Act 28 | KxfSCKXF | STEP | Bǎ pa htò̌tǒ̤ wô̌wô̌bǎbǎ hto dǒ khokhû̌ akhanu, kòyò hî̌lṳ̌ bǎ pa kû̌ shikho nutôkû mî̌ kòyò kaǎ kû̌ Mè̌lata̤ shikhokhû̌.

Acts 28

Cû̌tǒ̤ dǒ Mè̌lata̤ shikhokhû̌

1 Bǎ pa htò̌tǒ̤ wô̌wô̌bǎbǎ hto dǒ khokhû̌ akhanu, kòyò hî̌lṳ̌ bǎ pa kû̌ shikho nutôkû mî̌ kòyò kaǎ kû̌ Mè̌lata̤ shikhokhû̌. 2 Kòyò ô̌ bǎ shikhokhû̌ tokhlǒnu, a kaǎmô̤bǎ pa. Gǎju hè dě gǎwô̤̌ jî̌jî̌ pa akhû̌akhî, asî shû̌gè̌mî̌ dě a kaǎ ushǔ lôkhô pa mî̌. 3 Khûpò̌lǔ cû̌ phî̌ge kû̌ tôhu dě a ge shǔnṳ̌ dǒ mî̌kû akhanu, mî̌khǔ gû̌u wṳ̂̌sa tôbô dě a hǎhtò̌ pè̌ Khûpò̌lǔ dě a pakî̌mě dǒ acǔdelô̤. 4 Kòyò ô̌ bǎnu tokhlǒ kè̌shǐ wṳ̂̌ pakî̌mě dǒ Khûpò̌lǔ cǔdelô̤ dě a hî̌ kè̌khîlû̌û tôpwa̤ kû̌ tôpwa̤ pô̤̌o, “Kòyò hǒtôpwa̤ mî̌ pwa̤ma̤si kòyò pwǎ. A hǎplǎ kû̌ ta̤si dǒ shidû̌tawe̤kû bǎbǎkǎlè Běcǎ dǒ kòyò kaǎ kû̌ ta̤tě̤ta̤mè̤̌ nutôpwa̤ dǐ ô̌htûpwa̤ pe yǎ tô̤̌.” 5 Bǎbǎkǎlè Khûpò̌lǔ tuphlǔ lò̤tě̤nṳ̌kè wṳ̂̌ dǒ mî̌kû, dě a ma̤ lû̌û tocǒ꤮ tô̤̌. 6 Asî ô̌pǒ̤ kè̌ lô̌khô kû̌ Khûpò̌lǔ anǎ̤ bǎyô̌hè pě. Asî ô̌pǒ̤ yî̤ lû̌û bǎbǎkǎlè a kè̌shǐ awè htò̌ lû̌û tocǒ꤮ tô̤̌ akhû̌akhî, asî gènè̤ khô̌kè Khûpò̌lǔ kû̌ a mî̌ Cǒmara aphû̌ tôpwa̤pwa̤ pwǎ.

7 Gûlǎ̤ te̤we̤lû̌ ô̌phǔ bǎnutûkû mî̌, klǔ pûkǎ Khûpǔpaliya a we̤ ô̌ tôwe̤. Dě a kaǎ mô̤shǔ wô̌bǎ pa, dě pacû̌htû shǐtèmè̤ suni̤susa. 8 Khûpǔpaliya apha nǎ̤gû̌ dě a sha lû̌û hǐphu akhû̌akhî a hǎmôô̌ dǒ lǎ̤mi̤kû pwǎ. Dě Khûpò̌lǔ nṳ̌ dǒ a hǐdǒkû dě, a nṳ̌ kwicaba bǎ lû̌û, dě a bè̌htò̌ acǔde dǒ lû̌lô̤ dě a ma̤hǎmǎ bǎ lû̌û. 9 Pô̤̌nu akhû̌akhî, lǒ̤꤮ bò kòyòshǐ kòyòsha ô̌ bǎ shikhokhû̌ nutokhlǒ hè ma̤hǎmǎ lô̌khô anǎ̤ dǒ Khûpò̌lǔ ô̌. 10 Asî ǐdû̌wî̤ pa sû tokhlǒ, dě bǎ pa htò̌dò̌ sǒkhlidû̌ akhanu, asî dò̌cû̌nṳ̌ bǎ pa lǎ̤ǎlǎ̤ô dǒ klè̌lô̤ aya tokhlǒ.

