Ephesians 1
1He mî̌ Khûpò̌lǔ. Cǒmara sǎphlǒô̌ dǒ he gǔ htû Yeshǔ Khrǐ a pwa̤nophû̌ tôpwa̤. He wě̤cû̌bǎ lî̤hǒtôbǎ dǒ Cǒmara a kòyò dǒ a ô̌ lô̌khô dǒ Wî̤̌ěphěsu akû nutokhlǒ a ô̌. Sî mî̌ kòyò tokhlǒ dǒ a htûhtò̌ kû̌ Khrǐ tôcǒ꤮ nô̤̌ hǒ dě, sî wîkè sî ta̤yṳ̌ǎ Yeshǔ Khrǐ tô̤̌. a 2Papha Cǒmara kû̌ Běcǎ Yeshǔ Khrǐ ǐpû sî ta̤bwǐta̤sîrî kû̌ ta̤gûjû̌kabǎ nî̌꤮.A ta̤ǐshowî̤ dǒsû̌dǒsò̌ tôkhô dǒ Khrǐ akû
3Pa htû̌sò̌htò̌ wô̤̌wô̤̌ lû̌û pa Běcǎ Yeshǔ Khrǐ apha Cǒmara nutôpwa̤ tǎ꤮. A ǐlò̤ pa ta̤ǐshowî̤ pṳ̂̌꤮ tôcǒ dǒ a ô̌ dǒ mǒkhû̌ hènu, dě a gǔ ma̤jè̌ pa dǒsû̌dǒsò̌ tôkhô ata̤lṳ̂bǎ nutokhlǒ pě. Bǎ pa nutokhlǒ kû̌ Khrǐ htûhtò̌ lû̌û tôcǒ꤮ nô̤̌ akhanu, a ǐlò̤ bòkè pa nutokhlǒ hǒ. 4Ma̤titèhî̌dě, dǒ Cǒmara a lô̤mô̤̌ pěnu, pô̤̌khô pa gǔ plò̌shǐ dě kòyò gǔ bè̌jò pe pa ta̤sǔ tôcǒ꤮ tô̤̌ ayanu, a rû̌htò̌ pa dǒ Khrǐ akû, dǒ a bô̌lò̤ hǎkhû̌ nò̌khôtô̤̌ akhapenu hǒ. 5Cǒmara mô̤nṳ̌ pa akhû̌akhî, dǒ a bô̌lò̤ hǎkhû̌ nò̌khôtô̤̌ pe a bè̌lò̤ hto asǎphlǒ kû̌ a gǔ bǔǐ pa pô̤̌ aphû̌ali̤ kû̌ anǎ̤nu pě. Dǒ a gǔ ma̤ pô̤̌o ayanu, a gǔ noma̤ tutṳ̌ kû̌ Yeshǔ Khrǐ pě. A ma̤ pô̤̌o numî̌ amè̤̌pwǎ jû̌ asǎphlǒ sǎyṳ ma̤ kû̌ a ta̤yè̤lò̤ tûû̌ pwǎ. 6A ǐlò̤kwe pa sû mî̌ a phû̌pwa̤khû dǒ a mô̤ǐ nutôpwa̤ akhû̌akhî, pa htû̌sò̌htò̌ wô̤̌wô̤̌ lû̌û Cǒmara abwǐdû̌sîrîhtû nutǎ꤮. 7Dǒ Khrǐ tṳ̌sikhòsi anǎ̤ dě asǐ sǐlò̤ akhû̌akhî, Cǒmara htè̌ge hto pa hǒ, dě a plûkè bò pa ta̤sǔ hǒ. Cǒmara abwǐsîrî nî̌ adû̌ayô̤̌ jî̌jî̌ dǒ paya hǒ. b 8Cǒmara glǒlò̤lò̌lò̤ betǐpǐ bǎ pa abwǐdû̌asîrîhtû dě, a ǐ bò pa a ta̤sî̌ta̤jò̌ tokhlǒ kû̌ a ta̤sî̌khû̌sî̌ya pṳ̂̌꤮ tôcǒ. 9Dě a dǔlè̌lṳ̌ hto pa kû̌ a tîwî̌tòwòhǔsè̌ nuhǒ. A bè̌lò̤ hto asǎphlǒ dǒ a gǔ ma̤lǒhtò̌ ma̤behtò̌ a tîwî̌tòwòhǔsè̌nu kû̌ Khrǐ hǒ. Hǒnumî̌ amè̤̌kû̌ dǒ a sǎyṳ dǔlè̌lṳ̌ bǎ pa kû̌ a tîwî̌tòwòhǔsè̌ nuhǒ. 10Htû̌꤮ shěkhǎ hètôhèbǎ pěnu, Cǒmara gǔ ma̤lǒhtò̌ ma̤behtò̌ a ta̤tîwî̌tòwò nǎ nutokhlǒ pě. Lǒ̤bò ta̤dǒ a ô̌ dǒ mǒkhû̌ nutokhlǒ bǎbǎ, lǒ̤bò a ô̌ dǒ hǎkhû̌ nutokhlǒ bǎbǎ, a gǔ ma̤plǒma̤cu bò lû̌û dǒ a ikǒlǒkòdû̌lǒ Khrǐ nutôpwa̤ alǎ̤ pě. 11Dǒ Khrǐ khû̌khîdě, Cǒmara rû̌htò̌ pa kû̌ pa gǔ htûhtò̌ a kòyò hǒ. ▼▼pa htûhtò̌kè Cǒmara a û̌tě̤û̌ca.
