Col 2 | KxfSCKXF | STEP | He sǎyṳ dǐsî̌ganǎ̤ bǎ sî kû̌ he jî̌pwǐ̤ ma̤ lǒ̤sǔlǒ̤sò̌ dǒ sîya, kû̌ kòyò ô̌dǒ Wî̤̌lò̤dǐkǐ akû nutokhlǒ aya, kû̌ kòyò dǒ a sî̌ganǎ̤ kè̌shǐ nô̌ he khôtô̤̌ nutokhlǒ aya pwǐ tènu.

Colossians 2

1 He sǎyṳ dǐsî̌ganǎ̤ bǎ sî kû̌ he jî̌pwǐ̤ ma̤ lǒ̤sǔlǒ̤sò̌ dǒ sîya, kû̌ kòyò ô̌dǒ Wî̤̌lò̤dǐkǐ akû nutokhlǒ aya, kû̌ kòyò dǒ a sî̌ganǎ̤ kè̌shǐ nô̌ he khôtô̤̌ nutokhlǒ aya pwǐ tènu. 2 Pô̤̌khô he gǔ ǐkhû̌ǐǎ asî dě he ma̤pô̤̌nu pwǎ. Pô̤̌khô asî sǎphlǒ gǔ ijò kè̌khî lû̌û tôpwa̤ kû̌ tôpwa̤ dǒ ta̤mô̤ akû, htokhôtô̤̌ pô̤̌khô asî gǔ nǐ̤bǎ bòmǔtegle tě̤tě̤mè̤̌mè̤̌ ta̤sî̌ya, pô̤̌nudě asî sî̌yaphlôphǎ Cǒmara ata̤bè̌ ô̌hǔô̌sè̌ Khrǐ nudě he jî̌pwǐ̤ ma̤ lǒ̤sû̌lǒ̤sò̌ pô̤̌nu pwǎ. 3 Ta̤sî̌jò̌ kû̌ ta̤sî̌khû̌sî̌ya lǒ̤bò ta̤ǐshowî̤ lě̤dû̌pwî̤htûnu, a ô̌hǔô̌sè̌ dǒ Khrǐ akû. 4 Pô̤̌khô kòyò gǔ lô̌ǐplò̤ǐ cû̌ sî kû̌ kòyò ta̤sû̌ǐtòwòǐ dǒ asǔ nutokhlǒ tǎ̤mǎ̤ nudě, he hî̌ sî pô̤̌o nupwǎ. Ta̤sû̌ǐtòwòǐ tokhlǒnu, a sô̌sô̌ kû̌ atô bǎbǎ, yṳ̌ǎ tǎ̤mǎ̤ nî̌꤮. 5 Ma̤titèhî̌dě, he nǎ̤glǒ ô̌plǒ kû̌ sî tô̤̌ bǎbǎkǎlè he sǎphlǒ ihtu kû̌ sî dě he ganǎ̤de dǒ sî ô̌lû̌û kû̌ sǎphlǒ tômènô̌, htokhôtô̤̌ sî pṳ̂̌měǐ ta̤yṳ̌ta̤nǎ̤ dǒ Khrǐ akû akhû̌akhî, he sǎlě̤sǎlò̤ jî̌le.

6 Pô̤̌ sî yṳ̌ǎ hto Yeshǔ Khrǐ pô̤̌ sî Běcǎ tôpwa̤nu, ô̌htûpwa̤ sělě lô̌khô pô̤̌ Běcǎ sǎyṳ nohtûpwa̤ sînu. 7 Shǒlò̤ yô̤̌yô̤̌ lô̌khô sî ta̤yṳ̌ dǒ Yeshǔ Khrǐ akû pô̤̌ sǒkhò̌wǐ̤ shǒlò̤yô̤̌nu. Dě dû̌htò̌ lô̌khô dǒ Yeshǔ Khrǐ akû nî̌꤮. Sî yṳ̌ǎnu sǔ sǔ a bǎ shohè sělě pô̤̌ kòyò sû̌ǐ hto sînu, dě lǒ̤꤮ bò Cǒmara ma̤ bǎ hto sî tokhlǒnu, htû̌sò̌ hî̌bwǐhî̌sîrî htò̌ lô̌khô lû̌û nî̌꤮.