Khûpò̌lǔ ô̌ dǒ shikho Mè̌lata̤ dě hǎhtò̌cû̌ dǒ Wî̤̌rṳ̂̌me̤

11 Behtò̌ sula dě dǒ nô̌kònu, pa htò̌dò̌ Wî̤̌alè̌shadriya a sǒkhlidû̌ tôbǎ. Dǒ sǒkhlidû̌ a ikǒ alô̤mô̤̌nu Běcǎ ata̤yô̤ ô̌ sègwè̌. Dě sǒkhlidû̌nu a cû̌ ô̌kǔ dǒ gǎwô̤̌kha bǎ shikho nutôkû alô̤. 12 Pa cû̌tǒ̤ dǒ Wî̤̌shurakǔ dě pa cû̌ ô̌ bǎnu suni̤. 13 Pa ô̌ bǎnu dě pa hǎhtò̌cû̌ pô̤̌ dǒ Wî̤̌rěki. Htodě dǒ nô̌kò tôni̤nu, gili̤sǎ dû̌hè dǒ lô̤̌kò tôkhô dě ginǐ̤ni̤tôni̤nu pa cû̌tǒ̤ dǒ Wî̤̌pò̌tilǔ. 14 Pa kè̌shǐ shěshu kû̌ ta̤dòkûphû̌ bǎnu tokhlǒ, dě asî kaǎ ô̌sô̌ pô̤̌ pa bǎnu susô̌tôni̤. Pa ô̌kè hto bǎnu dě pa hǎhtò̌cû̌kè dǒ Wî̤̌rṳ̂̌me̤. 15 Pa pṳ̌wè̤̌ ta̤dòkûphû̌ dǒ a ô̌ bǎ Wî̤̌rṳ̂̌me̤ akû tokhlǒnu, a ganǎ̤de lô̌khô pawe̤pakè dě a hè kè̌shǐ shěshu pa dǒ Wî̤̌Apǐya klǎkûnu, tokhlǒkhlǒdě a hè kè̌shǐ shěshu pa dǒ shǐtè̤mè̤ hǐnu sumè akû. Bǎ Khûpò̌lǔ kè̌shǐ asî akhanu, a nǐ̤khû̌nǐ̤ǎ lû̌û dě a hî̌bwǐhî̌sîrî Cǒmara.

Dǒ Wî̤̌rṳ̂̌me̤ akû

16 Bǎ pa cû̌tǒ̤ dǒ Wî̤̌rṳ̂̌me̤ akû akhanu, kòyò noô̌ pwǎ Khûpò̌lǔ nô̤̌ dě kòyò cû̌ khò̌ô̌ bǎ a hǐtômè dě kliphû̌ tôpwa̤ ô̌pǒ̤ ǐ yǎ.