A bè̌lò̤ hto asǎphlǒ akhû̌akhî, a ma̤ pô̤̌nu hǒ. A ma̤htûhtò̌ bòkè ta̤pṳ̂̌꤮ tocǒ pô̤̌ a sǎyṳ ma̤nu hǒ. 12Pô̤̌khô pa gǔ bè̌ pa ta̤kè̌shuǐ dǒ Khrǐ akûnu dě, a ma̤ bǎ pa pô̤̌nu hǒ. Pa Yǔdaphû̌ tokhlǒ mî̌ kòyò dǒ a kè̌shuǐ wǐ Khrǐ tokhlǒ hǒ. Dǒ pa kè̌shuǐ pô̤̌nu akhû̌akhî, kòyò gǔ htû̌sò̌ Cǒmara a ta̤bwǐdû̌sîrîhtû gutṳ̌ nutokhlǒ pě. 13Sî dě, bǎ sî ganǎ̤de ta̤tě̤ta̤mè̤̌, ta̤sǎlě̤we̤kè dǒ a ma̤hǎplǎge sî awe̤akè akhanu, sî yṳ̌ǎ dě sî htûhtò̌ tôcǒ꤮ nô̤̌ kû̌ Khrǐ hǒ. Dǒ sî yṳ̌ǎ Khrǐ akhû̌akhî, a ǐlò̤ sî Yôla Plò̌shǐ Běcǎ dǒ a olò̤ nǎ htonu hǒ. Yôla Plò̌shǐ Běcǎ nî̌ a sô̌sô̌ kû̌ ta̤ma̤mǎnǎ tôcǒ dǒ a dǔlè̌lṳ̌ kû̌ sî htû Cǒmara a kòyò hǒ. 14Yôla Plò̌shǐ Běcǎ nî̌ asô̌sô̌kû̌ ta̤olò̤ aměagle tôcǒ dǒ a dǔlè̌lṳ̌ kû̌ Cǒmara olò̤ bò dǒ a gǔ ǐ pa pě tokhlǒnu, pa gǔ nǐ̤bǎ pě. Htû̌꤮ Cǒmara a htè̌ge pa a ta̤phǐta̤ma̤nu ahtoaphlǔ bòkè pě akhanu, a gǔ ǐ pa û̌tě̤û̌ca nutokhlǒ pě. Pô̤̌nudě kòyò gǔ htû̌sò̌htò̌ Cǒmara a ta̤sîrîdû̌sîrîhtû nutokhlǒ pě. Khûpò̌lǔ kwicaba bǎ Khrǐphû̌ dǒ Wî̤̌ěphěsu akû nutokhlǒ aya
15Cǒmara ǐshowî̤ pa pô̤̌nuhǒ akhû̌akhî, sahtò̌ bǎ he ganǎ̤de kû̌ sî yṳ̌ǎ Běcǎ Yeshǔ Khrǐ dě sî mô̤ǐ Cǒmara a kòyò akhanu, 16He hî̌bwǐhî̌sîrî Cǒmara dǒ sîyanu, a ahtò̌tṳ̌pè̤̌pe tôkhò̌꤮ tô̤̌. He kwicaba bǎkhò̌tè bǎbǎnu, he gènè̤ htò̌nṳ̌sô̌ sî. 17He kwicaba padô̌pe dǒ pa Běcǎ Yeshǔ Khrǐ a Cǒmara, amè̤̌kû̌ papha dǒ ata̤bwǐdû̌sîrîhtû apô̤aphǎ nutôpwa̤ a ô̌. Dě pô̤̌khô sî gǔ sî̌yahè tě̤tě̤mè̤̌mè̤̌ wô̌khlo