Eph 3 | KxfSCKXF | STEP | Pô̤̌nudě, dǒ he ma̤ Khrǐ a ta̤phǐta̤ma̤ dě he shôbǐǐ bǎ Yǔdaphû̌ mè̤̌tô̤̌ tokhlǒ kû̌ ta̤sǎlě̤we̤kènu akhû̌akhîdě, he mî̌ Khûpò̌lǔ, kòyò bǎ dǒlò̤kè he dǒ apô̤kû.

Ephesians 3

Cǒmara no Khûpò̌lǔ kû̌ a gǔ shôbǐǐ bǎ Yǔdaphû̌ mè̤̌tô̤̌ tokhlǒ

1 Pô̤̌nudě, dǒ he ma̤ Khrǐ a ta̤phǐta̤ma̤ dě he shôbǐǐ bǎ Yǔdaphû̌ mè̤̌tô̤̌ tokhlǒ kû̌ ta̤sǎlě̤we̤kènu akhû̌akhîdě, he mî̌ Khûpò̌lǔ, kòyò bǎ dǒlò̤kè he dǒ apô̤kû.

2 Cǒmara abwǐsîrî akhû̌akhîdě, a ǐlò̤ he ta̤ma̤ dǒ he gǔ ma̤jè̌ bǎ sî numî̌, he yṳ̌ǎ kû̌ sî ganǎ̤de hto tûû̌ hǒ. 3 Cǒmara dǔlè̌lṳ̌ bǎ he kû̌ ta̤adû̌ayô̤̌ dǒ kòyò sî̌yahtò̌ yǎ tô̤̌nu, he wě̤lṳ̌ sî̌ganǎ̤cû̌ bǎ hto sî dǒ lî̤nu tôbǎ akûnu tukutîkî̌phû̌ hǒ. 4 Dǒ꤮ sî dô̌ pe helî̤ akhanu, sî gǔ sî̌ganǎ̤hè kû̌ he sî̌yaphlôbò̌ ta̤sûû̌yô̤̌ dě ta̤sûû̌yô̤̌ numî̌ amè̤̌kû̌ Khrǐ awe̤akè nuhǒ. ^a 5 Ta̤sûû̌yô̤̌nu, Cǒmara dǔlè̌lṳ̌ padô̌ kòyò dǒwǐkha nutokhlǒ tô̤̌. Bǎbǎkǎlè khònò̤̌ dǒ Yôla Plò̌shǐ Běcǎ akhû̌akhîdě a dǔlè̌lṳ̌ bǎ a pwa̤nophû̌ dǒ aplò̌shǐ nutokhlǒ kû̌ apô̤phǎ aplò̌shǐ nutokhlǒ hǒ. 6 Cǒmara a ta̤cǒta̤yô̤̌ dǒ kòyò sî̌yahtò̌ tô̤̌ numî̌ amè̤̌pwǎ Cǒmara ǐlò̤bǎ Yǔdaphû̌ ta̤ǐshowî̤ nuhǒ. Dě ta̤ǐshowî̤ tokhlǒnu, sî Yǔdaphû̌ mè̤̌tô̤̌ tokhlǒ nǐ̤bǎ wô̤̌ sô̌sô̌ kû̌ asî nuhǒ. Yǔdaphû̌ mè̤̌tô̤̌ tokhlǒ kû̌ Yǔdaphû̌ tokhlǒnu, a htû lû̌û nǎ̤ tôpwa̤ nô̤̌hǒ. Lǒ̤bò Cǒmara olò̤kè a kòyò tokhlǒnu, sî Yǔdaphû̌ mè̤̌tô̤̌ tokhlǒ gǔ nǐ̤bǎ wô̤̌wô̤̌ kû̌ asî hǒ. Dǒ sî yṳ̌ǎ ta̤sǎlě̤we̤kè dě sî htûhtò̌kè kû̌ Yeshǔ Khrǐ tôcǒ nô̤̌ akhû̌akhî, sî nǐ̤bǎ bòkè ta̤ǐshowî̤ nutokhlǒ hǒ.

