Acts 27

Khûpò̌lǔ htò̌dò̌ sǒkhlidû̌ dě hǎhtò̌cû̌ dǒ Wî̤̌rṳ̂̌me̤

1Bǎ kò hî̌phlǔhî̌hto ayô̤̌ dǒ pa bǎ htò̌dò̌ sǒkhlidû̌ dě bǎ hǎhtò̌cû̌ dǒ Italigǎ akha, Khûpò̌lǔ kû̌ kòyò ashǔshawa dǒ kòyò dǒlò̤tě̤ asî dǒ apô̤kû tokhlǒnu, kòyò ǐlò̤kè asî dǒ Khûjuliyashô a cǔdekû. Khûjuliyashô mî̌ kli tôya aikǒ tôpwa̤. A mî̌ a ô̌ pa kû̌ Rṳ̂̌me̤ kliphû̌ dǒ a ô̌ apwa̤ tôrǐ tôprṳ̂, dě kòyò kaǎ kû̌ “Òkashata akli saprṳ̂dû̌.” 2Sǒkhlidû̌ tôbǎ a ô̌ dǒ Wî̤̌adrèmǔte dě a hè. Dě a gǔ hǎhtò̌cû̌ dǒ wî̤̌ bǎ a ô̌ shidû̌shite̤we̤htu dǒ Ashǎgǎkû tokhlǒ dě pa htò̌dò̌ yǎ. Kòyò mi̤ kû̌ Khûarǐshataku dǒ a ô̌ bǎ Wî̤̌tîsalònǐ, dǒ Mèsidûnǐ̤yagǎ a ta̤pǒalǎ̤ ô̌ tôpwa̤ dě a cû̌ kû̌ pa.

3Nô̌kò tôni̤nu, pa cû̌ dǒ Wî̤̌shǐdṳ̂ pě. Khûjuliyashô gwèbǎǐ Khûpò̌lǔ. Dě pô̤̌khô a khô tokhlǒ gǔ ǐpè̤̌ lû̌û ta̤ dǒ a lǎ̤lṳ̂ tokhlǒnu dě a plûcû̌ ô̌lè kû̌ lû̌û dǒ a khô tokhlǒ a ô̌. 4Pa ô̌bǎnu hǎhtò̌cû̌ dě gili̤sǎ htò̌hèshǔ pa akhû̌akhî, pa cû̌ ô̌tûdûbǐkè kû̌ Kuprǔ shikho dǒ lô̤̌khi tôgǎ. 5Pa cû̌ tûlû̌kè Shilishiyagǎ kû̌ Phaphǔliyagǎ a shidû̌shite̤we̤ dě pa cû̌tǒ̤ dǒ Wî̤̌mǔra, Lusiya gǎkûnu. 6Bǎnukha kli tôya aikǒdû̌ nutôpwa̤ kè̌shǐ sǒkhlidû̌ ô̌ dǒ Wî̤̌Alè̌shadriya hè dě a gǔ cû̌ dǒ Italigǎ tôbǎ, dě a nohtò̌dò̌ cû̌ pa kû̌ sǒkhlidû̌ nutôbǎ. 7A cû̌yo shû̌lě bǎ pa dě yî̤ dû̌ gǔ gǔ hǒ dě dǒnô̌kònu pa cû̌tǒ̤ pò̤̌yǎ̤pò̤̌sha dǒ gûlǎ̤ tûkû, bǎ aphǔ kû̌ Wî̤̌kanidǔnu. Gili̤sǎ sǎshû̌ bǎ pa dě pa cû̌ sělě jòpetô̤̌ akhû̌akhî, pa cû̌ tûdû dǒ Grete shikho lô̤̌kò tôkhô. Krete shikhonu a ô̌ tôtǐcû̌ kû̌ Shalamûne shikho nutôkû. 8Pa cû̌꤮kû̌ shidû̌ shite̤we̤htunu apò̤̌asha shû̌lě bǎ pa. Dě pa hètǒ̤ dǒ gûlǎ̤ tûkû dǒ kòyò kaǎ lû̌û kû̌ lǎ̤ô̌kǔ gûlǎ̤mô̤nu tûkû. Gûlǎ̤nu a ô̌phǔ kû̌ Wî̤̌lasǐya.

