Colossians 3

Ta̤ô̌htûpwa̤ ali̤ kû̌ asa

1Pô̤̌ Cǒmara ma̤ ihtǒhtûpwa̤ getîkhî Khrǐ dǒ ta̤sinu, Cǒmara ma̤ ihtǒhtûpwa̤ getîkhî sî dǒ ta̤si hǒ dě a ǐ sî ta̤htûpwa̤ asanu kû̌ Khrǐ hǒ. Pô̤̌nudě lǒ̤bò sî sǎphlǒ a ta̤sǎyṳ tokhlǒnu, bè̌ô̌ lô̌khô dǒ mǒkhû̌ bǎ Khrǐ lǎ̤hǎnòò̌ ǐtûû̌ agûlǎ̤ dǒ Cǒmara acǔtômû nutôkhô nî̌꤮. ^a 2Gènè̤ lô̌khô mǒkhû̌ a ta̤lě̤dû̌pwî̤htû nunî̌꤮. Hǎkhû̌ atě̤ta̤ tokhlǒnu, gènè̤ tǎ̤ lô̌khô tǎ̤mǎ̤. 3Ma̤titèhî̌dě, sî sitǒ̤ kû̌ Khrǐ dě khònò̤̌ sî nǐ̤bǎ ta̤htûpwa̤ asa kû̌ Khrǐ hǒ. Htokhôtô̤̌ sî htûhtò̌ ta̤tôcǒ꤮ nô̤̌ kû̌ Cǒmara hǒ. Kòyò tokhlǒnu a sî̌yaphlô ta̤htûpwa̤ asanu khôtô̤̌. 4Khrǐ mî̌ pwa̤ dǒ a ǐ sî ta̤htûpwa̤ tôpwa̤ dě dǒ a hèlò̤ sô̌ pěnu, a ô̌ kû̌ a ta̤bwǐdû̌sîrîhtû pě. Bǎnu akhapěnu, sî ô̌lṳ̌htò̌ kû̌ a ta̤bwǐdû̌sîrîhtû nupě.

5Pô̤̌nu akhû̌akhî, wîkè sî ta̤ô̌htûpwa̤ li̤ a ta̤sǎyṳsǎbǎ dǒ amè̤̌, ta̤cû̌sǔ pwa̤mǒ̤pwa̤khû, ta̤ô̌htûpwa̤ dǒ a mṳ̂̌plî tô̤̌ tokhlǒ, sǎphlǒ putupatǎ, ta̤sǎyṳsǎbǎ phû̌mò̤̌, kû̌ sǎyṳ nǐ̤bǎ dû̌htò̌ pô̤̌ ta̤dû̌yò̤̌htò̌sa tokhlǒ. Ta̤sǎyṳ̌nǐ̤bǎ dû̌wî̤pô̤̌ ta̤dû̌yò̤̌htò̌sa mî̌ asô̌sô̌kû̌ caba ta̤yô̤ta̤gî̌ hǒ. 6Kòyò dǒ a ma̤ phû̌mò̤̌shî̌htô ta̤pô̤̌nu tokhlǒnu, a tṳ̌bǎ kû̌ Cǒmara a ta̤sǎphlǒdû̌ pě. 7Tôplǎkhanu, sî ô̌htûpwa̤ sǔ htobò pô̤̌ sî sǎphlǒ a ta̤sǎyṳ no sî nutokhlǒ hǒ. 8Bǎbǎkǎlè khònò̤̌ wîkè ta̤sǎphlǒdû̌, ta̤sǎphlǒkě, ta̤sǎkhěkhô̌, ta̤dô̌mi̤dô̌yô̤, htodě ta̤hî̌bǎ phû̌mò̤̌ dǒ a gwǎ khôtô̤̌ nutokhlǒ. 9Hî̌bǎ lòhô pe tǎ̤ lû̌û tôpwa̤ kû̌ tôpwa̤ tǎ̤mǎ̤, ma̤titèhî̌dě sî wîkè sî ta̤ô̌htûpwa̤ ali̤ dǒ sî lǎ̤klô ma̤nu tokhlǒhǒ. ^b 10Dě sî kûsô̌htò̌hǒ ta̤ô̌htûpwa̤ asa dǒ Cǒmara bô̌tèplè̌sa nuhǒ. ^c Pô̤̌khô sî gǔ sî̌ganǎ̤ tě̤tě̤mè̤̌mè̤̌ ayanu, Cǒmara ma̤htûhtò̌ sô̌sô̌ hǒ kû̌ sî kû̌ anǎ̤ hǒ. ^d 11Dǒ ta̤ô̌htûpwa̤ asakûnu, Yǔdaphû̌ tokhlǒ kû̌ Yǔdaphû̌ mè̤̌tô̤̌ tokhlǒnu bǎbǎ, kòyò dǔtṳ̌abě kû̌ dǔtṳ̌abětô̤̌ tokhlǒnu bǎbǎ, shigǎ ashishawa̤phû̌ tokhlǒ bǎbǎ, kòyò mi̤ tokhlǒ bǎbǎ, jû̌ kû̌ kòyò piliphû̌ tokhlǒnu bǎbǎ, pa tôbǎ gènè̤ pe kû̌ a khô̌lû̌û tîkî̌꤮ tô̤̌. Kòyò dǒ a yṳ̌ǎ Khrǐ pṳ̂̌꤮ tôpwa̤nu, Khrǐ ô̌htûpwa̤ dǒ lû̌kû hǒ. Pô̤̌nu akhû̌akhî, Khrǐ mî̌ ta̤ dǒ a lṳ̂dû̌lǒ hǒ.