pô̤̌ Cǒmara ayanu, he kwicaba kû̌ Yôla Plò̌shǐ Běcǎ gǔ ǐ sî ta̤sî̌ta̤jò̌, dě a gǔ dǔlè̌lṳ̌ bǎ sî kû̌ Cǒmara pě. 18Pô̤̌khô sî gǔ sî̌yaphlôwô̌ kû̌ kòyò ta̤ma̤ cô̌klǐcô̌sè dǒ a olò̤ bǎhto a kòyò dǒ a kaǎ ǐ lû̌û nutokhlǒ ayanu, he kwicaba dǒ a gǔ dǐsî̌nǎ̤phlô bǎ sî pwǎ. Cǒmara ǐ kwè̌ a kòyò tokhlǒ û̌tě̤û̌ca dǒ alě̤dû̌pwî̤htû, awî̤awô̌ tokhlǒ kwè̌ titènu, he sǎyṳ nosî̌ganǎ̤ tě̤tě̤mè̤̌mè̤̌ sî. 19Htokhôtô̤̌ a ta̤pô̤ta̤phǎ dǒ a gǔ ma̤jè̌ bǎ kòyò dǒ a yṳ̌ǎ lû̌û tokhlǒnu, adû̌ pwǐ tènu, he sǎyṳ nosî̌ganǎ̤ sî dě he kwicaba bǎ dǒ sîya pwǎ. Ta̤pô̤ta̤phǎ numî̌ a ta̤siwi̤sòwò̤ asô̌sô̌kû̌, 20Ta̤pô̤ta̤phǎ dǒ Cǒmara ma̤htûpwa̤ getîkhî sô̌ Khrǐ dǒ ta̤si nutôcǒ kû̌ ta̤pô̤ta̤phǎ dǒ a nohǎnòò̌ lû̌û dǒ mǒkhû̌ dǒ acǔde cǔtômû nutôkhô nuhǒ. d 21Lǒ̤bò pwa̤pǒta̤ dǒ mǒkhû̌ tokhlǒ, lǒ̤bò mǒkhû̌ a ta̤siwi̤sòwò̤ tokhlǒ, lǒ̤bò mǒkhû̌ a ta̤pô̤ta̤phǎ tokhlǒ kû̌ mǒlǎ̤ aběcǎ nutokhlǒ lǒ̤bò akhû̌nu, Khrǐ htûdû̌khlo bò dǒ asîkhû̌ hǒ. A mi̤dû̌mi̤htû numî̌, mi̤ dǒ kòyò gǔ pô̤htò̌ anu tôhtu bǎbǎ, dǒ nô̌kò tôhtu pě nubǎbǎ, a htò̌yô̤̌ lǒkhlo mi̤ dǒ kòyò bè̌htò̌ yǎnuhǒ. 22Cǒmara noô̌ bò ta̤pṳ̂̌꤮ tocǒ dǒ Khrǐ a ta̤pǒalǎ̤ hǒ. Cǒmara rû̌htò̌ lû̌û dǒ a gǔ htûhtò̌bò ta̤pṳ̂̌꤮ tocǒ a ikǒlǒkò dǒ ta̤dòkû aya hǒ. 23Ta̤dòkû mî̌ Khrǐ anǎ̤glǒ. Ta̤dòkû numî̌ alǒbehtò̌ jò pwǎ kû̌ Khrǐ a ta̤ô̌htûpwa̤ pwǎ. Pwa̤ dǒ a ma̤lǒhtò̌behtò̌ ta̤pṳ̂̌꤮ tocǒ kû̌ gûlǎ̤ pṳ̂̌꤮ tûkû numî̌ tǒ̤pwǎ Khrǐ tôpwa̤ nô̤̌pwǎ. e
Copyright information for
KxfSCKXF