Act 6 | KxfSCKXF | STEP | Bǎnu akha, ta̤dòkûphû̌ tokhlǒ sǔ sǔ a ô̌dû̌htò̌ dě Yǔdaphû̌ dǒ a hî̌bǎ Grěyô̤̌ tokhlǒ kû̌ Yǔdaphû̌ dǒ a hî̌bǎ tûû̌ ayô̤̌ tokhlǒ htè̌kè̌khî lû̌û. Yǔdaphû̌ dǒ a hî̌bǎ Grěyô̤̌ tokhlǒ hî̌ kû̌ kòyò dǒ a yṳ̂̌ǎyṳ̂̌ô shǎǎshǎô tôni̤ kû̌ tôni̤ tokhlǒnu a kè̌tûklû̌ dò̌tûklû̌ asî pwa̤mǒ̤ô̌khwè̌ tokhlǒ, a hî̌ lô̌khô pô̤̌nu.

Acts 6

Pwa̤ma̤jè̌ kòyò susô̌tôpwa̤.

1 Bǎnu akha, ta̤dòkûphû̌ tokhlǒ sǔ sǔ a ô̌dû̌htò̌ dě Yǔdaphû̌ dǒ a hî̌bǎ Grěyô̤̌ tokhlǒ kû̌ Yǔdaphû̌ dǒ a hî̌bǎ tûû̌ ayô̤̌ tokhlǒ htè̌kè̌khî lû̌û. Yǔdaphû̌ dǒ a hî̌bǎ Grěyô̤̌ tokhlǒ hî̌ kû̌ kòyò dǒ a yṳ̂̌ǎyṳ̂̌ô shǎǎshǎô tôni̤ kû̌ tôni̤ tokhlǒnu a kè̌tûklû̌ dò̌tûklû̌ asî pwa̤mǒ̤ô̌khwè̌ tokhlǒ, a hî̌ lô̌khô pô̤̌nu. 2 Pô̤̌nudě pwa̤nophû̌ shǐsò̌ginǐ̤, a kaǎplǒ bò ta̤dòkûphû̌ tokhlǒ dě a hî̌ asî kû̌, “Pa kè̌ bè̌kè kûmṳ̂̌ Cǒmara alě̤ayô̤̌ dǒ pa shôbǐǐ yǎ nutokhlǒ dě pa gǔ yṳ̂̌lò̤pè̤̌ kòyò shǎǎshǎô kû̌mî̌ ruhta numî̌ a tôtô̤̌. 3 Pô̤̌nu akhû̌akhî pṳ̌wè̤̌ sî, rû̌htò̌ lô̌khô kòyò susô̌tôpwa̤ dǒ a lǒbe kû̌ Yôla Plò̌shǐ Běcǎ kû̌ ta̤sî̌ta̤jò̌ tokhlǒ dě pa glè̌ noma̤ asî ta̤ma̤ dǒ a bǎ yṳ̂̌ǎyṳ̂̌ô bǎ kòyò shǎǎshǎô kû̌mî̌ ruhta tokhlǒ. 4 Pa tokhlǒ nudě pa tôbǎ ǐlò̤bò shěkhǎ dǒ ta̤kwicaba kû̌ ta̤shôbǐǐlṳ̌ bǎ kòyò kû̌ Cǒmara alě̤ayô̤̌ tôkhô.”

5 Pwa̤nophû̌sî shôbǐǐlṳ̌htò̌ ta̤tokhlǒnu nî̌ lǒ̤꤮bò kòyò ô̌ dǒ asaprṳ̂kû pṳ̂̌꤮ tôpwa̤ sǎphlǒtô kû̌ asî, dě asî rû̌htò̌ Khûsôtibe dǒ a lǒbe kû̌ ta̤yṳ̌ta̤nǎ̤ kû̌ Yôla Plò̌shǐ Běcǎ nutôpwa̤, htodě a rû̌htò̌ pô̤̌ Khûphǐlǐpǔ, Khûphrûkhòrû, Khûnikanò̤ra, Khûtǐmṳ̂nǎ, Khûpame̤nǎ. Htodě a rû̌htò̌ Khûnikòlǎ, a mî̌ Yǔdaphû̌ mè̤̌tô̤̌, a mî̌ Wî̤̌atiò̌phû̌ tôpwa̤ dě a genṳ̌ dǒ Yǔda a ta̤cubucaba akû. 6 Asî saprṳ̂saphǎ nohè kòyònu susô̌tôpwa̤ dǒ pwa̤nophû̌ tokhlǒ a lô̤mô̤̌. Dě a kwicaba hto bǎ asî dě a dò̌htò̌ lô̌khô acǔde dǒ asî tokhlǒ alô̤.