7 Cǒmara abwǐsîrî a ta̤ǐkwenu kû̌ a ta̤pô̤ta̤phǎ akhû̌akhî, dě a ǐlò̤ he ta̤ma̤nu dǒ he gǔ bǎ shôbǐǐ bǎ kòyò kû̌ ta̤sǎlě̤we̤kè nuhǒ. 8 Dǒ Cǒmara kòyò tokhlǒ aklanu, he mî̌ kòyò dǒ atôagwǎ gû̌ kòyò tîkî̌꤮ tô̤̌ tôpwa̤. Pô̤̌nu bǎbǎkǎlè Cǒmara ǐlò̤ he ta̤bwǐta̤sîrînu kû̌ he gǔ shôbǐǐlṳ̌ bǎ Yǔdaphû̌ mè̤̌tô̤̌ tokhlǒ kû̌ Khrǐ a ta̤lě̤dû̌pwî̤htû dǒ kè̌lǎsî̌ya bò̌ awe̤akè tô̤̌ nutokhlǒ. 9 Cǒmara gǔ ma̤lǒbehè a ta̤tîwî̌tòwònǎ ta̤ adû̌ayô̤̌ tôcǒ hî̌tè pěnu, a ǐlò̤ hto he ta̤ma̤ dǒ he bǎ cû̌ shôbǐǐphlô bǎ kòyò ta̤nuhǒ. Ně dǒ a tûlû̌hto tokhlǒnu, Cǒmara dǒ a bô̌lò̤ ta̤ lǒ̤bò tôpwa̤nu, a dǔlè̌lṳ̌ bǎ kòyò ta̤nu nò̌khôtô̤̌. 10 Khònò̤̌dě pô̤̌khô pwa̤pǒta̤ dǒ mǒkhû̌ kû̌ mǒkhû̌ a ta̤siwi̤sòwò̤ tokhlǒ gǔ kè̌shǐ sî̌ganǎ̤ Cǒmara ô̌ kû̌ a ta̤sǐta̤jò̌ pwǐ꤮ tè, dě a dǔlè̌lṳ̌ bǎ asî kû̌ a ma̤htûhtò̌ ijò kû̌ Yǔdaphû̌ dǒ a htû Khrǐphû̌ tokhlǒ kû̌ Yǔdaphû̌ mè̤̌tô̤̌ dě a htû Khrǐphû̌ tokhlǒnu, a ma̤htû lû̌û tômṳ̌꤮ nô̤̌ pô̤̌ a ta̤dòkû tômṳ̌nô̤̌ nuhǒ. 11 Cǒmara bè̌lò̤ hto asǎphlǒ dǒ a gǔ ma̤ pô̤̌o numî̌ dǒ a bô̌lò̤ hǎkhû̌ khôtô̤̌ akha pe. Khònò̤̌ dǒ pa Běcǎ Yeshǔ Khrǐ ma̤phlǔma̤htokè bò bǎ pa akhû̌akhî, Cǒmara ma̤lǒma̤be hto a ta̤tîwî̌nǎ nuhǒ. 12 Dǒ pa yṳ̌ǎ Khrǐ, htodě dǒ pa htûhtò̌kè ta̤tôcǒ꤮ nô̤̌ kû̌ Khrǐ akhû̌akhî, khònò̤̌ pa gǔ hènṳ̌ dǒ Cǒmara a ô̌ kû̌ ta̤yṳ̌ǎ tûû̌ anǎ̤ kû̌ ta̤khuta̤he numî̌ anǐ̤ hǒ. 13 Ma̤pô̤̌nudě, he kwisǎyṳ sî, dǒ he khòbǎ ta̤jî̌ta̤jû̌ dǒ sîyanu, sǎphlǒpî̌ tǎ̤ lô̌khô tǎ̤mǎ̤ nî̌꤮. He khòbǎ pô̤̌o numî̌ sî lǎ̤nǐ̤bwǐ nǐ̤sîrî ayapwǎ.

