Ephesians 4

Ta̤htûhtò̌ dǒ Khrǐ akû tôcǒ꤮ nô̤̌

1Pô̤̌nu akhû̌akhî, he kwisǎyṳǐ sî sô̌sô̌kû̌ kòyò dǒlò̤tě̤ kò dǒ apô̤kû dǒ Běcǎ aya tôpwa̤nu. Cǒmara kaǎ sî dǒ sî htûhtò̌ ta̤dòkûphû̌ tokhlǒ akhû̌akhî, he kwisǎyṳ sî kû̌ sî ô̌htûpwa̤ bè̌wô̌ sî sǎphlǒ pô̤̌ ta̤dòkûphû̌ tokhlǒ tô ô̌htûpwa̤nu. 2Dǒ sî ma̤ta̤ lǒ̤bò aklanu, sî tôbǎ htû lô̌khô kòyò dǒ a shò̌lò̤ asǎphlǒ dě a sǎdôhôbî̌ tokhlǒ. Htodě khòsǎphlǒhtû lô̌khô lû̌û tôpwa̤ kû̌ tôpwa̤ dǒ ta̤mô̤ lû̌û akûnu nî̌꤮. ^a 3Yôla Plò̌shǐ Běcǎ ma̤plǒma̤cu sî hǒ. Pô̤̌khô sî gǔ ô̌plǒô̌cu lû̌û ayanu, jî̌pwǐ̤ ô̌htûpwa̤ lô̌khô dǒ ta̤pè̤̌ta̤dû akû nî̌꤮. 4Pa nutokhlǒ mî̌ panǎ̤glǒ ô̌cu lû̌û tôpwa̤꤮ nô̤̌ pwǎ, pa nǐ̤bǎcu wô̤̌wô̤̌ lû̌û Yôla Plò̌shǐ Běcǎ tôpwa̤꤮ nô̤̌ pwǎ. Pô̤̌nudě, bǎ Cǒmara kaǎ pa akhanu, a olò̤ kû̌ a gǔ ǐ pa ta̤wô̌nu dǒ nô̌kò pě. Pô̤̌nudě pa lǒ̤bò kè̌shuǐ wô̤̌wô̤̌ lû̌û ta̤nu tôcǒ꤮ nô̤̌ pwǎ. 5Pa Běcǎ ô̌ tôpwa̤pwǎ̤ nô̤̌ pwǎ, pa ta̤yṳ̌ta̤nǎ̤ mî̌ tôcǒ꤮ nô̤̌ pwǎ, htokhôtô̤̌ pa ju wô̤̌wô̤̌ lû̌ shi tôcǒ꤮ nô̤̌ pwǎ. 6Pa Cǒmara ô̌ tôpwa̤꤮ nô̤̌ pwǎ. A mî̌ pa lǒ̤bò apha sô̌sô̌ lû̌û pwǎ. A pǒ sô̌sô̌bò pa, dě a ma̤ tutṳ̌ ta̤ dǒ pa lǒ̤bò akû. A ô̌cu dǒ pa lǒ̤bò akû.

7Bǎbǎkǎlè Khrǐ ǐlò̤ khô̌ pa ta̤sî̌ta̤jò̌ tôpwa̤ kû̌ tôpwa̤ dǒ pa ma̤khô̌ lû̌û a ta̤phǐta̤ma̤ tokhlǒ. Khrǐ ǐpè̤̌ pa ta̤sî̌ta̤jò̌nu, a sǎleǐ lû̌û tô̤̌. 8Lî̤plò̌shǐ wě̤ nǎ numî̌ a hî̌ pô̤̌o. Dě a hî̌ kû̌,

“Bǎ a gehtò̌ dǒ gûlǎ̤htò̌yô̤̌ akhanu, a pṳ̂̌cû̌nṳ̌ pwa̤sǎkhě a dǒ a lò̤jû̌kè lû̌û gûlǎ̤ nutokhlǒ. Dě a ǐ a kòyò tokhlǒ sû hǒ.” ^b