8 Ô̌sè̌rè̌ lô̌khô sînǎ̤ nî̌꤮. Nolô̌ǐplò̤ǐ tǎ̤ sînǎ̤ kû̌ kòyò dǒ a sû̌ǐtòwòǐsǔ ta̤nutokhlǒ tôpwa̤ tǎ̤mǎ̤ nî̌꤮. Ta̤nutokhlǒ mî̌ a nòdû̌ pwǎ. Ta̤sû̌ǐtòwòǐ pô̤̌nu tokhlǒmî̌ mè̤̌pwǎ kòyò hǎkhû̌phû̌ alǎ̤klô ǐlò̤ tutṳ̌ kè̌khîlû̌û tôhtu hto tôhtu nutokhlǒ pwǎ. Dě hǒnu tokhlǒ mî̌ a hè dǒ khînǎkhîno phû̌mò̤̌ dǒ a pǒ hǎkhû̌běkhû̌ nutokhlǒ a ô̌ pwǎ. Ta̤sû̌ǐ pô̤̌nu tokhlǒmî̌ a hè dǒ Yeshǔ Khrǐ a ô̌ mè̤̌tô̤̌.

9 Ma̤titèhî̌dě Yeshǔ Khrǐ hè sûlû anǎ̤glǒ pô̤̌ kòyònu bǎbǎkǎlè, a lǒbebò kû̌ Cǒmara alǎ̤klô tokhlǒ lǒ̤bò. 10 Dě dǒ sî kû̌ Khrǐ htûhto lû̌û tôcǒ꤮ nô̤̌ akhû̌akhî, dǒsû̌dǒsò̌ tôkhô ata̤lû lǒ̤bò tokhlǒnu, sî nǐ̤bǎ lǒbe htobò hǒ. Khrǐ mî̌ lǒ̤bò khînǎkhîno a ta̤shû̌ta̤sho nutokhlǒ kû̌ hǎkhû̌běkhû̌ a ta̤siwi̤sòwò̤ tokhlǒ a ikǒ hǒ. 11 Sî ô̌ dǒ Khrǐ akû akhû̌akhî, a sô̌sô̌ kû̌ sî dǔtṳ̌abě hǒ. Ta̤dǔtṳ̌abě mî̌ kòyò dǔ sî mè̤̌tô̤̌. Bǎ Khrǐ phǐhtò̌kè sî sǎphlǒ a ta̤sǎyṳsǎbǎ phû̌mò̤̌ tokhlǒ akhanu, a dǔtṳ̌ sîbě hǒ. 12 Bǎ sî ju sînǎ̤ kû̌ shi akha, sî lǎ̤klô phû̌mò̤̌ tokhlǒnu, sî lǔlò̤ hto kû̌ Khrǐ hǒ. Dě sî lǎ̤bû̌lǎ̤klôma̤ tokhlǒnu, Cǒmara ma̤htûpwa̤ getîkhî kû̌ Khrǐ hǒ. Dǒ sî yṳ̌ǎ Cǒmara a ta̤po̤ta̤pwa̤ dǒ a ma̤ ihtǒhtûpwa̤ getîkhî sô̌ Khrǐ dǒ ta̤si akhû̌akhî, a htûhtò̌ htobò pô̤̌nu hǒ. ^a