12Sî mî̌ Cǒmara a kòyò dǒ a mṳ̂̌plî dě a mô̤ǐ tokhlǒ, dě a rû̌htò̌ tû̌ sî hǒ. Pô̤̌nudě kûsô̌htò̌ lô̌khô ta̤sǎyṳgwèbǎǐ, ta̤ma̤wô̤̌ta̤, ta̤shò̌lò̤ sǎphlǒ, ta̤sǎdôhôbî̌ kû̌ ta̤khòsǎdô sînu tokhlǒ nî̌꤮. ^e 13Khòsǎdô bǎ kòyò dǒ a ma̤jî̌ma̤jû̌ na sǎphlǒ nutokhlǒ nî̌꤮. Kòyò tôpwa̤pwa̤ kè̌ ma̤sǔ na hî̌dě plûkè ata̤sǔ nî̌꤮. Plûkè kè̌khî lû̌û ta̤sǔ tôpwa̤ kû̌ tôpwa̤ pô̤̌ Běcǎ plûkè sî ta̤sǔ nunî̌꤮. ^f 14Dǒ ta̤lǒ̤꤮ bò tokhlǒ aklanu, ta̤ dǒ a lûdû̌lǒ tôcǒmî̌, mô̤ǐ kè̌khî lû̌û tôpwa̤ kû̌ tôpwa̤ nuhǒ. Sî kè̌ ma̤pô̤̌nu mî̌, sî ô̌cuô̌plǒ wô̤̌wô̤̌ lû̌û dǒ ta̤tôcǒ꤮ nô̤̌ akû hǒ.

15Lǒ̤꤮ bò sî tokhlǒ numî̌ sî htû bòkè Khrǐ anǎ̤glǒ dě Cǒmara rû̌htò̌ sî dǒ sî ma̤kla kè̌khî lû̌û tôpwa̤ kû̌ tôpwa̤ hǒ. Ma̤pô̤̌nudě nopǒǐ sî sǎphlǒ kû̌ Khrǐ a ta̤pè̤̌ta̤dû, dě hî̌bwǐhî̌sîrî lô̌khô Cǒmara nî̌꤮. 16No ô̌měô̌gle lǒbe Khrǐ alě̤ayô̤̌ dǒ sî sǎphlǒkû nî̌꤮. Sî gǔ sû̌ǐtòwòǐ kè̌khî lû̌û tôpwa̤ kû̌ tôpwa̤, dě sî gǔ dǐsè̌rè̌ kè̌khî lû̌û tôpwa̤ kû̌ tôpwa̤ bǎ ta̤sî̌jò̌ ô̌ kû̌ sî nunî̌꤮. Sǎwǐhtûsò̌htò̌ lô̌khô Cǒmara kû̌ sî ta̤hî̌bwǐhî̌sîrî lû̌û dǒ sî sǎphlǒkû nî̌꤮. Sǎwǐsǎshô̌ lô̌khô Cǒmara kû̌ alî̤ sǎwǐ nutokhlǒ lǒ̤bò nî̌꤮. ^g 17Sî hî̌bǎ bǎbǎ, sî ma̤ta̤ titètè̌꤮ bǎbǎ, kè̌ Běcǎ Yeshǔ Khrǐ amǐ̤sǎ dě ma̤ lô̌khô nî̌꤮. Dǒ Běcǎ Yeshǔ Khrǐ akhû̌akhî, dě hî̌bwǐhî̌sîrî htû̌sò̌htò̌ lô̌khô Cǒmara nî̌꤮.

