Acts 4

Kòyò dǒtě̤ Khûpetarǔ kû̌ Khûyṳ̂ha dǒ apô̤kû

1Bǎ Khûpetarǔ kû̌ Khûyṳ̂ha hî̌bǎpe kû̌ kòyò tokhlǒ akhanu, pwa̤shû̌gǎ tokhlǒ kû̌ pwa̤ô̌pǒ̤ ta̤lṳhtò̌hô ikǒdû̌ tôpwa̤ kû̌ Sadukè̌phû̌ tokhlǒ hètǒ̤ lô̌khô. 2Pwa̤nophû̌ nusò̌ginǐ̤ sû̌ǐtòwòǐ bǎ kòyò kû̌ Yeshǔ htûpwa̤ getîkhî sô̌ dǒ ta̤si dě a yṳ̂̌lṳ̌nè̌lṳ̌ bǎ bò kòyò kû̌ kòyòsi tokhlǒ gǔ htûpwa̤ getîkhî sô̌sô̌ pô̤̌nupě akhû̌akhî, asî nutokhlǒ sǎphlǒdû̌ kòyò nusò̌ginǐ̤. 3Dě asî pṳ̂̌ pwa̤nophû̌ nusò̌ginǐ̤ dě a dǒtě̤ asî dǒ apô̤kû. A pṳ̂̌ asî akhanu, lṳmṳ̌hǎlò̤hǒ akhû̌akhî, a dǒô̌ asî tǒ̤dǒ lṳmṳ̌lî. 4Bǎbǎkǎlè kòyò dǒ a ganǎ̤de asî ta̤shôbǐǐ tokhlǒnu, a yṳ̌nǐ̤nǎ̤nǐ̤ dû̌wî̤ Yeshǔ. Dô̌ còcè̌ pwǎ pwa̤khûdû̌ dǒ a yṳ̌ǎ Yeshǔ tokhlǒnu a phǔ꤮ ô̌ yè̤̌rî̌.

5A pṳ̂̌hto asî nô̌kò tôni̤nu, Yǔdaphû̌ a ikǒlǒkòdû̌ tokhlǒ kû̌ mǒ̤khumǒ̤pwǎ̤ dǒ a htû ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ hè ô̌plǒhî̌bǎcu kè̌shǐ kè̌khîlû̌û dǒ Wî̤̌yarǔshôle akû. 6Asî hè ô̌plǒhî̌bǎcu kè̌shǐ shěshu kû̌ pha Kayaphǎ, Khûyṳ̂ha, Khûalè̌sadru, pwa̤shû̌gǎ ikǒdû̌lǒ pha Anǎ kû̌ kòyò ashǔshawa̤ dǒ akhlialè kû̌ pwa̤shû̌gǎ ikǒdû̌lǒ nutôpwa̤ tokhlǒ. 7Asî no ihtǒ pwa̤nophû̌nu sò̌ginǐ̤ dǒ asî lô̤mô̤̌ dě a gwè̌ asî kû̌, “Sî ma̤wô̌ getîkhî sô̌ kòyò khò̌lôpô̤̌dě nutôpwa̤ hî̌tè? Sî ma̤pô̤̌o numî̌ sî ma̤ kû̌ mò̌pè a ta̤pô̤ta̤phǎ ya? Mè̤̌tô̤̌dě sî cû̌ noǎ mò̌pè ami̤ ya?”

8Khûpetarǔ lǒbehtò̌ kû̌ Yôla Plò̌shǐ Běcǎ dě a hî̌shěshu asî kû̌, “Pwa̤htûdû̌htûpwǎ̤ sî kû̌ mǒ̤khumǒ̤pwǎ̤ dǒ a htû ikǒlǒkòdû̌ sî꤮, 9Dǒ pa ma̤wô̌ getîkhî kòyò khò̌lôpô̤̌dě nutôpwa̤ akhû̌akhî, dě khò̌tini̤ sîsǐ sîgwè̌ pa pô̤̌nu ya? Pa ma̤hǎmǎkè lû̌û hî̌tè numî̌ sî sǎyṳ sî̌ganǎ̤ ya? 10Lǒ̤꤮ bò sî nutokhlǒ bǎbǎ, Isôrěla akhlialè lǒ̤꤮ bò bǎbǎ, a tô sî̌ganǎ̤ lô̌khô kû̌ kòyò khò̌lôpô̤̌dě nutôpwa̤ ihtǒ cû̌jò wô̌tîkhî sô̌ dǒ sî lô̤mô̤̌ khònò̤̌ numî̌, amè̤̌kû̌ Wî̤̌na̤sôrè̤̌phû̌ Yeshǔ Khrǐ ami̤ a ta̤pô̤ta̤phǎ akhû̌akhî pwǎ. Yeshǔ Khrǐ mî̌ sî ma̤sihtò̌ a dǒ nò̌dò̌htǔlô̤ nutôpwa̤ pwǎ, bǎbǎkǎlè Cǒmara ma̤htûpwa̤ getîkhî sô̌ a dǒ ta̤si hǒ. 11Yeshǔ mî̌,

