Ephesians 5

Ô̌htûpwa̤ dǒ ta̤lî akû

1Sî mî̌ Cǒmara aphû̌ali̤ dǒ a mô̤ǐ sîtokhlǒ akhû̌akhî, ô̌htûpwa̤ kè̌lû̌ sô̌sô̌kû̌ lô̌khô pô̤̌ anu nî̌꤮. 2Sî tô ô̌htûpwa̤ lô̌khô hî̌tè numî̌, mô̤nṳ̌ lô̌khô kòyò pṳ̂̌꤮ tôni̤ sô̌sô̌kû̌ Khrǐ mô̤ǐ pa dě a tṳ̌sikhòsi bǎ payanu nî̌꤮. Htokhôtô̤̌ Khrǐ lṳhtò̌ ata̤htûpwa̤ dǒ Cǒmara a lô̤mô̤̌ sô̌sô̌kû̌ ta̤numû̌ dǒ atô Cǒmara asǎphlǒ nuhǒ. ^a

3Sî htûhto Cǒmara a kòyò aplò̌shǐ tokhlǒ akhû̌akhî, ta̤cû̌sǔ pwa̤mǒ̤pwa̤khû, ta̤ma̤ sòwò̤̌ ǐ tûû̌ anǎ̤ kû̌ sǐshiphěyî̌ a ta̤sǎyṳ phû̌mò̤̌ pṳ̂̌tocǒ, tô̤̌mî̌ ǎtṳ̌ǎbǐ kò khû̌ tokhlǒnu, a tôbǎ ô̌ dǒ sîkla tîkî̌꤮ tô̤̌. 4Ta̤hî̌bǎ phû̌mò̤̌shǐhtô, ta̤hî̌bǎ dǒ yô̤̌mûyô̤̌sǎ ô̌tô̤̌ tokhlǒ, ta̤hî̌bǎ putupatǎ tokhlǒnu, atôabǎ tô̤̌ akhû̌akhî, hî̌bǎ lô̌khô tǎ̤mǎ̤ nî̌꤮. Tònò̤̌ sî glè̌ hî̌bǎta̤ pô̤̌nu tokhlǒnu, hî̌bwǐhî̌sîrî htò̌wǐ dǒ Cǒmaranu. 5Sî sî̌ganǎ̤ mè̤̌mî̌cahto kû̌ kòyò dǒ a cû̌sǔnṳ̌plěnṳ̌ pwa̤mǒ̤pwa̤khû, kòyò dǒ a ma̤sòwò̤̌ tûû̌ anǎ̤ kû̌ sǐshiphěyî̌ a ta̤sǎyṳ phû̌mò̤̌ tokhlǒ, kû̌ ǎkǒôbe tûû̌ aya tokhlǒnu, a nǐ̤bǎjò kû̌ kò û̌tě̤û̌ca dǒ Khrǐ kû̌ Cǒmara ashiagǎkûnu tôpwǎ̤꤮ tô̤̌. Kòyò dǒ a ǎkǒôbe tûû̌ aya tokhlǒ numî̌ asô̌sô̌kû̌ cabahtò̌ ta̤yô̤ta̤gî̌ nuhǒ. 6No tili̤talô̌ǐ tǎ̤ sînǎ̤ kû̌ kòyò dǒ a hî̌bǎlòhô dě yô̤̌mûyô̤̌sǎ ô̌tô̤̌ tokhlǒnu tǎ̤mǎ̤ nî̌꤮. Kòyò dǒ a ma̤ ta̤phû̌mò̤̌shǐhtô pô̤̌nu tokhlǒ, dě a ganǎ̤de kû̌ kòyò Cǒmara ayô̤̌ tô̤̌ tokhlǒnu, Cǒmara gǔ sǎphlǒdû̌ asî pě dě a gǔ cî̌htò̌ asî pě. 7Pô̤̌nudě, cû̌nṳ̌ bǒsû̌ tǎ̤ kû̌ kòyò ma̤ta̤sǔ pô̤̌nu tokhlǒ tǎ̤mǎ̤ nî̌꤮.