17 Susa be hǒnu, Khûpò̌lǔ kaǎplǒ Yǔdaphû̌ dǒ a htû a ikǒlǒkò bǎ Wî̤̌rṳ̂̌me̤ nutokhlǒ. Bǎ asî hètǒ̤ bò akhanu, a hî̌ asî kû̌, “He pṳ̌wè̤̌ sî꤮, ta̤ma̤ ma̤takǎshěshu pa kòyò khlilèphû̌ tokhlǒ bǎbǎ, mè̤̌tô̤̌dě ta̤ dǒ a khô̌ kû̌ pa lǎ̤bû̌lǎ̤klô dǒ pa nǐ̤bǎ dǒ pa mǒ̤phaphiphu dǒ awǐnu tokhlǒ a ô̌nu bǎbǎ, he ma̤nô̌ bǎ tocǒ tô̤̌. Bǎbǎkǎlè kòyò pṳ̂̌ he dǒ Wî̤̌yarǔshôle akû dě kòyò ǐlò̤kè he dǒ Rṳ̂̌me̤phû̌ tokhlǒ a cǔdekû. 18 Rṳ̂̌me̤phû̌sî gwè̌kè̌kè̌ hto he dě dǒnô̌kònu, asî kè̌shǐ he ta̤sǔ dǒ atô kû̌ bǎ cî̌htò̌ sikènu a ô̌ tocǒ꤮ tô̤̌ akhû̌akhî, asî sǎyṳ plûkè he. 19 Bǎbǎkǎlè bǎ Yǔdaphû̌ tokhlǒ htè̌shěshu ta̤ akhanu, he tôbǎ nocî̌htò̌ henǎ̤ kû̌ khwǐdû̌ Kèsha he gènè̤ pô̤̌nu. He bè̌ he kòyò khlilèphû̌ alô̤ ta̤sǔnu a ô̌ nô̌ tocǒ꤮ tô̤̌. ^a 20 Dǒ ta̤we̤ta̤kè hǒo akhû̌akhîdě, he kwi asî dǒ a gǔ dǐkè̌shǐ hî̌bǎ ta̤ kû̌ sî. Kè̌hî̌kû̌mî̌ dǒ sî Yǔdaphû̌ nutokhlǒ a ta̤kè̌shuǐ akhû̌akhîdě kòyò bǎ coměkè he kû̌ sǒpli̤tè̤glè nuhǒ.”

21 Dě asî hî̌shěshu lû̌û kû̌, “Pa nǐ̤bǎ lî̤ ô̌ dǒ Yǔdagǎ hè dě a shôbǐǐ bǎ pa kû̌ nawe̤nakènu a ô̌ tôbǎ꤮ tô̤̌. Pa pṳ̌wè̤̌ Yǔdaphû̌ dǒ a hè bǒo tokhlǒnu, a hî̌nô̌ bǎ pa kû̌ na ma̤sǔma̤plěta̤ awe̤akè tôpwǎ̤꤮ tô̤̌. 22 Bǎbǎkǎlè pa sǎyṳ ganǎ̤de na ta̤kè̌shǐ kû̌ na ta̤gènè̤ tokhlǒ pwǎ, ma̤titè̌hî̌dě, pa sî̌ganǎ̤ kû̌ kòyò bǎtè꤮ tûkû bǎbǎ a hî̌ takǎbò kòyò nutôprṳ̂ pwǎ.”

23 Pô̤̌nudě asî hî̌ lû̌û alṳmṳ̌ni̤ dǒ a gǔ kè̌shǐ shěshu sô̌ kû̌ Khûpò̌lǔ dě bǎ asî hî̌ lû̌û nutini̤nu, Yǔdaphû̌ tokhlǒ hè lô̌khô bǎ Khûpò̌lǔ ô̌ tûû̌ hǐ nutômè akû, dě asî hè dû̌khlo kû̌ dǒ awǐkha nutôplǎ dě Khûpò̌lǔ sahtò̌ shôbǐǐlṳ̌ bǎ asî kû̌ Cǒmara ashiagǎ awe̤akè dě a khòlṳ̌ anǎ̤ dǒ lṳmṳ̌lî tǒ̤dǒ lṳmṳ̌khǐ pô̤̌khô asî gǔ yṳ̌ǎ Yeshǔ awe̤akè ayanudě, a jî̌pwǐ̤ shôbǐǐphlô bǎ asî kû̌ Khûmṳ̂shě a ta̤sû̌ta̤tòwò nutokhlǒ kû̌ piwi̤pèshè hî̌nǎ nutokhlǒ. 24 Tokhlǒkhlǒ dě a yṳ̌ǎ lô̌khô kû̌ Khûpò̌lǔ hî̌ tokhlǒ nu mî̌ a mè̤̌mî̌ca bǎbǎkǎlè tokhlǒkhlǒnu a yṳ̌ǎ tô̤̌. 25 Bǎ asî sǎphlǒ lûkhô̌ kè lû̌û dě asî hǎhtò̌cû̌kè akhanu, Khûpò̌lǔ hî̌bǎ ayô̤̌ dǒnô̌kòlǒ tômû kû̌, “Yôla Plò̌shǐ Běcǎ hî̌bǎ tutṳ̌ kû̌ piwi̤pèshè Khûyashǎya dě a shôbǐǐ pa mǒ̤phaphiphu dǒ꤮ awǐnu tokhlǒ numî̌ a tôtǐ pwǎ. 26 Dě a hî̌ kû̌,