9Pa cû̌nu, alṳmṳ̌ni̤ yî̤ dû̌ gǔ gǔ hǒ akhû̌akhî pa kè̌ cû̌ sělě pô̤̌ dǒ alô̤mô̤nu ta̤pò̤̌ta̤sha ô̌htò̌ jò pě, ma̤titèmî̌, ta̤plûkè ta̤sǔ pwènu alṳmṳ̌ni̤ tûlû̌kèhǒ akhû̌akhî Khûpò̌lǔ dǐsè̌rè̌ asî dě a hî̌ kû̌, 10“Khôbǒsû̌ sî꤮, he kè̌shǐ kû̌ kè̌ pa hǎhtò̌cû̌ hî̌nu, sahtò̌ bǒo hènè tǒ̤dǒ lômô̤̌ nupěmî̌ ta̤pî̌ta̤lṳ̂̌ gǔ ô̌htò̌ pě, dě ta̤lò̤jû̌lò̤pwe̤ gǔ ô̌htò̌ dû̌wî̤ pě. Pa gǔ lò̤jû̌lò̤pwe̤ pwǎtǒ̤ sǒkhlidû̌ kû̌ ta̤kî̌ta̤krû̌ ô̌ dǒ sǒkhlidû̌kû nutokhlǒ nô̤̌ bǎtô̤̌. Pa ta̤htûpwa̤ tokhlǒ gǔ lò̤jû̌lò̤pwe̤kè pepe.” 11Bǎbǎkǎlè kli tôya aikǒ nutôpwa̤ nî̌ a ganǎ̤de Khûpò̌lǔ ayô̤̌ tô̤̌. A ganǎ̤de pwǎtǒ̤ sǒkhlidû̌ a ikǒdû̌ tôpwa̤ kû̌ sǒkhlidû̌ aběcǎ yô̤̌ nô̤̌pwǎ. 12Htû̌꤮ gǎwô̤̌kha hètǒ̤pěnu, lǎ̤bè̌ô̌kǔ sǒkhlidû̌ gûlǎ̤ bǒo numî̌ a lò̤tě̤tôbǎ tô̤̌. Asî sǎphlǒtô dû̌khlo kû̌ hǎhtò̌cû̌ kè bǒo dě jî̌pwǐ̤ cû̌ bò̌ dǒ Wî̤̌bûnǐ nu, htû̌ gǎwô̤̌kha pěnu cû̌ô̌kǔkûmṳ̂̌ bǎnu pě. Wî̤̌bûnǐ mî̌ sǒkhlidû̌ bǎ Gretehtu nutokhlǒ lǎ̤geô̌kǔ tûdûwô̌ agûlǎ̤. Wî̤̌nu, a ô̌ tôtǐ dǒ lṳmṳ̌nṳ̌ lô̤̌kò kû̌ lṳmṳ̌nṳ̌ lô̤̌khi tôkhô.

Gili̤sǎdû̌ lò̤ dǒ shidû̌shite̤we̤ akû

13Gǎ sahtò̌ sǎ sǎdôsǎdô hè dǒ lô̤̌kò tôkhô dě kòyò tokhlǒ gènè̤ lôkhô kû̌ hǒtaplǎmî̌, kè̌ hǎhtò̌cû̌ mò̌mî̌ anǐ̤ pwǎkǎ a gènè̤ lôkhô pô̤̌nu, dě asî cî̌htò̌ lǒ̤ dǒ kòyò lǎ̤ma̤ ô̌kǔ kû̌ sǒkhlidû̌nu ▼

