Ephesians 6

Phû̌ kû̌ mǒ̤pha tokhlǒ

1Phû̌li̤sî, sî htûhtò̌kè kû̌ Běcǎ tôcǒ꤮ nô̤̌ hǒ akhû̌akhî, ganǎ̤de lô̌khô sîmǒ̤sîpha ayô̤̌ nî̌꤮, ma̤titèhî̌dě ganǎ̤de mǒ̤phayô̤̌ mî̌ ta̤ dǒ atôabǎ. ^a 2“Bè̌dubè̌nǎ̤ lô̌khô sîmǒ̤sîpha nî̌꤮.” ^b Ta̤mǎlò̤ numî̌ Cǒmara mǎnǎ wǐ ayô̤̌ tômû dǒ a ô̌pa kû̌ ata̤olò̤ nuhǒ. 3Ata̤olò̤ numî̌ kwè̌꤮ mî̌titè hî̌dě, sî kè̌ bè̌dubè̌nǎ̤ sîmǒ̤sîpha hî̌nu, sî nǐ̤bǎ ta̤ǐshowî̤ pě. Htokhôtô̤̌ sî ô̌htûpwa̤ lṳmṳ̌salahtû dǒ hǎkhû̌nu pě. ^c

4Phasî, ma̤sǎphlǒdû̌ tǎ̤ sîphû̌ tǎ̤mǎ̤ nî̌꤮. Mè̤mè̤̌tôkhônu, bǔǎbǔô sû̌ǐtòwòǐ dû̌htò̌pwǎ̤htò̌ǐ asî kû̌ Běcǎ Cǒmara alě̤ayô̤̌nu. Htokhôtô̤̌ nè̌klè̌nè̌klò asî kû̌ Běcǎ Cǒmara sǎyṳ noma̤ pa nutokhlǒ nî̌꤮. ^d

Jû̌ kû̌ aběcǎ

5Jû̌ sî, ganǎ̤de lô̌khô sî hǎkhû̌nǎ̤khû̌ běcǎ nutokhlǒ ayô̤̌ nî̌꤮. Ǐsha asî dě bè̌dubè̌nǎ̤ asî nî̌꤮. Pô̤̌ sî ganǎ̤de Khrǐ ayô̤̌nu, ganǎ̤de lǒ̤sǔlǒ̤sò̌ asîyô̤̌ nî̌꤮. ^e 6Pô̤̌khô a gǔ htû̌sò̌htò̌ǐ sî dě sî ganǎ̤depwǎ asîyô̤̌ bǎ a ô̌pǒ̤kè̌ sî akhanu tǎ̤mǎ̤ nî̌꤮. Ma̤titèhî̌dě sî mî̌ Khrǐ ajû̌ tokhlǒ akhû̌akhî, ma̤ lǒ̤sû̌lǒ̤sò̌ bǎ asî pô̤̌ Cǒmara sǎyṳ noma̤ sî nunî̌꤮. 7Ma̤ shapwǎ̤ bǎ asî sô̌sô̌kû̌ sî ma̤ bǎ mǒkhû̌ Běcǎ ata̤ma̤nu nî̌꤮, cû̌ gènè̤ tǎ̤ kû̌ sî ma̤ bǎ hǎkhû̌ běcǎ ata̤ma̤ tokhlǒnu tǎ̤mǎ̤ nî̌꤮. 8Ma̤titèhî̌dě sî sî̌yahto kû̌, kòyò htûjû̌ tokhlǒ bǎbǎ, kòyò ô̌pili tokhlǒ bǎbǎ, kè̌ a ma̤ ta̤wô̌ hî̌dě Cǒmara ǐ a ta̤ma̤nǐ̤khû̌kǎ pě.

9Pô̤̌nudě, jû̌ běcǎ sî꤮, ma̤wô̌ lô̌khô sî jû̌ tokhlǒ pô̤̌nu nî̌꤮. Hî̌ tirǐsò̌ ǐsha tǎ̤ asî tǎ̤mǎ̤ nî̌꤮. Sî bǎbǎ, asî bǎbǎ, sî Běcǎ ô̌ pwǎ tôpwa̤ nô̤̌ dǒ mǒkhû̌ pwǎnu, sî̌ganǎ̤ tûû̌ lô̌khô nî̌꤮. ^f Sîběcǎ dǒ mǒkhû̌ numî̌, a kè̌dû̌ kè̌pî̌tî̌ bǎtô̤̌. ^g

