Colossians 1

1He mî̌ Khûpò̌lǔ, he kû̌ pa pṳ̌wè̤̌ Khrǐphû̌ Khûtîmôte wě̤ bǎ sî lî̤ nutôbǎ. Cǒmara sǎphlǒô̌ he kû̌ he gǔ htûhtò̌ Yeshǔ Khrǐ a pwa̤nophû̌ tôpwa̤.

2He wě̤ cû̌nṳ̌ bǎ pa pṳ̌wè̤̌ Khrǐphû̌ dǒ a aplò̌shǐ dě acǒ kû̌ ayô̤̌ dě a ô̌ lô̌khô dǒ Wî̤̌kòlòtè̌ akû nutokhlǒ a ô̌. Papha Cǒmara abwǐdû̌sîrîhtû kû̌ a ta̤gûjû̌kabǎ gǔ ô̌cu kû̌ sî nî̌꤮.

Ta̤hî̌bwǐhî̌sîrî kû̌ ta̤kwicaba

3Bǎ pa kwicaba ta̤ dǒ sîya akhanu, pa hî̌bwǐhî̌sîrî pa Běcǎ Yeshǔ Khrǐ apha Cǒmara pṳ̂̌꤮ taplǎ. 4Ma̤titèhî̌dě pa hî̌bwǐhî̌sîrî numî̌, sî yṳ̌ǎnṳ̌ Yeshǔ Khrǐ dě sî mô̤ǐ Cǒmara a kòyò aplò̌shǐ lǒ̤bò tokhlǒnumî̌, pa ganǎ̤de htobòhǒ. 5Bǎ sî ganǎ̤de sakhû̌lû̌ ta̤sǎlě̤awe̤akè dǒ acǒatè̤ akhanu, sî ganǎ̤de hto ta̤kè̌shuǐ dǒ ta̤sǎlě̤we̤kè ǐ sî nuhǒ. Dǒ ta̤kè̌shuǐnu akhû̌akhî, sî yṳ̌ǎ Cǒmara, htodě sî mô̤nṳ̌ kòyò shǔshawa̤. Cǒmara bè̌htubè̌plǒ bǎ sî ta̤kè̌shuǐnu dǒ mǒkhû̌ hǒ. 6Ta̤sǎlě̤we̤kè nunî̌ a phî̌hèǐ ta̤ǐshowî̤ dě a lṳ̌peshecû̌ bòkè dǒ hǎkhû̌běkhû̌ hǒ. A lṳ̌peshecû̌ dě a phî̌hèǐ ta̤ǐshowî̤ sô̌sô̌kû̌ a phî̌hèǐ bǎ sî, bǎ sî ganǎ̤de dě sî sî̌yaphlôhè ta̤tě̤ta̤mè̤̌ mî̌ Cǒmara abwǐsîrîdû̌ awe̤akè nuhǒ. 7Khûepapra mî̌ kòyò dǒ a shôbǐǐlṳ̌ wǐlǒ bǎ sî kû̌ Cǒmara a ta̤bwǐta̤sîrî tôpwa̤ hǒ. A mî̌ Yeshǔ Khrǐ pwa̤ma̤ta̤phû̌ dǒ a ma̤ta̤ kû̌ pa dě pa mô̤ǐ yǎ nutôpwa̤. A mî̌ Khrǐ pwa̤ma̤ta̤phû̌ dǒ acǒ kû̌ ayô̤̌ tôpwa̤. Dě a ma̤ pô̤̌o numî̌ a ma̤ bǎ pa gûlǎ̤ hǒ. ^a 8A shôbǐǐlṳ̌ bǎ pa kû̌ Yôla Plò̌shǐ Běcǎ htû̌wṳ̂̌ sî dǒ sî gǔ mô̤nṳ̌ kòyònu.