9“A gehtò̌,” yô̤̌mûyô̤̌sǎ mî̌ mî̌titè? “A gehtò̌,” yô̤̌mûyô̤̌sǎ mî̌ a sǎyṳ̌ hî̌ kû̌ Khrǐ hèlò̤ hto dǒ hǎkhû̌ dǒ a yô̤̌lǒnu tôpwa̤ hǒ. 10Kòyò dǒ a hèlò̤ hto dǒ hǎkhû̌ tôpwa̤nu, dě a gehtò̌ dǒ gûlǎ̤htò̌yô̤̌ lǒkhlo kû̌ mǒkhû̌ tokhlǒ nutôpwa̤ mî̌ a tôpwa̤ nô̤̌ pwǎ. Dǒ mǒkhû̌ bǎbǎ, dǒ mǒlǎ̤ bǎbǎ, dǒ hǎkhû̌ gûlǎ̤ bǎtè tûkû̌꤮ bǎbǎ, pô̤̌khô a gǔ ô̌bò gûlǎ̤ pṳ̂̌꤮ tûkûnu dě, a gehtò̌ dǒ mǒkhû̌ pwǎ. 11Pô̤̌khô kòyò htû pwa̤nophû̌ tokhlǒ, kòyò htû piwi̤pèshè tokhlǒ, kòyò htû pwa̤shôbǐǐ ta̤sǎlě̤we̤kè tokhlǒ, kòyò htû ta̤dòkû sara tokhlǒ, kòyò htû pwa̤sû̌ǐ lî̤plò̌shǐ asara tokhlǒnudě, pwa̤ dǒ a ǐlò̤ kòyò ta̤sî̌ta̤jò̌ dǒ a khô̌ lû̌û tokhlǒ tôpwa̤ numî̌ Khrǐ hǒ. 12Pô̤̌khô Cǒmara a kòyò tokhlǒ ô̌ tîwî̌tòwò anǎ̤ kû̌ a glè̌ ma̤ bǎ lû̌û ta̤ma̤ aya, htokhôtô̤̌ pô̤̌khô a glè̌ ǐshû̌ǐshò̌htò̌ ta̤dòkû dǒ a mè̤̌kû̌ Khrǐ anǎ̤glǒ ayanudě, a ǐlò̤ pô̤̌nuhǒ. 13Dě Khrǐ anǎ̤glǒnu a shû̌htò̌shohtò̌ tǒ̤dǒ pa lǒ̤bò ô̌lû̌û kû̌ ta̤yṳ̌ tôcǒ꤮ nô̤̌ kû̌ ta̤sî̌yahè Cǒmara aphû̌khû tôcǒ꤮ nô̤̌ pěnu. Htokhôtô̤̌ pa htûhtò̌ ta̤dòkûphû̌ dǒ a dû̌to̤yobǎ sî̌ya tě̤tě̤mè̤̌mè̤̌ tokhlǒ pě. Ta̤dû̌to̤yobǎ sî̌ya tě̤tě̤mè̤̌mè̤̌ numî̌ amè̤̌kû̌ pa htûhtò̌kè kòyò dǒ a lǒbe sô̌sô̌kû̌ Khrǐ dǒ alǒabe tôpwa̤ nuhǒ.

14Pô̤̌nudě pa mî̌ asô̌sô̌kû̌ phijǎphû̌ dǒ a ûnû̌pe nutokhlǒ mè̤petô̤̌ hǒ. Kòyòkě dǒ a sû̌ǐ lòhô ta̤ tokhlǒnu, a lô̌ǐplò̤ǐ jò pe pa tô̤̌, dě pa yṳ̌ǎsǔ jò pe asî ata̤sû̌ǐtòwòǐ tô̤̌. Pa sô̌sô̌pe kû̌ sǒkhli dǒ gili̤sǎdû̌ dě a plǎ̤ lûhtôlûlò̤ yǎ tôbǎnu mè̤̌petô̤̌. 15Mè̤mè̤̌tôkhônu, pa tô hî̌bǎ khlo dǒ ta̤tě̤ta̤mè̤̌ kû̌ ta̤mô̤nṳ̌ nutokhlǒ. Htodě dǒ pa ma̤ ta̤pṳ̂̌꤮ tocǒ akûnu, pa bǎ htûhtò̌ sô̌sô̌ kû̌ pa Běcǎ Khrǐ dǒ a htû pa ikǒdû̌ nutôpwa̤ hǒ. 16Khrǐ pṳ̂̌mě plǒcubò a kòyò sîtokhlǒ dǒ asô̌sô̌kû̌ kòyò awǐ̤htû̌ kû̌ ayô̤agî̌ dǒ acomě ibò nǎ̤glǒ ayô̤agî̌ dǒ a khô̌ lû̌û nutokhlǒ hǒ. Kè̌ nǎ̤glǒ ayô̤agî̌ tôcǒ kû̌ tôcǒ kè̌ ma̤ tûû̌ ata̤ma̤ dǒ a tô ma̤ tokhlǒ numî̌, nǎ̤glǒ tôpwa̤bò gǔ dû̌htò̌ dě sǔ sǔ ashû̌htò̌ pě. Ta̤dòkû numî̌ a sô̌sô̌ pô̤̌nu hǒhǒ. Ta̤dòkû dǒ ata̤ma̤ khô̌ lû̌û tokhlǒnu, a kè̌ mô̤ǐ kè̌khî lû̌û tôpwa̤ kû̌ tôpwa̤ dě a kè̌ ma̤ tûû̌ tôpwa̤ kû̌ tôpwa̤ ata̤ma̤ numî̌, ta̤dòkû nu gǔ dû̌htò̌ lǒbe tutṳ̌ kû̌ Khrǐ a ta̤pô̤ta̤phǎ akò pě. ^c