▼lǎ̤ma̤ô̌kǔ sǒkhlidû̌

dě a plûcû̌kè sǒkhlidû̌ dǒ Greteshikho nutôkhô. 14Bǎbǎkǎlè ayî̤khôtô̤̌, gili̤sǎhèshû̌ dǒ kòyò kaǎ lû̌û kû̌ “Lṳmṳ̌htò̌ lô̤̌khi gili̤sǎ” nu a ô̌ dǒ shikhokhû̌ tôkhô dě a hètô dǒ asî ô̌. 15Gili̤sǎ hè htû̌ sǒkhlidû̌ dě asî bôpè̤̌ pe a sǒkhlidû̌ aikǒ tô̤̌ akhû̌akhî, pa plû htò̌cû̌kè yǎ kû̌ gili̤sǎ. 16Bǎ pa cû̌tûdûkè kû̌ Kòde khokhû̌ pî̌tî̌ tôkû akhanu, pô̤̌khô a sǒkhliphû̌ dǒ sǒkhlidû̌ cî̌cû̌ ǐyǎ nutôbǎ glè̌ hǎphò̌kè tô̤̌nu, pa jî̌pwǐ̤ cî̌cû̌ yǎ dǒ ta̤pò̤̌ta̤sha akû. 17Asî cî̌htò̌nṳ̌ sǒkhliphû̌ nutôbǎ dǒ sǒkhlidû̌ akû, htodě pô̤̌khô sǒkhlidû̌ nutôbǎ glè̌ hǎphò̌kè tô̤̌nu, asî phî̌ sǒpli̤dû̌ dě a comě te̤we̤ kû̌ sǒkhlidû̌. Ǐsha kû̌ sǒkhlidû̌nu lûcû̌ dèmè̤̌ ô̌tò̤̌kè dǒ Shuhtǐsô hǎsè̌khû̌ nudě, asî cî̌lò̤tě̤kè sǒkhlidû̌ a gò̌pwǐpṳdû̌ lǎ̤plûhtǒ kû̌ gili̤sǎnu dě a plû lûcû̌kè sǒkhlidû̌nu, jû̌꤮ gili̤sǎ htò̌cû̌ a pô̤̌nu pwǎ. 18Gili̤shû̌ gili̤sho pe akhû̌akhî, anô̌kò tôni̤nu asî tě̤lò̤tě̤kè ta̤kî̌ta̤krû̌ dǒ sǒkhlidû̌kû tokhlǒ dǒ shikû. 19Dǒnô̌kòpô̤̌ tôni̤nu, asî anǎ̤běcǎ tě̤lò̤tě̤kè pô̤̌ sǒkhlidû̌ tě̤ta̤ tokhlǒ dǒ shikûkû. 20Lṳmṳ̌ bǎbǎ, shǎ bǎbǎ, pa kè̌shǐ petô̤̌nu, alṳmṳ̌ni̤ yî̤ dû̌ gǔ gǔ hǒ, gili̤sǎ hèshû̌lě dě pa ta̤kè̌shuǐ dǒ pa lǎ̤hǎplǎnu a ô̌ petô̤̌.

21Bǎ kòyò nutokhlǒ ǎbǎôbǎ petô̤̌ yî̤hǒ akhanu, Khûpò̌lǔ ihtǒ dǒ asî lô̤mô̤̌ dě a hî̌ asî kû̌, “Khôbǒsû̌ sî꤮ bǎ pa ô̌ dǒ Grete shikho akhanu, sî tô hǎhtò̌cû̌ tô̤̌ he hî̌ sî akhanu, sî tô ganǎ̤de heyô̤̌. Sî kè̌ ganǎ̤de mò̌ heyô̤̌ dě, sî gǔpî̌gǔlṳ̂̌, gǔ lò̤jû̌lò̤pwe̤ bòkè pô̤̌nutô̤̌. 22Bǎbǎkǎlè khònò̤̌ he kwisǎyṳ sî, bè̌shû̌bè̌sho lôkhô sî sǎphlǒ, sî ta̤htûpwa̤ tôbǎ lò̤jû̌kè tôpwǎ̤꤮ tô̤̌. A gǔ pî̌kè pwǎtǒ̤ sǒkhlidû̌ hǒtôbǎ nô̤̌ pwǎ. 23Ma̤titèmî̌, khò̌tôsa, Cǒmara dǒ he htû ata dě he ma̤ ata̤ma̤ nutôpwa̤ a mǒkhû̌ tanaphû̌ hè ihtǒô̌ dǒ he kòshǐ, 24Dě a hî̌ he kû̌, ‘Khûpò̌lǔ꤮, ǐsha ta̤mǎ̤. Na bǎ hè ihtǒ bò̌ sanǎ̤ dǒ khwǐdû̌ Kè̌sa alô̤mô̤̌ pě, dě a gǔ cî̌htò̌ gwè̌khû̌gwè̌kò tûû̌ na pě. Cǒmara kè̌ namǐ̤sǎ dě a ma̤bwǐma̤sîrî na akhû̌akhî, a gǔ ma̤hǎplǎ na kû̌ kòyò dǒ a htò̌dò̌ kû̌ na sǒkhlidû̌ nutokhlǒ lǒ̤꤮ bò pě.’ 25Pô̤̌nu akhû̌akhî, khô sî꤮, bè̌sho lôkhô sî sǎphlǒ nî̌꤮, ma̤titèmî̌ he yṳ̌ǎ Cǒmara nutôpwa̤ kû̌ a gǔ ma̤pô̤̌khô a hî̌ hto he nupě. 26Ama̤hî̌tètè̌꤮ bǎbǎ, gili̤sǎnu glè̌sǒcû̌ pa dǒ shikho tômèmè akhû̌ pě.”