8Sî nǎ̤běcǎ dě sî ô̌htûpwa̤ hto dǒ ta̤khǐsiwi̤ akla hǒ. Bǎbǎkǎlè khònò̤̌ sî htû Běcǎ a kòyò hǒ dě sî ô̌ dǒ ta̤lî akû hǒ. Pô̤̌nudě ô̌htûpwa̤ sô̌sô̌kû̌ lô̌khô pô̤̌ ta̤lîphû̌ tokhlǒnu nî̌꤮. 9Ma̤titèhî̌dě, ta̤lî a ta̤sǎta̤phô tokhlǒ numî̌ lǒ̤bò ta̤tôta̤bǎ, ta̤tě̤ta̤mè̤̌ kû̌ ta̤sǎphlǒ cǒtè̤ tokhlǒ nuhǒ. 10Dě kè̌shuǐ sî̌ganǎ̤ lô̌khô ta̤ dǒ atô Cǒmara asǎphlǒ nutokhlǒ nî̌꤮. 11Ta̤khǐsiwi̤ ata̤ma̤ tokhlǒnu cû̌nṳ̌ ma̤ tǎ̤mǎ̤ nî̌꤮. Asî ta̤ma̤ nutokhlǒ mî̌ abwǐsirî ô̌ tôcǒ꤮ tô̤̌. Mè̤mè̤̌tôkhônu, ta̤ hǒo tokhlǒ nî̌ a dǐsî̌ganǎ̤ bǎ kòyò kû̌ awô̌tô̤̌. 12Ta̤ma̤ dǒ kòyò ganǎ̤de kòyò Cǒmara ayô̤̌ tô̤̌ tokhlǒ dě ma̤hǔma̤û̌ ǐtûû̌ tokhlǒnu, shôbǐǐ pwǎ ata̤ma̤ awe̤akè pwǎnu tô hî̌bǎ tô̤̌. Ta̤nutokhlǒ mî̌ lǎ̤sòwò̤̌ agûlǎ̤ pwǎ. 13Kòyò phî̌htò̌lṳ̌ bò ta̤lǒ̤bò dǒ alîklanu, lǒ̤bò ta̤nu tokhlǒ, asô̌sô̌kû̌ titènu kòyò kè̌shǐ lṳ̌lîtîklî̌ bòhǒ. 14Ta̤ dǒ a dǐ kè̌shǐlṳ̌ sî̌ganǎ̤ tě̤tě̤mè̤̌mè̤̌ wô̌ kòyò mî̌ ta̤lî nô̤̌ pwǎ. Pô̤̌nudě kòyò hî̌ kû̌,

“Phahǎmôô̌shû̌, shǐnǎsô̌ mò̌, ihtǒge mò̌ dǒ ta̤si a gûlǎ̤nu. Khrǐ a ta̤lî gǔ kakhalò̤ dǒ nalô̤ pě.”

15Pô̤̌nudě, sî bǎ ô̌htûpwa̤ hî̌tènu, sè̌rè̌ lô̌khô sînǎ̤ nî̌꤮. Ô̌htûpwa̤ lô̌khô tǎ̤ pô̤̌ kòyò dǒ a gènè̤phlô gènè̤phǎ tô̤̌ nutokhlǒ tǎ̤mǎ̤ nî̌꤮. Ô̌htûpwa̤ lô̌khô pô̤̌ kòyò dǒ a gènè̤phlô gènè̤phǎ nutokhlǒ nî̌꤮. 16Bǎkhò̌tè̌꤮ bǎbǎ, bǎ na nǐ̤bǎ ta̤shěta̤khǎ wô̌ dǒ na gǔ ma̤ ta̤wô̌ akhanu, tûlû̌ ma̤ yǎ nî̌꤮, ma̤titèhî̌dě lṳlṳmṳ̌ni̤lṳmṳ̌sa khònò̤̌ tokhlǒ numî̌ lṳlṳmṳ̌ni̤lṳmṳ̌sa dǒ kòyò ma̤ ta̤phû̌mò̤̌shǐhtô tokhlǒ pwǎ. ^b 17Pô̤̌nudě ô̌ pè̌sho lô̌khô tǎ̤mǎ̤ nî̌꤮. Běcǎ sǎphlǒô̌ kwè̌꤮ hî̌tènu kè̌lǎ sî̌ya lô̌khô nî̌꤮. 18Ǎmuômupwǎ lô̌khô sînǎ̤ kû̌ shishǐkhǎ tǎ̤mǎ̤ nî̌꤮, ma̤titèhî̌dě ta̤ǎmuômupwǎnu a ma̤pî̌ kòyò ta̤ô̌htûpwa̤. Pô̤̌nudě plûnṳ̌ Yôla Plò̌shǐ Běcǎ gǔ ô̌lǒô̌be bǎ nakûnu nî̌꤮. 19Sî tôpwa̤ kû̌ tôpwa̤ sǎwǐ kè̌khî kû̌ Cǒmara alî̤ sǎwǐ tokhlǒ kû̌ lî̤sǎwǐ htû̌sò̌htò̌ nutokhlǒ nî̌꤮. Sǎwǐ lô̌khô dě sǎwǐ htû̌sò̌htò̌ lô̌khô dǒ sî sǎphlǒkûnu. ^c 20Titètè̌꤮ aya bǎbǎ, dǒ pa Běcǎ Yeshǔ Khrǐ ami̤ akhû̌akhî, tûlû̌ hî̌bwǐhî̌sîrî papha Cǒmara pṳ̂̌꤮ taplǎ nî̌꤮.

