Acts 3
Khûpetarǔ kû̌ Khûyṳ̂ha ma̤hǎmǎ kòyò khò̌lôpô̤̌dě tôpwa̤
1Bǎtôni̤, lṳ̌mṳ̌lò̤ sunarî, kòyò tô kwicaba ashěkhǎnu, Khûpetarǔ kû̌ Khûyṳ̂ha cû̌htò̌ lô̌khô dǒ ta̤lṳhtò̌hô. 2Dě kòyò johè kòyò khò̌lôpô̤̌dě pe dǒ amǒ̤ hǐphukûnu tôpwa̤ dě kòyò hè bè̌ yǎ bǎ ta̤lṳhtò̌hô takha akòshî̌nu. Takhanu nî̌ kòyò kaǎ a kû̌ “Takhawî̤.” Ma̤pô̤̌ a gǔ kwinǐ̤ kò ru dǒ kòyò hènṳ̌ dǒ ta̤lṳhtò̌hôkû nutokhlǒ a ô̌ dě pṳ̂̌꤮ ni̤ni̤ kòyò johè bè̌ô̌ yǎ bǎnu. 3Bǎ a kè̌shǐ Khûpetarǔ kû̌ Khûyṳ̂ha glè̌ nṳ̌ dǒ ta̤lṳhtò̌hôkû akhanu, a kwisǎyṳ asî dǒ a gǔ ǐ lû̌û ta̤ tocǒcǒ. 4Dě asî kè̌lò̤ lû̌û dě Khûpetarǔ hî̌ lû̌û kû̌, “Kè̌htò̌tô dǒ paô̌ bǒo!” 5Dě a glè̌ nǐ̤bǎ ta̤ tocǒcǒ kǎlè a gènè̤ dě a kè̌htò̌tô Khûpetarǔ kû̌ Khûyṳ̂ha. 6Bǎbǎkǎlè Khûpetarǔ hî̌ lû̌û kû̌, “Heruhehta ô̌ tôbǎ tô̤̌, bǎbǎkǎlè ta̤ dǒ a ô̌ kû̌ henu, he gǔ ǐ na. Dǒ Wî̤̌na̤sôrè̤̌phû̌ Yeshǔ Khrǐ ami̤ dě a ô̌ kû̌ ta̤pô̤phǎ shû̌sho tôpwa̤ khû̌khîdě he hî̌ na, ihtǒ cû̌mò̌!” 7A hî̌hto pô̤̌nudě a pṳ̂̌ lû̌ cǔgô̌ a cǔtômû dě a cî̌ihtǒ lû̌û kû̌ taplǎnô̤̌ a khǎlǎ kû̌ khò̌shîdǐsî shû̌htò̌shohtò̌ bò sô̌. 8Dě a pě̤ ihtǒ dě a ihtǒ cû̌le̤cû̌ge htodě a cû̌nṳ̌ wô̤̌wô̤̌ kû̌ asî dǒ ta̤lṳhtò̌hô akû dě a cû̌le̤cû̌ge, pě̤khîsèkò dě htû̌sò̌htò̌ Cǒmara. 9Lǒ̤꤮ bò kòyò ô̌ bǎnu tokhlǒ kè̌shǐ bò a cû̌jònu kû̌ a ta̤sǎwǐ htû̌sò̌htò̌ Cǒmaranu tokhlǒ. 10Dě asî to̤ǐ lô̌khô lû̌û kû̌ a mî̌ kòyò hǎnòò̌ kwiǎ kòyò ru bǎ ta̤lṳhtò̌hô takhawî̤ kòshî̌ nutôpwa̤ pwǎ. Dǒ a cû̌jò sô̌ pô̤̌o akhû̌akhî, asî ǒò̌ kiti̤kaa bò pṳ̂̌꤮ tôpwa̤.Khûpetarǔ a ta̤shôbǐǐlṳ̌ dǒ ta̤lṳhtò̌hôkû