27Bǎ shǐlǐ̤sa tôsanu, gili̤sǎdû̌ a sǒcû̌ pa dǒ Atarǐya shidû̌shite̤we̤nu akû. Atô kû̌ lṳmṳ̌klama glè̌ phǔ akhanu, pwa̤ma̤ta̤phû̌ dǒ sǒkhlidû̌ akû tokhlǒ sî̌ganǎ̤ kû̌ a sô̌sô̌ kû̌ a lûcû̌phǔ kû̌ hǎkhû̌ tûkûkû hǒ. 28Pô̤̌nu akhû̌akhî, asî tèkè̌kè̌bǎ shinu dě a yô̤̌pe akhli ginǐ̤shi, dě ô̌ pô̤̌ tòshò̌phû̌nu asî tèkè̌bǎsô̌ shi dě a ô̌pwǎ akhli shǐyè̤̌ nô̤̌ pwǎ. 29Asî gû̌gè̌ kû̌mî̌ a ǐsha kû̌ sǒkhlidû̌ cû̌tô̤̌bǎ kû̌ lǒ̤ dě a jolò̤tě̤ lǒ̤ lǎ̤ma̤ô̌kǔ sǒkhlidû̌ lǐ̤mè dǒ shikû dě asî kwicaba lôkhô kû̌ lṳmṳ̌ gǔ lî phwè bǎ asî. 30Pwa̤ma̤ta̤phû̌ dǒ sǒkhlidû̌kû tokhlǒ kè̌lǎ lôkhô klè̌ dǒ a gǔ khlè̌hǎplǎ aya dě asî bè̌lò̤ sǒkhliphû̌ notôbǎ dǒ shikû dě a bè̌lò̤ khô̌ lôkhô lǎ̤ma̤ô̌kǔ sǒkhli nutokhlǒ dǒ shikû dǒ sǒkhlidû̌nu alô̤mô̤. 31Dě Khûpò̌lǔ hî̌ kli tôya aikǒdû̌ tôpwa̤ kû̌ kliphû̌ tokhlǒ kû̌ pwa̤ma̤ta̤phû̌ dǒ sǒkhlidû̌kû tokhlǒ kû̌, “Sî kè̌ ô̌ lô̌khô dǒ sǒkhlidû̌ akû tô̤̌ numî̌ sî hǎplǎjò tôpwa̤꤮ tô̤̌.” 32Pô̤̌nu akhû̌akhî, kliphû̌ tokhlǒ pě̤tṳ̌kè sǒpli̤ dǒ kòyò comě kû̌ sǒkhliphû̌ nutôbǎ tokhlǒ dě a plû cû̌kè sǒkhliphû̌nu.

33Lṳmṳ̌ gǔ lîhǒ akhanu, Khûpò̌lǔ kwisǎyṳ bò asî kû̌ a glè̌ǎô sô̌ lôkhô, “Khònò̤̌dě sî sòklò shǐlǐ̤sa hǒ, dě sîǎsîô bǎ tocǒ tô̤̌. 34Pô̤̌nudě, he kwisǎyṳ sî kû̌ sî gǔǎgǔô lôkhô shǎǎ tocǒcǒ. Pô̤̌khô sî gǔ htûpwa̤ lô̌khônu, sî lǎ̤lṳ̂ǎ lôkhô shǎ. Khǔlṳ tôbô dǒ sî ikǒlô̤ pwǎnu a bǎ hǎmǎkè tôbô̌꤮ tô̤̌.” 35Khûpò̌lǔ hî̌hto asî pô̤̌o dě, a phî̌ mû̌ dě a hî̌bwǐhî̌sîrî Cǒmara dǒ asî lǒ̤꤮ bò alô̤mô̤̌. Htodě a běphwǐ mû̌ dě a ǎ lôkhô. 36Pô̤̌nudě asî sǎphlǒshû̌ sǎphlǒsho getîkhî bò sô̌ dě a ǎ bòsô̌ shǎ pṳ̂̌꤮ tôpwa̤. 37Kòyò ô̌ dǒ sǒkhlidû̌ akû lǒ̤꤮ bò numî̌ a ô̌ ginǐ̤ya kû̌ susô̌tôshi kû̌ pwa̤ susô̌. 38Kòyò ǎkǒôbe htobò shǎ pṳ̂̌꤮ tôpwa̤ dě pô̤̌khô sǒkhlidû̌ gǔ phihtò̌ ayanu, asî tě̤lò̤tě̤kèbò bǔjû̌ tokhlǒ dǒ shidû̌shite̤we̤ akû.