‘cû̌ dǒ kòyò khlilèphû̌ nutômṳ̌tocǒ a ô̌ dě hî̌ asî kû̌, “Sî ganǎ̤de hto ganǎ̤de sô̌sô̌ bǎbǎkǎlè sî sî̌ganǎ̤phlôtô̤̌. Sî kè̌shǐhto kè̌shǐsô̌ bǎbǎkǎlè sî kè̌shǐtô̤̌.” ^b 27 Ma̤titèhî̌dě kòyò hǒtômṳ̌tocǒnu, a sǎyṳ sî̌ganǎ̤ gû̌ kòyò tô̤̌. Asî ma̤bǐ lô̌khô a nò̌kukû, htodě a ma̤bǐ lô̌khô a mǐ̤sǎphlǒ. Kè̌mè̤̌tô̤̌dě, asî gǔ kè̌shǐ gû̌ lô̌khô ta̤ kû̌ a mǐ̤sǎphlǒ, dě asî gǔ ganǎ̤de gû̌ lô̌khô ta̤ kû̌ anò̌ku, asî gǔ gènè̤phlô hè lô̌khô dě a gǔ htû̌tiwǐ getîkhîtô lô̌khô anǎ̤ dǒ he ô̌, dě he gǔ ma̤hǎmǎ bǎ asî.’” ^cA hî̌ pô̤̌nu.

28 Khûpò̌lǔ hî̌ pô̤̌ kû̌, “Pô̤̌nu akhû̌akhî sî tôbǎ sî̌ganǎ̤ lô̌khô kû̌, Cǒmara a ta̤ma̤hǎplǎge awe̤akènu, kòyò gǔ sûcû̌ lû̌û dǒ Yǔdaphû̌ mè̤̌tô̤̌ tokhlǒ a ô̌ hǒ, dě Yǔdaphû̌ mè̤̌tô̤̌ tokhlǒ gǔ ganǎ̤de lû̌û pě.” 29 (Khûpò̌lǔ hî̌hto ta̤ pô̤̌o dě, Yǔdaphû̌ tokhlǒ hǎhtò̌cû̌kè dě asî cû̌ htè̌ kè̌khî lû̌û.) ^{▼▼kòyò wě̤ lî̤phě dǒ akòshî̌lǒ tokhlǒ akûnu, tokhlǒkhlǒdě aphû̌pî̌tî̌ 29 nu a ô̌ pa tô̤̌.}

30 Khûpò̌lǔ ô̌ bǎ hǐ dǒ a cû̌ khò̌ô̌ hǐnu ginǐ̤ně hǒ dě a kaǎmô̤shǔ lǒ̤꤮ bò kòyò dǒ a hè ô̌lè kû̌ lû̌û nutokhlǒ. 31 Khûpò̌lǔ shôbǐǐlṳ̌ bǎ kòyò kû̌ Cǒmara ashiagǎ awe̤akè, dě a sû̌ǐtòwòǐlò̤ bǎ kòyò kû̌ Běcǎ Yeshǔ Khrǐ awe̤akè. Htodě a hî̌bǎkhuhe dě kòyò ma̤tě̤tṳ̌ amî̌ a ô̌ tôpwǎ̤꤮ tô̤̌.