Khûpò̌lǔ kwicaba bǎ sô̌ Ěphěsuphû̌ tokhlǒ aya

14 Dǒ ta̤we̤ta̤kènu akhû̌akhîdě, he dô̌gînî̤ kwicaba bǎ sî dǒ hepha a lô̤mô̤̌. 15 Lǒ̤bò mǒkhû̌ a hǐphû̌phòphû̌ tokhlǒnu bǎbǎ, lǒ̤bò hǎkhû̌ a hǐphû̌phòphû̌ tokhlǒnu bǎbǎ, Cǒmara numî̌ asî apha mè̤̌mî̌ca tôpwa̤. 16 Cǒmara a ta̤ǐshôwî̤shôwô̌ ô̌dû̌wî̤ plṳ̂phǎhǒ. Pô̤̌nu akhû̌akhî, he kwihtò̌ a dǒ a no Yôla Plò̌shǐ Běcǎ gǔ ǐlò̤ tutṳ̌ bǎ sî ata̤siwi̤sòwò̤ nudě a gǔ ma̤shû̌ma̤shohtò̌ sô̌ sî sǎphlǒ pěnu. 17 Htokhôtô̤̌ dǒ sî ta̤yṳ̌ta̤nǎ̤ akhû̌akhîdě, pô̤̌khô Khrǐ gǔ hè ô̌měô̌gle dǒ sî sǎphlǒkû ayanudě, he kwicaba bǎ sîya. He kwicaba kû̌ sǔ sǔ sî gǔ mô̤hèǐ Cǒmara, htodě sǔ sǔ sî gǔ mô̤hèǐ tûû̌ lû̌û tôpwa̤ kû̌ tôpwa̤. Sî kè̌ ma̤pô̤̌nu hî̌dě pô̤̌ sǒkhò̌wǐ̤ shǒlò̤yô̤̌nu, sî ta̤mô̤ cû̌yô̤̌ pô̤̌nu pě. Htodě pô̤̌ kòyò bô̌lò̤ měglěwô̌ hǐ tômè akòshî̌nu, sî ta̤mô̤ měglewô̌ sô̌sô̌ pô̤̌nu pě. 18 Htodě Khrǐ mô̤ǐ sî pwǐ꤮ tènu, he kwicaba bǎ sî kû̌ Cǒmara a kòyò aplò̌shǐ tokhlǒ sî̌ganǎ̤hè tě̤tě̤mè̤̌mè̤̌ bò̌bò pě. A ta̤mô̤ pa numî̌ adû̌ayô̤̌ jî̌jî̌, htokhôtô̤̌ a gutṳ̌jò pe tô̤̌. 19 Kòyò sî̌yahtò̌ Khrǐ ata̤mô̤nṳ̌ tôpwǎ̤꤮ tô̤̌ bǎbǎkǎlè pô̤̌khô sî sî̌ganǎ̤ gû̌ kòyò nudě, he kwicaba bǎ sîya. Bǎ sî sî̌yahèhto ata̤mô̤ akhanu, sî nǐ̤bǎ lǒlǒbebebò Cǒmara alǎ̤klô nutokhlǒ pě.

20 Htû̌sò̌htò̌ lô̌khô Cǒmara. Dǒ a ta̤pô̤ta̤phǎ adû̌ayô̤̌nu ma̤ta̤ dǒ pakû akhû̌akhî, a gǔ ma̤bò̌ khlo bǎ pa kû̌ pa kwihtò̌ a nutokhlǒ pě. Tô̤̌mî̌, a ma̤bò̌ khlo bǎ pa kû̌ pa gènè̤ nǎpe pwǎ nutokhlǒ pě. 21 Dǒ Yeshǔ akhû̌akhîdě kòyò pṳ̂̌꤮ tôpwa̤ htû̌sò̌htò̌ bò pû Cǒmara nî̌꤮. Kòyò tôhtu hto tôhtu dǒ a yṳ̌ǎ Yeshǔ Khrǐ tokhlǒnu, a htû̌sò̌htò̌ pû Cǒmara ajû̌jû̌ apwa̤pwa̤ nî̌꤮. Ame̤.