11Bǎ kòyò nutôpwa̤ pṳ̂̌měteglě Khûpetarǔ kû̌ Khûyṳ̂ha, bǎ gûlǎ̤ tûkû dǒ kòyò kaǎ kû̌ khûshò̌lômû hǐtolǒkhû̌ akhanu, kòyò bǎnu tokhlǒ ǒò̌ kiti̤kaa dě khlè̌hè lô̌khô dǒ asî ô̌. 12Khûpetarǔ kè̌shǐ asî dě a hî̌ asî kû̌, “He khô Isôrělaphû̌ sî꤮ sî cû̌ ǒò̌ kiti̤kaa lô̌khô ta̤ma̤ nutôcǒ alǎ̤ ma̤titè? Sî cû̌ kè̌ jonǒ̤jana̤ bò tǒ̤ pa ma̤titè? Kòyò nutôpwa̤ cû̌jò nu mî̌ sî gènè̤ lô̌khô kû̌ pa ma̤ bǎ a kû̌ pa ta̤siwi̤sòwò̤nu ya? Sî gènè̤ lô̌khô kû̌ pamî̌ kòyò plò̌shǐphû̌ tokhlǒ akhû̌akhî pô̤̌nu ya? 13PhaAbraha, PhaIsè̌ kû̌ Phaya̤kò tokhlǒ a Cǒmara kû̌ pa mǒ̤phaphiphu dǒ awǐnu tokhlǒ a Cǒmara dǔlè̌lṳ̌ hto a ta̤sîrîdû̌sîrîhtû kû̌ pwa̤ma̤ta̤phû̌ Yeshǔ nuhǒ. Bǎbǎkǎlè sî ǐlò̤kè a dǒ kòyò htûdû̌htûkhû̌ tokhlǒ a cǔdekû dě bǎ Khwǐpǐlǎ cî̌htò̌ hto a dǒ a gǔ plûhǎhtò̌kè lû̌û akhanu, sî jû gû̌ yǎ tô̤̌. Dǒ khwǐ nutôpwa̤ a mǐ̤sǎlô̤mô̤̌nu, sî htè̌bǐ kòyò pwǎ. a 14A mî̌ kòyòplò̌shǐ, kòyòcǒkòyòtè̤ tôpwa̤ bǎbǎkǎlè sî wîkè yǎ. Sî kwi Khwǐpǐlǎ kû̌, ‘khòsǎdô dě plûhǎhtò̌ bǎ pa pwa̤ ma̤si kòyò nutôpwa̤.’ b 15Sî ma̤sikèhto kòyò dǒ a ǐ kòyò ta̤htûpwa̤nu tôpwa̤ hǒ, bǎbǎkǎlè Cǒmara ma̤htûpwa̤ getîkhî sô̌ a dǒ ta̤si hǒ. Dě ta̤htûhtò̌ anǎ̤ pô̤̌o numî̌ pa kè̌shǐ hto kû̌ panǎ̤ hǒ. 16Sî kè̌shǐsî̌ya kû̌ kòyò khò̌lôpô̤̌dě tôpwa̤ numî̌ a yṳ̌ǎ Yeshǔ ami̤ akhû̌akhîdě a wô̌ tîkhî pwǎ. Pa sî̌ganǎ̤ kû̌ hǒo numî̌ dǒ a yṳ̌ǎ Yeshǔ akhû̌akhî, Yeshǔ ma̤wô̌ bòmǔtegle lû̌û pô̤̌ sî kè̌shǐ bò̌꤮ bò khònò̤̌ nuhǒ. 17“Pṳ̌wè̤̌ sî꤮, khònò̤̌dě, sî kû̌ sî ikǒlǒkòdû̌ ma̤si Yeshǔ numî̌, sî sî̌ganǎ̤ yô̤̌mṳ̂yô̤̌sǎ tô̤̌ akhû̌akhî, dě sî ma̤ a pwǎ. 18Cǒmara hî̌nǎ htobò ayô̤̌ kû̌ lǒ̤꤮ bò piwi̤pèshè tokhlǒ hǒ. Dě a hî̌nǎ bǎ asî kû̌ Khrǐ bǎ khòbǎ ta̤jî̌ta̤jû̌ pě. Dě