Khûpò̌lǔ shôbǐǐ ta̤dòkûphû̌ tokhlǒ dǒ a bǎ shěpě̤ hǎkhû̌tana hî̌tè

10Dǒ nô̌kò gutṳ̌nu, he sǎyṳ hî̌ sî pô̤̌o, pô̤̌khô sî gǔshû̌gǔshohtò̌nu, phî̌ lô̌khô Běcǎ a ta̤pô̤ta̤phǎ shû̌sho nutokhlǒ nî̌꤮. A ta̤pô̤ta̤phǎ tokhlǒ numî̌ ashû̌asho jî̌jî̌. 11Sô̌sô̌kû̌ kliphû̌ tokhlǒ kûsô̌htò̌ a ta̤wè̤̌ta̤htònu, kûsô̌htò̌ bò lô̌khô ta̤wè̤̌ta̤htò dǒ Cǒmara ǐ sînu nî̌꤮. Pô̤̌khô sî gǔ ma̤tě̤tṳ̌ shěshubò̌ hǎkhû̌tana a ta̤tili̤tôlô̌ tokhlǒnu, sô̌htò̌ lô̌khô pô̤̌nu nî̌꤮. 12Ma̤titèhî̌dě, pa shěpě̤ kû̌ kòyò dǒ a ô̌ kû̌ aphěayî̌ asǔshi tokhlǒnu mè̤̌tô̤̌. Pa shěpě̤ kû̌ khînǎkhîno dǒ a pǒta̤ tokhlǒ, kû̌ khînǎ dǒ a ô̌ kû̌ a ta̤siwi̤sòwò̤ tokhlǒ kû̌ khînǎ shû̌sho dǒ a pǒ hǎkhû̌ ata̤khǐsiwi̤ nutokhlǒ, kû̌ khînǎkhîno phû̌mò̤̌ dǒ a ô̌ dǒ mǒlǎ̤ nutokhlǒ. 13Pô̤̌nudě, dǒ ta̤pò̤̌ta̤sha alṳmṳ̌ni̤ hètǒ̤ pě akhanu, pô̤̌khô sî gǔ ihtǒ tònò showô̌ pû, kǎtô̤̌ dǒ sî shěpě̤ pô̌hto pěnu, sî gǔ lò̤jû̌ tô̤̌nu dě kûsô̌htò̌bò lô̌khô Cǒmara a ta̤wè̤̌ta̤htò nutokhlǒ. 14Pô̤̌nu akhû̌akhî, ihtǒ tònò showô̌ lô̌khô sînǎ̤. È̌htò̌mò̌ Cǒmara a ta̤tě̤ta̤mè̤̌nu dǒ asô̌sô̌kû̌ sî è̌htò̌mě dǒ sî sǎtô̤̌ dǒ sè̌kònu nî̌꤮. ^h Kûsô̌htò̌ ta̤tě̤ta̤mè̤̌ ta̤cǒta̤tè̤ pô̤̌ sî kûsô̌htò̌ jetě̤htò̌ dǒ a gǔ takabǐ sînǎ̤ nunî̌. ⁱ 15Sô̌sô̌kû̌ kliphû̌ tîwî̌tòwò dò̌htò̌ nǎ lô̌khô a khò̌phě tûplû̌ dǒ a hǎhtò̌cû̌ ayanu, tîwî̌tòwò nǎ lô̌khô sînǎ̤ kû̌ ta̤sǎlě̤we̤kè dǒ a ǐ sî ta̤pè̤̌ta̤dû nunî̌. ^j 16Htokhôtô̤̌, asô̌sô̌kû̌ sî pṳ̂̌mě lǎ̤taka dǒ lǎ̤tòdòbǐ tě̤tṳ shěshunu, tûlû̌ pṳ̂̌mě ǐ wô̌ lô̌khô sî ta̤yṳ̌ta̤nǎ̤ dǒ a gǔ ma̤pǐ̤ shěshukè khînǎ mî̌u aplǎ̤ dǒ a khǎ hèbǎ sî nutokhlǒ nî̌꤮. 17Sî̌ganǎ̤ tě̤tě̤mè̤̌mè̤̌ lô̌khô ta̤ma̤hǎplǎge awe̤akè dǒ Cǒmara ma̤ bǎ hto sî dǒ asô̌sô̌kû̌ sî glû̌htò̌ khû̌glû̌tě̤htò̌ dǒ a gǔ taka tě̤tṳ bǎ sînu. Htokhôtô̤̌ pṳ̂̌měǐ Yôla Plò̌shǐ Běcǎ adòdǔ dǒ Cǒmara alě̤ayô̤̌ nunî̌. ^k 18Kwicaba Cǒmara dě kwisǎyṳ ǐ yǎ dǒ a gǔ ma̤jè̌ sî ta̤pṳ̂̌꤮ tocǒ nî̌꤮. Kwicaba lô̌khô pô̤̌ Yôla Plò̌shǐ Běcǎ nè̌klè̌nè̌klò sî pṳ̂̌꤮ taplǎ nî̌꤮. Dě bǎ sî kwicaba pô̤̌nu akha, ô̌sòklò dě sè̌rè̌ lô̌khô sînǎ̤ nî̌꤮. Kwicaba nṳ̌pa dô̌ pû bò̌bò Cǒmara a kòyò nutokhlǒ pṳ̂̌꤮ taplǎ nî̌꤮.