‘a sô̌sô̌kû̌ lǒ̤ tômè dǒ sî bô̌htò̌ hǐ dě sî wîkè yǎ, bǎbǎkǎlè dǒnô̌kònu a htûhtò̌ lǒ̤ dǒ kòyò noǎ a dǒ hǐně̤ dǒ alǎ̤lṳ̂bǎdû̌lǒ tômè hǒ.’ ^a

12Kòyò dǒ a ma̤hǎplǎge jò pa mî̌ tǒ̤pwǎ Yeshǔ tôpwa̤ nô̤̌ pwǎ. Kòyò ashǔshawa̤ dǒ Cǒmara ǐ asî kû̌ a gǔ ma̤hǎplǎge pa ayanu, dǒ hǎkhû̌ tôbǎbò nu a ô̌ tôpwǎ̤꤮ tô̤̌.”

13Yǔdaphû̌ dǒ a htûdû̌htûpwǎ̤ tokhlǒnu, a kè̌shǐ kû̌ Khûpetarǔ kû̌ Khûyṳ̂ha sǎphlǒ khuhe dě a sî̌ganǎ̤ kû̌ asî mî̌ kòyò pwa̤wè̤ǎ hǔklaphû̌ pwǎ dǒ a jò̌lî̤jò̌lè kû̌ kòyòtô̤̌ akhû̌akhî, a ǒò̌ kiti̤kaa lô̌khô htokhôtô̤̌ asî sî̌ganǎ̤ pô̤̌ kû̌ Khûpetarǔ kû̌ Khûyṳ̂ha mî̌ kòyò dǒ a khô kû̌ Yeshǔ tokhlǒ. 14Bǎbǎkǎlè asî kè̌shǐ kû̌ kòyò dǒ akhò̌lôpô̤̌ wô̌tîkhî sô̌ nutôpwa̤ ihtǒ ô̌ bǎ Khûpetarǔ kû̌ Khûyṳ̂ha akòshî̌ akhû̌akhî, asî hî̌jò pe tocǒ꤮ tô̤̌. 15Htodě asî nohǎhtò̌cû̌ tephekè Khûpetarǔ kû̌ Khûyṳ̂ha dǒ pwa̤yṳ̌ǎ ta̤ô̌plǒhî̌bǎcu hǐdòkû̌ dě asî nutokhlǒ ô̌kǔ hî̌bǎ kè̌khî tûû̌ lû̌û. 16Asî gwè̌ kè̌khî lû̌û kû̌, “Pa tôbǎ ma̤ asî hî̌tè? Asî ma̤htûhtò̌ ta̤cô̌klǐcô̌sè hǒtokhlǒnu, lǒ̤bò kòyò ô̌ dǒ Wî̤̌yarǔshôle akû nutokhlǒ sî̌ganǎ̤ bò hǒ akhû̌akhî, pa gǔ hî̌ kû̌ amè̤̌tô̤̌nu a nǐ̤petô̤̌. 17Bǎbǎkǎlè, pô̤̌khô ta̤we̤ta̤kènu gǔ lṳ̌peshecû̌ dǒ kòyò saprṳ̂ akla tô̤̌ nu, pa bǎ hî̌ asî kû̌ bǎ shôbǐǐ kòyò kû̌ Yeshǔ ami̤ tôpwǎ̤꤮ tô̤̌.”

18Dě asî kaǎ genṳ̌ sô̌ Khûpetarǔ kû̌ Khûyṳ̂ha dě a hî̌ asî kû̌, “Yeshǔ ami̤ nî̌, sî bǎ hî̌ pe tô̤̌tô̤̌, sî bǎ sû̌ǐ pe kòyò tô̤̌tô̤̌.” 19Bǎbǎkǎlè Khûpetarǔ kû̌ Khûyṳ̂ha hî̌shěshu asî kû̌, “Mî̌ pa tôbǎ ganǎ̤de khlosîyô̤̌ ya? Mè̤̌tô̤̌dě pa tôbǎ ganǎ̤dekhlo dǒ Cǒmara ayô̤̌ yanu, gènè̤lò̤tû̌ lô̌khô sînǎ̤ dǒ Cǒmara a lô̤mô̤̌nu. 20Ma̤titèhî̌dě ta̤ dǒ pa kè̌shǐ ganǎ̤de hto tokhlǒnu pa kè̌ shôbǐǐlṳ̌ bǎ kòyò tô̤̌ hî̌nu, pa ô̌jò tô̤̌.”

