Col 4 | KxfSCKXF | STEP | Jû̌ běcǎ sî ma̤wô̌ lô̌khô sîjû̌ nî̌꤮, jî̌cǒjî̌tè̤ lô̌khô sǎphlǒ dǒ asî akhû̌ nî̌꤮, kè̌dû̌kè̌pî̌tî̌ tǎ̤ kòyò tǎ̤mǎ̤ nî̌꤮, ma̤titèhî̌dě sî sî̌ganǎ̤ kû̌ sî Běcǎ ô̌ dǒ mǒkhû̌ hǒ.

Colossians 4

1 Jû̌ běcǎ sî ma̤wô̌ lô̌khô sîjû̌ nî̌꤮, jî̌cǒjî̌tè̤ lô̌khô sǎphlǒ dǒ asî akhû̌ nî̌꤮, kè̌dû̌kè̌pî̌tî̌ tǎ̤ kòyò tǎ̤mǎ̤ nî̌꤮, ma̤titèhî̌dě sî sî̌ganǎ̤ kû̌ sî Běcǎ ô̌ dǒ mǒkhû̌ hǒ. ^a

Ta̤sû̌ǐtòwòǐ tokhlǒ

2 Kwicaba shapwǎ̤ lô̌khô Cǒmara dě sî̌ya kwicabahtò̌ sǎlala a nî̌꤮. Ô̌sòklò lô̌khô, dě ô̌ lô̌khô kû̌ ta̤hî̌bwǐhî̌sîrî htò̌ a nî̌꤮. 3 Dǒwǐkha mî̌ kòyò tokhlǒ sî̌ganǎ̤ Khrǐ awe̤akè tô̤̌. Cǒmara bè̌hǔbè̌sè̌ Khrǐ awe̤akè. Bǎbǎkǎlè khònò̤̌ ta̤dǒû̌dǒshò̌nu a ô̌lṳ̌htò̌ hǒ. Pô̤̌khô Cǒmara gǔ bǔmô paklè̌ dǒ pa gǔ shôbǐǐlṳ̌ kòyò kû̌ Khrǐ awe̤akè nudě, kwicaba padô̌ lô̌khô dǒ paya nî̌꤮. Dǒwǐkha mî̌ ta̤bè̌û̌bè̌shò̌nu, a ô̌lṳ̌htò̌ khôtô̤̌, bǎbǎkǎlè khònò̤̌ a ô̌lṳ̌htò̌ hǒ. Dǒ he shôbǐǐlṳ̌ bǎ kòyò kû̌ Khrǐ awe̤akè akhû̌akhî, kòyò dǒtě̤ he dǒ apô̤kû pwǎ. 4 Pô̤̌ he tô shôbǐǐ bǎ kòyònu, pô̤̌khô he gǔ shôbǐǐ phlôphǎwô̌ bǎ dǒ kòyò aya nudě, kwicaba padô̌ lô̌khô dǒ heya nî̌꤮. 5 Jò̌gènè̤ lîmò lô̌khô dě jî̌sara sînǎ̤ dǒ kòyò dǒ a yṳ̌ǎ Khrǐ tô̤̌ tokhlǒ alô̤mô̤̌ nî̌꤮. Bǎkhò̌tè꤮ bǎbǎ, bǎ sî nǐ̤bǎ ta̤shěta̤khǎ wô̌ dǒ sî gǔ ma̤ ta̤wô̌ akhanu, tûlû̌ ma̤wô̌ lô̌khô pṳ̂̌꤮ taplǎ nî̌꤮. ^b 6 Pô̤̌khô sî gǔ sî̌ganǎ̤ lô̌khô kû̌ sî tô hî̌shěshu getîkhîjò bǎ kòyò pṳ̂̌꤮ tôpwa̤ hî̌tèhî̌tè ayanu, hî̌bǎjǎhî̌bǎmô̤, hî̌bǎ cî̌nǐ̤ gû̌ lô̌khô kòyò sǎphlǒ nî̌꤮.

Ta̤hî̌mô̤hî̌wô̌ dǒ gutṳ̌kò

7 Khûtǔkǐkǔ gǔ shôbǐǐ bò bǎ sî kû̌ hewe̤hekè pě. ^c A mî̌ pṳ̌wè̤̌ dǒ kòyò mô̤ǐ yǎ tôpwa̤, htokhôtô̤̌ a mî̌ kòyò tôpwa̤ dǒ acǒ kû̌ Cǒmara ata̤ma̤, dě a ma̤ Běcǎ ata̤ma̤ dě a ma̤ ta̤ kû̌ pa tôpwa̤. ^d 8 Pô̤̌khô a gǔ shôbǐǐlṳ̌ bǎ sî kû̌ pawe̤pakè lǒ̤bò, htokhôtô̤̌ pô̤̌khô a gǔ ǐkhû̌ǐǎ ma̤mô̤ǐ sî sǎphlǒ ayanu, he sûlò̤ a dǒ sî ô̌ hǒ. 9 Khûò̌nesamǔ gǔ hèlò̤ kû̌ a pě. A mî̌ kòyò dǒ acǒ kû̌ ayô̤̌ dě kòyò mô̤ǐ yǎ tôpwa̤. A mî̌ sî dokûphû̌ tûû̌ pwǎ. Asî gǔ shôbǐǐ bǎ bò sî kû̌ lǒ̤bò ta̤htûhtò̌ anǎ̤ bǎo nutokhlǒ pě. ^e