9Pô̤̌nudě, sahtò̌ bǎ pa ganǎ̤debǎ sîwe̤sîkènu tôni̤nu, pa no dǐô̌kǔkè pa ta̤kwicaba dǒ sîya tôkhò̌꤮ tô̤̌. Pa kwicaba Cǒmara dǒ a gǔ ǐlò̤ lǒlǒbebebò sî ta̤sî̌ta̤jò̌ dǒsû̌dǒsò̌ tôkhô kû̌ ta̤sî̌khû̌sî̌ya dǒsû̌dǒsò̌ tôkhô dě dǒ nutokhlǒ akhû̌akhî, pa kwicaba Cǒmara kû̌ a gǔ dǐsî̌ganǎ̤ lǒlǒbebe bǎ sî kû̌ sî gǔ ma̤ta̤ pô̤̌ atô lû̌sǎphlǒ nutokhlǒ. 10Pô̤̌khô sî gǔ ô̌htûpwa̤ kû̌ Běcǎ htodě pô̤̌khô sî ma̤mô̤ lû̌û sǎphlǒ ayanu, pa kwicaba Cǒmara pô̤̌nu. Htokhôtô̤̌ pô̤̌khô sî ma̤wô̌ta̤ pṳ̂̌tocǒ, dě sî sǎhtò̌wô̌ dě sî gǔ dû̌htò̌ pû dǒ ta̤sî̌ya Cǒmara akû ayanu, pa kwicaba bǎ pô̤̌ sîya. 11Pô̤̌khô sî sǎlě̤sǎlò̤ khòjî̌khòjû̌bò̌ khòsǎdôbò̌ ta̤pò̤̌ta̤sha nudě, pa kwicaba kû̌ lǒ̤bò Cǒmara a ta̤pô̤ta̤phǎ shû̌sho tokhlǒ gǔ ǐkhû̌ǐǎ bò pû sî sǎphlǒ. 12Sî hî̌bwǐhî̌sîrî pû pha Cǒmara dǒ a ǐhtûhto sî kû̌ a kòyò dě sî nǐ̤bǎ padô̌ a û̌tě̤û̌ca tokhlǒnu, kû̌ a kòyò aplò̌shǐ tokhlǒ dǒ ashiagǎ dǒ a lîtîklî̌ akûnu pû nî̌꤮. 13A ma̤hǎplǎge pa dǒ hǎkhû̌tana a ta̤shû̌ta̤sho dǒ a pǒǐ ta̤khǐsiwi̤ nutôdo alǎ̤ dě a sûnṳ̌ pa dǒ aphû̌khû dǒ a mô̤ǐ nutôpwa̤ ashigǎkû hǒ. 14Dǒ phû̌khûnu akhû̌akhîdě, Cǒmara ma̤hǎplǎge pa, htokhôtô̤̌ a plûkèbò pa ta̤sǔ tokhlǒ. ^b

Khrǐ kû̌ ata̤ma̤

15Yeshǔ Khrǐ dǒ pa kè̌shǐjò yǎ tôpwa̤nu, a dǔlè̌lṳ̌ tě̤tě̤mè̤̌mè̤̌ pa kû̌ Cǒmara dǒ pa kè̌shǐjò a tô̤̌ nutôpwa̤ hǒ. A mî̌ Cǒmara aphû̌khû wè̤̌pwǎ̤ dǒ apô̤aphǎ, ashû̌asho a dû̌khlohtûkhlo kû̌ ta̤bô̌lò̤ pṳ̂̌꤮ tôcǒ tôpwa̤ hǒ. 16Ma̤titèhî̌dě, lǒ̤bò ta̤dǒ a ô̌ dǒ mǒkhû̌ nutokhlǒ bǎbǎ, dǒ hǎkhû̌ tokhlǒ bǎbǎ, ta̤ dǒ pa kè̌shǐjò a tokhlǒ kû̌ pa kè̌shǐjò a tô̤̌ tokhlǒ bǎbǎ, kòyò dǒ a ô̌ kû̌ a ta̤pô̤ta̤phǎ tokhlǒ bǎbǎ, a ô̌ kû̌ a ta̤shû̌ta̤sho tokhlǒ bǎbǎ, pwa̤pǒta̤ lǒ̤bò nutokhlǒ bǎbǎ, Cǒmara nobô̌lò̤ tutṳ̌ kû̌ Khrǐ pwǎ. Htodě lǒ̤bò ta̤ nutokhlǒ nî̌ a bô̌lò̤ kû̌ anǎ̤ dě a bô̌lò̤ kû̌ aya pwǎ. 17Khrǐ ô̌nǎ wǐ hto kû̌ ta̤ lǒ̤bò, dě pô̤̌khô ta̤nutokhlǒ gǔ cû̌ lě̤tôlě̤bǎ ayanu, a pṳ̂̌měǐ lǒ̤bò. 18Lǒ̤bò kòyò dǒ a yṳ̌ǎ Khrǐ tokhlǒnu, Khrǐ pǒǐ asî dě a nè̌klè̌nè̌klò asî sô̌sô̌kû̌ ikǒ nè̌klè̌nè̌klò ǐ nǎ̤glǒnu, dě kòyò dǒ a yṳ̌ǎ lû̌û tokhlǒnu asô̌sô̌kû̌ nǎ̤glǒ nuhǒ. Htokhôtô̤̌ a mî̌ a ǐ pwa̤ dǒ a yṳ̌ǎnǎ̤ǎta̤ tokhlǒ a ta̤htûpwa̤ tôpwa̤ hǒ. Htodě pô̤̌khô a htûhtò̌ ta̤lǒ̤꤮ bò a ikǒ ayanu, Cǒmara ma̤ ihtǒhtûpwa̤ getîkhî wǐlǒ a hǒ. ^c 19Ma̤titèhî̌dě, lǒ̤bò Cǒmara ô̌ kû̌ a ta̤lǒta̤be tokhlǒnu, a sǎyṳ noô̌kû̌ dǒ Khrǐ akû. 20Lǒ̤꤮ bò ta̤ dǒ a ô̌ dǒ mǒkhû̌ nutokhlǒ bǎbǎ, dǒ hǎkhû̌nu tokhlǒ bǎbǎ, Cǒmara noma̤kla getîkhîbò tutṳ̌bò sô̌ kû̌ Khrǐ hǒ. A nohè tṳ̌sikhòsi aphû̌khû dǒ nò̌dò̌htǔ alô̤ dě asǐ bǎ sǐlò̤kè dǒ paya akhû̌akhî, a ma̤pè̤̌ma̤dû getîkhî bò sô̌ ta̤pṳ̂̌꤮ tocǒ pô̤̌nuhǒ. ^d