21Pô̤̌nudě Yǔdaphû̌ dǒ a htû ikǒlǒkòdû̌ tokhlǒ lě̤ dǐsè̌rè̌ shû̌sho lǒkhlo pô̤̌ asî kû̌ dǒ awǐanô̌nu, htodě a plûgekè asî pwǎ. Asî sî̌ganǎ̤ kû̌ kòyò htû̌sò̌htò̌ bò Cǒmara kû̌ asî ma̤htûhtò̌ ta̤hǒo tokhlǒ akhû̌akhî, a gǔ cî̌htò̌ Khûpetarǔ kû̌ Khûyṳ̂ha hî̌tènu a gènè̤phlô lô̌khô tô̤̌. 22Kòyòpwa̤khû̌ dǒ kòyò ma̤hǎmǎ cô̌klǐcô̌sè yǎ tôpwa̤nu aně ô̌ lǐ̤shilǒ hǒ.

Pwa̤yṳ̌ǎta̤phû̌ tokhlǒ kwicaba Cǒmara dǒ a gǔ ǐ lû̌û sǎphlǒ ata̤khuhe.

23Bǎ kòyò plûhtò̌hto Khûpetarǔ kû̌ Khûyṳ̂ha nudě taplǎnô̤̌ asî getîkhî dǒ a khô tokhlǒ a ô̌. Dě lǒ̤꤮ bò pwa̤shû̌gǎ ikǒlǒkòdû̌ tokhlǒ kû̌ mǒ̤khumǒ̤pwǎ̤ dǒ a htû ikǒlǒkòdû̌ tokhlǒ hî̌kwè̌꤮ asî hî̌tènu, a gepwe̤ǐlṳ̌ bǎ kû̌ akhô nutokhlǒ. 24Bǎ a khô tokhlǒ ganǎ̤de ta̤we̤ta̤kè hǒo akhanu, asî kwicaba wô̤̌wô̤̌ lû̌û dǒ sǎphlǒ tômè꤮ akû dǒ Cǒmara a ô̌ nô̤̌ dě a hî̌ kû̌, “Ǒ꤮ Běcǎdû̌, na mî̌ pwa̤ dǒ a bô̌lò̤ mǒkhû̌hǎkhû̌, shidû̌te̤we̤ sîtokhlǒ kû̌ lǒ̤꤮ bò ta̤ dǒ a ô̌ dǒ ta̤nutokhlǒ akû lǒ̤꤮ bò tôpwa̤! ^b 25Yôla Plò̌shǐ Běcǎ nohî̌bǎ tutṳ̌ pa Phidawi̤, amè̤̌kû̌ na pwa̤ma̤ta̤phû̌ nu kû̌,

‘kòyò khlilè ashǔshawa̤ tokhlǒ cû̌ sǎphlǒdû̌ jî̌ lô̌khô ma̤titè? Ma̤titè̌hî̌dě kòyò tokhlǒ cû̌gènè̤ ma̤phǔmò̤̌ lô̌khô ta̤ dǒ a tônô̤̌ tokhlǒ ma̤titè? ^c 26Hǎkhû̌ khwǐ tokhlǒ tîwî̌tòwò nǎ lô̌khô anǎ̤ dǒ a gǔ shěpě̤ Cǒmara kû̌ khwǐ dǒ Cǒmara rû̌htò̌ lû̌û dǒ a gǔ ma̤hǎplǎge kòyò hǎkhû̌phû̌ nutôpwa̤. Pô̤̌nudě pwa̤pǒta̤ tokhlǒ ô̌plǒhî̌bǎcu wô̤̌wô̤̌ lû̌û dǒ a gǔ shěwô̤̌wô̤̌ ta̤ kû̌ hǎkhû̌ akhwǐ tokhlǒ.’ ^d

