̌lǔ hî̌bǎ hǎplǎ anǎ̤ kû̌, “Ta̤sǔ dǒ a ma̤pò̌ma̤kè Yǔdaphû̌ a ta̤sû̌ta̤tòwò tokhlǒ bǎbǎ, ta̤lṳhtò̌hônu bǎbǎ, htodě Rṳ̂̌me̤ akhwǐdû̌ bǎbǎ he ma̤bǎ tocǒ꤮ tô̤̌.”

9Khwǐdû̌ Pòkibesôtǔ sǎyṳ kè̌dû̌ Yǔdaphû̌ tokhlǒ akhû̌akhîdě, a gwè̌ Khûpò̌lǔ kû̌, “Kè̌ cû̌ cî̌htò̌ bǎ na ta̤we̤ta̤kènu dǒ Yarǔshôle dǒ he lô̤mô̤̌ numî̌, na sǎphlǒ ô̌ ya?”

10Dě Khûpò̌lǔ hî̌shěshu a kû̌, “Khònò̤̌dě he ihtǒô̌hto dǒ khwǐdû̌ lǎ̤cî̌htò̌ agûlǎ̤ hǒ. Hǒomî̌ gûlǎ̤ dǒ tôbǎ cî̌htò̌ gwè̌lǎ henu hǒ. Pô̤̌ na sî̌ganǎ̤ wô̌bǎ htotûû̌ hǒ, he ma̤sǔbǎ Yǔdaphû̌ tokhlǒ tocǒ꤮ tô̤̌. 11Kè̌ he ma̤sǔ tûlû̌ Yǔdaphû̌ tokhlǒ a ta̤sû̌ta̤tòwò dǒ a tô kû̌ ta̤cî̌htò̌ si he tocǒcǒ hî̌dě, he kwisǎyṳ bǎ sî kû̌ dǒ sî gǔ plû htûpwa̤ he mè̤̌bǎtô̤̌. Bǎbǎkǎlè asî ata̤dǔlè̌lṳ̌htò̌ he ta̤sǔ tokhlǒnu, kè̌ a tôtô̤̌ hî̌dě kòyò bè̌lò̤tě̤jò he dǒ Yǔdaphû̌ tokhlǒ a cǔdekû tôpwa̤ tô̤̌. Pô̤̌khô kòyò gǔ cî̌htò̌ he dě he kwi cû̌ kòyò dǒ kòyò glè̌ sûcû̌ he dǒ Rṳ̂̌me̤ khwǐdû̌ a ô̌.”

12Khwǐdû̌ Pòkibesôtǔ kû̌ kòsî̌jò̌ta̤ tokhlǒ hî̌bǎ wô̤̌wô̤̌lû̌û dě a hî̌shěshu Khûpò̌lǔ kû̌, “Na kwi kòyò dǒ kò gǔ sûcû̌ na dǒ khwǐdû̌ Kè̌sa ô̌ akhû̌akhî, na gǔ cû̌ bǎ dǒ a ô̌ pě.”

Khûpò̌lǔ hè hî̌bǎ ta̤ dǒ khwǐdû̌ Akrǐpa kû̌ apṳ̌ Mǒ̤benǐke alô̤mô̤̌

13Dǒ nô̌kò suni̤lǐ̤ni̤nu dě khwǐdû̌ Akrǐpa kû̌ apṳ̌ Mǒ̤benǐke hètǒ̤ dǒ Wî̤̌kè̌sharǐ dǒ a gǔ hè ô̌lè kû̌ khwǐdû̌ pòkibesôtǔ dě a gǔ hè ô̌lè dǔlè̌lṳ̌ lû̌û kû̌ a ta̤hî̌mô̤hî̌wô̌ tokhlǒ. 14Asî cû̌ô̌ yî̤gipi̤ bǎnu hǒ dě khwǐdû̌ pòkibesôtǔ shôbǐǐ bǎ khwǐdû̌ Akrǐpa kû̌ Khûpò̌lǔ awe̤akè. Dě a hî̌ kû̌, “Khwǐdû̌ Běli̤ dǒlò̤tě̤kè kòyò dǒ apô̤kû tôpwa̤. 15Dě bǎ he hè dǒ Wî̤̌yarǔshôle akhanu, Yǔdaphû̌ pwa̤lṳhtò̌ ikǒdû̌ tokhlǒ kû̌ Yǔdaphû̌ mǒ̤khumǒ̤pwǎ̤ dǒ a htû ikǒlǒkò tokhlǒ hè bè̌lṳ̌htò̌ ata̤sǔ dě a nocî̌htò̌ kû̌ he.