7 Pô̤̌nudě Cǒmara alě̤ayô̤̌ nî̌ sǔ sǔ a lṳ̌peshe cû̌ htodě dǒ Wî̤̌yarǔshôle akûnu, kòyò dǒ a yṳ̌ǎnǎ̤ǎta̤ tokhlǒ sǔ sǔ a ô̌wô̤̌htò̌ htokhôtô̤̌ pwa̤shû̌gǎ tokhlǒnu, a yṳ̌ǎnǎ̤nǎ dû̌wî̤ htò̌.

Kòyò pṳ̂̌ Khûsôtibe

8 Khûsôtibe dǒ a lǒbe kû̌ Cǒmara abwǐsîrîdû̌ kû̌ a ta̤pô̤ta̤phǎ tôpwa̤nu, a ma̤lṳ̌ bǎ kòyò ô̌ bǎnu tokhlǒ kû̌ ta̤ma̤ cô̌klǐcô̌sè tokhlǒ kû̌ ta̤ma̤ ǒò̌ kiti̤kaa tokhlǒ bǎnu. 9 Bǎbǎkǎlè kòyò dǒ a htè̌shěshu jûlě̤phî̌yô̤̌ kû̌ lû̌û tô̤̌nu a ô̌ tokhlǒ. Asî mî̌ kòyò tôprṳ̂ dǒ a nṳ̌ ô̌plǒ dǒ (pô̤̌ kòyò kaǎ asî kû̌) Yǔdaphû̌ dǒ a nǐ̤bǎ ta̤pili̤ tokhlǒ a ta̤cabahǐ tôprṳ̂tôphǎ akû. Asî mî̌ a ô̌ dǒ Wî̤̌kurene kû̌ Wî̤̌alè̌shadriya akû. Asî nutokhlǒ kû̌ Yǔdaphû̌ dǒ ashǔshawa̤ tokhlǒ dǒ a ô̌ bǎ Shilishiyagǎ kû̌ Ashǎgǎ sî tokhlǒnu, a sahtò̌ htè̌shěshǔ Khûsôtibe. 10 Bǎbǎkǎlè Khûsôtibe hî̌bǎta̤ akhanu, Yôla Plò̌shǐ Běcǎ ǐ yǎ ta̤sî̌ta̤jò̌ tokhlǒ akhû̌akhî, asî htè̌shěshu jò pe lû̌û tocǒ꤮ tô̤̌.

11 Pô̤̌nudě asî cû̌ tili̤tôlô̌ kòyò dǒ ashǔshawa̤ tokhlǒ dě a no lô̌hǔ asî kû̌, “Pa ganǎ̤de kû̌ Khûsôtibe nî̌ a htè̌shěshu hî̌bǎ phû̌mò̤̌ Khûmṳ̂shě a ta̤sû̌ta̤tòwò tokhlǒ kû̌ Cǒmara hǒ.”

12 Asî cû̌ dǒ kòyò saprṳ̂ tokhlǒ a ô̌ kû̌ Yǔdaphû̌ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ a ô̌ dě a cû̌ htû̌bǎ kû̌ a cû̌ noma̤shû̌shǎhtò̌ asî. Dě kòyò nutokhlǒ cû̌ pṳ̂̌ Khûsôtibe dě cî̌hè lû̌û dǒ kòyò htû ikǒlǒkòdû̌ tokhlǒ a lô̤mô̤̌. 13 Htodě asî kaǎ kòyò dǒ a phǔkhò̌ lòhô kû̌ Khûsôtibe awe̤akè tokhlǒ. Dě kòyò nutokhlǒ nî̌ a hî̌ lô̌khô kû̌, “Kòyò hǒtôpwa̤ mî̌ a hî̌pî̌hî̌lṳ̂̌ bò pa ta̤lṳhtò̌hô aplò̌shǐ kû̌ Khûmṳ̂shě a ta̤sû̌ta̤tòwò tokhlǒ pṳ̂̌꤮ taplǎ hǒ. 14 Pa ganǎ̤de a hî̌ kû̌ Wî̤̌na̤sôrè̤̌phû̌ Yeshǔ gǔ ma̤lò̤tě̤pro̤kè ta̤lṳhtò̌hônu pě dě a gǔ htû̌lè̌ pa lǎ̤bû̌lǎ̤klô dǒ Khûmṳ̂shě bè̌kè bǎ pa nutokhlǒ pě” A hî̌ pô̤̌nu.

15 Lǒ̤bò kòyò dǒ a hǎnòò̌ bǎ kòyò htû ikǒlǒkòdû̌ agûlǎ̤ nutokhlǒ kè̌꤮ bò Khûsôtibe, dě asî kè̌shǐ lû̌û kû̌ asô̌sô̌ kû̌mî̌ mǒkhû̌ tanaphû̌ amǐ̤sǎnu.