Ta̤ô̌htûpwa̤ asa dǒ Khrǐ akû

17Pô̤̌nudě, dǒ Khrǐ ami̤ akû dě he bǎ hî̌shosho nò sî kû̌ ô̌htûpwa̤ lô̌khô tǎ̤ pô̤̌ kòyò dǒ a sî̌ganǎ̤ Cǒmara tô̤̌ nutokhlǒ ô̌htûpwa̤ nutǎ̤mǎ̤. Asî ata̤gènè̤ tokhlǒ numî̌ abwǐsîrî ô̌ tôcǒ꤮ tô̤̌. 18Asî nutokhlǒ mî̌ a sî̌yaphlô bò̌ gû̌ kòyò ta̤tě̤ta̤mè̤̌ tô̤̌. Dǒ asî ikǒpwǐ̤ akhû̌akhî, a sî̌ganǎ̤ gû̌ lô̌khô kòyò Cǒmara aklè̌aklò tô̤̌, dǒ asî sî̌ya lô̌khô Cǒmara aklè̌aklò tô̤̌ akhû̌akhîdě, asî nǐ̤bǎ gû̌ kòyò ta̤htûpwa̤ asa dǒ Cǒmara ǐ nutô̤̌. 19Bǎ asî ma̤sǔ ta̤ akhanu, a gènè̤ sòwò̤̌ ǐtûû̌ pe anǎ̤ tô̤̌. Asî ma̤ pô̤̌ anǎ̤glǒ phěyî̌ a ta̤sǎyṳsǎbǎ kwi asînu, asî ǐlò̤kè anǎ̤glǒ dǒ sǐshiphěyî̌ a ta̤sǎyṳ phû̌mò̤̌ putupatǎ dǒ a gǔ ma̤bò asî sǎphlǒ a ta̤gènè̤ phû̌mò̤̌shǐhtô nutokhlǒ. Dě a sǎyṳ ma̤ sělě pô̤̌ lô̌khô.

20Sî dě, bǎ sî sî̌ganǎ̤hè Khrǐ akhanu, kòyò sû̌ǐbǎ sî kû̌ sî gǔ ô̌htûpwa̤ ma̤pô̤̌nu tôpwǎ̤꤮ tô̤̌. 21Sî dǒ a htûhtò̌ kû̌ Khrǐ tôcǒ꤮ nô̤̌ hǒ tokhlǒnu, he yṳ̌ǎ kû̌ sî ganǎ̤de tě̤tě̤mè̤̌mè̤̌ hto Khrǐ awe̤akè hǒ. Htodě kòyò sû̌ǐ hto bǎ sî ta̤sû̌ǐ dǒ acǒatè̤ dǒ Yeshǔ sû̌ǐ nutokhlǒ hǒ. 22Kòyò sû̌ǐ sî kû̌ sî tôbǎ plû̌tě̤kè sî ta̤ô̌htûpwa̤ ali̤alṳ̂̌ tokhlǒ. Bǎ sî ô̌htûpwa̤ dǒ ta̤ô̌htûpwa̤ ali̤alṳ̂̌ akhanu, sî sǎphlǒ a ta̤sǎyṳ phû̌mò̤̌ tokhlǒnu a tili̤tôlô̌kè sî dě a ma̤ phû̌mò̤̌bò sî sǎphlǒ. ^d 23Kòyò sû̌ǐhto sî kû̌ ma̤sahtò̌ tèplè̌ sî sǎphlǒ a ta̤gènè̤ nutokhlǒ kû̌ Yôla Plò̌shǐ Běcǎ. 24Dě kûhtò̌sô̌htò̌ lô̌khô ta̤ô̌htûpwa̤ asa pô̤̌ Cǒmara bô̌lò̤ sô̌sô̌kû̌ sî kû̌ anǎ̤glǒ ^e dǒ ta̤tě̤ta̤mè̤̌ mè̤̌mî̌ca kû̌ ta̤plò̌shǐ mè̤̌mî̌ca akû nutokhlǒ nî̌꤮. ^f