19Pô̤̌khô Cǒmara gǔ nohî̌bǎ he ayô̤̌ dǒ a tô hî̌bǎ nutokhlǒ ayanudě, bǎ he glè̌ sahtò̌ hî̌ bǎ kòyò akha, kwicaba padô̌ heya nî̌꤮. Htokhôtô̤̌ pô̤̌khô he gǔ shôbǐǐlṳ̌ khukhu bǎ kòyò kû̌ Cǒmara a ta̤sǎlě̤we̤kè dǒ a ô̌hǔô̌û̌ yî̤gîpî̤ hǒ ayanu, kwicaba ǐ pô̤̌ padô̌ heya nî̌꤮. 20Dǒ Khrǐ rû̌htò̌ he kû̌ a pwa̤shôbǐǐ ta̤we̤ta̤kè tôpwa̤ dǒ he gǔ shôbǐǐlṳ̌ bǎ kòyò kû̌ ta̤sǎlě̤we̤kènu akhû̌akhî, khònò̤̌ he lò̤tě̤ dǒ apô̤kû hǒ. Ta̤ dǒ he tôbǎ shôbǐǐ bǎ kòyò tokhlǒnu, pô̤̌khô he gǔ shôbǐǐ khukhu bǎ kòyò ayanudě, kwicaba pû bǎ heya nî̌꤮.

Khûpò̌lǔ a ta̤hî̌mô̤hî̌wô̌ dǒ nô̌kò gutṳ̌

21Khûtǔkǐkǔ mî̌ pa pṳ̌wè̤̌ dǒ pa mô̤ǐ jî̌ yǎ tôpwa̤, htokhôtô̤̌ a mî̌ pṳ̌wè̤̌ dǒ acǒ kû̌ Běcǎ ta̤ma̤. Pô̤̌khô sî gǔ sî̌ganǎ̤ kû̌ he ô̌shû̌ô̌mô̤ ya, ô̌ mô̤ tô̤̌ ya, htokhôtô̤̌ he ma̤kwè̌ titènu, a gǔ hè shôbǐǐlṳ̌ bǎ bò sî pě. ^l 22Ta̤we̤ta̤kè a kòshî̌gutṳ̌ dǒ he sǎyṳ sûhè a dǒ sîô̌ numî̌, pô̤̌khô sî gǔ sî̌ganǎ̤ kû̌ pa ô̌shû̌ô̌mô̤ ya, mî̌ ô̌ mô̤ tô̤̌ yanu, htokhôtô̤̌ pô̤̌khô a gǔ hè ǐshû̌ǐshò̌htò̌ bǎ sî sǎphlǒ aya pwǎ.

23Pha Cǒmara kû̌ pa Běcǎ Yeshǔ Khrǐ ǐ pû pṳ̌wè̤̌ Khrǐphû̌ tokhlǒ kû̌ ta̤pè̤̌ta̤dû, ta̤mô̤ǐ kè̌khî tôpwa̤ kû̌ tôpwa̤, kû̌ ta̤yṳ̌ǎ Khrǐ nutokhlǒ nî̌꤮. 24Cǒmara dǔlè̌lṳ̌ pû bǎ abwǐsîrî kû̌ kòyò dǒ a mô̤nṳ̌ Běcǎ Yeshǔ Khrǐ nutokhlǒ kû̌mî̌ ata̤mô̤ dǒ agutṳ̌ jòtô̤̌ nunî̌꤮.