Khûpò̌lǔ nè̌klè̌nè̌klò hǐphû̌phòphû̌ tokhlǒ

18Masî jûlě̤phî̌yô̤̌ sîwṳ̂ ayô̤̌, ma̤titè̌hî̌dě sî mî̌ ta̤dòkûphû̌ tokhlǒ akhû̌akhî, sî tô ma̤ lô̌khô pô̤̌nu. ^h

19Wṳ̂sî mô̤ǐ lô̌khô sîma dě sǎhtǎdû̌da, ma̤pò̤̌ma̤sha tǎ̤ asî tǎ̤mǎ̤. ⁱ

20Phû̌sî ganǎ̤de lô̌khô mǒ̤pha ayô̤̌ dǒ ta̤pṳ̂̌꤮ tocǒ akû nî̌꤮, ma̤titèhî̌dě, ganǎ̤de mǒ̤pha ayô̤̌ mî̌ atôabǎ kû̌ Běcǎ asǎphlǒ. ^j

21Phasî ma̤sha tǎ̤ sîphû̌sîli̤ asǎphlǒ tǎ̤mǎ̤ nî̌꤮, ma̤titèhî̌dě hî̌pěmî̌ asî sǎphlǒpî̌ hè̌꤮. ^k

22Jû̌sî ganǎ̤de lô̌khô sîběcǎ tokhlǒ ayô̤̌ dǒ ta̤lǒ̤bò akû nî̌꤮. Sî sǎyṳ nǐ̤bǎ a ta̤htû̌sò̌ sî dě sî ma̤wô̌ lô̌khô pwǎtǒ̤ bǎ a lô̤mô̤̌ pwǎ. Ma̤ lô̌khô pô̤̌nu tǎ̤mǎ̤ nî̌꤮. Ma̤wô̌ lô̌khô pṳ̂̌꤮ taplǎ dǒ ta̤sǎphlǒcǒ sǎphlǒtè̤ akû nî̌꤮. Ma̤titèhî̌dě, dǒ sî bè̌dubè̌nǎ̤ lô̌khô Cǒmara akhû̌akhî, tûlû̌ ma̤wô̌ lô̌khô nî̌꤮. ^l 23Sî ma̤ titètè̌꤮ bǎbǎ, bè̌ lô̌khô sî sǎphlǒ pô̤̌ sî ma̤ Běcǎ ata̤ma̤nu, dě ma̤ shapwǎ̤shèpwè̤ lô̌khô. Gènè̤ lô̌khô tǎ̤ pô̤̌ sî ma̤ bǎ kòyòhǎkhû̌phû̌ ata̤ma̤nu tǎ̤mǎ̤ nî̌꤮. 24Ma̤wô̌ lô̌khô sî ta̤ma̤ nî̌꤮, ma̤titèhî̌dě sî sî̌ganǎ̤ kû̌ Běcǎ gǔ ǐ sî û̌tě̤û̌ca pô̤̌ sî ma̤nu pě. Běcǎ dǒ sî ma̤ bǎ lû̌û tôpwa̤ numî̌ Běcǎ Khrǐ nuhǒ. 25Cǒmara gǔ cî̌htò̌ kòyò dǒ a ma̤sǔta̤ nutokhlǒ pě. Cǒmara cî̌htò̌ ta̤nu, a kè̌dû̌ kè̌pî̌tî̌ tô̤̌. ^m