21Dǒ awǐkha bǎ sî yṳ̌ǎ Yeshǔ Khrǐ khôtô̤̌ akhanu, sî mî̌ kòyò dǒ a cû̌ khô̌kè kû̌ Cǒmara. Sî ta̤gènè̤ tokhlǒnu a lûkhô̌ kû̌ Cǒmara, htokhôtô̤̌ sî ta̤ma̤ tokhlǒnu a phû̌mò̤̌. 22Bǎbǎkǎlè khònò̤̌, Khrǐ hè sanǎ̤ hè tṳ̌sikhòsi anǎ̤ akhû̌akhî, Cǒmara ma̤kla getîkhîsô̌ sî kû̌ anǎ̤glǒ tû̌hǒ. Dǒ Cǒmara a lô̤mô̤̌ pěnu, pô̤̌khô sî aplò̌shǐ dě sî gǔ hǎplǎ kû̌ ta̤sǔ, htokhôtô̤̌ kòyò gǔ bè̌jò pe ta̤sǔ dǒ sîlô̤ tôpwa̤ tô̤̌nu, Cǒmara ma̤kla getîkhî sô̌ sî pô̤̌nu hǒ. 23Pô̤̌khô sîmǐ̤sǎ gǔ ô̌ dǒ Cǒmara a lô̤mô̤̌ nudě, tûlû̌ yṳ̌ǎ hèpô̤̌ lô̌khô pô̤̌nu. Yṳ̌ǎshû̌ yṳ̌ǎsho lô̌khô, dě ô̌měô̌gle lô̌khô dǒ sî ta̤yṳ̌ akû nî̌꤮. Bǎ sî ganǎ̤de ta̤sǎlě̤we̤kè akhanu, sî nǐ̤bǎ hto ta̤kè̌shuǐ hǒ. Dě sǎphlǒ lûhtôlûlò̤ tǎ̤ lô̌khô dǒ sî ta̤kè̌shuǐ akûnu tǎ̤mǎ̤ nî̌꤮. Ta̤sǎlě̤we̤kè dǒ Cǒmara ma̤wô̌ getîkhî sô̌ kòyò tokhlǒ kû̌ anǎ̤nu, kòyò shôbǐǐ cû̌ lû̌û dǒ kòyò pṳ̂̌꤮ tôpwa̤ a ô̌, kû̌ dǒ hǎkhû̌ tabǎ a ô̌ hǒ. He mî̌ Khûpò̌lǔ, he shôbǐǐ ta̤sǎlě̤we̤kè nuhǒhǒ.