Sǒkhlidû̌ hǎpò̌kè

39Bǎ lṳmṳ̌lî akhanu, asî kè̌shǐ lṳ̌ hǎkhû̌ taplǎnô̤̌ asî cû̌tǒ̤tô bǎtè tûkûnu a sî̌ganǎ̤ lôkhô tô̤̌. Bǎbǎkǎlè asî kè̌shǐ shidû̌shite̤we̤ ategwe ô̌tûkû akhû̌akhî, asî kè̌ cû̌tǒ̤jò bǎnu mî̌, a sǎyṳcû̌ bè̌ô̌kǔ lô̌khô a sǒkhlidû̌ bǎnu. 40Pô̤̌nu akhû̌akhî asî pě̤tṳ̌kè sǒpli̤ dǒ kòyò comě kû̌ lǒ̤ lǎ̤ma̤ô̌kǔ sǒkhlidû̌ nutokhlǒ htodě a plû lò̤yṳ̂ kè bò lǒ̤ tokhlǒ dǒ shidû̌shite̤we̤kû. Taplǎnô̤̌ asî bôphlǔ sǒpli̤ dǒ kòyò comě kû̌ lǎ̤plû sǒkhlidû̌ nutokhlǒ. Htodě asî cî̌tadǎhtò̌ gò̌pwǐpṳdû̌ dǒ sǒkhlidû̌ lô̤mô̤̌ tôkhô dě asî plûhtò̌cû̌ kû̌ gili̤sǎ dǒ shihtu tôkhô. 41Bǎbǎkǎlè sǒkhlidû̌ htò̌ô̌tò̤̌ dǒ hǎsè̌khû̌ tôkû. Sǒkhlidû̌ aikǒ shǒlò̤ shutuklǔ dě a guyṳ̌ bò̌petô̤̌. Dǒ sǒkhlidû̌ lǎ̤wǎ̤ tôkhônu, shipěpǒ plǎ̤shû̌ tûlû̌shû̌lě dě a hǎphò̌kè.

42Hî̌pěmî̌ lǒ̤bò kòyò dǒ kò dǒlò̤tě̤ asî dǒ apô̤kû tokhlǒ gòyò̤̌htò̌ bò dǒ khokhû̌ dě hǎhtò̌ khlè̌ hǎplǎ cû̌kè bò hè̌, kliphû̌ tokhlǒ a gènè̤ dě, asî bè̌lò̤ lôkhô asǎphlǒ kû̌ a gǔ ma̤sikè bò asî. 43Bǎbǎkǎlè kli tôya a ikǒdû̌ a sǎyṳ ma̤hǎplǎ Khûpò̌lǔ akhû̌akhî, a hî̌ dǐdòtě̤tṳ kliphû̌ tokhlǒ kû̌ a gǔ ma̤si asî tôpwǎ̤꤮ tô̤̌. Pô̤̌nu akhû̌akhî a hî̌lò̤ ayô̤̌ kû̌ kòyò dǒ a gòyò̤̌jò shi tokhlǒnu pě̤tě̤ wǐmò̌ dǒ shikûnu dě gòyò̤̌ cû̌wǐ mò̌ dǒ khokhû̌nu. 44Kòyò dǒ a ô̌kè tokhlǒnu, htò̌dò̌nǐ̤ sǒbě tokhlǒ, tô̤̌mî̌ htò̌dò̌nǐ̤ lôkhô sǒkhlidû̌ hǎphò̌ kô̌kǔkô̌ke tokhlǒ dě gû̌ gòyò̤htò̌ kû̌ lô̌khô. Dě asî ma̤ bò lô̌khô pô̤̌ a hî̌ nudě asî hǎhtò̌tǒ̤ wô̌wô̌bǎbǎ bò dǒ khokhû̌ pṳ̂̌꤮ tôpwa̤.