Ma kû̌ wṳ̂ tokhlǒ

21Sî bè̌dubè̌nǎ̤ Khrǐ akhû̌akhî, jûlě̤phî̌yô̤̌ kè̌khî lû̌û ayô̤̌ tôpwa̤ kû̌ tôpwa̤ nî̌꤮. 22Ma sî, pô̤̌ sî jûlě̤phî̌yô̤̌ Běcǎ ayô̤̌nu, jûlě̤phî̌yô̤̌ sî wṳ̂tokhlǒ ayô̤̌ nî̌꤮. ^d 23Ma̤titèhî̌dě, pô̤̌ Khrǐ mî̌ ta̤dòkû a ikǒnu, wṳ̂ mî̌ ma a ikǒ. Ta̤dòkû mî̌ Khrǐ anǎ̤glǒ hǒ. Pwa̤ dǒ a ma̤hǎplǎge a ta̤dòkû numî̌ ahǒ. 24Pô̤̌nudě, khònò̤̌ pô̤̌ ta̤dòkû jûlě̤phî̌yô̤̌ Khrǐ ayô̤̌nu, sî tôbǎ jûlě̤phî̌yô̤̌ sî wṳ̂ tokhlǒ ayô̤̌ dǒ ta̤lǒ̤꤮ bò akû.

25Wṳ̂ sî pô̤̌ Khrǐ mô̤ǐ a ta̤dòkû dě a ǐlò̤kè ata̤htûpwa̤ dǒ ta̤dòkû tokhlǒ ayanu, mô̤nṳ̌ lô̌khô sî ma nî̌꤮. ^e 26Pô̤̌khô a ma̤plò̌shǐ a ta̤dòkû tokhlǒnu, a sikè bǎ asîya, dě a shǔbòkè asî kû̌ shi kû̌mî̌ alě̤ayô̤̌ nuhǒ. 27Pô̤̌khô a ta̤dòkû gǔ wî̤, gǔ sara, gǔ sîrîdû̌sîrîhtû wô̌ dǒ a lô̤mô̤̌ pěnu, a tṳ̌sikhòsi bǎ asîya. Dě a sǎyṳ dǒ a ta̤dòkû, abǎ wî̌ pe tô̤̌. Bǎ sutǔ pe tô̤̌, bǎ phû̌mò̤̌ ǐ kû̌ ta̤ dǒ ashǔshawa̤ tokhlǒ tô̤̌. Mè̤mè̤̌tôkhô, a sǎyṳ dǒ a bǎ plò̌shǐ dě kòyò bǎ bè̌nṳ̌ ta̤sǔ dǒ alô̤ tô̤̌. 28Pô̤̌nudě, pô̤̌ wṳ̂ tokhlǒ mô̤ǐlò̤ tûû̌ anǎ̤glǒ nu, asî tôbǎ mô̤ǐ ama pô̤̌nu. Kòyò dǒ a mô̤ǐ amanu a mô̤ǐ tûû̌ anǎ̤hǒ. 29Kòyò sǎkhě lò̤ǐ tûû̌ anǎ̤ tôpwǎ̤꤮ tô̤̌. Mè̤mè̤̌tôkhônu, kòyò bǔǎbǔô kè̌lò̤ǐ tûû̌ anǎ̤ pṳ̂̌꤮ tôpwa̤. Khrǐ sanǎ̤ bǔǎbǔô kè̌lò̤ǐ anǎ̤glǒ dǒ amè̤̌kû̌ ta̤dòkû nutokhlǒ pô̤̌nuhǒ. 30Pa mî̌ anǎ̤glǒ ayô̤agî̌ tokhlǒ akhû̌akhî, a kè̌lò̤ǐ pa. 31Lî̤plò̌shǐkû hî̌ kû̌, “Dǒ ta̤we̤ta̤kè hǒo akhû̌akhîdě, pwa̤khû gǔ cû̌ tephekè kû̌ amǒ̤apha dě a cû̌ô̌ kû̌ ama. Dě asî sò̌ginǐ̤ nî̌ a htûhtò̌kè tôpwa̤ nô̤̌.” ^f 32Yô̤̌sǎ numî̌ adû̌ayô̤̌ dǒ kòyò sî̌yahtû tô̤̌ nuhǒ, bǎbǎkǎlè yô̤̌sǎ numî̌ a sǎyṳ hî̌ Khrǐ kû̌ a ta̤dòkû tokhlǒ pwǎ. 33Bǎbǎkǎlè, sî bǎbǎ, sî bǎ mô̤ǐlò̤ tûû̌ sîma pô̤̌ sî mô̤ǐlò̤ tûû̌ sînǎ̤nu pṳ̂̌꤮ tôpwa̤. Htodě ma bǎbǎ, a bǎ bè̌dubè̌nǎ̤ awṳ̂ pṳ̂̌꤮ tôpwa̤.