16“Bǎbǎkǎlè he shôbǐǐ asî kû̌ pa Rṳ̂̌me̤phû̌ tokhlǒ a lǎ̤bû̌lǎ̤klô ô̌ kû̌, bǎ kòyò ǐlò̤ pwa̤ ma̤sǔ shigǎ ta̤sû̌ta̤tòwò tôpwa̤pwa̤ dǒ kò cǔdekû nò̌khôtô̤̌nu, a tô nǐ̤bǎ akhwè dǒ kòyò gǔ ganǎ̤de kò bè̌ a ta̤sǔ dǒ alô̤, htodě bǎ ǐ yǎ akhwè dǒ a bǎ hî̌bǎ hǎplǎ anǎ̤ kû̌ ta̤sǔ dǒ kòyò bè̌ alô̤nu tokhlǒ. 17Pô̤̌nu akhû̌akhî, bǎ asî hètǒ̤ bǎ Wî̤̌kè̌sharǐ akû akhanu, he cî̌htû pe bǎ asî lṳmṳ̌ni̤ tô̤̌. Anô̌khîkò tôni̤ dě he hǎnòò̌ dǒ lǎ̤cî̌htò̌ agûlǎ̤ dě he no kaǎhènṳ̌ kòyò nutôpwa̤ dǒ he lô̤mô̤̌. 18Kòyò hè bè̌ Khûpò̌lǔ ta̤sǔ tokhlǒ ihtǒ lôkhô dě bè̌htò̌lṳ̌ bò ata̤sǔ tokhlǒ. Dě asî glè̌ yṳ̂̌ Khûpò̌lǔ ta̤sǔ kû̌ a ma̤sǔ shigǎ a ta̤sû̌ta̤tòwò ô̌ pe ya he gènè̤, taplǎnô̤̌ asî pè̤̌wǎ̤ lû̌û ta̤sǔ tokhlǒnu, a ma̤sǔ shigǎ a ta̤sû̌ta̤tòwònu a ô̌pa tocǒ꤮ tô̤̌. 19Asî htè̌ shěshu sô̌ lû̌û kû̌ asî ata̤cubucaba nutokhlǒ kû̌ kòyò dǒ ami̤ kû̌ Yeshǔ dǒ a sihto nutôpwa̤ awe̤akè pwǎ, taplǎnô̤̌ Khûpò̌lǔ hî̌shěshu kû̌ a ô̌ htûpwa̤ pepwǎnu. 20Pô̤̌khô he gǔ sǎganǎ̤ dû̌htò̌pô̤̌ ta̤we̤ta̤kè nutokhlǒ dě, he tôbǎ ma̤pô̤̌hî̌tènu he hî̌phlôbò̌ bǎ pe asî tô̤̌ akhû̌akhî, he gwè̌ Khûpò̌lǔ kû̌ mî̌ na sǎphlǒ ô̌ cû̌ dǒ Wî̤̌yarǔshôle dě na sǎyṳ nogwè̌lǎ kòyò ta̤we̤ta̤kè nutokhlǒ kû̌ nanǎ̤ ya? He gwè̌ yǎ pô̤̌nu. 21Bǎbǎkǎlè Khûpò̌lǔ kwi ô̌yṳ̂̌ kûmṳ̂̌ dě a sǎyṳ nocî̌htò̌ ta̤we̤ta̤kènu kû̌ khwǐdû̌ Kè̌sa. Pô̤̌nu akhû̌akhî, he nolò̤ he kliphû̌ tokhlǒ gǔ ô̌pǒ̤ yǎ tǒ̤dǒ pa sûcû̌ tǒ̤bò̌ hto yǎ dǒ khwǐdû̌ Kè̌sa a ô̌,” khwǐdû̌ pòkibesôtǔ hî̌ pô̤̌nu.

