Galatians 2
Khûpò̌lǔ kû̌ pwa̤nophû̌ dǒ ashǔshawa̤ tokhlǒ
1Dǒ nô̌kò shǐlǐ̤ně htonu he kû̌ Khûbanabǎ getîkhî sô̌ dǒ Wî̤̌yarǔshôle dě he kaǎgenṳ̌ pô̤̌ kû̌ Khûtǐtǔ. a 2Cǒmara dǐlè̌lṳ̌htò̌ he kû̌ he tôbǎ cû̌ bǎnu akhû̌akhîdě, he cû̌ pwǎ. Bǎ he ô̌ bǎnu akha, he kè̌shǐ kû̌ ta̤ dǒ kòyò bè̌ asî kû̌ ta̤dòkû ikǒlǒkòdû̌ tokhlǒ dě he shôbǐǐphlô bǎ asî kû̌ ta̤sǎlě̤we̤kè pô̤̌ he shôbǐǐlṳ̌ bǎ kòyò pṳ̂̌꤮ plǎ dǒ Yǔdaphû̌ mè̤̌tô̤̌ tokhlǒ akla nupwǎ. He ta̤shôbǐǐlṳ̌ dǒ a tûlû̌kè htonu tokhlǒ bǎbǎ, khònò̤̌ tokhlǒnu bǎbǎ, he sǎyṳ nohtûhtò̌ tṳ̌dè yǎtô̤̌. 3Khûtǐtǔ dǒ a ô̌cu kû̌ he hǒtôpwa̤ numî̌ khlilèphû̌ ashǔshawa̤ Grěphû̌ tôpwa̤ bǎbǎkǎlè ta̤dǔtṳ̌běnu, kòyò noshû̌ nô̌ a tôpwǎ̤꤮ tô̤̌. 4Bǎbǎkǎlè Khûtǐtǔnu kòyò tokhlǒkhlǒ a sǎyṳ nodǔtṳ̌bě. Asî nutokhlǒ mî̌ kòyò dǒ a jî̌lòhô anǎ̤ pô̤̌ pṳ̌wè̤̌ nutokhlǒ pwǎ. Pô̤̌khô asî gǔ nṳ̌kè̌lǎ hǔ pa nǐ̤bǎ hto ta̤pi̤li̤ dǒ Yeshǔ Khrǐ akû hǒnudě asî hènṳ̌hǔ dǒ pakla pwǎ. Dě asî sǎyṳ nohtûhtò̌ pa kû̌ Yǔdaphû̌ tokhlǒ a ta̤mǎlò̤ ajû̌ pwǎ. 5Bǎbǎkǎlè pô̤̌khô ta̤sǎlě̤we̤kè acǒatè̤nu akô ô̌měô̌gle dǒ sîkû ayanudě, pa bǎ ganǎ̤de gû̌ kû̌ asî ta̤hî̌bǎ tîkî̌꤮ tô̤̌. 6Dě ta̤ dǒ kòyò nohtû asî kû̌ ikǒlǒkòdû̌ dǒ ta̤dòkû akû tokhlǒ numî̌, a no shû̌nṳ̌lǒ shû̌nṳ̌khlo pô̤̌ kû̌ he ta̤shôbiǐlṳ̌ nutokhlǒ tôcǒ꤮ tô̤̌. Kòyò hî̌ kû̌ asî mî̌ ikǒlǒkòdû̌ dǒ ami̤lṳ̌dû̌ tokhlǒ bǎbǎkǎlè he sî̌ganǎ̤ kû̌ Cǒmaranu a kè̌dû̌ kè̌pî̌tî̌ nô̌ kòyò tôpwǎ̤꤮ tô̤̌. b 7Kòyò htû ikǒlǒkòdû̌ nutokhlǒ hî̌lǒ hî̌khlo kû̌ he ta̤shôbiǐlṳ̌ tôcǒ꤮ tô̤̌. A hî̌ tèpè̤̌꤮ pe