a lǒhtò̌behtò̌ pô̤̌ a hî̌ nuhǒ. 19Pô̤̌khô Cǒmara gǔ plûkè sî ta̤sǔnu dě, yò̤lǎ̤plǎdî̌ lô̌khô sîsǎphlǒ dě htû̌lè̌ getîkhî sô̌ lô̌khô dǒ Cǒmara a ô̌. Sî kè̌ ma̤pô̤̌nu hî̌dě htǔ꤮ shěkhǎtô shěkhǎbǎ pěnu, Běcǎ Cǒmara gǔ ǐ sî ta̤khû̌ǎ pě. 20Dě a gǔ nohèlò̤ bǎ sî Yeshǔ mî̌ Me̤shǐya dǒ Cǒmara rû̌htò̌ bǎ hto dǒ sîya nu tôpwa̤ pě. 21Pô̤̌ Cǒmara ǐ sî̌ya nǎ hto kû̌ piwi̤pèshè aplò̌shǐ dǒwǐkha tokhlǒ kû̌ Yeshǔnu a tôbǎ ô̌ dǒ mǒkhû̌ tǒ̤dǒ Běcǎ Cǒmara ma̤sa bò sô̌ ta̤pṳ̂̌꤮ tocǒ akhanu pě. 22Ma̤titèhî̌dě Khûmṳ̂shě hî̌ kû̌, ‘pô̤̌ Cǒmara nohè henu, a gǔ nohèlò̤ piwi̤pèshè dǒ sî khlilè kla tôpwa̤ pě dě sî bǎ ganǎ̤de ayô̤̌ pṳ̂̌꤮ tômû pě. c 23Kòyò dǒ a ganǎ̤de piwi̤pèshè nutôpwa̤ alě̤ayô̤̌ tô̤̌ tokhlǒnu, Cǒmara gǔ bè̌tephekè asî kû̌ Cǒmara aphû̌ali̤ gûlǎ̤ pě, htokhôtô̤̌ a gǔ ma̤pî̌kè asî pě.’ d 24“Sahtò̌ dǒ piwi̤pèshè Shamuěla htukha tǒ̤dǒ lǒ̤꤮ bò piwi̤pèshè dǒ a shôbǐǐlṳ̌ Cǒmara awe̤akè dǒ nô̌kò tokhlǒ ahtukhanu, a shôbǐǐlṳ̌ nǎ hto bò ta̤ dǒ a gǔ htûhtò̌ khònò̤̌ htukha tokhlǒ awe̤akè hǒ. 25Cǒmara a ta̤olò̤wǎ̤lò̤ dǒ a no dǔlè̌lṳ̌lò̤ tutṳ̌ piwi̤pèshè sî tokhlǒ numî̌ sîya hǒ. Htokhôtô̤̌ Cǒmara olò̤ hto kû̌ sî mǒ̤phaphiphu dǒ awǐnu tokhlǒ nu mî̌ sîya hǒhǒ. Pô̤̌ Cǒmara shôbǐǐlṳ̌ nǎ hto PhaAbraha kû̌, ‘he gǔ ǐshowî̤ tutṳ̌ bò hǎkhû̌phû̌ nutokhlǒ lǒ̤bò kû̌ na khlilè gelò̤ nutôpwa̤ akhû̌khî pě.’ e 26Bǎ Cǒmara rû̌htò̌ pwa̤ma̤ta̤phû̌ Yeshǔ akhanu, a nohè wǐ lû̌û dǒ sî ô̌ hǒ. Pô̤̌khô a gǔ ǐshowî̤ sî dě a nohè lû̌û pô̤̌nu. Dǒ Cǒmara no htû̌tiwǐ̤ tèplè̌ sî kû̌ sî pṳ̂̌꤮ tôpwa̤ ata̤phû̌mò̤̌shǐhtô akhû̌akhî, a ǐshowî̤ sî hǒ.”
Copyright information for
KxfSCKXF