27Khònò̤̌dě dǒ wî̤̌kûnu a htûhtò̌kè anǎ̤ pô̤̌nu hǒ! Ma̤titèhî̌dě Khwǐherû kû̌ Khwǐpò̌tiyapǐlǎ ô̌plǒhî̌bǎcu kû̌ Yǔdaphû̌ mè̤̌tô̤̌ tokhlǒ kû̌ Yǔdaphû̌ tokhlǒ bǎ wî̤̌kûnu. Dě a gènè̤ ma̤si wô̤̌wô̤̌ lû̌û, Yeshǔ mî̌ na pwa̤ma̤ta̤phû̌ plò̌shǐ dǒ na dǐhtû a kû̌ Khrǐ nu tôpwa̤. ^e 28Dǒ na ta̤pô̤ta̤phǎ akhû̌akhî kû̌ ta̤ dǒ na bè̌lò̤ hto na sǎphlǒ dǒ a gǔ htûhtò̌ pě tokhlǒ akhû̌akhî, kòyò nutokhlǒ ma̤ lô̌khô pô̤̌ na tîwî̌tòwò ô̌nǎnu hǒ. 29Bǎbǎkǎlè, ǒ꤮ Běcǎ꤮, ganǎ̤de kè̌mò̌ asî hî̌ sǎgònò̤̌ ǐsha lô̌khô pa khònò̤̌ tokhlǒnu, htokhôtô̤̌ pô̤̌khô pa htû na jû̌ nutokhlǒ gǔ hî̌bǎ khuhebǔ wô̌ kû̌ nawe̤nakè nudě, ma̤jè̌ mò̌ pa. 30Dǔlè̌lṳ̌ na ta̤pô̤ta̤phǎ dǒ a gǔ ma̤hǎmǎ kòyò aya, kû̌mî̌ ta̤ma̤ cô̌klǐcô̌sè tokhlǒ kû̌ ta̤ma̤ ǒò̌ kiti̤kaa tokhlǒ, dě dǒ na pwa̤ma̤ta̤phû̌ plò̌shǐ Yeshǔ nutôpwa̤ ami̤ akhû̌akhî, dě no ô̌lṳ̌htò̌ tûû̌ ta̤ nutokhlǒ nî̌꤮.”

31Bǎ asî kwicaba hto akhanu, gûlǎ̤ bǎ asî lǎ̤ô̌plǒcu lû̌û nutûkû a guyṳ̌wṳ̌wè̤ dě asî lǒbe bò kû̌ Yôla Plò̌shǐ Běcǎ pṳ̂̌꤮ tôpwa̤ dě asî pṳ̂̌꤮ tôpwa̤ shôbǐǐlṳ̌ khukhuhehe bǎ lô̌khô kòyò kû̌ Cǒmara awe̤akè.

Pwa̤yṳ̌ǎta̤phû̌ tokhlǒ ma̤lṳma̤tò ma̤jè̌ kè̌khîlû̌û kû̌ ta̤ dǒ a ô̌ kû̌ asî tokhlǒ

32Pwa̤ yṳ̌ǎnǎ̤ǎta̤ tokhlǒnu asî ô̌ lû̌û kû̌ sǎphlǒ tômè nô̤̌, ta̤gènè̤ tocǒ꤮ nô̤̌. Asî ta̤kî̌ta̤krû̌ tokhlǒnu asî dô̌kôǐ tûû̌ ata pwǎ ahî̌ tôpwǎ̤꤮ tô̤̌. Ta̤ dǒ a ô̌ kû̌ asî tokhlǒnu asî ǎwô̤̌wô̤̌ phî̌wô̤̌wô̤̌ kè̌khî lû̌û. ^f 33Pwa̤nophû̌ tokhlǒ khòlṳ̌ bǎ kòyò kû̌ Běcǎ Yeshǔ htûpwa̤ getîkhî sô̌ awe̤akènu, a lǒbe kû̌ ta̤siwi̤sòwò̤ ashû̌asho htokhôtô̤̌ Cǒmara glǒlò̤ lǒbe bǎ abwǐasîrî dǒ asî lǒ̤꤮ bò alô̤. 34Dǒ ta̤dòkûphû̌ tokhlǒ aklanu, kòyò hǎwǐ̤shèwè̤ ô̌ tôpwǎ̤꤮ tô̤̌, ma̤titè̌hî̌dě kòyò dǒ a ô̌ kû̌ hǐphò kû̌ hǔkla tokhlǒnu, a shaǎ lò̤kè lû̌ dě a phî̌hèǐ lô̌khô ruhta dǒ a shaǎlò̤nǐ̤ lû̌û nutokhlǒ, 35Dě hèbè̌lò̤ lô̌khô ruhta dǒ pwa̤nophû̌ tokhlǒ a cǔdekû dě asî bèpè̤̌ bǎ kû̌ kòyò dǒ a lǎ̤lṳ̂ru lṳ̂hta nutokhlǒ.

36Pô̤̌nu akhû̌akhî kòyò mi̤ kû̌ Khûyṳ̂tǎ ô̌ tôpwa̤, a mî̌ Le̤wǐphû̌ tôpwa̤ dě a ô̌ phijǎlò̤ dǒ Kuprǔ shikhokhû̌, dě pwa̤nophû̌ tokhlǒ kaǎ lû̌mi̤ kû̌ Khûbanabǎ (yô̤̌mûyô̤̌sǎ mî̌ kòyò dǒ a ǐkhû̌ǐǎ kòyò). 37A shaǎkè awe̤ tôlǎ̤ dě a hè ǐlò̤ aruhta dǒ pwa̤nophû̌ tokhlǒ a cǔdekû.