he kû̌, asî kè̌shǐ dǒ Cǒmara ǐ he ta̤phǐta̤ma̤ dǒ he gǔ cû̌ shôbǐǐlṳ̌ bǎ kòyò kû̌ ta̤sǎlě̤we̤kè dǒ Yǔdaphû̌ mè̤̌tô̤̌ tokhlǒ a ô̌ pô̤̌ a ǐlò̤ hto Khûpetarǔ ta̤ma̤ mî̌ ta̤ma̤ dǒ a bǎ shôbǐǐlṳ̌ bǎ kòyò ta̤sǎlě̤we̤kè dǒ Yǔdaphû̌ tokhlǒ akla nuhǒ. 8Ma̤titèhî̌dě Cǒmara ǐlò̤ tutṳ̌ a ta̤pô̤ta̤pwǎ̤ kû̌ Khûpetarǔ dǒ a gǔ ma̤ ta̤ma̤ pô̤̌ pwa̤nophû̌ tôpwa̤nu dǒ Yǔdaphû̌ tokhlǒ ayahǒ. A sô̌sô̌ pô̤̌nudě Cǒmara ǐlò̤ tutṳ̌ he kû̌ he gǔ ma̤pô̤̌ pwa̤nophû̌ tôpwa̤nu dǒ Yǔdaphû̌ mè̤̌tô̤̌ tokhlǒ aya hǒhǒ. 9Khûya̤kû kû̌ Khûpetarǔ kû̌ Khûyṳ̂ha dǒ kòyò bè̌ asî kû̌ ikǒlǒkòdû̌ tokhlǒnu, a sî̌yaphlô lô̌khô kû̌ ta̤bwǐta̤sîrî numî̌ Cǒmara ǐ he pwǎ, a kè̌shǐ lô̌khô pô̤̌nu. Dǒ ta̤hǒo akhû̌akhî, asî kè̌shǐ kû̌ Khûbanabǎ kû̌ he numî̌ pwa̤ma̤wô̤̌wô̌ ata̤ kû̌ asînu pwǎ. Asî sǎphlǒsǔshi bǎ kû̌ pa gǔ ma̤ta̤ dǒ Yǔdaphû̌ mè̤̌tô̤̌ tokhlǒ aklahǒ. Dě asî gǔ ma̤ dǒ Yǔdaphû̌ tokhlǒ akla pô̤̌nu pwǎ. 10Tǒ̤ ta̤tôcǒ dǒ asî sǎyṳ noma̤ pa numî̌, mè̤̌pwǎtǒ̤ pa gǔ shôpě̤ ma̤jè̌ tǎ̤ kòyò hǎwǐ̤shèwè̤ tokhlǒ tǎ̤mǎ̤ nupwǎ. Hǒnumî̌ ta̤tôcǒ dǒ he sǎphlǒshû̌ ma̤ nupwǎ.Khûpò̌lǔ sû̌ǐ Khûpetarǔ dǒ Wî̤̌ataò̌ akû
11Bǎbǎkǎlè bǎ Khûpetarǔ ô̌ dǒ Wî̤̌ataò̌ akhanu, a ma̤tô ta̤tô̤̌ akhû̌akhî, he hî̌ a dǒ kòyò yṳ̌ǎ Khrǐ tokhlǒ a lô̤mô̤̌. 12Ma̤titèhî̌dě bǎ Khûya̤kû nohè a kòyò Yǔdaphû̌ dǒ a yṳ̌nǐ̤nǎ̤nǐ̤ta̤ tokhlǒ hètǒ̤ khôtô̤̌ akhanu, Khûpetarǔ ǎcuôcu kû̌ Yǔdaphû̌ mè̤̌tô̤̌ dǒ a yṳ̌nǐ̤nǎ̤nǐ̤ Khrǐ tokhlǒ. A ǎcuôcu pô̤̌numî̌ atô pwǎ. Bǎbǎkǎlè dǒ nô̌kò, bǎ Khûya̤kû nohè a kòyò nutokhlǒ hètǒ̤ akhanu, a