13 Bǎ sî yṳ̌ǎ Yeshǔ Khrǐ khôtô̤̌ akhanu, dǒ sî ta̤sǔ akhû̌akhîdě, sî sô̌sô̌kû̌ kòyò dǒ a si dǒsû̌dǒsò̌ nutokhlǒ hǒ. Htokhôtô̤̌ sî hǎplǎhtò̌bò̌ kû̌ sî lǎ̤klô ma̤ta̤sǔ a pô̤pwǎ̤shû̌sho nutô̤̌. Bǎbǎkǎlè khònò̤̌ Cǒmara ma̤ ihtǒhtûpwa̤ getîkhî sî kû̌ Khrǐ hǒ. Cǒmara plûkèbò pa ta̤sǔ lǒ̤bò hǒ. ^b 14 A htǔpǐ̤kè bò ta̤wě̤mǎnǎ dǒ a glè̌ cî̌htò̌ pa nutokhlǒ hǒ. Bǎ kòyò ma̤sihtò̌ Khrǐ dǒ nò̌dò̌htǔlô̤ akhanu, Cǒmara ma̤mǔma̤pî̌ htobò ta̤wě̤mǎnǎ nutokhlǒ hǒ. ^c 15 Bǎ Yeshǔ si dǒ nò̌dò̌htǔlô̤ akhanu, lǒ̤bò khînǎkhîno dǒ a ô̌ kû̌ a ta̤siwi̤sòwò̤ tokhlǒnu, Cǒmara phî̌kèbò asî ata̤siwi̤sòwò̤ nutokhlǒ dě a dǔlè̌lṳ̌htò̌ bǎ kòyò pṳ̂̌꤮ tôpwa̤ kû̌ a ma̤pè̤̌kè hǒ asî hǒ.

16 Pô̤̌nudě, kòyò dǒ a bè̌ sî ta̤sǔ kû̌ sî ta̤ǎta̤ô awe̤akè tokhlǒnu, ganǎ̤de tǎ̤ asîyô̤̌ tǎ̤mǎ̤ nî̌꤮. Pṳ̂̌něně sî kè̌ ma̤pwèma̤lû padô̌ asî lṳmṳ̌ni̤ aplò̌shǐtô̤̌, kè̌ labǎ hǒdě sî kè̌ ma̤pwèma̤lû padô̌ asî tô̤̌ hî̌nu, asî sǎyṳ bè̌ sî ta̤sǔ. Bǎbǎkǎlè ganǎ̤de tǎ̤ asî ayô̤̌ tǎ̤mǎ̤ nî̌꤮. ^d 17 Ma̤titèhî̌dě, dǒwǐkhanu, Cǒmara ǐlò̤ ta̤sû̌ta̤tòwò, ta̤ma̤pwèma̤lû tokhlǒ dě lǒ̤bò ta̤ nutokhlǒ numî̌, asô̌sô̌kû̌ ta̤yô̤ǔ dǒ a dǔlṳ̌ kû̌ ta̤ glè̌ htûhtò̌ dǒ alô̤mô̤̌ hî̌tè pě nupwǎ. Anǎ̤běcǎ mè̤̌caca mî̌ Khrǐ pwǎ. 18 Kòyò dǒ a noshû̌ sî kû̌ sî bǎ shò̌lò̤ sî sǎphlǒ dě a nocabahtò̌ gû̌ sî kû̌ mǒkhû̌tanaphû̌ tokhlǒ pô̤̌ asî cabahtò̌ nutokhlǒnu, gû̌ma̤ tǎ̤ asî tǎ̤mǎ̤ nî̌꤮. Sî kè̌ gû̌kû̌ asî ata̤sû̌ǐtòwòǐ tokhlǒ numî̌, ta̤ma̤nǐ̤khû̌kǎ dǒ Cǒmara olò̤ hto sî kû̌ a gǔ ǐ sî nutokhlǒ pěnu, sî nǐ̤bǎ pe tô̤̌. Kòyò pô̤̌nutokhlǒ mî̌ a hî̌ ǐtûû̌ lô̌khô anǎ̤ kû̌ pa kè̌shǐ tobo dǒ Cǒmara a ô̌ akhû̌akhî, pa nǐ̤bǎ khô̌ ta̤sî̌ta̤jò̌ dǒ Cǒmara a ô̌, a hî̌ lô̌khô pô̤̌nu. Asî phî̌htò̌yô̤̌ a ta̤gènè̤ tokhlǒ kû̌ a ta̤hî̌lǒhî̌khlo nutokhlǒ. 19 Kòyò nutokhlǒ mî̌ a pṳ̂̌mětegle pe Khrǐ tô̤̌ hǒ. Khrǐ mî̌ asô̌sô̌kû̌ ikǒ dě lǒ̤bò kòyò dǒ a yṳ̌ǎ lû̌û tokhlǒ numî̌ a htû lû̌û nǎ̤glǒ. Ikǒ nî̌ a ǐkhû̌ǐǎ nǎ̤glǒ dě a nopô̤̌htu kû̌ amě̤ tokhlǒ kû̌ ayô̤agî̌ tokhlǒ gǔ icu wô̤̌wô̤̌ lû̌ nǎ̤glǒ dě a nǎ̤glǒ nî̌ a dû̌htò̌ pô̤̌ Cǒmara nodû̌htò̌ lû̌û nupwǎ. ^e