22Khwǐdû̌ Akrǐpa hî̌shěshu khwǐdû̌ pòkibesôtǔ kû̌, “He sǎyṳ ganǎ̤dekû̌ kòyò nutôpwa̤ a ta̤hî̌bǎ kû̌ henǎ̤ sanǎ̤.”

Dě khwǐdû̌ pòkibesôtǔ hî̌shěshu yǎ kû̌, “Kè̌ hî̌pô̤̌nu dě pe̤wô̤pě nu na gǔ ganǎ̤de bǎ tû̌pě.”

23Dǒnô̌kò tôni̤nu, khwǐdû̌ Akrǐpa kû̌ apṳ̌ Mǒ̤benǐke hè dě a kûsô̌ hènṳ̌ jehǐyò̤̌wî̤ dǒ a plò̌kishǐ tokhlǒ dě a hènṳ̌ wô̤̌wô̤̌ kû̌ kli ikolǒkò kû̌ kòyòdû̌kòyòhtû bǎ wî̤̌kû nutokhlǒ dǒ kòyò lǎ̤ô̌kǔ hî̌bǎplǒ lû̌û agûlǎ̤ tûkû. Khwǐdû̌ pòkibesôtǔ nokaǎnṳ̌ Khûpò̌lǔ kû̌ kòyò dǒ akû. 24Dě khwǐdû̌ Pòkibesôtǔ hî̌ kû̌, “Khwǐdû̌ Akrǐpa kû̌ kòyò dǒ a ô̌ bǒo lǒ̤꤮ bò sî꤮, sî kè̌shǐhto kòyò hǒtôpwa̤ hǒ. Lǒ̤꤮ bò Yǔdaphû̌ dǒ a ô̌ bǒo tokhlǒnu bǎbǎ, a ô̌ dǒ Wî̤̌yarǔshôle akû nutokhlǒ bǎbǎ, a hè kwisǎyṳ he kû̌ kòyò hǒtôpwa̤ awe̤akè. Asî kaǎgǔhtò̌ lôkhô kû̌ kòyò hǒtôpwa̤ bǎ tô ô̌htûpwa̤ petô̤̌, a hî̌ lôkhô pô̤̌nu. 25Bǎbǎkǎlè, a ma̤ ta̤sǔ dǒ tô cî̌htò̌ sikè anu he kè̌shǐ tocǒ꤮ tô̤̌. Anǎ̤ běcǎ sanǎ̤ kwi tûû̌ kû̌ a sǎyṳ nocî̌htò̌ sanǎ̤ kû̌ khwǐdû̌ Kè̌sa akhû̌akhî, he bè̌lò̤ he sǎphlǒ kû̌ he gǔ sûlò̤ a pwǎ. 26Bǎbǎkǎlè, ta̤we̤ta̤kè dǒ he gǔ wě̤lṳ̌htò̌ mè̤̌ca dǒ khwǐdû̌ ô̌nu, a ô̌ tocǒ꤮ tô̤̌. Pô̤̌nu akhû̌akhî, he nokaǎhè kòyò kû̌ a dǒ sî lǒ̤꤮ bò alô̤mô̤̌ hǒ. A lǎ̤lṳ̂gutṳ̌ numî̌ he gǔ nohè lû̌û dǒ khwǐdû̌ Akrǐpa, na lô̤mô̤̌ hǒ. Htû̌꤮ pa gwè̌ hto a pě mî̌ he wě̤htò̌lṳ̌ nô̌ ta̤we̤ta̤kè pě, pô̤̌nupwǎ. 27Ma̤titèmî̌ kò dǒlò̤tě̤ kòyò dǒ apô̤kû tôpwa̤nu, he kè̌ hî̌lṳ̌ phlôhtò̌ mè̤̌ca tîkhî ta̤sǔ dǒ kòyò yò̤̌ǎ lû̌û nutokhlǒ tô̤̌ hî̌dě he kè̌ nosûcû̌ lû̌û dǒ khwǐdû̌ ô̌ hî̌nu, a sô̌sô̌ kû̌ atôabǎ tô̤̌,” khwǐdû̌ Pòkibesôtǔ hî̌ pô̤̌nu.