25Pô̤̌nudě lòhô pe tǎ̤ kòyò tôpwǎ̤꤮ tǎ̤mǎ̤ nî̌꤮. Hî̌bǎcǒhî̌bǎtè̤ lô̌khô kòyò pṳ̂̌tôpwa̤ nî̌꤮, ma̤titèhî̌dě pa mî̌ asô̌sô̌kû̌ nǎ̤glǒ tôpwa̤ nô̤̌, bǎbǎkǎlè ayô̤agî̌ khô̌ lû̌û pô̤̌nupwǎ. ^g 26Sî kè̌ sǎphlǒdû̌ dě ma̤sǔ tǎ̤ ta̤ tǎ̤mǎ̤ nî̌꤮. Lṳmṳ̌lò̤tě̤ khôtô̤̌nu, sî bǎ sǎphlǒdû̌ pe tô̤̌. ^h 27Pô̤̌khô hǎkhû̌tana gǔ cî̌nṳ̌ sî dǒ ta̤sǔ akû tô̤̌nu, bǔmôbǎ aklè̌ tǎ̤mǎ̤ nî̌꤮. Pô̤̌nudě sǎphlǒdû̌ kudǔdǔ lô̌khô tǎ̤mǎ̤. 28Kòyò dǒ a htûpwa̤ ǎhǔ tôpwa̤nu, ǎhǔ sělě pe tǎ̤mǎ̤ nî̌꤮. Pô̤̌khô a gǔ yṳ̂̌ǎyṳ̂̌ô bǎ kòyò pwa̤shèwè̤phû̌ tokhlǒnu, a bǎ gôǎgôwè̤ ǐ ta̤wô̌ dǒ a cǒtè̤nu tokhlǒ.

29Ta̤hî̌bǎ dǒ a htûbwǐhtûsîrî dǒ kòyòya tô̤̌nu, nohǎhtò̌ tǎ̤ dǒ sî gô̌kû tômṳ̂̌ tǎ̤mǎ̤ nî̌꤮. Pô̤̌khô a gǔ nǐ̤khû̌nǐ̤ǎ bǎ kòyò dǒ a ganǎ̤de ta̤ tokhlǒ ayanu, hî̌bǎ lô̌khô pwǎ ta̤hî̌bǎ dǒ a htûbwǐhtûsîrî dě a gǔ ma̤jè̌ kòyò ta̤dû̌htò̌htûhtò̌ nutokhlǒ pwǎ nî̌꤮. Hî̌bǎpwǎ lô̌khô dǒ nǐ̤bwǐnǐ̤sîrî nutokhlǒ pwǎ nî̌꤮. 30Ma̤sǎplǎ̤ tǎ̤ Cǒmara a Yôla Plò̌shǐ tǎ̤mǎ̤. Cǒmara ǐ sî Yôla Plò̌shǐ Běcǎ numî̌, a sô̌sô̌ kû̌ ta̤ma̤mǎnǎ tôcǒ dǒ sî mî̌ Cǒmara ata hǒ. Yôla Plò̌shǐ Běcǎnu, a gǔ ô̌plǒ kû̌ sî tǒ̤dǒ Cǒmara hè ma̤hǎplǎge sî nutôni̤ pě. 31Wîkè pû ta̤sǎphlǒsha, ta̤sǎphlǒdû̌, ta̤klǐ yî̤̌kǒyî̤̌sa lû̌û, ta̤dô̌mi̤dô̌yô̤, ta̤sǎkhě phû̌mò̤̌shî̌htô kòyò pṳ̂̌tocǒ tokhlǒ nî̌꤮. 32Ma̤mô̤ma̤wô̌ kè̌khî lû̌û dě sǎyṳgwèbǎǐ kè̌khî lû̌û tôpwa̤ kû̌ tôpwa̤ nî̌꤮. Dǒ Khrǐ akhû̌akhîdě, Cǒmara plûkè sî ta̤sǔ akhû̌akhî, plûkè kè̌khî lû̌û ta̤sǔ tôpwa̤ kû̌ tôpwa̤ pô̤̌nu nî̌꤮. ⁱ