Khûpò̌lǔ ma̤ta̤ pô̤̌ pwa̤ma̤ta̤phû̌ tôpwa̤ dǒ ta̤dòkû akû

24Pô̤̌khô sî nǐ̤bwǐsîrî ayanu, khònò̤̌ he khòbǎta̤ dǒ sîya pô̤̌o numî̌ he sǎlě̤ pwǎ. Pô̤̌ Khrǐ khòbǎ kòyò dǒ a yṳ̌ǎ lû̌û dǒ a sô̌sô̌ kû̌ anǎ̤glǒ tokhlǒnu, he sǎphlǒshû̌ dǒ he nǎ̤glǒphěyî̌nu khò padô̌ lǒ̤bò kòyò dǒ a yṳ̌ǎ lû̌û nutokhlǒ ayaya. 25Pô̤̌khô he gǔ shôbǐǐlṳ̌ lǒbe bǎ sî kû̌ Cǒmara a ta̤we̤ta̤kè ayanu, Cǒmara ǐlò̤ he ta̤phǐta̤ma̤nu dǒ sîyahǒ. Htokhôtô̤̌ a nohtûhtò̌ he kû̌ lǒ̤bò pwa̤yṳ̌ǎ Khrǐ nutokhlǒ apwa̤ma̤ta̤phû̌ tôpwa̤ hǒ. 26Kòyò ô̌htûpwa̤ dǒ awǐtôhtu tokhlǒ lǒ̤꤮ bònu, Cǒmara nogènèphlô asî kû̌ ta̤sǎlě̤we̤kènu awe̤akè khôtô̤̌. Ta̤sǎlě̤we̤kè numî̌ Cǒmara bǎ dǒû̌dǒshò̌ pe lû̌û pwǎ, bǎbǎkǎlè khònò̤̌ a dǔlè̌lṳ̌ hto dǒ a kòyò tokhlǒ a ô̌ hǒ. 27Cǒmara sǎphlǒô̌ dǒ a gǔ bè̌lṳ̌htò̌ bǎ a kòyò tokhlǒ kû̌ a ta̤dǒû̌dǒshò̌ nutôcǒ. A ta̤dǒû̌dǒshò̌ numî̌ Yǔdaphû̌ mè̤̌tô̤̌ tokhlǒ aya numî̌ amè̤̌. Ta̤dǒû̌dǒshò̌ numî̌ a lě̤dû̌pwî̤htû, ata̤bwǐdû̌sîrîhtû mî̌ca. Ta̤dǒû̌dǒshò̌ numî̌ amè̤̌kû̌ Khrǐ dǒ a ô̌ bǎ sîkû nuhǒ, dě yô̤̌mûyô̤̌sǎ mî̌ amè̤̌kû̌ sî gǔ nǐ̤bǎ Cǒmara a ta̤bwǐdû̌sîrîhtû pě, nuhǒ.

28Pô̤̌khô pa gǔ sûnṳ̌ kòyò pṳ̂̌꤮ tôpwa̤ dǒ Cǒmara lô̤mô̤̌ pô̤̌ kòyò dǒ a htûhtò̌ ta̤tôcǒ꤮ nô̤̌ kû̌ Khrǐ dě a dû̌to̤yobǎ sî̌ya tě̤tě̤mè̤̌mè̤̌ dǒsû̌dǒsò̌ tôkhô tokhlǒ ayanu, pa shôbǐǐlṳ̌ bǎ kòyò pṳ̂̌꤮ tôpwa̤ kû̌ Khrǐ awe̤akè hǒ. Htokhôtô̤̌ pa dǐsè̌rè̌ hǒ, kòyò pṳ̂̌tôpwa̤, dě pa sû̌ǐtòwòǐ bǎ kòyò pṳ̂̌꤮ tôpwa̤ kû̌ lǒ̤bò ta̤sî̌ta̤jò̌ nutokhlǒ hǒ. 29Khrǐ a ta̤pô̤ta̤phǎ nî̌ a ma̤shû̌ma̤sho mî̌ca dǒ hekû. He gènè htò̌ǐ a ta̤pô̤phǎ shû̌sho dě he jî̌pwǐ̤jî̌li̤ dě he gôma̤ Cǒmara ata̤ma̤ nutokhlǒ hǒ.