Si kû̌ Khrǐ, htûpwa̤ kû̌ Khrǐ

20 Sî si kû̌ Yeshǔ Khrǐ dě a ma̤hǎplǎge sî kû̌ khînǎkhîno dǒ a pǒǐ hǎkhû̌běkhû̌ nutokhlǒ a cǔdekû hǒ. Sî cû̌ ô̌htûpwa̤ pe lô̌khô pô̤̌ kòyò dǒ a sô̌sô̌pe kû̌ hǎkhû̌phû̌ tokhlǒnu hî̌tè? Dě sî cû̌ ganǎ̤de gû̌ma̤ pe ta̤dǔta̤wî̤ tokhlǒ ma̤titè? 21 Ta̤sû̌ta̤tòwò kû̌ ta̤dǔ nutokhlǒ hî̌ kû̌, “Hǒtôcǒnu pṳ̂̌měkè̌ tǎ̤ a tǎ̤mǎ̤,” “Dǒnu tôcǒ dě lǐbǎkè̌ tǎ̤ a tǎ̤mǎ̤,” “Dǒnu tôcǒdě tô̌bǎ tǎ̤ a tǎ̤mǎ̤.” 22 Hǒtokhlǒ numî̌ a sû̌ǐtòwòǐ pwǎ ta̤dǒ a ô̌lṳ̌ tûrû̌tòshò̌phû̌ nutokhlǒ pwǎ. Pa noǎ hto yǎ dě pa bǎ wîkè sô̌ a pwǎ. Ta̤mǎlò̤ kû̌ ta̤sû̌ǐtòwòǐ tokhlǒ numî̌ kòyò dǐ ô̌htûhtò̌ a pwǎ. 23 Dǒ ta̤sû̌ta̤tòwònu akhû̌akhî, kòyò tokhlǒkhlǒnu a jî̌ caba phô̌phô̌ pwǎ lô̌khô Cǒmara, a jî̌ shò̌lò̤ pepwǎ lô̌khô asǎphlǒ dě a ma̤jî̌ma̤jû̌ lò̤ lô̌khô anǎ̤. Ta̤sû̌ta̤tòwò tokhlǒnu a sô̌sô̌kû̌ a ô̌ kû̌ ta̤sî̌ta̤jò̌ bǎbǎkǎlè amè̤̌ bǎtô̤̌. Pô̤̌khô kòyò gǔ khòbò̌ sǎphlǒ a ta̤sǎyṳsǎbǎ phû̌mò̤̌ tokhlǒ ayanu, ta̤sû̌ta̤tòwò nutokhlǒ ma̤jè̌bò̌ kòyò tô̤̌.