sǒcû̌ tephe cû̌kè dě a ǎcuôcu pe kû̌ asî nutokhlǒ tô̤̌, ma̤titèhî̌dě Khûya̤kû a khô Yǔdaphû̌ tokhlǒnu, a sǎyṳ kû̌ Yǔdaphû̌ mè̤̌tô̤̌ tokhlǒ gǔ dǔtṳ̌bě akhû̌akhî, a ǐsha asîlǎ̤ dě a sǒcû̌ tephe cû̌kè pwǎ. 13Yǔdaphû̌ dǒ a yṳ̌ǎ Khrǐ dǒ ashǔshawa̤ tokhlǒnu, a sî̌ganǎ̤ kû̌ Khûpetarǔ ma̤ numî̌ a tôtô̤̌, bǎbǎkǎlè a gû̌ma̤ pô̤̌ Khûpetarǔ ma̤nu. Khûbanabǎ gû̌ma̤ pô̤̌ asî jî̌khô̌jî̌yò ma̤nu hǒ. 14Bǎ he kè̌shǐ dǒ asî cû̌tephe kû̌ ta̤sǎlě̤we̤kè a ta̤tě̤ta̤mè̤̌ aklè̌aklò tô̤̌ akhanu, he hî̌ Khûpetarǔ dǒ asî lô̤mô̤̌ kû̌, “Na mî̌ Yǔdaphû̌ tôpwa̤ bǎbǎkǎlè na ô̌htûpwa̤ pô̤̌ Yǔdaphû̌ mè̤̌tô̤̌ tôpwa̤ numî̌ anǐ̤ hǒ. Pô̤̌ Yǔdaphû̌ tôpwa̤ alǎ̤klô ma̤nu, na tô lǎ̤lṳ̂ ma̤ petô̤̌, ma̤titèhî̌dě khònò̤̌ na yṳ̌ǎ hto Khrǐ hǒ. Ma̤pô̤̌nudě khònò̤̌ na cû̌ noshû̌ Yǔdaphû̌ mè̤̌tô̤̌ dǒ a yṳ̌ǎ Khrǐ tokhlǒ kû̌ a gǔ ma̤pô̤̌ Yǔdaphû̌ alǎ̤klô numî̌ anǐ̤ ya?”Yǔdaphû̌ kû̌ Yǔdaphû̌ mè̤̌tô̤̌ tokhlǒ a ta̤yṳ̌ta̤nǎ̤ akhû̌khî, asî nǐ̤bǎ ta̤ma̤hǎplǎge
15He hî̌ hèpô̤̌ Khûpetarǔ kû̌, “Pa dě pa ô̌phijǎlò̤ pô̤̌ Yǔdaphû̌ dǒ a sî̌ganǎ̤ Cǒmara a ta̤mǎlò̤ nutokhlǒ. Pa mî̌ asô̌sô̌kû̌ Yǔdaphû̌ mè̤̌tô̤̌ dǒ a sî̌ganǎ̤ gû̌ kòyò ta̤mǎlò̤ tô̤̌ nutokhlǒ mè̤̌tô̤̌. Htodě kòyò pô̤̌nu tokhlǒ mî̌ pa kaǎ asî kû̌ pwa̤ma̤sǔphû̌. 16Bǎbǎkǎlè pa Yǔdaphû̌ dǒ a yṳ̌ǎ Khrǐ nutokhlǒ numî̌, pa sî̌ganǎ̤ kû̌ Cǒmara bè̌cǒbè̌tè̤ kòyò tôpwa̤numî̌ a bè̌cǒbè̌tè̤ lû̌û kû̌ a gû̌ma̤ ta̤sû̌ta̤tòwò akhanu mè̤̌tô̤̌. Mè̤̌pwǎ tǒ̤ a yṳ̌nǐ̤nǎ̤nǐ̤ Yeshǔ Khrǐnu pwǎ. Pa tokhlǒnu bǎbǎ, pô̤̌khô Cǒmara gǔ bè̌cǒbè̌tè̤ pa kû̌ pa ta̤yṳ̌ta̤nǎ̤ Khrǐ akhû̌khî nudě, pa yṳ̌nǐ̤nǎ̤nǐ̤ Yeshǔ Khrǐ hǒ. Mè̤̌pwǎ dǒ pa gû̌ma̤ ta̤sû̌ta̤tòwò akhanu mè̤̌tô̤̌, ma̤titèhî̌dě dǒ kòyò gû̌ ma̤bò̌ ta̤sû̌ta̤tòwò akò dě kòyò htûhtò̌bò̌ kòyòcǒ kòyòtè̤nu a ô̌ tôpwǎ̤ tô̤̌. c 17“Bǎ pa jî̌pwǐ̤ kè̌lǎ kû̌ Cǒmara gǔ bè̌cǒbè̌tè̤ pa dǒ Khrǐ khû̌khî akhanu, kòyò kè̌shǐ pwǎ pa pô̤̌ pa htû pwa̤ma̤sǔphû̌ sô̌sô̌kû̌ Yǔdaphû̌ mè̤̌tô̤̌ nutokhlǒ pwǎ. Kè̌ a htûpwa̤ pô̤̌nupwǎ hî̌dě, Khrǐ mî̌ pwa̤ dǒ a noshû̌ pa kû̌ pa bǎ ma̤ta̤sǔ pô̤̌nu ya? A noshû̌ pa pô̤̌nu mè̤̌tô̤̌. 18Bǎbǎkǎlè kè̌ he hî̌ tèplè̌kè gesô̌ heta̤hî̌bǎ kû̌ Cǒmara bè̌cǒbè̌tè̤ kòyò dǒ a gû̌ma̤ ta̤mǎlò̤ nutokhlǒ pwǎ kè̌hî̌dě he gǔ htû pepwǎ pwa̤ma̤sǔphû̌ tôpwa̤ pwǎ. 19Bǎ he jî̌pwǐ̤ gû̌ma̤ kû̌ ta̤sû̌ta̤tòwò akhanu, he lṳ̂ ma̤tô bò̌jò Cǒmara asǎphlǒ tôkhò̌꤮ tô̤̌. Pô̤̌nudě pô̤̌khô he gǔ ô̌htûpwa̤bò̌ bǎ Cǒmara ayanudě, he sikè dǒ ta̤sû̌ta̤tòwò akû hǒ. ▼▼he sikè dǒ ta̤sû̌ta̤tòwò akûnu yô̤̌mûyô̤̌sǎ mî̌ he ô̌pe dǒ ta̤sû̌ta̤tòwò a ta̤pǒalǎ̤ tô̤̌ hǒ.
20Hǒnumî̌ a sô̌sô̌ kû̌ he si kû̌ Khrǐ dǒ nò̌dò̌htǔ alô̤ hǒ. He ô̌htûpwa̤ mè̤̌petô̤̌ bǎbǎkǎlè Khrǐ ô̌htûpwa̤ dǒ hekû hǒ. Ta̤ô̌htûpwa̤ dǒ he ô̌htûpwa̤ khònò̤̌ numî̌ mè̤̌pwǎ he ô̌htûpwa̤ dǒ ta̤yṳ̌ǎ Cǒmara aphû̌khû dǒ a mô̤nṳ̌ he dě a ǐlò̤kè a ta̤htûpwa̤ dǒ heyanu tôpwa̤ akhû̌khî pwǎ. 21He wîkè Cǒmara abwǐsîrî tô̤̌, ma̤titèhî̌dě kòyò tôpwa̤pwa̤ kè̌ htûhtò̌ bò̌jò kòyòcǒ kòyòtè̤ kû̌ gû̌ma̤ ta̤sû̌ta̤tòwò akò pwǎ kè̌hî̌dě, Khrǐ tṳ̌sikhòsi anǎ̤ numî̌ a tônô̤̌ bòkè hǒ.”
Copyright information for
KxfSCKXF