10 Khûarǐshataku dǒ kòyò dǒtě̤ a kû̌ he hǒtôpwa̤ sûhè padô̌ sî ata̤hî̌mô̤hî̌wô̌, htodě Khûbanabǎ tôûbû Khûmakǔ sûhè padô̌ sî ata̤hî̌mô̤hî̌wô̌ dǒ sî ô̌ô̌. ^f (Sî nǐ̤bǎ hto lî̤ dǒ kòyò wě̤lṳ̌ bǎ sî kû̌ Khûmakǔ awe̤akè nuhǒ. A kè̌ hètǒ̤ dǒ sî ô̌ pě dě kaǎmô̤ shěshuwô̌ yǎ nî̌꤮.) ^g 11 Khûyûshǔ dǒ kòyò kaǎ a kû̌ Khûyǔsatu nutôpwa̤ sûlò̤ a ta̤hî̌mô̤hî̌wô̌ dǒ sî ô̌ô̌. Yǔdaphû̌ dǒ a yṳ̌ǎ Khrǐ tokhlǒ aklanu, pwa̤ dǒ a ma̤ ta̤ kû̌ he dǒ Cǒmara ashiagǎ ayanu, mî̌ a ô̌pwǎ sò̌su pwǎ. Asî mî̌ a ma̤mô̤ jî̌ he sǎphlǒ. 12 Khûepapra mî̌ sî dokûphû̌ tôpwa̤pwa̤. A mî̌ a htû Khrǐ ajû̌ tôpwa̤. A hî̌mô̤hî̌bǎwô̌ hèǐ sî. A sǎphlǒshû̌ dě a kwicaba taga bǎ dǒ sîya pô̤̌khô sî gǔ ô̌měô̌gle dǒ sî ta̤yṳ̌ta̤nǎ̤ akû dě sî gǔ dû̌htò̌bò̌pû lô̌khô dǒsû̌dǒsò̌ tôkhô, htokhôtô̤̌ pô̤̌khô sî gǔ yṳ̌ǎ sî̌ganǎ̤hè tě̤tě̤mè̤̌mè̤̌ pô̤̌ Cǒmara a ta̤sǎyṳ pṳ̂̌꤮ tôcǒ ayanudě, a kwicaba bǎ dǒ sîya. ^h 13 He khòlṳ̌ dǒ aya kû̌ a mî̌ kòyò tôpwa̤ dǒ a jî̌pwǐ̤ jî̌le dǒ sîya kû̌ Wî̤̌lò̤dǐkǐphû̌ tokhlǒ aya kû̌ Wî̤̌hî̌rû̌palǐphû̌ tokhlǒ aya. 14 Ta̤khû̌saradû̌ Khûlǔka dǒ pa mô̤ ǐ yǎ nutôpwa̤ kû̌ Khûdemǎ nu, sûlò̤ padô̌ a ta̤hî̌mô̤hî̌wô̌ dǒ sî ô̌ô̌. ⁱ 15 Khòsǎdô sûcû̌ pû pa ta̤hî̌mô̤hî̌wô̌nu dǒ pa pṳ̌wè̤̌ Wî̤̌lò̤dǐkǐphû̌ tokhlǒ kû̌ pa pṳ̌wè̤̌ Mǒ̤nûpha kû̌ ta̤dòkû ô̌dǒ ahǐkû nutokhlǒ nî̌꤮.

16 Dǒ sî Kòlòtè̌ ta̤dòkûphû̌ tokhlǒ dô̌hto palî̤nu pědě, ǐ padô̌ Lò̤dǐkǐ ta̤dòkûphû̌ nutokhlǒ pě nî̌꤮. Htodě dô̌pô̤̌ lô̌khô helî̤ dǒ he sûlò̤ bǎ asînu pě nî̌꤮.

17 Shôbǐǐ padô̌ Khûakǐpǔ kû̌, “Ta̤phǐta̤ma̤ dǒ Běcǎ ǐlò̤ na nunî̌, ma̤htokè yǎ,” hî̌ a pô̤̌nu nî̌꤮. ^j 18 He mî̌ Khûpò̌lǔ dě ta̤hî̌mô̤hî̌wô̌ numî̌, he wě̤cû̌bǎ sî kû̌ he cǔde pwǎ. He ô̌ dǒ a pô̤kûnu akhû̌akhî, shepě̤ tǎ̤ he tǎ̤mǎ̤ nî̌꤮. Cǒmara abwǐsîrî ô̌cu pû kû̌ sî nî̌꤮.